पुणे-: राष्ट्रवादीचे आमदार व जिल्हा बँकेचे अध्यक्ष हसन मुश्रीफ यांच्या निवासस्थानासह साखर कारखान्यावर गुरुवार (25 जुलै) रोजी आयकर विभागाने छापा टाकला. या छाप्याचे कारण अद्याप समजू शकलेले नाही. आयकर विभागाच्या या छाप्यामुळे जिल्ह्यात एकच खळबळ उडाली आहे. आयकर विभागाने हसन यांच्यासह त्यांच्या पुण्यात राहणाऱ्या मुलाच्या घरावर व टाकाळा परिसरात राहणाऱ्या साडूच्या घरावरही छापा टाकला आहे.
हसन मुश्रीफ हे कोल्हापुरातील कागल मतदारसंघाचे राष्ट्रवादी काँग्रेसचे विद्यामान आमदार आहेत. राष्ट्रवादी काँग्रेसचा पश्चिम महाराष्ट्रातील मोठा मुस्लीम चेहरा म्हणून त्यांच्याकडे पाहिले जाते. 2014 च्या विधानसभा निवडणुकीत मोदी लाटेतही ते निवडून आले होते. हसन मुश्रीफ शरद पवार यांच्या जवळचे आणि विश्वासू मानले जातात.
दरम्यान या कारवाईमागे भाजपची राजकीय खेळी असल्याचे बोलले जात आहे. गेल्या काही दिवसापासून भाजपचे प्रदेशाध्यक्ष तथा राज्याचे महसुलमंत्री चंद्रकांत दादा पाटील यांनी हसन मुश्रीफ यांना भाजप प्रवेशासाठी खुले आव्हान दिल्याचे पहायला मिळत होते. कदाचित मुश्रीफ यांनी ही ऑफर नाकारल्याच्या शक्यतेने त्यांच्यावर सुडाचे राजकारण केले जात असल्याची राजकीय चर्चा जोर धरू लागली आहे.