पुणे, दि. १८: महाराष्ट्र विधानसभा निवडणूकीच्या आदर्श आचारसंहिता कालावधीत पुणे विभागाच्या भरारी पथकाने जिल्ह्यातील कारवाईत अवैध हातभट्टी दारू, देशी, विदेशी दारूची वाहतूक, विक्री व इतर साहित्य असे एकूण ४१ लाख ४२ हजार ३९५ रुपये किमतीचा मुद्देमाल जप्त करण्यात आला आहे, अशी माहिती राज्य उत्पादन शुल्क पुणे विभागाचे विभागीय उपायुक्त सागर धोमकर यांनी दिली आहे.
राज्य उत्पादन शुल्क पुणे विभागाच्या भरारी पथकाच्या कारवाईत १५ ऑक्टोबर ते १७ नोव्हेंबर २०२४ दरम्यान अवैद्य दारू निर्मिती वाहतूक व विक्रीवर आळा घालण्याच्या दृष्टिने मोहिम आखून पुणे जिल्ह्यातील अवैद्य गावठी हातभट्टी दारू निर्मितीच्या, बनावट विदेशी मद्य निर्मितीच्या तसेच अवैद्य दारू विक्रीच्या ठिकाणावर सातत्याने छापे मारून एकूण ५६ गुन्ह्यांची नोंद करण्यात आली असून त्यामध्ये ३५ वारस व २१ बेवारस गुन्ह्यांचा समावेश आहे.
या कारवाईमध्ये आतापर्यंत २७ आरोपी विरूद्ध गुन्हे नोंदविण्यात आले असून ६० हजार ८०० लिटर गावठी हातभट्टी दारू निर्मितीचे रसायन, ६ हजार ८६९ लिटर अवैद्य गावठी हातभट्टी दारू, गावठी हातभट्टी दारू निर्मितीचे साहित्य, १४४ ब.लि. विदेशी मद्य व बनावट मद्य निर्मिती साहित्य, ८३ ब.लि. देशी मद्य, ७ ब.लि. विदेशी मद्य, ७ ब.लि. बिअर व ८६३ लिटर ताडी असा एकूण ४१ लाख ४२ हजार ३९५ रूपये किंमतीचा मुद्देमाल जप्त केला आहे.
निरीक्षक नरेंद्र थोरात दुय्यम निरीक्षक विराज माने, सहाय्यक दुय्यम निरीक्षक अलिम शेख, जवान प्रताप कदम, सतीश पोंधे, अनिल थोरात, रंजीत चव्हाण, शशीकांत भाट, अमोल दळवी, राहूल तारळकर आदींनी या कारवाईत सहभाग घेतला.
यापुढे देखील विधानसभा निवडणूकीच्या आदर्श आचार संहितेच्या पार्श्वभूमीवर अवैद्य दारू व्यवसाय करणाऱ्यावर अशाच प्रकारची कारवाई सूरू राहणार असून कोठेही अवैद्य दारू व्यवसाय सूरू असल्यास राज्य उत्पादन शुल्क कार्यालयाच्या दूरध्वनी क्रमांक ०२०-२९९११९८६ वर संपर्क साधावा, असे आवाहन राज्य उत्पादन शुल्क विभागाकडून करण्यात आले आहे.
