पुण्यात काँग्रेसचा कँडल मार्च; नीट पेपरफुटी प्रकरणी आत्महत्या केलेल्या विद्यार्थ्यांना श्रद्धांजली, केंद्र सरकारविरोधात घोषणाबाजी

पुणे-नीट पेपरफुटी प्रकरणाच्या निषेधार्थ आणि आत्महत्या केलेल्या विद्यार्थ्यांना श्रद्धांजली अर्पण करण्यासाठी पुण्यातील कोथरूड येथे काँग्रेस पक्षाच्या वतीने रविवारी कँडल मार्चचे आयोजन करण्यात आले. छत्रपती शिवाजी महाराज यांच्या पुतळ्यापासून दशभुजा गणपती मंदिरापर्यंत काढण्यात आलेल्या या मार्चचे नेतृत्व काँग्रेस पक्षाचे गटनेते चंदू शेठ कदम आणि शहराध्यक्ष प्रशांत जगताप यांनी केले. या वेळी मोठ्या संख्येने युवक-युवती सहभागी झाले असून केंद्र सरकारविरोधात जोरदार घोषणाबाजी करण्यात आली.
यावेळी नगरसेवक रफिक शेख नगरसेवक विशाल मलके,नगरसेवक साहिल केदारी,नगरसेवक सुनील शिंदे,
नगरसेविका दिपाली डोख,नगरसेविका अश्विनी लांडगे,नगरसेविका वैशाली भालेराव,माजी नगरसेवक अविनाश बागवे,माजी नगरसेवक गोपाळ तिवारी,माजी नगरसेवक शिवा मंत्री, सौरभ आमराळे, केदार सातपुते,अभिजित गोरे,प्रथमेश अबनावे,स्वाती शिंदे यांच्या सह आजी माजी पदाधिकारी व कार्यकर्ते उपस्थित होते.
यावेळी बोलताना काँग्रेसचे गटनेते चंदू शेठ कदम म्हणाले, “केंद्रात भाजप सरकार सत्तेवर आल्यानंतर अनेक गंभीर घटना घडल्या असून प्रत्येक वेळी विरोधी पक्षांनी आवाज उठवला. मात्र नीट पेपरफुटी प्रकरणात देशभरातील तरुणाई रस्त्यावर उतरली आणि त्यांच्या संघर्षामुळे केंद्र सरकारला माघार घ्यावी लागली. हा तरुणाईच्या एकजुटीचा विजय आहे.”
ते पुढे म्हणाले, “दिल्लीतील आंदोलनादरम्यान आंदोलनकर्त्या युवकांवर झालेल्या लाठीमाराबद्दल पंतप्रधान नरेंद्र मोदी यांनी माफी मागावी. तसेच, नीट पेपरफुटी प्रकरणातील दोषींवर कठोर कारवाई करण्यात यावी आणि आत्महत्या केलेल्या विद्यार्थ्यांच्या कुटुंबीयांना केंद्र सरकारने प्रत्येकी 1 कोटी रुपयांची आर्थिक मदत द्यावी. या मागण्या पूर्ण होईपर्यंत आमचा लढा सुरू राहील.”