शनिवारी सोने-चांदीला पुन्हा झळाळी आली. सराफा बाजारात प्रतितोळ्यामागे सोन्याच्या भावात ६०४ रुपयांची वाढ होत भाव उच्चांकी ६५,७०० (जीएसटीसह) रुपयांवर पोहोचले. येत्या जानेवारीत सोने ६७ हजारांचा टप्पा ओलांडेल, असा अंदाज इंडिया बुलियन असाेसिएशनचे संचालक विजय लष्करे यांनी व्यक्त केला आहे. चांदीच्या भावातही ५५१५ रुपयांची वाढ होऊन ७९,८२५ वर पाेहाेचली.असे असले तरी यंदाच्या वर्षात म्युच्युअल फंडात सरासरी २० टक्के परतावा मिळाला. अमेरिकेने तिमाहीतील बेरोजगारीचा डेटा प्रसिद्ध केला. त्यानंतर गुंतवणूकदारांनी केलेल्या गुंतवणुकीतून पैसा काढून घेतला. शिवाय सोन्यात नैसर्गिक वाढ झाल्यामुळे जागतिक बाजारात सोने-चांदीचे दर ऑल टाइम उच्चांकावर पोहोचले आहेत. युक्रेन आणि रशिया युद्धानंतर सहा हजार रुपयांची तेजी पकडलेल्या सोन्याच्या भावात तेजी कायम होती. दिवाळीत साेने ६४ हजारांचा टप्पा ओलांडणार असा अंदाज जाणकारांनी आधीच व्यक्त केला होता. ती दरवाढ आधीच होत असून जानेवारीत सोन्याचे भाव ६७ हजारांपार जातील, असेही संकेत मिळत असल्याचे जाणकारांनी सांगितले.
शनिवारचे भाव
- सोने : ६५,७००
- चांदी : ७९,८२५
- दाेन्ही दर जीएसटीसह