पुणे- कोंढवा परिसरात गुन्हे शाखेच्या खंडणी विरोधी पथकाने आयपीएल क्रिकेट सामन्यावर बेटिंग घेणाऱ्या सट्टेबाजांवर कारवाई करून त्यांना अटक केली. याप्रकरणी तीन आरोपींना अटक करण्यात आली आहे. आरोपींमध्ये पुणे शहरातील एका पबच्या मालकासह मोठ्या सट्टेबाजाचा समावेश असल्याने खळबळ उडाली आहे.
पोलिसांनी आरोपींच्या केलेल्या चौकशीत आयपीएल सामन्यांवरील बेटींगचे धागेदोरे नागपूर, मुंबई या शहरांसह दुबई पर्यंत असल्याचे उघडकीस आल्याने पोलिसांनी त्यादृष्टीने तपास सुरू केला आहे.तसेच आरोपींनी सट्टेबाजासाठी वेगवेगळ्या इमेल आयडीचा वापर केल्याचे तपासात उघडकीस आले आहे.
खंडणी विरोधी पथकाने शनिवारी रात्री कोंढव्यातील एका सदनिकेत छापा टाकून इक्राम मकसुद मुल्ला (वय २६, रा. मदने सोसायटी, घोरपडे पेठ,पुणे), वसिम हनीफ शेख (वय -३९, रा. साईबाबानगर, कोंढवा खुर्द,पुणे) आणि मुसाबिन मेहमुद बाशाइब (वय ३५, रा. सोमवार पेठ,पुणे) या आरोपींना अटक केली. याप्रकरणी जितेश मेहता (रा. पुणे) आणि अक्षय तिवारी (रा. इंदूर, मध्यप्रदेश) यांच्या विरुद्ध कोंढवा पोलिस ठाण्यात गुन्हा दाखल करण्यात आलेला आहे़. आरोपी जितेश मेहता हा पबमालक असून इंदूरमधील सट्टेबाज अक्षय तिवारी याच्यासोबत मेहताचे व्यवहारिक संबंध आहेत. गुन्हे शाखेचे अतिरिक्त पोलीस आयुक्त रामनाथ पोकळे, उपायुक्त अमोल झेंडे, सहायक आयुक्त सतीश गोवेकर यांच्या मार्गदर्शनाखाली पोलीस निरीक्षक अजय वाघमारे, उपनिरीक्षक मोहनदास जाधव, शंकर संपते आणि पथकाने ही कारवाई केली आहे.
संबंधित प्रकरणात अटक करण्यात आलेले आरोपी शेख, मुल्ला, बाशाइब यांची पोलीस कोठडी संपल्यावर त्यांना शिवाजीनगर न्यायालयात हजर केले असता, पोलिस तपासासाठी तिघांच्या पोलीस कोठडीत पाच दिवसांची वाढ करण्यात आली आहे.
