पुणे: एका नामांकित कॉलेजच्या प्राचार्यांना बाललैंगिक अत्याचाराच्या गुन्ह्यात अटक करण्याची धमकी देऊन सात लाख रुपयांची खंडणी मागणाऱ्या पीएसआय अजित बडे, रिल्स स्टार पोलिस कर्मचारी सोनाली हिंगे आणि सुदाम तायडे या तिघांना पोलिस दलातून बडतर्फ करण्यात आले आहे. संबंधित तिन्ही पोलिस कर्मचारी हे गुन्हा दाखल झाल्यापासून पसार झाले आहे.
अपर पोलिस आयुक्त (प्रशासन) संजय पाटील यांनी या बडतर्फीचे आदेश दिले आहेत. या तिघांविरुद्ध बंडगार्डन पोलिस ठाण्यात खंडणीचा गुन्हा दाखल करण्यात आला आहे. गुन्हा दाखल झाल्यापासून हे तिघेही अद्याप फरार आहेत. यापूर्वी त्यांच्यावर निलंबनाची कारवाई करण्यात आली होती.प्राचार्यांकडून खंडणी उकळण्यासाठी या तिघांनी एका अल्पवयीन मुलीचा वापर केल्याचे समोर आले आहे. त्यांचे हे वर्तन अत्यंत गंभीर स्वरूपाचे मानले जात आहे. गुन्हे शाखेचे अपर पोलिस आयुक्त शंकर खटके यांच्याकडे सोपवण्यात आलेल्या प्राथमिक चौकशीत सोनाली हिंगे, अजित बडे आणि सुदाम तायडे हे खंडणी उकळणे व धमकी देणे या प्रकारात दोषी आढळले आहेत.
या तिघांनी केलेल्या कृत्यामुळे पोलिस दलाची प्रतिमा जनमानसात मलीन झाली आहे. तिघे फरार असल्याने ते विभागीय चौकशीला हजर राहू शकले नाहीत. फरार कालावधीत ते साक्षीदारांना धमकावू शकतात, अशी शक्यता वर्तवण्यात आली होती.पोलिसांवर जनतेचा विश्वास कायम राहावा यासाठी त्यांना पोलिस दलातून बडतर्फ करणे आवश्यक असल्याचे आदेशात नमूद आहे. त्यामुळे विभागीय चौकशी बाजूला ठेवून, मिळालेल्या अधिकारानुसार संविधानातील कलम 311(2) नुसार या तिघांना बडतर्फ करण्यात आले आहे.
