विमाननगर, चंदननगर, वडगाव शेरी व खराडी परिसरातील विविध मंडळांना सदिच्छा भेट
पुणे-
पुणे शहराच्या सांस्कृतिक आणि सामाजिक परंपरेचा अविभाज्य भाग असलेल्या गणेशोत्सवाच्या चौथ्या दिवशी महापौर मंजुषा नागपुरे यांनी विमाननगर, चंदननगर,
वडगाव शेरी आणि खराडी येरवडा परिसरातील विविध सार्वजनिक गणेशोत्सव मंडळांना सदिच्छा भेट देत श्री गणरायाचे दर्शन घेतले. यावेळी गणरायाची आरती व मनोभावे दर्शन करून पुणेकरांच्या सुख, समृद्धी, उत्तम आरोग्य आणि शहराच्या सर्वांगीण विकासासाठी प्रार्थना करण्यात आली.
या भेटीदरम्यान महापौर मंजुषा नागपुरे यांनी मंडळांचे पदाधिकारी, कार्यकर्ते आणि स्थानिक नागरिकांशी संवाद साधत गणेशोत्सवाच्या आयोजनाबाबत माहिती घेतली. उत्सव काळातील स्वच्छता, नागरी सुविधा, वाहतूक व्यवस्था, सुरक्षितता आणि कायदा-सुव्यवस्था याबाबतही चर्चा करण्यात आली. सामाजिक प्रबोधन, जनजागृती तसेच विविध समाजोपयोगी उपक्रमांच्या माध्यमातून गणेशोत्सवाला विधायक स्वरूप देणाऱ्या मंडळांच्या कार्याचे महापौरांनी कौतुक केले.
पुण्याचा सार्वजनिक गणेशोत्सव हा केवळ धार्मिक उत्सव नसून सामाजिक एकोपा, लोकसहभाग आणि सामाजिक बांधिलकीची समृद्ध परंपरा जपणारा उत्सव आहे. मंडळांनी पर्यावरणपूरक उत्सव, सामाजिक प्रबोधन आणि जनकल्याणाच्या उपक्रमांना प्राधान्य देत पुण्याच्या गणेशोत्सवाची वैभवशाली परंपरा अधिक समृद्ध करावी, असे आवाहन महापौर मंजुषा नागपुरे यांनी यावेळी केले.
