स्थायी समितीचे अध्यक्ष श्रीनाथ भिमाले यांची माहिती
पुणे : वारजे परिसरातील राष्ट्रीय महामार्गालगतच्या प्रस्तावित १२ मीटर रुंदीच्या सर्व्हिस रस्त्याच्या कामाला गती देण्यासाठी उर्वरित जागेचे भूसंपादन करण्याचा प्रस्ताव पुणे महापालिका प्रशासनाने स्थायी समितीमार्फत मुख्य सभेपुढे मंजुरीसाठी ठेवला होता. या भूसंपादनासाठी सुमारे ९ कोटी ७५ लाख रुपयांचा खर्च अपेक्षित असून त्यासाठी पथ विभागाकडे निधी उपलब्ध असल्याचे प्रशासनाने स्पष्ट केले होते. या प्रस्तावा स्थायी समितीने मान्यता दिल्याने भूसंपादनाचा मार्ग मोकळा झाल्याचे समितीचे अध्यक्ष श्रीनाथ भिमाले यांनी सांगितले.
महापालिकेच्या विकास आराखड्यात पुणे पेठ वारजे येथील सर्व्हे क्रमांक १०४ मधून १२ मीटर रुंदीचा डीपी सर्व्हिस रस्ता प्रस्तावित आहे. या रस्त्याचे काम महापालिकेच्या ताब्यात आलेल्या जागेवर सुरू असले, तरी रस्त्यासाठी आवश्यक असलेले २ हजार १५४ चौरस मीटर क्षेत्र अद्याप संपादित झालेले नाही. त्यामुळे संपूर्ण रस्ता विकसित करण्यासाठी भूसंपादन प्रक्रिया हाती घेण्याचा निर्णय प्रशासनाने घेतला आहे.
महापालिकेच्या अतिरिक्त आयुक्तांच्या अध्यक्षतेखाली नोव्हेंबर २०२५ मध्ये झालेल्या बैठकीत राष्ट्रीय महामार्गालगतच्या सर्व्हिस रस्त्यांचे भूसंपादन प्राधान्याने करण्याचे निर्देश देण्यात आले होते. त्यानुसार वारजे स्मशानभूमी ते वारजे चौक तसेच डुक्करखिंड परिसरातील रस्ते विकास कामांना महत्त्व देण्यात आले आहे.
या प्रकरणात एका मिळकतधारकाची मालमत्ता बाधित होत असून ती निवासी क्षेत्रात मोडते. संबंधित जागाधारकांकडून जागेच्या बदल्यात सुमारे ९.७५ कोटी रुपयांच्या मोबदल्याची मागणी करण्यात आली आहे. मालमत्ता व व्यवस्थापन विभागाकडून वेळोवेळी जागा हस्तांतरित करण्याबाबत पत्रव्यवहार करण्यात आला असला, तरी अद्याप जागेचा ताबा महापालिकेला मिळालेला नाही.
भूसंपादनासाठी आवश्यक असलेली ९ कोटी ७५ लाख रुपयांची तरतूद ‘शहरातील प्रमुख रस्त्यांचे भूसंपादन’ या अर्थशीर्षाखाली उपलब्ध आहे. सन २०२६-२७ च्या अंदाजपत्रकात या कामासाठी ३४० कोटी रुपयांची तरतूद करण्यात आली असून त्यातून हा खर्च करण्यात येणार आहे.
महापालिका आयुक्त नवल किशोर राम यांनी या संदर्भातील प्रस्ताव स्थायी समितीसमोर मांडण्यात आला होता. स्थायी समिती आणि मुख्य सभेची मंजुरी मिळाल्यानंतर संबंधित जागेचे भूसंपादन करून सर्व्हिस रस्त्याचे काम पूर्ण करण्याचा मार्ग मोकळा होणार आहे. हा रस्ता विकसित झाल्यास वारजे परिसरातील वाहतूक व्यवस्थेला दिलासा मिळण्यास मदत होणार असल्याचे भिमाले यांनी सांगितले.
