वीजपुरवठ्याची लपाछपी:वीज कर्मचाऱ्यांची कसरत

झाडे पडणे, पाणी तुंबल्यामुळे वीजवाहिन्या बाधित–दुरुस्तीचे काम वेगाने सुरू

पुणे, दि. २ एप्रिल, २०२६ – पुणे शहर व परिसरात गुरुवारी (दि. २) दुपारी विजांच्या कडकडाटासहझालेल्या मुसळधार पावसामुळे आणि वादळामुळे अनेक अतिउच्चदाब (EHV) व उच्चदाब वाहिन्यांमध्ये बिघाड (Tripping) झाल्याने पुणे शहरातील अनेक भागांतील वीजपुरवठ्यावर त्याचा परिणाम झालेला असून महावितरणचे वीज कर्मचारी वीजपुरवठा पूर्ववत करण्यासाठी युद्धपातळीवर परिश्रम घेत आहेत. अनेक भागांचा बाधित झालेला वीजपुरवठा शक्य तितक्या लवकर सुरु देखील करण्यात आला आहे.

साधारणत: तासभर झालेल्या पावसामुळे अनेक ठिकाणी वाहिन्यांवर झाडे पडली आहेत. तर काही ठिकाणी फिडर बॉक्स पाण्यात गेल्यामुळे वीज वाहिन्या बंद पडल्या. तर विजेच्या कडकडाटांमुळे ही काही ठिकाणी वीज वाहिन्या बाधित झाल्या आहेत.

कोथरुड – भागात कुंदनगरी फिडरवर विजेच्या कडकडाटामुळे आकाशातील विजेला अटकावर करणारी यंत्रणा बाधित झाली. त्यामुळे संबंधित वाहिनीचा वीजपुरवठा ठप्प झाला होता. मात्र पर्यायी मार्गाने या भागातील वीजपुरवठा सुरळीत करण्यात आला. आता केवळ २ रोहित्र बंद आहेत. नांदेडसिटी अतिउच्चदाब वाहिनीवर ट्रिपिंग आल्यामुळे अर्ध्यातासासाठी कोथरुड विभागातील वीजपुरवठा बाधित झाला होता. पाऊस थांबताच वीजपुरवठा सुरळीत करण्यात आला आहे.

शिवाजीनगर – विभागातील विद्यापीठ, खडकी, बावधन, बाणेर, शिवाजी हाऊसिंग सोसायटी या वाहिन्यांचा वीजपुरवठा बाधित झाला असून विद्यापीठ वाहिनी सुरु करण्यात यश मिळाले.

पिंपरी/भोसरी – या भागातील रावेत २२ केव्ही वाहिनीचा वीजपुरवठा खंडित झाला असून, यावरील ५८ रोहित्रे बंद पडली आहेत. त्याला पर्यायी मार्गाने सुरु करण्याचे प्रयत्न महावितरण कर्मचारी करीत आहेत.

पर्वती – या भागातील महावितरणच्या जुन्या पर्वती वीज उपकेंद्रातील फिडरवर झाड पडले होते. त्याला हटवून वीजपुरवठा सुरु करण्याचे काम सुरु आहे. तर प्रयेजा व मधुकोश वाहिनीच्या इनकमिंग फिडर बॉक्स भागात पाणी साचल्याने वीजपुरवठा बंद झाला आहे. खडकवासला, श्रवण वाहिनीच्या पेट्रोलिंगचे काम हाती घेतली असून, बिघाड सापडताच दुरुस्ती केली जाणार आहे.

बंडगार्डन – या विभागात वडाचीवाडी या उपरी वीज वाहिनीवर झाडाच्या फांद्या पडल्याने त्या भागातील वीजग्राहकांचा वीजपुरवठा बंद झाला आहे. तर वाडिया वाहिनीला तासाभरातच पर्यायी मार्गाने सुरु करण्यात आले आहे.

रास्तापेठ- विभागातील कोंढवा, येवलेवाडी या भागाला वीजपुरवठा करणाऱ्या अतिउच्चदाब वाहिनीवर परिणाम झाल्याने या भागातील वीजपुरवठा देखील बाधित झालेला आहे.

या व्यतिरिक्‍त काही भागात लघुदाब वाहिन्यांवर देखील पावसाचा परिणाम झाला असण्याची शक्यता आहे. वीज ग्राहकांनी संयम बाळगून महावितरणला सहकार्य करावे. महावितरणचे कर्मचारी वीजपुरवठा सुरळीत करण्यासाठी अथक मेहनत घेत आहेत.

विजेच्या तक्रारींसाठी टोल फ्रीचा वापर करावा

वीजग्राहकांनी विजेसंबंधिच्या सर्व तक्रारींसाठी महावितरणच्या 1912, 18002333435 व 18002123435 या टोल फ्री क्रमांकावर संपर्क साधावा. हे क्रमांक www.mahadiscom.in या संकेतस्थळावर व वीजबिलावर प्रकाशित केले आहेत. महावितरणच्या मोबाईल ॲपवर देखील सर्व सुविधा २४ तास उपलब्ध आहेत.