पुणे- आंतरराष्ट्रीय महिला दिनाच्या पूर्वसंध्येला भवानी पेठ येथील काशिवाडी परिसरात मुस्लिम समाजातील महिलांसाठी विशेष रोजा इफ्तार पार्टीचे आयोजन करण्यात आले. सौ. इंदिरा अविनाश बागवे यांच्या पुढाकाराने आणि क्रांतिवीर लहुजी वस्ताद साळवे एकता प्रतिष्ठान यांच्या संयुक्त विद्यमाने हा कार्यक्रम पार पडला. मुस्लिम समाजातील महिला भगिनींमध्ये शिक्षण ,आरोग्य ,राष्ट्रीय एकात्मता, सर्वधर्म समभाव आणि सामाजिक सलोखा दृढ करण्याच्या उद्देशाने हा उपक्रम आयोजित करण्यात आला होता. कार्यक्रमात महिलांनी मोठ्या उत्साहाने सहभाग घेतला.
या कार्यक्रमाला मुक्ता फाउंडेशनच्या अध्यक्षा सौ. इंदिरा अविनाश बागवे, सेक्रेटरी फरजाना खान, पोलिस महिला पदाधिकारी राणी जाधव, हवालदार राणी राऊत, कॉन्स्टेबल आरती गायकवाड, सचिव मनीषा क्षीरसागर ,दिलशाद शेख,कोमल बावकर तसेच प्रतिष्ठानच्या ज्योती अडागळे, प्रियंका भोंडे, मालन कसबे आणि परिसरातील अनेक महिला भगिनी उपस्थित होत्या.
गेल्या तीन वर्षांपासून महिलांसाठीच या इफ्तार कार्यक्रमाचे विशेष आयोजन करण्यात येत असून, महिलांमध्ये ऐक्य, स्नेह आणि परस्पर संवाद वाढावा हा त्यामागील उद्देश आहे. याशिवाय सौ. इंदिरा बागवे यांनी मुक्ता फाउंडेशनच्या माध्यमातून प्रभागातील सर्व जातीधर्मांच्या महिलांसाठी विविध लघुउद्योग व व्यवसाय सुरू करून त्यांना रोजगाराच्या संधी उपलब्ध करून देण्याचे कार्यही केले आहे.
या उपक्रमाबद्दल उपस्थित महिलांनी समाधान व्यक्त करत या अनोख्या उपक्रमाचे स्वागत करीत महिला दिनाच्या पूर्व संध्येला उत्सव साजरा केला .
