मुंबई-हॉस्पिटलमध्ये असलेल्या लहान बालकांची विक्री करणाऱ्या टोळीचा मुंबई पोलिसांनी पर्दाफाश केला आहे. या टोळीत एका डॉक्टरचा देखील समावेश आहे. फर्टिलिटी केंद्रांत काम करणाऱ्या महिलांच्या मदतीने रॅकेट चालवलं जात असल्याची धक्कादायक माहिती समोर आली आहे. या टोळीने आतापर्यंत 14 बालकांची विक्री केल्याचे तपासात उघड झाल्याने मुंबईमध्ये एकच खळबळ उडाली आहे.
पोलिसांकडून मिळालेल्या माहितीनुसार, बालकांची विक्री करणाऱ्या महिला दलालासह एकूण 7 आरोपींच्या मुसक्या पोलिसांनी आवळल्या. तर तिघांची सखोल चौकशी केली जात आहे. अटक करण्यात आलेल्या आरोपींमध्ये वंदना अमित पवार, शितल गणेश वारे, स्नेहा सूर्यवंशी, नसीमा खान, लता सुरवाडे, शरद देवर आणि डॉ. संजय सोपानराव खंदारे यांचा समावेश असल्याची माहिती पोलिसांनी दिली.बालकांची विक्री करणाऱ्या टोळीचा पर्दाफाश केल्यानंतर संशयित आरोपींना न्यायालयासमोर हजर करण्यात आले. त्यांना सात दिवसांची पोलिस कोठडी सुनावण्यात आली. दुसरे म्हणजे आरोपींकडून आतापर्यंत लहान बाळांमध्ये 11 मुले आहेत, तर तीन मुली अशा एकूण 14 जणांची विक्री करण्यात आलेली आहे. पोलिस उपायुक्त रागासुधा आर. यांनी माध्यमांशी बोलताना सांगितले की, सदर आरोपींमध्ये एका बीएचएमएस डॉक्टरला देखील बेड्या ठोकल्या आहेत. तर फर्टिलिटी केंद्रामध्ये काम करणाऱ्या महिलांच्या मदतीने रॅकेट चालवलं जात असल्याचेही अधिकाऱ्यांनी सांगितले.
पोलिसांनी दिलेल्या माहितीनुसार आतापर्यंत 14 लहान बाळांची विक्री झाल्याचं समोर आलं असून 2 बाळांची सुखरुप सुटका करण्यात मुंबई पोलिसांना यश आलं आहे. अटकेतील आरोपी मुंबईमधील काही हॉस्पिटलमध्ये काम करत आहेत. बालक विक्री प्रकरणात काही हॉस्पिटल देखील मुंबई पोलिसांच्या रडारवर आहेत.
आरोपीमध्ये डॉ. संजय सोपानराव खंदारेचं दिव्यामध्ये दवाखाना आहे. मुळचा नांदेडचा रहिवासी असणारा हा डॉक्टर या रॅकेटमध्ये सहभागी असल्याचे समोर आलं आहे. पोलिस उपायुक्त रागासुधा आर. म्हणाले की, कदाचित या डॉक्टरकडे लहान मुलांचे हे पालक गेले असावेत. तिथं त्यांचा संपर्क झाला असावा असा आमचा संशय आहे. तेलंगणा आणि हैदराबादमधून खास करून बाळांच्या खरेदीची डिमांड असल्याचे पोलिसांचे म्हणणे आहे.