पोलीस आयुक्तांच्या आदेशाचे उल्लंघन; खडक पोलिसांनी २४ तासांत दोषारोपपत्र दाखल केले
पुणे : पुणे शहर पोलीस आयुक्तांनी जाहीर केलेल्या आदेशाचे उल्लंघन करून मिरवणुकीत मर्यादेपेक्षा जास्त आवाजात डीजे साऊंड सिस्टीम वाजवल्याप्रकरणी मंडळाचे अध्यक्ष, उपाध्यक्ष आणि साऊंड सिस्टीम मालकाला न्यायालयाने दोषी ठरवत शिक्षा सुनावली आहे. खडक पोलीस ठाण्याच्या हद्दीत घडलेल्या या प्रकरणात पोलिसांनी वेगाने कारवाई करत २४ तासांच्या आत दोषारोपपत्र न्यायालयात दाखल केले होते.
२६ ऑगस्ट २०२६ रोजी आयोजित जुलूस आणि मिरवणुकांमध्ये डीजे साऊंड सिस्टीम, लेझर लाईट आणि फटाक्यांचा वापर न करण्याबाबत पुणे शहर पोलीस आयुक्तांनी आदेश जारी केले होते. या आदेशांचे उल्लंघन करणाऱ्या मंडळांच्या पदाधिकाऱ्यांवर तसेच साऊंड चालक-मालकांवर कायदेशीर कारवाई करण्याच्या सूचनाही पोलिसांना देण्यात आल्या होत्या.
खडक पोलीस ठाण्याच्या हद्दीतील अल मदिना यंग बॉईज, ५४ बीपी, लोहियानगर या मंडळाने मिरवणुकीदरम्यान साऊंड सिस्टीमचा वापर केल्याचे पोलिसांच्या निदर्शनास आले. मंडळाचे अध्यक्ष वाहिद कासम मणियार, उपाध्यक्ष जावेद मजीद शेख आणि साऊंड सिस्टीम ऑपरेटर-मालक प्रकाश कृष्णात असवले यांच्याविरोधात कारवाई करण्यात आली.
पोलिसांनी यापूर्वी संबंधितांना मर्यादेपेक्षा जास्त आवाजात साऊंड सिस्टीम वाजवू नये, याबाबत लेखी सूचना दिल्या होत्या. भारतीय नागरिक सुरक्षा संहितेच्या कलम १६८ नुसार नोटीसही बजावण्यात आली होती. वारंवार सूचना देऊनही आदेशाचे उल्लंघन करत मोठ्या आवाजात गाणी वाजवून नागरिकांना त्रास दिल्याचे पोलिसांनी म्हटले आहे.
याप्रकरणी खडक पोलिसांनी सरकारतर्फे फिर्यादी होऊन भारतीय न्याय संहितेच्या कलम २२३ आणि २९२ अंतर्गत गुन्हा दाखल केला. त्यानंतर तिघांविरुद्ध कारवाई करून शिवाजीनगर येथील प्रथमवर्ग न्यायदंडाधिकारी न्यायालय क्रमांक ६ मध्ये २४ तासांच्या आत दोषारोपपत्र दाखल करण्यात आले.
न्यायालयाने ३ सप्टेंबर २०२६ रोजी मंडळाचे अध्यक्ष वाहिद मणियार, उपाध्यक्ष जावेद शेख आणि साऊंड सिस्टीम मालक प्रकाश असवले यांना संबंधित कलमांनुसार दोषी ठरवून शिक्षा सुनावली, अशी माहिती खडक पोलिसांनी दिली आहे.पोलिसांच्या प्रेस नोटमध्ये मात्र शिक्षेचे नेमके स्वरूप किंवा दंडाची रक्कम नमूद केलेली नाही.
ही कारवाई पोलीस आयुक्त अमितेश कुमार, पोलीस सहआयुक्त संजय दराडे, अपर पोलीस आयुक्त राजेश बनसोडे यांच्यासह वरिष्ठ अधिकाऱ्यांच्या मार्गदर्शनाखाली खडक पोलीस ठाण्याच्या पथकाने केली.
