मुंबई-भाजपा विरोधी नेत्यांवर आजवर आरोपांची राळ उडवणारे भाजपचे माजी खासदार किरीट सोमय्या आता स्वत:च वादात अडकले आहेत. त्यांचा आक्षेपार्ह स्थितीतील व्हिडिओ एका वृत्तवाहिनीने प्रसारित केला. त्यानंतर सर्वपक्षीय महिला नेत्यांनी सोमय्यांवर कारवाईची मागणी केली आहे. यावर सोमय्या यांनी या व्हिडिओची सत्यता सपासण्याची मागणी केली आहे. त्यांच्यावर सर्व आरोप त्यांनी फेटाळून लावले आहेत. या संदर्भात त्यांनी उपमुख्यमंत्री देवेंद्र फडणवीस यांना एक पत्रही पाठवले आहेत. यात त्यांनी व्हिडिओची सत्यता तपासण्याची मागणी केली आहे.
किरीट सोमय्या यांच्याकडे गोपनीय माहिती असते. अनेक राजकीय लोकांची पोलखोल करण्याचे काम ते करत असतात, अशा राजकीय जीवनात वावरत असलेल्या व्यक्तीचा व्हिडिओ समोर आल्यानंतर त्यावर जोरदार हल्लाबोल केला जात आहे.या संदर्भात किरीट सोमय्या यांनी सोशल मीडियाच्या माध्यमातून आपले स्पष्टीकरण दिले आहे. तसेच या प्रकरणाची चौकशी करण्याची मागणी देखील त्यांनी केली आहे. ते म्हणाले की, ‘आज सायंकाळी एका मराठी वृत्तवाहिनीवर माझी एक व्हिडिओ क्लिप प्रदर्शित करण्यात आली, या निमित्ताने अनेक व्यक्तींनी माझ्यावर अनेक आरोप केले, आक्षेप घेतले आहेत. अशाप्रकारच्या अनेक व्हिडिओ क्लिप्स उपलब्ध आहेत, असेही सांगण्यात आले आहे, येत आहे. मी अनेक महिलांवर अत्याचार केले, अनेक महिलांच्या तक्रारी आल्या आहेत आणि त्याच्या अनेक व्हिडिओ क्लिप आहेत, असेही दावे केले जात आहेत. तथापि माझ्याकडून कोणत्याही महिलेवर अशा अत्याचार…. झालेला नाही, हे मी याठिकाणी स्पष्ट करतो. त्यामुळे अशा सर्व आरोपांची आपण चौकशी करावी, अशी माझी आपणास विनंती आहे. ही व्हिडिओ क्लिप किंवा अन्य अशा व्हिडिओ क्लिप ( जर कोणाकडे असल्यास किंवा प्रदर्शित झाल्यास) या सगळ्यांची सत्यता तपासावी आणि त्याची चौकशीही करावी, अशी मी आपणास विनंती करीत आहे”