मुंबई दिनांक १४ मार्च २०२४
पंतप्रधान नरेंद्र मोदींच्या आवाहनानुसार, स्टार्ट अप इंडिया अंतर्गत असीम शक्ती फाउंडेशनची स्थापना करत महिलांना स्वावलंबी बनविणाऱ्या स्वाती सिंग यांचा महाराष्ट्राचे उपमुख्यमंत्री देवेंद्र फडणवीस यांच्या हस्ते गौरव करण्यात आला. अयोध्येतील राम मंदिराची प्रतिकृती देऊन स्वाती यांना सन्मानित करण्यात आले. यावेळी माजी राज्यमंत्री अमरजीत मिश्रा, विजय सिंह देखील उपस्थित होते.
“रेडी टू वेअर साडी विथ पॉकेट्स” या संकल्पनेचे पेटंट घेऊन स्वाती यांनी भारतीय पोशाख बाजारात उपलब्ध करून दिले आहेत. त्याचबरोबरआर्थिकदृष्ट्या दुर्बल महिलांना रोजगारही उपलब्ध करून दिला आहे. स्वाती यांचे कार्य उल्लेखनीय आहे. असे सांगत उपमुख्यमंत्री श्री.फडणवीस यांनी स्वातीच्या कार्याचे कौतुक केले आणि त्या इतर मुलींसाठी प्रेरणादायी ठरतील असा विश्वास व्यक्त केला.
नुकतेच क्रियेटर अवॉर्ड सोहळ्यात पंतप्रधान मोदी म्हणाले होते की, आता रेडीमेडचे युग आहे. पगडी घालण्याऐवजी आजचा तरुण रेडिमेड पगडी घालतो, आता रेडिमेड धोतरही बाजारात आले आहे. मुलींना सहज भारतीय कपडे घालता यावेत यासाठी रेडीमेड साड्याही बनवाव्यात, असे आवाहन त्यांनी केले होते. तर गेल्या काही वर्षांपासून स्वाती यांची संस्था असीम शक्ती फाउंडेशन महिलांना स्वावलंबी बनवण्यासाठी हा उपक्रम राबवत आहे.स्वाती यांचा कारखाना अंधेरीतील एका झोपडपट्टीत आहे.
