महापालिकेच्या सुरक्षा रक्षकांची संख्या वाढवून ,तीन शिफ्टमध्ये नेमणुका करा
समान पाणीपुरवठा योजनेतील प्रलंबित कामे पुढील दोन महिन्यांत पूर्ण करा .
महापौरांनी घेतली महापालिकेच्या विविध खात्यांच्या कामकाजाचा आढावा बैठक
पुणे : शहरातील नागरिकांना अधिक सक्षम व गुणवत्तापूर्ण नागरी सुविधा उपलब्ध करून देण्याच्या दृष्टीने पुणे महानगरपालिकेच्या विविध विभागांच्या कामकाजाचा सविस्तर आढावा घेण्यासाठी महापौर मंजुषा नागपुरे यांच्या अध्यक्षतेखाली गुरुवार, दि. १४ मे २०२६ रोजी दुपारी ३.०० वा. महत्त्वपूर्ण बैठक संपन्न झाली.
या बैठकीस अति. महापालिका आयुक्त पवनीत कौर, अतिक्रमण विभागाचे सोमनाथ बनकर, मुख्य लेखा व वित्त अधिकारी उल्का कळसकर, मुख्य अभियंता (पाणीपुरवठा) नंदकिशोर जगताप, उपआयुक्त (सुरक्षा) आशा राऊत, मुख्य अभियंता (ड्रेनेज) जगदीश खानोरे तसेच आरोग्य प्रमुख डॉ. नीना बोराडे उपस्थित होत्या.
बैठकीदरम्यान विविध विभागांकडील अंदाजपत्रक तरतूद, सुरू असलेली विकासकामे व नागरिकाभिमुख सेवा यांचा सखोल आढावा घेण्यात आला. यावेळी महापौर मंजुषा नागपुरे यांनी प्रशासनास खालीलप्रमाणे महत्त्वपूर्ण सूचना दिल्या:
🔹 समान पाणीपुरवठा योजनेतील प्रलंबित कामे पुढील दोन महिन्यांत पूर्ण करण्यासाठी गती द्यावी.
🔹 मेट्रो कामांमुळे दांडेकर पूल ते सिंहगड रस्ता जलशुद्धीकरण केंद्रादरम्यान पाईपलाईन स्थलांतरासाठी वाहतूक शाखेकडून तातडीने परवानगी मिळवावी.
🔹 मनपा इमारतींवर रेन वॉटर हार्वेस्टिंग प्रकल्प राबवून जलसंधारणाला चालना द्यावी.
🔹 सांडपाणी थेट नदीत न सोडता ते एसटीपी प्रकल्पांपर्यंत पाईपलाईनद्वारे वळविण्याची कार्यवाही करावी.
🔹 तलावातील गाळ काढण्याची कामे महानगरपालिकेच्या यंत्रणेमार्फतच प्रभावीपणे राबवावीत.
🔹 शहरात नवीन टँकर पॉईंटसाठी जागा ताब्यात घेऊन जलपुरवठा व्यवस्थेत सुधारणा करावी.
🔹 महानगरपालिकेच्या रुग्णालयांमध्ये ६ प्रसूतिगृहे व ५ सर्वसाधारण रुग्णालयांसह ६ एनआयसीयू अद्ययावत करण्याचे काम पुढील ६ महिन्यांत पूर्ण करावे. सिंहगड रस्ता परिसरातील लायगुडे दवाखान्याचे आधुनिकीकरण करण्यात येणार आहे.
🔹 शहरी गरीब योजनेअंतर्गत रुग्णालयांना वेळेवर देयके मिळावीत यासाठी पारदर्शक यंत्रणा उभारावी. तसेच के.ई.एम. रुग्णालयासह उपचार सुविधा पुन्हा सुरू करण्यासाठी उपाययोजना कराव्यात.
🔹 समाविष्ट गावांमध्ये लसीकरणासाठी कार्यरत निरामय संस्थेला आवश्यक प्रशासकीय सहकार्य द्यावे.
🔹 जिल्हा परिषदेची आरोग्य यंत्रणा पूर्णपणे हस्तांतरित नसल्याने उद्भवणाऱ्या अडचणी डीपीडीसीमध्ये मांडाव्यात.
🔹 भटक्या कुत्र्यांसाठी शेल्टरसोबत उपचार सुविधा उपलब्ध करून द्याव्यात तसेच शहरात प्राणी उपचार केंद्र स्थापन करावे. पाळीव प्राण्यांसाठी ‘डॉग गार्डन’ विकसित करण्याची संकल्पना राबवावी.
🔹 डुकरांच्या नियंत्रणासाठी नियुक्त एजन्सींचे संपर्क क्रमांक सार्वजनिक करावेत.
🔹 १५ क्षेत्रीय कार्यालयांसाठी शववाहिका (पुष्पक) व बसेस उपलब्ध करून द्याव्यात.
🔹 सुरक्षा रक्षकांची संख्या वाढवून आवश्यकतेनुसार तीन शिफ्टमध्ये नेमणुका करण्याबाबत पडताळणी करावी.
🔹 पालखी सोहळ्याच्या पार्श्वभूमीवर अतिक्रमण विभागाने विशेष मोहीम राबवावी तसेच आऊटसोर्स पद्धतीने अतिक्रमण निरीक्षक नेमण्याबाबत कार्यवाही करावी.
महापौर मंजुषा नागपुरे यांनी प्रशासनास सर्व कामे वेळेत व दर्जेदार पद्धतीने पूर्ण करण्याच्या सूचना देत, नागरिकांना अधिक कार्यक्षम सेवा देण्यासाठी समन्वयाने काम करण्याचे निर्देश दिले.
