पुणे-आंबेगाव पवनानगर, तसेच भाजे धबधबा परिसरात हुल्लडबाजी करणाऱ्या 7 पर्यटकांविरुद्ध लोणावळा ग्रामीण पोलिसांनी गुन्हा दाखल केला आहे.भुशी धरण परिसरातील धबधब्यात एकाच कुटुंबातील 5 जण वाहून गेल्याची घटना नुकतीच घडली होती. या दुर्घटनेनंतर जिल्हाधिकाऱ्यांनी पर्यटनस्थळी प्रतिबंधात्मक आदेश जारी केले. आदेशाचा भंग केल्याप्रकरणी भारतीय न्याय संहिता 2023 चे कलम 223 अन्वये 7 पर्यटकांविरुद्ध कारवाई करण्यात आली, अशी माहिती लोणावळा ग्रामीण पोलिस ठाण्याचे पोलीस निरीक्षक किशोर धुमाळ यांनी दिली.
धोकादायक पद्धतीने पर्यटन करणाऱ्या पर्यटकांविरुद्ध कारवाईचा बडगा उगारण्यात आला आहे. याबाबत पर्यटकांना वेळोवेळी सूचना देण्यात आल्याा. बंदोबस्तासाठी असलेल्या पर्यटकांची पोलिसांची नजर चुकवून पर्यटक धबधब्याच्या परिसरात जाऊन अपघातास निमंत्रण देत आहेत. आंबेगाव येथील डोंगररांगात असलेल्या धबधब्यावर 21 जुलै रोजी दुपारी दोनच्या सुमारास पोलिसांची नजर चुकून गेलेल्या 5 पर्यटकांवर कारवाई करण्यात आली. भाजे लेणी परिसरातील धबधब्याच्या बाजूला गेलेल्या 2 पर्यटकांविरुद्ध कारवाई करण्यात आली आहे. लोणावळा ग्रामीण पोलिसांनी आतापर्यंत धोकादायक पद्धतीने पर्यटन करणाऱ्या 15 पर्यटकांविरुद्ध गुन्हे दाखल केले आहेत.
लोणवळा शहर, तसेच ग्रामीण भागात पुणे, मुंबईतील पर्यटक मोठ्या संख्येने वर्षाविहारासाठी येतात. पर्यटकांनी आनंद घ्यावा. मात्र, पर्यटन करताना जीवाला धोका होईल, असे कृत्य करू नये. याबाबत वेळोवेळी सूचना देण्यात आल्या आहेत, तसेच पर्यटनस्थळांवर फलक लावण्यात आले आहेत. जिल्हाधिकाऱ्यांच्या आदेशाचा भंग करणाऱ्या पर्यटकांविरुद्ध यापुढील काळात कारवाई करण्यात येणार आहे, असा इशारा लोणावळा ग्रामीण पोलिस ठाण्याचे पोलिस निरीक्षक किशोर धुमाळ यांनी दिली आहे.
