एक मीटरपर्यंत त्सुनामीचा इशारा नंतर मागे; हजारो घरांचा वीजपुरवठा खंडित, रेल्वे आणि विमानसेवा विस्कळीत
टोकियो : जपानच्या दक्षिणेकडील क्युशू बेटावरील कुमामोटो प्रांताला मंगळवारी ७.१ तीव्रतेच्या शक्तिशाली भूकंपाचा धक्का बसला. जपान हवामानशास्त्र संस्थेने सुरुवातीला भूकंपाची तीव्रता ७.१ नोंदवली असून, त्याचे केंद्र जमिनीखाली सुमारे १० किलोमीटर खोलीवर होते. अमेरिकेच्या भूगर्भ सर्वेक्षण संस्थेने मात्र नंतर तीव्रता ६.८ अशी सुधारित केली.
भूकंपानंतर अरियाके आणि यात्सुशिरो समुद्राच्या किनारपट्टीसाठी एक मीटरपर्यंतच्या त्सुनामी लाटांचा इशारा जारी करण्यात आला होता. किनारपट्टीवरील नागरिकांना सुरक्षित ठिकाणी जाण्याच्या सूचना देण्यात आल्या. मात्र कोणतीही त्सुनामी नोंदवली न गेल्याने हा इशारा सुमारे दोन तासांनी मागे घेण्यात आला.
किमान ५० जण जखमी
भूकंपामुळे किमान ५० जण जखमी झाल्याचे प्राथमिक वृत्त आहे. काही इमारतींची पडझड झाली असून, अनेक ठिकाणी आग लागण्याच्या घटना घडल्या. रस्ते आणि पुलांचे नुकसान झाले असून, महामार्गांवर मोठ्या भेगा पडल्या आहेत. कुमामोटोमधील एका रुग्णालयात ५० हून अधिक जखमींवर उपचार सुरू असल्याचे वृत्त आहे.
कुमामोटो शहरातील ऐतिहासिक किल्ल्याच्या दगडी तटबंदीचा काही भागही कोसळला. अधिकाऱ्यांकडून इमारती, रस्ते आणि सार्वजनिक सुविधांच्या नुकसानीचे मूल्यांकन सुरू आहे.
सुमारे ४० हजार घरांचा वीजपुरवठा बंद
क्युशू इलेक्ट्रिक पॉवर कंपनीच्या माहितीनुसार, भूकंपानंतर सुमारे ४० हजार घरांचा वीजपुरवठा खंडित झाला. वीजपुरवठा पूर्ववत करण्यासाठी पथके कार्यरत आहेत. नागरिकांनी तुटलेल्या किंवा जमिनीवर पडलेल्या वीजवाहिन्यांना स्पर्श करू नये, असे आवाहन प्रशासनाने केले आहे.
दीड लाख नागरिकांना स्थलांतराच्या सूचना
जपानच्या आपत्ती व्यवस्थापन विभागाने एक लाख ५० हजारांहून अधिक नागरिकांना सुरक्षित निवारा केंद्रांमध्ये जाण्याच्या सूचना दिल्या. कुमामोटो, नागासाकी, कागोशिमा, फुकुओका, सागा, ओइता आणि मियाझाकी या प्रांतांसाठी आपत्कालीन भूकंप इशारे जारी करण्यात आले.
बुलेट ट्रेन आणि विमानसेवा बंद
सुरक्षेच्या तपासणीसाठी क्युशू भागातील शिंकान्सेन बुलेट ट्रेनसह अनेक रेल्वे सेवा तात्पुरत्या स्थगित करण्यात आल्या. कुमामोटो विमानतळाची धावपट्टीही बंद करण्यात आली असून, अनेक विमानांची उड्डाणे रद्द किंवा अन्य विमानतळांकडे वळवण्यात आली. एका मालगाडीचे डबे रुळावरून घसरल्याचेही वृत्त आहे.
परिसरातील अणुऊर्जा प्रकल्पांमध्ये कोणतीही असामान्य स्थिती आढळलेली नसल्याचे जपानच्या अणुनियमन प्राधिकरणाने स्पष्ट केले आहे.
आठवडाभर मोठ्या धक्क्यांचा धोका
भूकंपानंतर पुढील काही दिवस ते आठवडाभर मोठे धक्के बसण्याची शक्यता जपान हवामानशास्त्र संस्थेने व्यक्त केली आहे. भूस्खलनाचा धोकाही असल्याने नागरिकांनी अधिकृत सूचनांचे पालन करावे आणि धोकादायक इमारतींपासून दूर राहावे, असे आवाहन करण्यात आले आहे.
