नितीन देसाई यांच्यावर होते 249 कोटींचे कर्ज, ND स्टुडिओवर होती जप्तीच्या कारवाईची टांगती तलवार
एनडी स्टुडिओवर जप्तीच्या कारवाईचे संकट
कर्जत -सुप्रसिद्ध कलादिग्दर्शक नितीन देसाई यांनी आत्महत्या केल्याचं समोर आलं आहे. त्यांच्या कर्जत येथील एन. डी. स्टुडिओमध्ये त्यांनी गळफास घेऊन आत्महत्या केल्याचे वृत्त आहे. नितीन देसाई यांनी त्यांच्या कारकिर्दीत अनेक हिंदी, मराठी चित्रपटांमध्ये कला दिग्दर्शनाचं काम केलं. अशा प्रकारे त्यांनी आत्महत्या केल्यामुळे चित्रपटसृष्टीतून शोक व्यक्त करण्यात येत आहे. ते ५८ वर्षांचे होते.
नितीन देसाई यांनी जे. जे. स्कूल ऑफ आर्ट्समधून आपलं प्रशिक्षण पूर्ण केलं होतं. १९८७ सालापासून त्यांनी चित्रपटांसाठी कला दिग्दर्शनाचं काम सुरू केलं. २००५ साली त्यांनी कर्जतमध्ये त्यांचा एन. डी. स्टुडिओ उभा केला होता. याच स्टुडिओमध्ये त्यांनी आत्महत्या केल्याची बाब समोर आली आहे. त्यामुळे चित्रपटसृष्टीवर शोककळा पसरली आहे.
नितीन देसाई यांनी आपल्या कारकिर्दीत अनेक मराठी, हिंदी चित्रपटांसाठी कला दिग्दर्शनाचं काम केलं. यामध्ये जोधा अकबर, हम दिल दे चुके सनम, माचिस, देवदास, लगान, प्रेम रतन धन पायो अशा अनेक हिट चित्रपटांचा समावेश आहे. यासारख्या अनेक चित्रपटांसाठी नितीन देसाईंनी ‘लार्जर दॅन लाईफ’ असं चित्र उभं करण्यात सिंहाचा वाटा उचलला होता. अनेक ऐतिहासिक मालिका व महानाट्यांसाठीही नितीन देसाई यांनी उभारलेले सेट प्रचंड चर्चेचा विषय ठरले होते.
दरम्यान, नितीन देसाई यांना त्यांच्या उत्तुंग कारकिर्दीमध्ये चार वेळा सर्वोत्कृष्ट कला दिग्दर्शनाचा राष्ट्रीय पुरस्कार मिळाला आहे. त्याशिवाय, त्यांना फिल्म फेअर पुरस्कारानंही सन्मानित करण्यात आलं आहे.
नितीन देसाई यांच्यावर होते 249 कोटींचे कर्ज, ND स्टुडिओवर होती जप्तीच्या कारवाईची टांगती तलवार
नितीन देसाई यांच्यावर तब्बल 249 कोटी रुपयांचे कर्ज असल्याची माहिती उजेडात आली आहे. त्यामुळे त्यांनी आर्थिक विवंचनेतून हे पाऊल उचलले असावे, असा अंदाज व्यक्त केला जात आहे.नितीन देसाई यांचा मृतदेह बुधवारी सकाळी एनडी स्टुडिओतील त्यांच्या खोलीत आढळून आला. सफाई कर्मचारी खोलीत साफसफाईसाठी गेले असता त्यांच्या निदर्शनास ही गोष्ट आली. त्यानंतर तातडीने ही खबर पोलिसांना देण्यात आली. त्यानंतर कर्जत व खालापूर पोलिसांनी तातडीने घटनास्थळी धाव घेऊन मृतदेह आपल्या ताब्यात घेतला. पोलिस अधिक्षक सोमनाथ घार्गे यांनी या प्रकरणी सर्वच अंगाने तपास सुरू असल्याचे स्पष्ट केले.यासंबंधीच्या वृत्तानुसार, नितीन देसाई यांनी काही वित्तीय संस्थांकडून ठराविक मुदतीचे कर्ज घेतले होते. यामुळे त्यांचा जीव की प्राण असणाऱ्या एनडी स्टुडिओवर जप्तीच्या कारवाईचे संकट ओढावले होते. कलिना येथील एडलवाइस अॅसेट रिकन्स्ट्रक्शन कंपनीने यासंबंधी रायगडच्या जिल्हाधिकारी कार्यालयात अर्जही केला होता. पण जिल्हाधिकारी कार्यालयाने जप्तीच्या कारवाईला अंतिम मंजुरी दिली नव्हती.
रायगडचे निवासी उपजिल्हाधिकारी संदेश शिर्के यांनी एनडी स्टुडिओच्या जप्तीसंबंधीचा अर्ज आपल्या कार्यालयाला मिळाल्याची पुष्टी केली आहे.
काय आहे प्रकरण?
नितीन देसाई यांनी काही कारणास्तव CFM नामक वित्तीय संस्थेकडून 180 कोटी रुपयांचे कर्ज घेतले होते. 2016 व 2018 या 2 वर्षांत या कर्जाचा करारनामा झाला होता. यासाठी देसाई यांनी 3 वेगवेगळ्या अशा 40 एकरच्या मालमत्ता तारण ठेवल्या होत्या. काही कालावधीनंतर CFM ने आपल्याकडील सर्व कर्ज खाते एडलवाइस ॲसेट रिकन्स्ट्रक्शन कंपनीकडे सोपवली. पण त्यानंतरही कर्जाची वसुली होत नव्हती.
यादरम्यान 180 कोटींचे कर्ज व्याजासह 249 कोटींच्या घरात पोहोचले. त्यामुळे देसाई प्रचंड आर्थिक तंगीत सापडले. खालापूरचे आमदार महेश बालदी यांच्याकडे काही दिवसांपूर्वीच त्यांनी या संदर्भात चर्चाही केली होती.