इंदापूर -बारामती हा माझा मतदारसंघ आहे. माझ्या मतदारसंघात कोणी दमदाटी केली तर गाठ माझ्याशी आहे असा इशारा राष्ट्रवादीच्या शरद पवार गटाच्या खासदार सुप्रिया सुळे यांनी इंदापूर येथे बोलताना अजित पवार गटाला दिला आहे. तसेच हर्षवर्धन पाटील यांना कुणी शिव्या घातल्या तर मी ढाल बनून उभी राहीन. भाजपचे नेते हर्षवर्धन पाटील यांना धमकी देण्यात आल्याचा दावा त्यांनी स्वतः पत्राद्वारे केला होता. यावरूनच सुप्रिया सुळे यांनी निशाणा साधला आहे.
यावेळी बोलतांना सुप्रिया सुळे म्हणाल्या, ”आजनंतर बारामती लोकसभा मतदारसंघ किंवा महाराष्ट्रात कुणीही आमच्या कार्यकर्त्यांना धमकी दिली तर त्यांना सांगायचे आधी सुप्रिया सुळेंना धमकी दे, मग माझ्याशी बोल. कुणीही शिवीगाळ करायची नाही. सत्तेची आणि पैशाची मस्ती आहे. जसा चढ असतो तसा उतारही असतो”, असे सुप्रिया सुळे म्हणाल्या.
बारामती हा माझा मतदारसंघ आहे. मी इथली खासदार आहे. त्यामुळे इथे कोणीही दमदाटी करायची नाही. कोणीही धमकी द्यायची नाही. नाही तर गाठ माझ्याशी आहे असे सुप्रिया सुळे म्हणाल्या.
पुढे त्या म्हणाल्या ”भाजप आणि त्यांचे मित्रपक्ष एकमेकांवर असे हल्ले करतात, हर्षवर्धन पाटलांना शिव्या घातल्यात, ही इंदापूर आणि महाराष्ट्राची संस्कृती आहे?, एका मित्रपक्षाचा नेता दुसऱ्या मित्रपक्षाच्या नेत्याला शिवीगाळ करतो. हर्षवर्धन पाटील यांना राज्याच्या मुख्यमंत्र्यांना पत्र लिहून सांगावे लागले”, असा टोलाही सुप्रिया सुळे यांनी महायुतीला लगावला आहे.
खालच्या पातळीवरील एकेरी व शिवराळ भाषेत बेताल वक्तव्य करत आपणास तालुक्यात फिरु देणार नाही, अशी धमकी देणाऱ्या मित्र पक्षातील गुंड प्रवृत्तीच्या लोकांवर वेळीच आळा घालावा. ठोस भूमिका घेऊन योग्य त्या कारवाईचे आदेश देण्यात यावेत, अशी मागणी नुकतेच भाजपाचे नेते हर्षवर्धन पाटील यांनी लेखी पत्राद्वारे मुख्यमंत्री एकनाथ शिंदे, उपमुख्यमंत्री देवेंद्र फडणवीस यांच्याकडे केली आहे. त्यावरून सुप्रिया सुळे यांनी महायुतीच्या नेत्यांचा समाचार घेतला.
