पुणे: पुण्यासारख्या शिस्तप्रिय आणि नियमांचे भान ठेवणाऱ्या शहरात एक धक्कादायक प्रकार समोर आला आहे. पुणे महानगर परिवहन महामंडळ लिमिटेडची (PMPML) बस चक्क एका तरुणाने पळवून नेण्याचा प्रयत्न केल्याची घटना शनिवारी दुपारी उघडकीस आली.
सुदैवाने पोलिसांची तत्परता आणि नागरिकांची जागरूकता यामुळे मोठा अपघात टळला. पोलिसांनी दिलेल्या माहितीनुसार, दुपारी सुमारे अडीच वाजण्याच्या सुमारास मनपा-वाघोली-मनपा या मार्गावरील बस महानगरपालिकेच्या डेपोमध्ये CNG भरण्यासाठी उभी होती. यावेळी संबंधित चालकाची दुसऱ्या बसवर ड्युटी लागल्याने तो घाईत चावी बसमध्येच ठेवून निघून गेला. हीच संधी साधत एका अज्ञात युवकाने बस ताब्यात घेतली आणि ती थेट रस्त्यावर घेऊन गेला.
हा प्रकार अधिक गंभीर तेव्हा झाला, जेव्हा आरोपीने बस JM रोड मार्गे पुढे नेत नटराज चौक येथून राँग साईडने गुडलक चौककडे धाव घेतली. भर गर्दीच्या भागात बस बेफामपणे चालवल्याने नागरिकांमध्ये भीतीचे वातावरण निर्माण झाले.
दरम्यान, गुडलक चौकात त्यावेळी आंदोलन सुरू असल्याने मोठी गर्दी होती. योगायोगाने पोलिसांचा बंदोबस्तही तिथे तैनात होता. राँग साईडने येणारी बस पाहताच पोलिसांनी आणि उपस्थित नागरिकांनी तात्काळ धाव घेतली. काही काळ तणावाचे वातावरण निर्माण झाले. आपल्याही अंगावर बस येईल की काय, अशी भीती काहींना वाटू लागली. काहींनी बस थांबवण्याचा प्रयत्न केला, तर काहींनी थेट चालकाला खाली उतरवले. त्यानंतर संतप्त नागरिकांनीही आरोपीला चोप दिला. त्यानंतर पोलिसांनी त्याला ताब्यात घेतले .
या घटनेनंतर आरोपीला डेक्कन पोलीस ठाणे येथे नेण्यात आले आहे. त्याच्यावर गुन्हा दाखल करण्याची प्रक्रिया सुरू आहे. प्राथमिक चौकशीत तो उडवाउडवीची उत्तरे देत असल्याची माहिती समोर आली आहे. त्याची वैद्यकीय तपासणी करून मद्यप्राशन केले होते का? याचाही तपास केला जाणार आहे.
या प्रकरणात सर्वात मोठा प्रश्न म्हणजे निष्काळजीपणा नेमका कुणाचा? चालकाने चावी बसमध्येच का ठेवली? डेपोमध्ये सुरक्षा व्यवस्था का अपुरी ठरली? याबाबतही आता चौकशी होणार असून संबंधितांवर कारवाई होण्याची शक्यता आहे.
सुदैवाने या संपूर्ण प्रकारात कोणतीही जीवितहानी झाली नाही. मात्र, जर वेळीच पोलीस आणि नागरिकांनी हस्तक्षेप केला नसता, तर मोठी दुर्घटना घडण्याची शक्यता नाकारता येत नाही. आता पुढील तपासातून आरोपीचा नेमका उद्देश काय होता? तो कुठून आला आणि या मागे आणखी कोणी आहे का? याचा उलगडा होणार आहे
