हॉलिवूड नगरीत मराठी अस्मितेचा झंझावात; ५ मराठी चित्रपटांचे प्रीमिअर, ११ शॉर्टफिल्म्सचे स्क्रीनिंग
सॅन होजे, कॅलिफोर्निया (शरद लोणकर) : महाराष्ट्र शासनाच्या सहकार्याने ७ ते ९ ऑगस्टदरम्यान सॅन होजे येथे आयोजित करण्यात आलेल्या नॉर्थ अमेरिकन फिल्म असोसिएशन (NAFA) मराठी फिल्म फेस्टिव्हल २०२६चा तीन दिवसांचा दिमाखदार सोहळा उत्साहपूर्ण वातावरणात पार पडला. अमेरिकेतील भारतीय आणि मराठी रसिकांनी दिलेल्या उत्स्फूर्त प्रतिसादामुळे हा महोत्सव मराठी भाषा, संस्कृती, कला आणि चित्रपटांचा जागतिक जल्लोष ठरला.
हॉलिवूडच्या प्रभावक्षेत्रात मराठी सिनेमाचा झेंडा फडकवणाऱ्या या महोत्सवात ५ मराठी चित्रपटांचे प्रीमिअर आणि ११ पुरस्कारप्राप्त शॉर्टफिल्म्सचे विशेष स्क्रीनिंग करण्यात आले. चित्रपट प्रदर्शनाबरोबरच कलाकारांशी थेट संवाद, अनुभवकथन, चर्चासत्रे, कार्यशाळा आणि विशेष सत्रांनी महोत्सवाला वेगळी उंची मिळाली.
‘नाफा’ म्हणजे मराठी अस्मितेचा जागतिक सेतू
नाफाचे संस्थापक-अध्यक्ष अभिजित घोलप यांनी या महोत्सवाला मिळालेल्या प्रतिसादाबद्दल समाधान व्यक्त करताना सांगितले की, हा महोत्सव केवळ चित्रपटांचा उत्सव नसून अमेरिकेच्या भूमीवर मराठी भाषा, संस्कृती, कला आणि आपल्या मातीशी नाते सांगणाऱ्या भावनांचा जागर आहे. महाराष्ट्र शासनाच्या सहकार्यामुळे या उपक्रमाला यंदा अधिक व्यापक स्वरूप प्राप्त झाल्याचे त्यांनी नमूद केले.
त्यांच्या मते, अमेरिकेतील मराठी रसिकांचा प्रचंड प्रतिसाद आणि महाराष्ट्रातून आलेल्या कलाकारांचा उत्साहपूर्ण सहभाग हीच नाफाच्या वाटचालीतील खरी ताकद आहे. मराठी सिनेमा जगाच्या कानाकोपऱ्यात पोहोचवणे आणि नव्या पिढीला आपल्या भाषा-संस्कृतीशी जोडणे हेच नाफाचे पुढील ध्येय असल्याचेही त्यांनी स्पष्ट केले.
रेड कार्पेटवर मराठी तारकांचा ‘ग्लोबल स्वॅग’
महोत्सवाची सुरुवात दिमाखदार रेड कार्पेट सोहळ्याने झाली. रोहिणी हट्टंगडी, महेश कोठारे, अतुल कुलकर्णी, नागराज मंजुळे, अजिंक्य देव, प्रसाद ओक, गिरीजा ओक, श्रुती मराठे, अर्चना जोगळेकर, तृप्ती भोईर, सई देवधर, मंजिरी ओक आणि गार्गी कुलकर्णी यांसह अनेक मान्यवर कलाकारांच्या उपस्थितीने या सोहळ्याची रंगत वाढली. महाराष्ट्रीय परंपरा आणि आधुनिक जागतिक शैलीचा अनोखा मिलाफ या उपस्थितीत पाहायला मिळाला.
रोहिणी हट्टंगडींना ‘नाफा जीवन गौरव’
महोत्सवातील अत्यंत भावनिक क्षण म्हणजे ज्येष्ठ अभिनेत्री रोहिणी हट्टंगडी यांना प्रदान करण्यात आलेला ‘नाफा जीवन गौरव’ पुरस्कार. हा सन्मान स्वीकारताना त्यांनी, “जीवन गौरव हा प्रवासाचा शेवट नाही; मला अजून खूप काम करायचे आहे. भारताबाहेर मिळालेला हा माझा पहिलाच पुरस्कार असल्यामुळे हा सन्मान माझ्यासाठी विशेष आहे,” अशी भावना व्यक्त केली.
