छापेमारीने भाजपची प्रतिमा संशयाच्या भोवऱ्यात
पुणे-पुण्याच्या कोथरूड विधानसभा मतदारसंघात मंत्री चंद्रकांत पाटील यांच्याविरोधात बंडखोरी करण्याचे संकेत देणाऱ्या भाजप नेते अमोल बालवडकर यांच्या सासुरवाडीत प्राप्तिकर खात्याने मंगळवारी सकाळी धाड टाकली. ही कारवाई डबल महाराष्ट्र केसरी अभिजीत कटके यांच्या घरी करण्यात आली. कटके हे बालवडकर यांचे मेहुणे आहेत. त्यामुळे सत्ताधारी पक्ष आपल्या इच्छुक उमेदवारांची अशा प्रकारे गळचेपी करत असल्याची चर्चा राजकीय वर्तुळात रंगली आहे.
विधानसभा निवडणुकीच्या तोंडावर राज्यातील राजकारण चांगलेच तापले आहे. त्यातच सर्वच राजकीय पक्षांना इच्छुक उमेदवारांच्या बंडखोरीचेही ग्रहण लागले आहे. भाजपने पुण्याच्या कोथरूड विधानसभा मतदारसंघात मंत्री चंद्रकांत पाटील यांना उमेदवारी दिली आहे. पण तिथे भाजप नेते अमोल बालवडकर यांनी त्यांच्याविरोधात बंडखोरी करण्याचे संकेत दिलेत. भाजप प्रदेशाध्यक्ष चंद्रशेखर बावनकुळे यांनी त्यांच्या निवासस्थानी भेट देऊन बालवडकर यांची नाराजी दूर करण्याचा प्रयत्न केला. भाजपच्या अनेक नेत्यांनीही त्यांना समजवण्याचा प्रयत्न केला होता. पण त्यानंतरही बालवडकर यांनी माघार घेण्याचे संकेत दिले नव्हते.
या पार्श्वभूमीवर प्राप्तिकर खात्याने मंगळवारी सकाळी बालवडकर यांच्या सासुरवाडीत म्हणजे डबल महाराष्ट्र केसरी अभिजीत कटके यांच्या घरी धाड टाकली आहे. मंगळवारी सकाळी 7 वाजेपासून प्राप्तिकर विभागाचे अधिकारी त्यांच्या घराची झाडाझडती घेत आहेत. या कारवाईमुळे अमोल बालवडकर यांना निवडणुकीच्या रिंगणातून माघार घेण्यासाठी ही कारवाई करण्यात आल्याचा दावा केला जात आहे.
अभिजीत कटके हे भाजपचे पुण्यातील नेते आणि माजी नगरसेवक अमोल बालवडकर यांचे सख्खे मेहुणे आहेत. त्यांनी एकवेळा महाराष्ट्र केसरी, तर दोनवेळा उपमहाराआष्ट्र केसरी किताब जिंकला आहे. त्यांनी 2015 मध्ये युवा महाराष्ट्र केसरीचा मान मिळवला होता. त्यानंतर 2016 मध्ये ज्यूनिअर राष्ट्रीय कुस्ती स्पर्धेतही कांस्यपदक जिंकले होते.अभिजीत कटके यांनी 2023 मध्ये हैदराबाद येथे झालेल्या हिंदकेसरी कुस्ती स्पर्धेत हरियाणाचा कुस्तीपटू सोमवीर यांचा पराभव करत हिंदकेसरी किताब जिंकला होता.
पुण्यातील गणेश पेठेतील शिवरामदादा तालमीचा पैलवान म्हणून कटके यांची ओळख असून सदर ठिकाणी ते कुस्तीचा सराव करतात. राज्यातील नामांकित पैलवान अशी कटके यांची ओळख आहे. बालवडकर यांनी थेट मंत्री चंद्रकांत पाटील यांनाच कोथरुड मतदारसंघात आव्हान देण्याची भाषा केल्यामुळे राजकीय हेतूने ही छापेमारी केल्याचा संशय आहे. दरम्यान, प्राप्तिकर विभागाने या कारवाईविषयी अद्याप अधिकृत भाष्य केले नाही.
पुण्यातील वाघोली इथले अभिजित कटके यांच्या वाघोली आणि परिसरातील 15 जमीन विकासकांच्या कार्यालयात आणि घरी आयकर विभागानं पहाटे पाच वाजता छापेमारी केली. या ठिकाणी अजूनही तपासणी सुरू आहे.
भाजपाचे अमोल बालवडकर संतापले : आयकर विभागानं छापेमारी केल्यामुळे भाजपाचे नेते अमोल बालवडकर म्हणाले की, “आज सकाळी माझे मेहुणे हिंद केसरी अभिजीत कटके यांच्या घरावर इन्कम टॅक्सची छापेमारी झाली आहे. देशाचं नाव ज्यानं उंचावलं त्यांच्या घरी छापा पडणं ही आमच्यासाठी चिंतेची गोष्ट आहे. त्यांचे अवैध व्यवसाय नसताना देखील त्यांच्या घरावर छापेमारी झाली आहे. तो माझा मेव्हणा आहे म्हणून त्याच्या घरावर धाड पडली का असा मला प्रश्न पडतोय,” असं यावेळी बालवडकर म्हणाले.
भाजपामध्ये चंद्रकांत पाटील आणि बालवडकर वाद : विधानसभा निवडणुकीत कोथरूड मतदार संघातून भारतीय जनता पक्षाचे नेते राज्याचे उच्च आणि तंत्रशिक्षण मंत्री चंद्रकांत पाटील हे कोथरुड मतदार संघाचे आमदार आहेत. मात्र अमोल बालवडकर यांनी कोथरूड मतदार संघातून आमदारकीसाठी इच्छा व्यक्त केली. तेव्हापासून बालवडकर आणि पाटील यांच्यात संघर्ष पहायला मिळत आहे. अमोल बालवडकर हे आक्रमक भूमिका घेत कोथरूडमध्ये निवडणूक लढवण्यावर ठाम आहेत. मात्र भारतीय जनता पक्षाकडून पहिल्या यादीत मंत्री चंद्रकांत पाटील यांचं नाव आल्यानं बालवडकर हे नाराज झाले. ते बंड करणार असल्याची चर्चा सुरू असून आता पैलवान अभिजित कटके यांच्यावर झालेल्या आयकर विभागाच्या छापेमारीमुळे कोथरूड मतदार संघातील राजकारण तापलं आहे.
