पुणे-अमित ठाकरे यांनी आज येथे सांगितले कि, लोकसभा निवडणुकीच्या प्रचारासाठी राज ठाकरे आणि पंतप्रधान मोदी यांची मुंबईत एकत्र सभा होईल . त्यामुळे राज ठाकरे हे लोकसभा निवडणुकीत महायुतीच्या बाजूने प्रत्यक्ष प्रचारात उतरणार असल्याचे स्पष्ट झाले आहे.याचवेळी पुण्यातील मनसेचे माजी नगरसेवक आणि वंचित चे लोकसभा उमेदवार वसंत मोरे हे सोशल मिडिया च्या भूलभुलैय्याच्या आहारी गेलेले आहेत , निवडणुकीत हे स्पष्ट होईल असे ते म्हणाले.
राज ठाकरे आणि पंतप्रधान नरेंद्र मोदी एकाच मंचावर दिसतील. लवकरच राज ठाकरे आणि पंतप्रधान नरेंद्र मोदी यांची जाहीर सभा मुंबईतील शिवाजी पार्क मैदानावरती होईल अशी माहिती अमित ठाकरे यांनी पत्रकारांशी अनौपचारिक संवाद साधताना दिली आहे.दरम्यान मनसे नेते अमित ठाकरे आज पुणे दौऱ्यावर आले आहेत. पुण्यात अमित ठाकरे आज प्रभाग निहाय बैठका घेत आहेत. महायुतीला दिलेल्या पाठिंबाबाबत ते पदाधिकाऱ्यांसोबत बोलत आहेत. तर दुसरीकडे मनसेतील काही पदाधिकाऱ्यांनी महायुतीला पाठिंबाबात नाराजी व्यक्त केली आहे. यावर आता मनसेने पक्षाचे काम करणार नाहीत त्यांच्यावर कारवाई करण्यात येणार असल्याचे सांगण्यात आले आहे.
अमित ठाकरे म्हणाले की, वसंत मोरे हे सोशल मीडियाच्या आहारी गेल्याचा चिमटा त्यांनी काढला. मनसेने लोकसभा निवडणूक न लढविण्याची भूमिका घेतल्यानंतर मोरे यांनी मनसेला जय महाराष्ट्र केला होता. त्यानंतर त्यांनी काँग्रेस, राष्ट्रवादी शरद पवार गटाकडे उमेदवारीसाठी चाचपणी केली होती. त्यानंतर त्यांनी वंचितचे प्रकाश आंबेडकर यांची पण भेट घेतली होती.पुणे लोकसभा निवडणुकीत वसंत मोरे बहुजन वंचित आघाडीकडून लढत आहेत. त्यांना महाविकास आघाडीचे उमेदवार रवींद्र धंगेकर, माजी महापौर आणि महायुतीचे उमेदवार मुरलीधर मोहोळ यांचा सामना करावा लागणार आहे. पुणे लोकसभेची लढत तिरंगी होणार आहे. तर चार दिवसांपूर्वीच राज ठाकरे यांना भेटणार असल्याचे ते म्हणाले होते .
मनसे नेते बाबू वागास्कर म्हणाले, पक्षप्रमुख राज ठाकरे यांनी पंतप्रधान नरेंद्र मोदी आणि महायुती यांना जाहीर बिनशर्ता पाठिंबा दिलेला आहे.त्यानुसार पुणे शहरातील पक्षाचे संघटक व शाखाध्यक्ष यांच्याशी प्रचाराबाबत बोलणे झाले आहे .अमित ठाकरे यांनी महायुतीच्या प्रचारात पक्षाच्या कार्यकर्त्यांनी सक्रिय होण्याचे संकेत दिले आहे. त्यानुसार पुण्यातील महायुती उमेदवार मुरलीधर मोहोळ यांना आम्ही पाठिंबा दिला आहे .मोहोळ यांचा प्रचार करण्यासाठी कार्यकर्ते पुण्यातील सहा विधानसभा मतदारसंघात यापुढे सक्रिय होतील.
