कोणकोणत्या आमदारांच्या आहेत सह्या? सूत्रांच्या माहितीनुसार, या शीटवर मंत्री गुलाबराव पाटील, संजय राठोड, संतोष बांगर, दादा भुसे, दिलीप लांडे, मंगेश कुडाळकर, सदा सरवणकर, योगेश कदम, उदय सामंत, दीपक केसरकर आदींच्या स्वाक्षऱ्या आहेत. त्यामुळे ठाकरे गटाचे वकील उलटतपासणीत या प्रकरणी विविध प्रश्न विचारून शिंदे गटाच्या नेत्यांची अडचण करतील असा अंदाज आहे. विशेष म्हणजे आमदार दिलीप लांडे यांनी आपल्या उलटतपासणीत या शीटवरील सही आपलीच असल्याचे मान्य केले आहे. पण त्यांनी वर लिहिण्यात आलेला पक्षादेश क्रमांक आपली सही घेतल्यानंतर टाकण्यात आल्याचा दावा त्यांनी केला आहे.
मुंबई-शिवसेनेच्या सत्तासंघर्षाप्रकरणी शुक्रवारी झालेल्या सुनावणीत ठाकरे गटाने एक मोठा पत्ता उघड केला. त्यांनी 21 जून 2022 रोजी तत्कालीन मुख्यमंत्री उद्धव ठाकरे यांच्या सरकारी ‘वर्षा’ निवासस्थानी झालेल्या एका बैठकीची अटेंडंट शिट सादर केली. या शिटवर तब्बल 23 आमदारांच्या स्वाक्षऱ्या आहेत. विशेष म्हणजे याच बैठकीत एकनाथ शिंदे यांची गटनेतेपदावरून हकालपट्टी करण्याचा निर्णय घेण्याचा निर्णय घेण्यात आला होता. त्याला या 23 आमदारांनी अनुमोदन दिल्यामुळे शिंदे यांचा पाय खोलात गेल्याची चर्चा रंगली आहे.
शिवसेना आमदार अपात्रता प्रकरणाची शुक्रवारी 2 टप्प्यांत सुनावणी होणार आहे. पहिल्या टप्प्यात गटाचे वकील देवदत्त कामत यांनी शिंदे गटाचे आमदार दिलीप लांडे यांची उलटतपासणी घेतली. त्यात ठाकरे गटाने 21 जून 2022 रोजी वर्षा बंगल्यावर झालेल्या बैठकीची अटेंडंट शिट सादर केली. 21 जून 2022 च्या बैठकीला पक्षादेशानुसार किती आमदार उपस्थित होते? असा प्रश्न सुनावणीत वारंवार येत होता. त्यानुसार ठाकरे गटाने ही अटेंडंट शिट सादर केली. ही शीट ठाकरे गटाने आपल्या प्रतिज्ञापत्रात सादर केली होती.
या अटेंडंटशिटनुसार सुनील प्रभू यांनी व्हीप जारी करून 21 जूनच्या बैठकीला हजर राहण्याच्या सूचना केल्या होत्या. तद्नुसार या बैठकीला शिवसेनेचे 23 आमदार हजर राहिले होते. या आमदारांनी एकनाथ शिंदे यांची पक्षाच्या गटनेतेपदावरून हकालपट्टी केल्याच्या प्रस्तावावर स्वाक्षरी केली होती. आता या शीटवरील सह्या संबंधित आमदारांच्याच आहेत का? याची खातरजमा केली जाणार आहे.
ठाकरे गटाचे वकील देवदत्त कामत यांनी काल शिंदे गटाचे आमदार दिलीप लांडे यांची उलटतपासणी घेतली. त्यांनी लांडे यांना प्रतिज्ञापत्रातील काही परिच्छेदांवर प्रश्न विचारले. तुम्ही पक्षाच्या विचारधारेनुसार काम करत असाल तर 2005 मध्ये बाळासाहेब जिवंत असताना तुम्ही पक्ष का सोडला, असा थेट सवाल कामत यांनी लांडे यांना केला. त्यावर दिलीप लांडे यांनी आपल्यापुढे दिलेली साक्ष ही आताच्या वस्तुस्थितीवर दिल्याचे नमूद केले.
दिलीप लांडे म्हणाले की, मी साक्षीमध्ये पूर्वीची वस्तुस्थिती मांडली नाही. त्यामुळे आता जी वस्तुस्थिती आहे, हिंदुहृदयसम्राट बाळासाहेब ठाकरे यांचे विचार पुढे नेण्यासाठी व बाळासाहेबांनी जी शिकवण दिली आहे ती शिकवण आचरणात आणण्यासाठी त्या परिच्छेदात ते उत्तर दिले आहे.