पुणे : सूर्यदत्त एज्युकेशन फाउंडेशन संचालित सूर्यदत्त विधी महाविद्यालयात अमृतमहोत्सवी संविधान दिवस उत्साहात साजरा करण्यात आला. संविधानाने सर्वसामान्य भारतीयांना दिलेले अधिकार व त्यांची कर्तव्ये याचे शिक्षण देण्याचे हे एक व्यासपीठ असते. हाच विचार घेऊन सूर्यदत्त विधी महाविद्यालयात संविधान दिनानिमित्त विविध उपक्रमांचे आयोजन करण्यात आले होते. ‘सूर्यदत्त’चे संस्थापक अध्यक्ष प्रा. डॉ. संजय बी. चोरडिया यांच्या मार्गदर्शनाखाली आयोजित या संविधान दिन कार्यक्रमात ‘सूर्यदत्त’मधील विद्यार्थी, शिक्षक-शिक्षकेतर कर्मचारी मोठ्या संख्येने सहभागी झाले होते.
विद्यार्थ्यांच्या सर्वांगीण विकासासाठी पाठ्यक्रमाला अवांतर उपक्रमांची जोड देण्यावर अधिक भर असलेले प्रा. डॉ. संजय बी. चोरडिया म्हणाले, “भारतीय संविधान हे नागरिकांसाठी दीपस्तंभासारखे आहे. जे त्यांना त्यांच्या मार्गाचे मार्गदर्शन करतात आणि त्यांना त्यांच्या हक्कांची आणि कर्तव्यांची जाणीव करून देतात. संविधान आणि त्यातील मूलभूत मूल्यांचा आदर करणे ही आपली नैतिक आणि सामाजिक जबाबदारी आहे.”
सूर्यदत्त विधी महाविद्यालयाच्या वरिष्ठ प्राध्यापक केतकी बापट यांनी स्वागत-प्रास्ताविक करून कार्यक्रमाची सुरुवात झाली. विधी महाविद्यालयासह सूर्यदत्त इन्स्टिट्यूट ऑफ हेल्थ सायन्सेस कॉलेज ऑफ फिजिओथेरपी, सूर्यदत्त ज्युनिअर कॉलेज, सूर्यदत्त कॉलेज ऑफ फार्मसी हेल्थकेअर अँड रिसर्च, सूर्यदत्त कॉलेज ऑफ मॅनेजमेंट इन्फर्मेशन रिसर्च अँड टेक्नॉलॉजीच्या विद्यार्थी व शिक्षकांनी भारतीय संविधानाच्या उद्देशिकेचे सामूहिक वाचन केले. तसेच संवैधानिक मूल्ये जपण्याचा आणि त्यांचे पालन करण्याचा संकल्प केला.
सूर्यदत्त विधी महाविद्यालयाचे प्राचार्य, लेखक प्रा. डॉ. मिथिलेश विश्वकर्मा यांचे मुख्य भाषण झाले. डॉ. विश्वकर्मा जयपूर नॅशनल युनिव्हर्सिटीच्या सीडलिंग स्कुल ऑफ लॉ अँड गव्हर्नन्सचे विभागप्रमुख व उपसंचालक होते. आजवर त्यांनी अनेक विधी चर्चासत्रे, परिषद, परिसंवादाचे अध्यक्षपद भूषविले आहे. त्यांना वीसपेक्षा अधिक वर्षांचा शिकवण्याचा व प्रशासकीय कामाचा अनुभव आहे. जगातील सर्वात प्रदीर्घ लिखित संविधानाच्या निर्मिती प्रक्रियेवर विश्वकर्मा यांनी प्रकाश टाकला. संविधानात सुशासनाच्या तरतुदी सविस्तरपणे नमूद करत सुशासनासाठी त्या किती गरजेच्या आहेत, याविषयी त्यांनी सांगितले.
विश्वकर्मा यांच्या मार्गदर्शनानंतर सूर्यदत्त विधी महाविद्यालयातील दृष्या नेडुंगडी व शांभवी श्रीवास्तव यांनी प्रशमंजुषा स्पर्धा घेतली. त्यात उपस्थितांनी उत्स्फूर्त सहभाग नोंदवला. ‘भारतीय संविधान : अपेक्षा व वास्तव’ या विषयावर ‘सूर्यदत्त’च्या विद्यार्थ्यांसाठी पोस्टर स्पर्धा घेण्यात आली. ११ वी कॉमर्समधील सुमन चेतन परिहार हिने प्रथम, तर दीपादेवी प्रजापती हिने द्वितीय क्रमांक मिळवला. सूर्यदत्त इन्स्टिट्यूट ऑफ हेल्थ सायन्सेसच्या प्राचार्य डॉ. सिमी रेठरेकर, अॅनिमेशन विभागाच्या प्रा. तेजल निकम यांनी स्पर्धेचे परीक्षक म्हणून काम पाहिले.
प्रा. डॉ. संजय बी. चोरडिया म्हणाले, “दरवर्षी २६ नोव्हेंबरला संविधान दिन साजरा करण्यात येतो. याच दिवशी भारताने संविधान स्वीकारले. हा आनंदाचा प्रसंग भारताच्या लोकशाहीचा कणा बनलेल्या दस्तऐवजाचा मसुदा तयार करण्यासाठी संविधान सभेच्या समर्पित प्रयत्नांचे शिखर सूचित करतो. संविधान दिन भारताच्या लोकशाही प्रजासत्ताक प्रवासाचा पाया रचणाऱ्या निर्मात्यांना आदरांजली वाहतो आणि कायद्याच्या वर काहीही नाही याची आठवण करून देतो. संविधानात अंतर्भूत असलेली मूलभूत मूल्ये कायम राखण्यासाठी, विविधतेत एकतेची भावना जोपासण्यासाठी आणि सर्व नागरिकांसाठी न्याय आणि समानता सुनिश्चित करण्यासाठी वचनबद्धतेची पुष्टी करण्याची ही संधी वर्षातून एकदा येते.”
ग्रीष्म सुराणा आणि आख्या उपमन्यु यांनी सूत्रसंचालन केले तर कार्यक्रमाचा समारोप करताना प्रा. डॉ. मोनिका सेहरावत यांनी सर्व उपस्थितांचे आभार मानले.
