पुणे: नसरापूर अत्याचार प्रकरणात आरोपीला जरूर जास्तीतजास्त शिक्षा व्हावी पण शिक्षा देण्याबाबत बेकायदेशीर मागन्या नेत्यांनी तरी करू नये. असे केल्याप्रकरणी महाराष्ट्र नवनिर्माण सेनेचे अध्यक्ष राज ठाकरे यांच्यावर गुन्हा दाखल करावा,किंवा बोलावून समज द्यावी अशी मागणी वकील असीम सरोदे यांनी पोलिसांकडे केली आहे.
अत्याचार प्रकरणातील ६५ वर्षीय नराधमाला सरकारने कायदा काय सांगतो किंवा अजून कोण काय म्हणेल याचा विचार न करता हालहाल करत संपवावं, अशी भूमिका महाराष्ट्र नवनिर्माण सेनेचे अध्यक्ष राज ठाकरे यांनी समाज माध्यमावरील पोस्टमधून मांडली आहे. या भूमिकेला विरोध करत ठाकरे यांची मागणी बेकादेशीर असून आरोपीला कायद्यानुसारच कठोर शिक्षा व्हावी, अशी भूमिका मांडत ॲड. सरोदे यांनी बेकादेशीर मागण्या करणाऱ्या ठाकरे यांच्यावर गुन्हा दाखल करण्याची मागणी केली.
अत्याचार प्रकरणातील नराधमाला कायद्यानुसार निश्चित फाशीची शिक्षा होईल. पण ती होण्याआधी त्याचा चौरंग करा, त्याला हालहाल करून संपवा, अशा बेकायदेशीर मागण्या करणारे अभिनेते व दिग्दर्शक प्रवीण तरडे आणि राज ठाकरे यांच्यासारख्या लोकांना पोलिसांनी बोलावून घेऊन समज दिली पाहिजे किंवा अशा लोकांवर गुन्हा दाखल केला पाहिजे. एखादी घटना घडल्यानंतर तेवढ्या घटनेपुरता कायदा बाजूला ठेवून वागावं आणि नंतर पुन्हा लोकशाहीने वागावं, असे सोयीनुसार करता येत नाही, असे मत ॲड. सरोदे यांनी मांडले.
