मुंबई-महाविकास आघाडी सरकारच्या काळात प्रदीर्घ काळ सुरू असलेल्या एसटी कर्मचाऱ्यांच्या आंदोलनाचे नेतृत्व करणारे वकील गुणरत्न सदावर्ते यांच्या एसटी कष्टकरी जनसंघ पॅनलने एसटी महामंडळाच्या स्टेट ट्रान्सपोर्ट को-ऑपरेटिव्ह बँकेच्या निवडणुकीत सर्वच्या सर्व १९ जागा जिंकून एकतर्फी बाजी मारली. शरद पवार पुरस्कृत राष्ट्रवादी काँग्रेसच्या संदीप शिंदे यांच्या कर्मचारी संघटनेच्या पॅनलचा धुव्वा उडाला.
एकतर्फी विजयानंतर काढण्यात आलेल्या विजयी मिरवणुकीत नथुराम गोडसेचे बॅनर्स झळकावण्यात आले. मुंबईतील कॉटन एक्स्चेंज बिल्डिंग, कॉटन ग्रीन येथे मतमोजणी पार पडली.
विविध पक्षांच्या प्रस्थापित कामगार संघटनांना दूर करत सदावर्ते यांच्या संघटनेने मुसंडी मारली आहे. सदावर्ते आणि भाजप आमदार गोपीचंद पडळकर यांच्या दोन्ही संघटनेने बँकेच्या निवडणुकीत अपेक्षेपेक्षा जादा मतदान घेतले आहे. मुख्यमंत्री एकनाथ शिंदे यांच्या शिवसेनेचे सचिव किरण पावसकर यांचे राष्ट्रीय कामगार सेनेचे पॅनल ७ व्या क्रमांकावर गेल्याचे दिसून आले आहे.
एकूण पदे आणि मतदान
19 संचालक पदे
07 पॅनल, 150+ उमेदवार
65 हजार मतदार
58 हजार जणांनी केले मतदान