पहिल्या मजल्याखाली ८ कामगार अडकल्याची भीती
पुणे-मोशी येथील कचरा डेपोत ‘वेस्ट टू एनर्जी’ प्रकल्पाच्या प्रशासकीय इमारतीवर कचऱ्याचा डोंगर कोसळून झालेल्या भीषण दुर्घटनेला आता ६५ तासांहून अधिक काळ लोटला आहे. तरीही ढिगाऱ्याखाली दबलेल्या ८ बेपत्ता कामगारांचा अद्याप कोणताही थांगपत्ता लागलेला नाही. या कामगारांचा शोध घेण्यासाठी एनडीआरएफ (NDRF) आणि महापालिका प्रशासनाकडून रात्रंदिवस युद्धपातळीवर बचावकार्य सुरू आहे.
दरम्यान, देवेंद्र फडणवीस यांनी या संपूर्ण घटनेचा पुण्यामध्ये सविस्तर आढावा घेत, मृतांच्या कुटुंबीयांना सर्वतोपरी मदत करण्याचे आणि कचरा प्रक्रियेची प्रभावी व्यवस्था उभारण्याचे कडक निर्देश प्रशासनाला दिले आहेत.
बुधवारी दुपारी घडलेल्या या दुर्घटनेनंतर बचाव पथकाने शर्थीचे प्रयत्न सुरू ठेवले आहेत. अत्याधुनिक कटरच्या साहाय्याने इमारतीच्या दुसऱ्या मजल्याचा स्लॅब पाडण्यात यश आले असून, आता पहिल्या मजल्याचा स्लॅब फोडण्याचे काम हाती घेण्यात आले आहे. बेपत्ता असलेले आठही कामगार याच स्लॅबखाली अडकले असल्याची दाट शक्यता वर्तवली जात आहे. अत्याधुनिक ‘डिमोलीशन एक्सकॅव्हेटर’ घटनास्थळी दाखल
इमारतीचा अस्थिर झालेला काँक्रिटचा भाग फोडण्यासाठी आणि आत जाण्यासाठी सुरक्षित मार्ग तयार करण्याकरिता ‘डिमोलीशन एक्सकॅव्हेटर मशीन’ घटनास्थळी आणण्यात आले आहे. या मशीनमुळे मोहिमेला वेग आला असून, आज रात्रीपर्यंत हे शोधकार्य पूर्ण होईल, अशी अपेक्षा प्रशासनाला आहे. महापालिका आयुक्त डॉ. विजय सूर्यवंशी आणि अतिरिक्त आयुक्त कुलदीप जंगम यांच्यासह वरिष्ठ अधिकारी घटनास्थळी तळ ठोकून आहेत.
देवेंद्र फडणवीसांकडून आढावा अन् प्रशासनाला निर्देश काल (१० जुलै) रात्री देवेंद्र फडणवीस यांनी पुणे येथे या दुर्घटनेचा सविस्तर आढावा घेतला.
कुटुंबीयांना मदत: दुर्घटनेतील मृतांच्या आणि अडकलेल्या कामगारांच्या कुटुंबीयांना प्रशासनाकडून आवश्यक ती सर्व मदत तात्काळ पोहोचवण्याचे निर्देश त्यांनी दिले.
बायोमायनिंगला गती: मोशी येथील ‘लेगसी वेस्ट’च्या बायोमायनिंग प्रक्रियेला गती देण्याच्या सूचना देण्यात आल्या.
कचरा प्रक्रिया व्यवस्था: दररोज साचणाऱ्या आणि प्रक्रिया न होणाऱ्या सुमारे १०० टन कचऱ्यावर तातडीने प्रक्रिया करण्यासाठी एक स्वतंत्र आणि प्रभावी व्यवस्था उभी करण्याचे निर्देशही त्यांनी दिले. या बैठकीला आमदार महेश लांडगे, महापौर रवी लांडगे, पोलीस आयुक्त आणि महापालिका आयुक्त उपस्थित होते.
बुधवारी झालेल्या मुसळधार पावसामुळे इमारतीचा पाया खचला आणि कचऱ्याचा मोठा डोंगर पुरासारखा इमारतीत घुसला. यात २३ कर्मचारी अडकले होते. त्यापैकी एकाचा मृत्यू झाला असून ८ जण अजूनही बेपत्ता आहेत. या संपूर्ण प्रकरणात झालेला निष्काळजीपणा उघड दिसत असून, महापालिका आयुक्त विजय सूर्यवंशी यांनी या घटनेची सखोल चौकशी केली जाईल, असे स्पष्ट केले आहे.
