पुणे, दि. २३ जुलै : वारजे माळवाडी पोलिसांनी घरफोडीच्या गुन्ह्याचा अवघ्या एका तासात छडा लावत एका सराईत चोरट्याला अटक केली आहे. आरोपीकडून चोरीतील ४० हजार रुपये किमतीचा एक लॅपटॉप आणि एक मोबाईल फोन जप्त करण्यात आला असून उर्वरित मुद्देमाल आणि साथीदाराचा शोध सुरू आहे.
वारजे माळवाडी पोलीस ठाण्याच्या हद्दीतील दत्त दिगंबर कॉलनी, वारजे जकात नाका, वारजे येथे २३ जुलै रोजी फिर्यादी यांच्या घराचा दरवाजा उघडा असल्याचा फायदा घेत अज्ञात चोरट्याने दोन लॅपटॉप, एक मोबाईल फोन, एक टॅब आणि एक हेडफोन असा एकूण १ लाख १५ हजार ५०० रुपयांचा ऐवज चोरून नेला होता. याप्रकरणी वारजे माळवाडी पोलीस ठाण्यात गुन्हा रजिस्टर क्रमांक २७८/२०२६ अन्वये भारतीय न्याय संहिता कलम ३०५(अ) अंतर्गत गुन्हा दाखल करण्यात आला.
गुन्हा दाखल होताच वरिष्ठ पोलीस निरीक्षक महेश बोळकोटगी यांच्या मार्गदर्शनाखाली तपास पथकाचे प्रभारी अधिकारी पोलीस उपनिरीक्षक संजय नरळे व त्यांच्या पथकाने तातडीने तपास सुरू केला. घटनास्थळावरील सीसीटीव्ही फुटेज आणि गोपनीय माहितीच्या आधारे गुन्हा दाखल झाल्यानंतर अवघ्या एका तासात निळे वादळ चौक, रामनगर, वारजे येथून मंजुनाथ बाल्या डी. बी. (वय २३, रा. कर्नाटक) याला ताब्यात घेण्यात आले.
कसून चौकशीत आरोपीने गुन्ह्याची कबुली दिली. त्याच्याकडून चोरीतील एक लॅपटॉप आणि एक मोबाईल फोन जप्त करण्यात आला. उर्वरित चोरीचा मुद्देमाल त्याच्या साथीदाराकडे असल्याची माहिती आरोपीने दिली असून त्या साथीदाराचा आणि उर्वरित मुद्देमालाचा शोध सुरू आहे. आरोपीला अटक करण्यात आली असून पुढील तपास पोलीस उपनिरीक्षक संजय नरळे करत आहेत.
ही कारवाई पोलीस आयुक्त अमितेश कुमार, पोलीस सहआयुक्त संजय दराडे, अप्पर पोलीस आयुक्त राजेश वनसोडे, पोलीस उपायुक्त डॉ. सागर कवडे, सहाय्यक पोलीस आयुक्त सुजाता तानवडे यांच्या मार्गदर्शनाखाली करण्यात आली.
या कारवाईत वरिष्ठ पोलीस निरीक्षक महेश बोळकोटगी, पोलीस निरीक्षक (गुन्हे) प्रकाश धेंडे, पोलीस निरीक्षक (गुन्हे) सुवर्णा हुलवान, पोलीस उपनिरीक्षक संजय नरळे, तसेच पोलीस अंमलदार बालाजी काटे, योगेश वाघ, शरद पोळ, अमित शेलार, श्रीहरी कांबळे, सागर कुंभार, अमित जाधव, निखील तांगडे, सत्यजित लोंढे, गणेश शिंदे, महादेव शिंदे आणि अमोल सुतकर यांनी सहभाग घेतला.
दरम्यान, वरिष्ठ पोलीस निरीक्षक महेश बोळकोटगी यांनी पीजी आणि वसतिगृहांमध्ये राहणाऱ्या विद्यार्थ्यांना खोल्या उघड्या न ठेवण्याचे, बाहेर जाताना लॅच लॉक किंवा अन्य सुरक्षित कुलूप व्यवस्था वापरण्याचे आवाहन केले आहे. तसेच पीजी व होस्टेल चालकांनीही सुरक्षा उपाय अधिक प्रभावी करण्याची गरज असल्याचे त्यांनी सांगितले.
