मुंबई- विधान परिषद आमदार प्रवीण दरेकर आणि मुंबई बँकेच्या कारभारावर सामाजिक कार्यकर्त्या अंजली दमानिया यांनी पत्रकार परिषदेत अत्यंत गंभीर आरोप केले आहेत. नव्याने सुरू होणाऱ्या ‘देवाभाऊ टॅक्सी’ योजनेमागे मोठा भ्रष्टाचार आणि मनी लाँड्रिंग असल्याचा दावा दमानिया यांनी केला असून उपमुख्यमंत्री देवेंद्र फडणवीस यांचे उदात्तीकरण करण्यासाठी सामान्य लोकांच्या पैशांचा गैरवापर होत असल्याचा घणाघात त्यांनी केला आहे.
दमानिया यांच्या म्हणण्यानुसार, ‘देवदत्त सहकारी पर्यटन व वाहतूक संस्था मर्यादित’ ही एक बोगस (Shell) संस्था आहे. ही संस्था 4 डिसेंबर 2001 रोजी स्थापन झाली, पण गेल्या 25 वर्षांत त्यांच्याकडे एकही गाडी नाही, कोणतीही उलाढाल नाही किंवा त्यांनी कधीही संस्थेची निवडणूक घेतलेली नाही. “2018 मध्ये निवडणूक का घेतली नाही?” या प्रश्नावर संस्थेने, ‘2018 साली कोविडमुळे लॉकडाऊन होता’ असे खोटे आणि हास्यास्पद कारण लेखी स्वरूपात दिल्याचे दमानिया यांनी उघड केले. या संस्थेतील 28 सदस्यांच्या सह्या बोगस असल्याचा संशय आहे. एकाच व्यक्तीची 2001 मधील सही मराठीत आणि 2013 मधील सही स्टायलिश इंग्रजीत असल्याचे त्यांनी समोर आणले. ही संस्था ‘क’ श्रेणीमध्ये मोडते आणि 2023-24 मध्ये तिचा निव्वळ नफा फक्त 941 रुपये होता.
संस्थेची आर्थिक स्थिती इतकी बिकट असताना आणि त्यांच्या मुंबई बँकेतील खात्यात सध्या शून्य रुपये शिल्लक असताना, प्रवीण दरेकर यांनी या संस्थेला मुंबई बँकेकडून 2 हजार गाड्यांसाठी कर्ज देण्याची घोषणा केली आहे. “हा पैसा सामान्य कष्टकरी लोकांचा आणि सहकारी संस्थांचा असून तो या बोगस संस्थेसाठी वापरला जात आहे,” असा आरोप दमानिया यांनी केला.
केंद्र सरकारने ‘भारत टॅक्सी’ योजना सुरू केली असून, महाराष्ट्राने त्याला पाठिंबा देणे गरजेचे होते. मात्र, अमित शहांची ‘भारत टॅक्सी’ डावलून या योजनेला देवेंद्र फडणवीस यांचे ‘देवाभाऊ टॅक्सी’ असे नाव देण्यात आले आहे. “देवेंद्र फडणवीस यांचे उदात्तीकरण करण्यासाठी आणि सरकारी कामात कुठेही अडवणूक होऊ नये म्हणून हे नाव दिले गेले आहे. ओला-उबरला पर्याय म्हणून टॅक्सी सेवा येणे गरजेचे आहे, पण त्याला ‘सामान्यांची टॅक्सी’ किंवा ‘महाराष्ट्र टॅक्सी’ असे नाव द्यावे, ‘देवाभाऊ टॅक्सी’ हे नाव आम्हाला मान्य नाही,” असे दमानिया म्हणाल्या.
पोलीस स्टेशनच्या भूखंडावर ‘सहकार भवन’?
याच बोगस संस्थेने सुरुवातीला गोरेगाव येथील माफकोची 3 एकर जमीन ‘सहकार भवन’ उभारण्यासाठी मागितली होती. मात्र, आता त्याऐवजी सायनच्या प्रतीक्षानगरमध्ये पोलीस स्टेशनसाठी आरक्षित असलेला एक मोठा भूखंड त्यांना देण्यात आला असून त्याचे उद्घाटनही देवेंद्र फडणवीस यांच्या हस्ते झाले आहे. “राजकीय पदाचा आणि देवेंद्र फडणवीसांशी असलेल्या जवळीकीचा गैरवापर करून जमिनी लाटण्याचा आणि स्वतःचे खिसे भरण्याचा हा प्रकार आहे,” असा आरोप दमानिया यांनी केला.दमानिया यांनी सहकार आयुक्तांकडे या संस्थेच्या सखोल चौकशीची मागणी केली असून, खोट्या सह्या आणि बोगस व्यवहारामुळे ही संस्था तत्काळ बंद करण्याचे आदेश देण्याची विनंती केली आहे. या प्रकरणाची सर्व कागदपत्रे आणि पुरावे त्या मुख्यमंत्री एकनाथ शिंदे, देवेंद्र फडणवीस आणि पुणे सहकार आयुक्तांना पाठवणार असल्याचे त्यांनी स्पष्ट केले. “देवेंद्र फडणवीस यांनी अशा चुगलीखोर आणि लुटारू नेत्यांना बाजूला करून थोडं तरी शुद्धीवर यावे,” असा सल्लाही त्यांनी अखेरीस दिला.