दिग्दर्शक-कलाकारांच्या संवादांना उत्स्फूर्त प्रतिसाद
ज्येष्ठ अभिनेते-दिग्दर्शक महेश कोठारे यांनी मराठी सिनेमाच्या आठवणींपासून ते नव्या पिढीच्या स्वप्नांपर्यंतचा प्रवास रसिकांसमोर उलगडला. नागराज मंजुळे यांनी आपल्या मातीतील आणि सामान्य माणसांच्या कथा जगाच्या कुठल्याही कोपऱ्यातील प्रेक्षकांच्या मनाला भिडू शकतात, असा विश्वास व्यक्त केला.
अजिंक्य देव यांनी बदलत्या जागतिक माध्यमविश्वामुळे मराठी कलाकारांसमोर नव्या संधी उपलब्ध झाल्याचे सांगितले, तर प्रसाद ओक यांनी परदेशातील मराठी प्रेक्षकांचे आपल्या सिनेमाशी असलेले नाते हीच मराठी कलाविश्वाची खरी ताकद असल्याचे नमूद केले. गिरीजा ओक यांनी नाफासारख्या व्यासपीठामुळे कलाकार आणि प्रेक्षकांमधील अंतर कमी होत असल्याचे सांगितले, तर श्रुती मराठे यांनी मराठी कथा आणि कलाकारांना मिळत असलेल्या जागतिक व्यासपीठाचे महत्त्व अधोरेखित केले.
मास्टरक्लासेस, कार्यशाळा आणि विविधांगी उपक्रम
चित्रपट आणि शॉर्टफिल्म्सच्या प्रदर्शनाबरोबरच या महोत्सवात सेलिब्रिटी मास्टरक्लासेस, Meet & Greet, अर्चना जोगळेकर यांची कार्यशाळा, अतुल कुलकर्णी यांचा मायक्रो-ड्रामा निर्मात्यांशी संवाद तसेच दिग्दर्शकांचा विशेष ‘Directors’ Grid’ असे विविध कार्यक्रम पार पडले. निवड झालेल्या मायक्रो-ड्रामा आणि शॉर्टफिल्म्सना पारितोषिकांनी गौरविण्यात आले. एकूण आठ पुरस्कार विविध विभागांमध्ये प्रदान करण्यात आल्याने स्पर्धात्मक विभागालाही विशेष महत्त्व प्राप्त झाले.
मुख्यमंत्री देवेंद्र फडणवीस यांच्या शुभेच्छांनी वाढले बळ
महाराष्ट्राचे मुख्यमंत्री देवेंद्र फडणवीस यांनीही या महोत्सवाला शुभेच्छा दिल्या. महाराष्ट्र शासनाच्या सहकार्यामुळे अमेरिकेच्या भूमीवर मराठी भाषा, कला, संस्कृती आणि चित्रपटांचा जागतिक जागर घडविणाऱ्या या उपक्रमाला विशेष बळ मिळाल्याचे आयोजकांनी नमूद केले.
‘नाफा’ आता अमेरिकेतील मराठी समाजाचा सांस्कृतिक उत्सव
California Theatreमध्ये उमटलेला टाळ्यांचा कडकडाट, कलाकारांभोवतीची गर्दी, चित्रपटांवरील चर्चा आणि प्रेक्षकांच्या चेहऱ्यावरील समाधान यामुळे तिसरा नाफा महोत्सव संस्मरणीय ठरला. पुढील वर्षी हा महोत्सव अधिक भव्य आणि व्यापक स्वरूपात आयोजित केला जाईल, अशी घोषणा सांगता समारंभात करण्यात आली.
मराठी सिनेमा आता केवळ महाराष्ट्रापुरता मर्यादित राहिलेला नाही; तो जगभरातील मराठी मनांचा अभिमान बनत असल्याचे चित्र ‘नाफा मराठी चित्रपट महोत्सव २०२६’मधून ठळकपणे समोर आले.
