पुणे : फेडरेशन ऑफ फिल्म सोसायटीज् ऑफ वेस्टर्न रीजनच्या पुण्यात ७ जून रोजी पार पडलेल्या मिटींगमध्ये आशय फिल्म क्लबचे सचिव तसेच अनेक महोत्सवांचे संयोजक वीरेंद्र चित्राव यांची उपाध्यक्षपदी निवड करण्यात आली आहे. याच मिटींगमध्ये कार्यकारीणीचे १२ सदस्य व ७ स्वीकृत सदस्यांची देखील निवड २०२६-२८ या कालावधीसाठी करण्यात आली.
वीरेंद्र चित्राव हे गेल्या ४२ वर्षांहून अधिक काळ चित्रपट, नाटक, संगीत, साहित्य, कला व पर्यावरण क्षेत्रात कार्यरत असून आशय फिल्म व सांस्कृतिक क्लबचे सचिव आहेत. पुलोत्सव, आशियाई चित्रपट महोत्सव, किर्लोस्कर वसुंधरा आंतरराष्ट्रीय चित्रपट महोत्सव, मुंम्बा आंतरराष्ट्रीय लघुपट महोत्सव, शि. द.100 महोत्सव इत्यादी अनेक महोत्सवांचे ते संयोजक असून आजपर्यंत देशभरात सुमारे ४५० महोत्सवांचे आयोजन त्यांनी केले आहे. फिल्म सेंसॉर बोर्ड, महाराष्ट्र शासनाच्या चित्रपट सल्लागार समितीचे सदस्य म्हणून त्यांची कारकिर्द लक्षणीय ठरली आहे. विविध विषयांवर आपले विचार त्यांनी लेखन व भाषणांमधून सातत्याने व्यक्त केले आहेत.
फेडरेशन ऑफ फिल्म सोसायटीज ऑफ वेस्टर्न रीजनच्या कार्यकारीणीवर निवड झालेल्या सदस्यांचा तपशील :
1 किरण व्ही. शांताराम (अध्यक्ष), मुंबई, 2 वीरेंद्र चित्राव (उपाध्यक्ष), पुणे, 3 संदिप मांजरेकर (सचिव), मुंबई, 4 दिलीप बापट (कोषाध्यक्ष), कोल्हापूर, 5 जितेंद्र पाटील (विभागीय सचिव), लातूर, 6 डॉ. सुनिल पुणतांबेकर (सदस्य), डोंबिवली, 7 राजभूषण सहस्त्रबुध्दे (सदस्य), सातारा, 8 हेमंत बेळे (सदस्य), नासिक, 9 डॉ. नवनीत तोष्णीवाल (सदस्य), सोलापूर, 10 विनित जोशी (सदस्य), जळगाव, 11 राजेंद्र तालक (सदस्य), मडगांव-गोवा, 12 ऋता धर्माधिकारी (सदस्य), नागपूर.
स्विकृत सदस्य : 1 शिरीष चिटणीस, सातारा, 2 सतीश जकातदार, पुणे, 3 अमित चव्हाण, मुंबई, 4 सचिन चट्टे, पणजी-गोवा, 5 मयुर कुलकर्णी, कोल्हापूर, 6 सुधीर मुळे, रत्नागिरी.
कार्यालयीन सचिव : प्रणव साळगांवकर, ठाणे
मिटींगचा समारोप करताना आपल्या भाषणात वीरेंद्र चित्राव म्हणाले की, फिल्म सोसायटी चळवळीचा काळ हा आव्हानात्मक आहे. परंतु ओ.टी.टी. प्लॅटफॉर्ममुळे निराश झालेला रसिक आगामी काळात मोठ्या प्रमाणात पुन्हा आपल्या चळवळीकडे येईल यात शंकाच नाही. फिल्म सोसायटी चळवळ जास्तीत जास्त तरूणाभिमुख होईल या दृष्टीने आपण प्रयत्न केले पाहिजेत. त्या प्रमाणे कार्यक्रमांची रचना करावी लागेल. प्रत्येक जिल्ह्यात पाच कॉलेज फिल्म क्लब हे आपले ध्येय असून त्यासाठी आपण पुढील दोन वर्षात कार्यरत असले पाहिजे.
