- आयोजक मुरलीधर मोहोळ यांची माहिती
- दोन हजार दिव्यांगाना मिळणार सुसह्य उपकरणे
पुणे (प्रतिनिधी) : ‘महाराष्ट्राचे उपमुख्यमंत्री आणि गृहमंत्री देवेंद्र फडणवीस यांच्या वाढदिवसानिमित्त दिव्यांग सहाय्यता अभियान आयोजित करण्यात आले असून या अभियानांतर्गत २ हजार दिव्यांगाना सुसह्य उपकरणे दिली जाणार आहेत’, अशी माहिती भारतीय जनता पार्टीचे प्रदेश सरचिटणीस आणि माजी महापौर मुरलीधर मोहोळ यांनी दिली.
उपमुख्यमंत्री फडणवीस यांच्या वाढदिवसानिमित्त मोहोळ यांनी एनएचआरडी, एनॅबलर आणि भारत विकास परिषद यांच्या संयुक्त विद्यमाने हे अभियान राबविले आहे. पालकमंत्री चंद्रकांत पाटील यांच्या प्रमुख उपस्थितीत २२ जुलै, २०२३ दुपारी ४ वाजता डी.पी. रस्त्यावरील शुभारंभ लॅान्स येथे हा कार्यक्रम होणार आहे.
‘दिव्यांग सहाय्यता अभियानात दोन हजार दिव्यांगांसाठी सुसह्य उपकरणांचे वाटप, दिव्यांग रोजगार नोंदणी आणि मार्गदर्शन शिबिराचे आयोजन करण्यात आले आहे. त्याचप्रमाणे, कृत्रिम अवयव मोजमाप आणि नोंदणी देखील यावेळी करण्यात येणार आहे, असेही मोहोळ म्हणाले.
‘भारतीय जनता पक्षाचे कर्तृत्ववान आणि संवेदनशील नेतृत्व देवेंद्र फडणवीस यांना दिव्यांगांच्या प्रश्नाविषयी नेहमीच विशेष आपुलकी राहिली आहे. नुकत्याच एका दौऱ्यात एका दिव्यांग भगिनीने त्यांना ओवाळले. हा प्रसंग एवढा भावनिक होता, की त्यातून आपल्याला या दिव्यांग सहाय्यता अभियानाची कल्पना सुचली. आम्हाला सहानुभुतीची नाही तर सहकार्याची गरज आहे, ही भावना दिव्यांगांची असते. म्हणूनच त्यांचे जीवन सुसह्य करण्याचा प्रयत्न या अभियानाच्या माध्यमातून करण्याचा प्रयत्न असल्याचेही मोहोळ यांनी सांगितले.