मुंबई | प्रतिनिधी
‘मसाला किंग’ म्हणून प्रसिद्ध असलेले उद्योगपती धनंजय दातार आणि वंदना दातार यांनी त्यांचा मुलगा रोहित दातार आणि सानिया नरवाडे यांच्या विवाहानिमित्त मुंबईतील फेअरमाँट हॉटेलमध्ये २३ व २४ जून रोजी दोन दिवसीय भव्य सोहळ्याचे आयोजन केले. या सोहळ्याला बॉलिवूड सुपरस्टार शाहरुख खान, गायक सोनू निगम यांच्यासह अनेक मान्यवरांनी उपस्थिती लावली.
२३ जून रोजी झालेल्या संगीत समारंभाची सुरुवात विनोदी कलाकार कृष्णा अभिषेक आणि राजीव ठाकूर यांच्या सादरीकरणाने झाली. त्यानंतर शाहरुख खानने आपल्या लोकप्रिय संवादांद्वारे आणि नृत्याने उपस्थितांचे मनोरंजन केले. रोहित व सानियासह तसेच दातार कुटुंबासोबत त्याने रंगमंचावर ठेका धरला. ‘ओम शांती ओम’ चित्रपटातील गाण्यावर झालेल्या नृत्याने कार्यक्रमाची रंगत आणखी वाढवली.
यावेळी धनंजय दातार यांनी नवदाम्पत्याला आयुष्यभर सुख, समृद्धी आणि प्रेम लाभावे, अशा शुभेच्छा देत हा क्षण कुटुंबासाठी अत्यंत आनंदाचा असल्याचे सांगितले.
२४ जून रोजी झालेल्या स्वागत समारंभात सुप्रसिद्ध गायक सोनू निगम यांनी आपल्या गाण्यांनी वातावरण भारावून टाकले. या कार्यक्रमात रोहितची आई वंदना दातार यांनी सोनू निगम यांच्यासोबत ‘तेरे हाथ में, मेरा हाथ हो’ हे गाणे सादर करून उपस्थितांची मने जिंकली.
सानियाचे आई-वडील सीमा आणि कुमार नरवाडे यांनी पाहुण्यांचे स्वागत केले, तर रोहितचा भाऊ हृषिकेश दातार आणि पत्नी आकांक्षा यांनीही कुटुंबासह उत्साहाने कार्यक्रमात सहभाग घेतला.
दोन दिवस चाललेल्या या विवाहसोहळ्याचा समारोप स्वादिष्ट भोजन आणि संगीताच्या सुरेल मैफलीत झाला.
धनंजय दातार हे ‘आदिल ग्रुप’चे संस्थापक असून, भारतीय किराणा व मसाल्यांच्या जागतिक स्तरावरील अग्रगण्य व्यावसायिकांपैकी एक म्हणून त्यांची ओळख आहे.
