पुणे: आयलीग स्पर्धेतील सहभागाबद्दल या गोष्टीचा संबंध नसला तरी इंडियन सुपर लीग स्पर्धेतील संघांना फिफाच्या परदेशी खेळाडूसंबंधी विशिष्ट खेळाच्या नियमाचे पालन करावे लागणार आहे. या नियमाप्रमाणे त्यांना जास्तीत जास्त चार परदेशी खेळाडूंना खेळविण्याची परवानगी असल्याचे एफसी पुणे सिटीचे मुख्य कार्यकारी अधिकारी गौरव मोडवेल यांनी सांगितले.
राजेश वाधवान समूह आणि ह्रितिक रोशन यांच्या सहमालकीच्या इंडियन सुपर लीग टीम असलेल्या एफसी पुणे सिटी यांच्या तर्फे आयोजित करण्यात आलेल्या कॉर्पोरेट सुपर कप स्पर्धेतील विजेत्या संघांचा सत्कार करण्यात आला. यावेळी ते बोलत होते.
गौरव मोडवेल पुढे म्हणाले कि, भारतातील अग्रगण्य आयलीग फुटबॉल स्पर्धेतील संघ आणि अखिल भारतीय फुटबॉल महासंघ यांच्यात आशियाई फुटबॉल कॉन्फिडरेशनच्या उपक्रमांमध्ये प्रतिनिधित्व करण्यासाठी सुरु असलेला वाद संपण्यासाठी अद्याप काही कालावधी लागणार आहे. यांसंबंधी आम्हांला लेखी सूचना अद्याप मिळालेल्या नसल्या तरी एशियन फुटबॉल कॉन्फिडरेशन(एएफसी)कडून आयएसएलला मान्यता मिळाली आहे आणि जर आयएसएलमधील संघ एएफसीच्या स्पर्धांमध्ये खेळणार असतील तर आम्हांला परदेशी खेळाडूसंबंधी एएफसीचा नियम मान्य करावा लागेन.
आशियाई फुटबॉल फेडरेशनने आयएसएलला नुकतीच अधिकृत मान्यता दिली असल्याचे जाहीर केले आहे. त्यामुळे आयलीग स्पर्धांमधील दोनच संघ एएफसी स्पर्धेसाठी पात्र ठरत असल्यामुळे त्यांचा आता या नियमासंबंधी एएफसीशी संघर्ष होऊ घातला आहे. सध्याची आयएसएल स्पर्धेतील परदेशी खेळाडूंसंबंधी नियम आणि धोरण हे एएफसी आणि फिफा नियमांपेक्षा वेगळे आहे. परंतु फिफा आणि एएफसीच्या नियमांप्रमाणे आता आम्हाला परदेशी खेळाडूंची संख्या चारवरच आणावी लागणार असल्याचे मोडवेल यांनी नमूद केले.
आयएसएल आणि आयलीग स्पर्धा एकाच वेळी खेळविल्या जाणार असल्यामुळे यासंबंधी कोणताही वाद निर्माण करण्याऐवजी अधिकाधिक खेळाडूंना दर्जेदार फुटबॉल खेळण्याची संधी मिळणे महत्वाचे आहे. दोन्ही लीग स्पर्धा एकाच वेळी होत असल्यामुळे त्यात सहभागी होणाऱ्या संघातील दर्जेदार खेळाडूंना देशातील सर्वोत्तम दर्जाची स्पर्धा खेळण्याची संधी मिळणार आहे. पूर्वी आयएसएल स्पर्धा खेळण्यासाठी आयलीग संघाच्या खेळाडूंनी क्लबला परवानगी देणे आवश्यक होते. परंतु आता दोन्ही स्पर्धा एकाच वेळी होत असल्यामुळे दोन स्पर्धांमध्ये कोणते वेगळे खेळाडू हे संघांना निश्चित करावे लागणार आहे. तसेच, एकाच वेळी स्पर्धा होत असल्यामुळे व्यावसायिक फुटबॉल खेळणाऱ्या खेळाडूंची संख्या १०० ते १२० वरून आता थेट ३०० वर पोहोचणार आहे. त्यामुळे अधिकाधिक खेळाडूंना क्लबशी व्यावसायिक करार करण्याची संधी मिळेल आणि राष्ट्रीय फुटबॉल संघासाठी मोठ्या संख्येने गुणवान खेळाडू निर्माण होतील. भविष्यामध्ये राष्ट्रीय फुटबॉल संघाला मोठ्या प्रमाणात गुणवान खेळाडू उपलब्ध करून देण्यासाठी हि योजना लाभदायक असल्याचे मोडवेल यांनी सांगितले.
