होर्मुझ सामुद्रधुनीत भारतीय खलाशांच्या तैनातीवर बंदी; केंद्र सरकारचा मोठा निर्णय

वाढत्या सुरक्षा धोक्यांच्या पार्श्वभूमीवर जहाज कंपन्या, व्यवस्थापन संस्था आणि RPSL कंपन्यांना आदेश; भारतीय खलाशांच्या सुरक्षेला प्राधान्य

नवी दिल्ली | प्रतिनिधी

आखाती प्रदेशातील वाढत्या सुरक्षा धोक्यांच्या पार्श्वभूमीवर केंद्र सरकारने महत्त्वाचा निर्णय घेत पुढील आदेश येईपर्यंत होर्मुझ सामुद्रधुनीतून प्रवास करणाऱ्या जहाजांवर भारतीय खलाशांची तैनाती करण्यास बंदी घातली आहे. जहाज मालक, जहाज व्यवस्थापन कंपन्या तसेच रिक्रूटमेंट अँड प्लेसमेंट सर्व्हिस लायसन्स (RPSL) धारक कंपन्यांना हा आदेश लागू करण्यात आला आहे.

सरकारने जारी केलेल्या निर्देशानुसार, अरबी आखात, होर्मुझ सामुद्रधुनी आणि परिसरातील सागरी मार्गांवर कार्यरत सर्व कंपन्यांनी अत्यंत दक्षता बाळगावी. सागरी सुरक्षा संदर्भातील सर्व सूचना आणि सल्ले नियमितपणे तपासावेत तसेच आंतरराष्ट्रीय जहाज व बंदर सुविधा सुरक्षा (ISPS) संहितेचे काटेकोर पालन करावे, असे निर्देशही देण्यात आले आहेत.

इराण-अमेरिका तणावानंतर होर्मुझ परिसरात व्यापारी जहाजांवरील हल्ल्यांचा धोका वाढला आहे. अलीकडील हल्ल्यांमध्ये भारतीय खलाशांचा मृत्यू झाल्यानंतर त्यांच्या सुरक्षेच्या दृष्टीने हा निर्णय घेण्यात आल्याचे मानले जात आहे.

जहाज वाहतुकीवर परिणाम

सुरक्षा धोक्यामुळे अनेक आंतरराष्ट्रीय शिपिंग कंपन्यांनी होर्मुझ सामुद्रधुनीतून जहाजे पाठविणे कमी केले आहे. काही कंपन्या पर्यायी सागरी मार्गांचा वापर करत असून, काही जहाजांनी इराणी सागरी मार्गाचा अवलंब केला आहे.

रॉयटर्सने सागरी डेटा कंपनी केप्लरच्या आकडेवारीच्या आधारे दिलेल्या माहितीनुसार, मंगळवारी या सामुद्रधुनीतून १३ जहाजे गेली होती, तर बुधवारी ही संख्या घटून ९ वर आली. विशेष म्हणजे, बुधवारी एकही अतिविशाल कच्चे तेल (VLCC) टँकर किंवा एलएनजी टँकर या मार्गाने गेल्याची नोंद नाही.

भारताबाहेरील भरतीवर आदेश लागू नाही

भारतीय सरकारचा हा आदेश भारतातून भरती होणाऱ्या भारतीय खलाशांपुरता लागू आहे. परदेशी शिपिंग कंपन्यांनी भारताबाहेरून खलाशांची भरती केल्यास त्या भरतीवर हा आदेश थेट लागू होणार नाही.

मध्यपूर्वेतील घडामोडी

दरम्यान, मध्यपूर्वेतील तणाव कायम असून अमेरिकेच्या हवाई हल्ल्यांमध्ये मृत्यू झाल्याचा इराणने दावा केला आहे. तसेच इराणचे परराष्ट्रमंत्री अब्बास अराघची यांनी कतारला भेट दिली असून, इस्त्रायलचे पंतप्रधान बेंजामिन नेतन्याहू अमेरिकेच्या दौऱ्यावर जाणार असल्याची माहिती समोर आली आहे.