पुणे – पुणेरी पाट्यांप्रमाणे पुणे शहरातील बॅनर नेहमी चर्चेचा विषय असतो. पुणे शहरात लागलेल्या या बॅनरची चर्चा राज्यभर होत असते. मग राजकीय बॅनर असतील तर त्यासंदर्भात अधिकच कुतूहल तयार झालेले असते. गेल्या काही दिवसांपासून राज्यातील विविध नेत्यांचे ‘भावी मुख्यमंत्री’ म्हणून उल्लेख असलेले बॅनर लागताना पाहायला मिळत आहे. अजित पवार यांच्यानंतर आता यात आता शिवसेनेच्या तानाजी सावंत यांची भर पडली आहे. लोकसभा निवडणुकीमुळे राज्याचे राजकारण तापले असतानाच शिवसेनेचे नेते तानाजी सावंत यांचे भावी मुख्यमंत्री म्हणून पुण्यात बॅनर लागल्याने तोंडात बोटे घालण्याची वेळ पुणेकरांच्यावर आली आहे.एवढेच नव्हे तर अशी पोस्टर्स फेसबुकवर हि दिसत आहेत. यामुळे एकनाथ शिंदेंनंतर शिवसेनेत तानाजी सावंत हे देखील मुख्यमंत्रीपदाचे दावेदार आहेत का? असा विस्मयकारी प्रश्न उपस्थित होतो आहे.
दरम्यान तानाजी सावंत यांनाएका उत्साही चाहत्याने यांनी वाढदिवसाच्या शुभेच्छा दिल्या आहेत. या शुभेच्छा देताना तानाजी सावंत यांचा उल्लेख भावी मुख्यमंत्री केला आहे. त्यांनी पुणे शहरात लावलेले हे बॅनर चर्चेचा विषय ठरला आहे. पुण्यातील कात्रज चौकात हे बॅनर लावण्यात आले आहे. यामुळे सावंत यांच्या राजकीय महत्त्वाकांक्षेला पंख फुटल्याची एकच चर्चा समाज माध्यमात होत आहे.
एकीकडे महायुतीच्या बैठकांचा सपाटा सुरू असताना तर दुसरीकडे जागावाटपावरुन रस्सीखेच सुरू असताना तानाजी सावंत यांचा भावी मुख्यमंत्री म्हणून उल्लेख करण्यात आलेले बॅनर मात्र चर्चेचा विषय ठरले आहेत. तसेच हे बॅनर सावंत यांच्या संमतीने लावले आहे की कार्यकर्त्यांनी अतिउत्साहीपणात हे बॅनर लावले आहेत, याचीही चर्चा होत आहे.