मुंबई-माजी मंत्री आणि एकनाथ शिंदे गटाचे विजय शिवतारे यांनी बरोबर निवडणूक समयी उपमुख्यमंत्री अजित पवार यांना अडचणीत आणून राजकीय वैमनस्याचा वचपा काढण्यासाठी बारामती लोकसभा मतदारसंघात अजित पवारांना आव्हान देणे सुरु केले आहे. त्यांनी अजित पवारांना थेट आव्हान देत मी लोकसभेच्या निवडणुकीत उतरणार असल्याची वल्गना केली. त्यामुळे महायुतीचा घटक पक्ष असलेले शिंदे व अजित पवार गटात चांगलाच वाद उफाळला आहे. दरम्यान, आता एकनाथ शिंदे यांनी विजय शिवतारे यांना भेटीसाठी बोलावले होते. मात्र, एकनाथ शिंदेंनी विजय शिवतारेंना 6 तासापासून वर्षा बंगल्यावर ताटकळत ठेवले आहे.
पुरंदर तालुक्याची शिवसेनेचे माजी आमदार विजय शिवतारे यांनी अजित पवारांवर जोरदार हल्लाबोल केला. शिवतारे म्हणाले की, मी त्यांना महायुती झाल्यानंतर माफ केले होते. मात्र अजित पवार यांचा उर्मटपण गेलेला नाही. जनता त्यांना निवडून देणार नाही. मी बारामतची लोकसभा निवडणूक लढवणारच आहे.अजित पवारांचा बदला घेणारच असा निर्धारच विजय शिवतारे यांनी केला होता. सुप्रिया सुळे की सुनेत्रा पवार असा प्रश्न आहे. मात्र, अजित पवार उर्मट आहेत, त्यामुळे लोक आम्ही सुप्रिया सुळेंनाच मतदान करु असे म्हणत आहेत”, असं विजय शिवतारे यांनी बोलून दाखवले आहे.
बारामती लोकसभा मतदारसंघ हा कोणाचा सातबारा नाही. लोकसभेचे 543 मतदारसंघ आहेत. त्यापैकीच हा एक आहे. त्यामुळे पवारांच्या नावाचा जयघोष करण्यापेक्षा मी स्वाभिमानाने लढले पाहिजे. अजित पवारांनी असभ्यतेची नीच पातळी गाठली आहे, असा जहरी टीकाही विजय शिवतारे यांनी केली होती.
आपल्याकडे लोकशाही आहे. सर्वांना बोलण्याचा अधिकार असतो. शिवाय निवडणूक लढवण्याचेही अधिकार आहेत. सध्या आम्ही महायुतीमध्ये काम करत आहोत. कोणाही राजकीय वातावरण बिघडेल, असं बोलू नये. महायुतीतील प्रत्येक पक्षाच्या कार्यकर्ते आणि नेत्यांनी आपल्या पक्षाच्या वरिष्ठांसोबत बोलावे, असं अजित पवारांनी स्पष्ट केलंय.
2019 च्या महाराष्ट्र विधानसभा निवडणुकीपासून अजित पवार आणि विजय शिवतारे यांचा वाद वाढीस लागला. विजय शिवतारे यांनी शरद पवारांविरोधात टोकाची टीका केली होती. त्यानंतर अजित पवारांनी शिवतारे यांच्या मतदारसंघात सभा घेतली होती. या सभेत अजित पवार म्हणाले होते की, “विजय शिवतारे पोपटासारखा मिठू मिठू बोलाय लागलाय. तुझ बोलण किती आहे आणि तुझा आवाका किती आहे? आमचं दैवत असणाऱ्या माणसाविरोधात बोलतो. तुला यंदा दाखवतो तू आमदार कसा होतो ते. अख्ख्या महाराष्ट्राला माहिती आहे की, मी जर एखाद्याला आमदार करायचं नाही असं ठरवलं तर कोणाच्या बापाला ऐकत नाही.” त्यानंतर झालेल्या विधानसभा निवडणुकीत विजय शिवतारेंचा पराभव झाला.
अजित पवारांचा बदला घेणार
जुन्या पराभवाचा वचपा काढण्यासाठी विजय शिवतारेंनी अजित पवारांविरोधात बारामतीतून शड्डू ठोकलाय. मी विधानसभा निवडणूक लढवणारच असं शिवतारेंनी म्हटलय. अजित पवारांनी त्यांच्याविरोधात केलेली विधाने दोघांतील वाद वाढण्यास कारणीभूत ठरली आहेत. त्यामुळे लोकसभा निवडणुकीत विजय शिवतारे युतीधर्म पाळून अजित पवारांना मदत करतात की, स्वत: निवडणुकीसाठी उमेदवारी अर्ज भरतात याकडे सर्वांचे लक्ष आहे. दरम्यान मुख्यमंत्री शिंदेंनी यावर मार्ग काढण्यासाठी शिवतारेंना वर्षा निवासस्थानी बोलावले होते.
