मुंबई-अजित पवार यांच्या राष्ट्रवादी काँग्रेसने राज्यसभेच्या निवडणुकीसाठी (Rajya sabha Election) आपला उमेदवार जाहीर केला आहे. प्रफुल्ल पटेल (Praful Patel) हेच राज्यसभेचे उमेदवार असतील. राज्यसभेसाठी उमेदवारी अर्ज भरण्याचा उद्या १५ फेब्रुवारी ही शेवटची तारीख आहे. आजच महायुती आणि काँग्रेसने आपले उमेदवार जाहीर केले आहेत. महायुतीमध्ये भाजपकडून नुकतेच काँग्रेसमधून आलेले अशोक चव्हाण, पुण्याच्या माजी आमदार मेधा कुलकर्णी, डॉ. अजित गोपछडे यांना तर शिवसेनेकडून मिलिंद देवरा यांना उमेदवारी जाहीर केली. दुसरीकडे काँग्रेसने ज्येष्ठ नेते आणि माजी मंत्री चंद्रकांत हंडोरे यांना उमेदवारी दिली आहे.प्रफुल पटेल हे सध्या राज्यसभेचे खासदार आहेत. त्यांचा कार्यकाळ मे 2027 मध्ये संपणार आहे. मात्र त्यापूर्वीच 3 वर्षे आधी प्रफुल पटेल हे राजीनामा देऊन पुन्हा अर्ज भरतील. काही तांत्रिक मुद्दे असल्याने हा निर्णय घेत आहोत, असं प्रदेशाध्यक्ष सुनील तटकरे यांनी सांगितलं. मात्र कार्यकाळ संपण्याच्या तब्बल 3 वर्ष आधी हा निर्णय का घेतला याबाबत राजकीय वर्तुळात चर्चा सुरु आहेत.
मुख्यमंत्री एकनाथ शिंदे यांच्या शिवसेनेच्या वतीने देखील राज्यसभेसाठी उमेदवाराच्या नावाची घोषणा करण्यात आली आहे. काँग्रेस पक्षाला सोडचिट्टी देत एकनाथ शिंदे यांच्या शिवसेनेमध्ये दाखल झालेले मिलिंद देवरा यांना राज्यसभेची उमेदवारी देण्यात आली आहे. मिलिंद देवरा हे एकेकाळी मुंबई काँग्रेसचे मोठे नाव होते. प्रदेश काँग्रेसचे तगडे नेते म्हणून त्यांची गणना होत होती. मिलिंद देवरा यांना 15 व्या लोकसभेचे सर्वात तरुण सदस्य म्हणून ओळख मिळाली आहे. वयाच्या अवघ्या 27 व्या वर्षी ते खासदार झाले होते. 2004 च्या निवडणुकीत मिलिंद देवरा यांनी भाजप उमेदवार जयवंतीबेन मेहता यांचा 10 हजार मतांनी पराभव केला होता. मिलिंद देवरा यांनी 2009 मध्ये दक्षिण मुंबई मतदारसंघातून विजय मिळवला होता. त्यांचा जन्म 4 डिसेंबर 1976 रोजी मुंबईत झाला. त्यांचे वडील ज्येष्ठ राजकारणी आणि काँग्रेसचे मोठे नेते मुरली देवरा आहेत. मिलिंद देवरा यांनी काँग्रेसमध्ये अखिल भारतीय सह कोषाध्यक्ष म्हणूनही काम केले आहे. ते मुंबई काँग्रेसचे अध्यक्षही राहिले आहेत.अलीकडेच त्यांनी एकनाथ शिंदे यांच्या शिवसेनेत प्रवेश केला होता. त्यांना लोकसभेची उमेदवारी देण्यात येईल, अशी शक्यता वर्तवली जात होती. मात्र, त्यांना राज्यभेची उमेदवारी देण्यात आली आहे.
सर्व उमेदवार जाहीर
भाजपचे उमेदवार – अशोक चव्हाण, मेधा कुलकर्णी, डॉ. अजीत गोपछडे
शिंदे गटाचे उमेदवार – मिलिंद देवरा
अजित पवार गट – प्रफुल्ल पटेल
चंद्रकांत हंडोरे -कॉंग्रेस