पुणे : ‘माइर्स एमआयटी – स्कूल ऑफ टेलिकॉम’ दरवर्षी नवस्थापित उद्योजकांच्या प्रयत्नांची प्रशंसा करुन त्यांचा गौरव केला जातो. यंदा हा पुरस्कार ‘एनकॉर्ड’च्या ई-हेल्थकार्ड या अभिनव संकल्पनेला मिळाला असून संस्थेतर्फे एमआयटी कॅम्पसमध्ये आयोजित ‘आयसीटी आंत्रप्रेन्युअरशिप फॉर इंडिया इम्पॅक्ट’ कार्यक्रमात काल तो सन्मानपूर्वक देण्यात आला.
‘माइर्स एमआयटी – स्कूल ऑफ टेलिकॉम’तर्फे ‘एनकॉर्ड’च्या ई-हेल्थकार्डचा पुरस्कार देऊन गौरव
पुरस्कार स्वीकारल्यानंतर बोलताना ‘एनकॉर्ड’चे संचालक प्रकाश लोहारकर म्हणाले, की आमच्या ई-हेल्थकार्डला वर्षभरात मिळत असलेला भरघोस प्रतिसाद व पाठिंबा भारावून टाकणारा आहे. या पुरस्काराच्या रुपाने आमच्या कामाची राष्ट्रीय पातळीवर दखल घेतली जाणे सन्मानाचे आहे. निरंतर यशासाठी अभिनव विचार वाढत्या प्रमाणात गरजेचे ठरतील, हेच यातून ठळक झाले आहे.
‘एनकॉर्ड’ने आरोग्यसुरक्षा क्षेत्रात बजावलेल्या कामगिरीबद्दल, तसेच ई-हेल्थकार्डसारखी अभिनव संकल्पना विकसित केल्याबद्दल हा गौरव करण्यात आला आहे. हे कार्ड वापरकर्त्याला जगभर त्याच्या वैद्यकीय तपशिलासाठी एकात्मिक संपर्क पुरवते. ई-हेल्थकार्ड ही वैयक्तिक आरोग्य तपशील प्रणाली म्हणजे क्लाऊड आधारित अभिनव पेटंटप्राप्त तंत्रज्ञान असून ते एनकॉर्ड हेल्थ कार्ड एलएलपी कंपनीने HITECH, HIPAA व HL7 या आंतरराष्ट्रीय मापदंडांनुसार विकसित केले आहे. हे कार्ड प्रत्येकाला लाईव्हवायर प्लॅटफॉर्मवर जागतिक आरोग्यसुरक्षा सेवा पुरवठादारांशी जोडते.
हा प्लॅटफॉर्म सर्व आरोग्य माहितीचे डिजीटल रुपांतर करतो व हा तपशील, तसेच विशिष्ट आरोग्य माहितीची इलेक्ट्रॉनिक साठवण, जतन व डाऊनलोडिंग कधीही, कुठेही करु देतो. या माहितीसाठ्यात वैद्यकीय विमा, अद्ययावत आरोग्य स्थिती, रक्तगट व इतर अनेक मूल्यवर्धित सेवांचा समावेश असतो. वैद्यकीय माहितीसाठा हस्तांतराचे सुसूत्रीकरण झाल्याने निदान अचूक व वेळेवर होण्यासाठी हे अभिनव संशोधन साधारण अथवा आपत्कालीन स्थितीत एक वरदानच आहे. हे कार्ड जगभरातील आरोग्यसुरक्षा व्यावसायिक, संशोधक, रुग्णालये व रुग्णांना सेवा पुरवते. क्लाऊडच्या माध्यमातून ई-हेल्थ कार्ड कधीही व कुठेही ॲक्सेस करता येते. वापरकर्ता मोबाईल ॲप्लिकेशनच्या मदतीनेही वैद्यकीय तपशील ॲक्सेस करु शकतो.
ई-हेल्थकार्ड न्यूयॉर्कमध्ये फेब्रुवारी २०१५ मध्ये, तर पुण्यात ऑक्टोबर २०१५ मध्ये सादर करण्यात आले. भारतातील ७ महानगरांत विस्तारण्याचे त्याचे लक्ष्य आहे. विस्तारासाठी भारताबरोबरच आग्नेय आशिया, पश्चिम आशिया व आफ्रिकी देश या बाजारपेठांवर आणि न्यूयॉर्क, अंकारा आदी ३० आंतरराष्ट्रीय शहरांवर लक्ष केंद्रित करण्यात आले आहे. या प्रत्येक भौगौलिक क्षेत्रात ‘एनकॉर्ड’चे भागीदार व सक्रिय सहयोगी आहेत. ‘एनकॉर्डस् ई-हेल्थकार्ड’चा समावेश ‘सिलिकॉन रिव्ह्यू’ मासिकाच्या ‘टॉप १० फास्टेस्ट ग्रोईंग हेल्थकेअर कंपन्यां’च्या यादीत करण्यात आला आहे.