पुणे : महाराष्ट्रीय कलोपासक आणि नाट्यसंस्कार कला अकादमी आयोजित भालबा केळकर नाटिका स्पर्धा दि. 10 ते दि. 12 जानेवारी तर महाराष्ट्रीय कलोपासक आयोजित राजा नातू करंडक आंतरशालेय एकांकिका स्पर्धा दि. 13 ते दि. 21 जानेवारी 2025 या कालावधीत होणार आहेत.
5 ते 10 वयोगटातील मुलांसाठी भालबा केळकर नाटिका स्पर्धा तर पाचवी ते दहावी या इयत्तेतील मुलांसाठी राजा नातू करंडक आंतरशालेय एकांकिका स्पर्धा घेण्यात येते. भालबा केळकर नाटिका स्पर्धेचे यंदाचे 32वे तर राजा नातू करंडक एकांकिका स्पर्धेचे यंदाचे तिसरे वर्ष आहे. स्पर्धांमध्ये सहभागी होऊ इच्छिणाऱ्या शाळांमधील शिक्षक प्रतिनिधींची पहिली सभा आज (दि. 20) इंदिरा मोरेश्वर सभागृह, डीएसके चिंतामणी, अप्पा बळवंत चौक येथे आयोजित करण्यात आली होती. स्पर्धेच्या नियोजनासंदर्भात शिक्षकांना संस्थेचे चिटणीस ॲड. राजेंद्र ठाकूरदेसाई यांनी माहिती दिली.
भालबा केळकर नाटिका स्पर्धेसाठी 36 तर राजा नातू करंडक आंतरशालेय एकांकिका स्पर्धेसाठी 26 शाळांनी अर्ज घेतले.
नाटिका आणि एकांकिका स्पर्धेत सहभागी होऊ इच्छिणाऱ्या शाळांमधील शिक्षक प्रतिनिधींसाठी नोव्हेंबर मध्ये कार्यशाळा घेतली जाणार आहे.
