विश्वकर्मा इन्स्ट्यिटूट ऑफ टेक्नॉलॉजी येथे विद्यार्थ्यांशी संवाद
पुणे : गावातील शेवटच्या व्यक्तीपर्यंत पोहोचणे हे विकसित भारत योजनेचे उद्दिष्ट आहे. विकसित भारत योजनेअंतर्गत देशाची आर्थिक उन्नती, महिला सक्षमीकरण, पायाभूत सुविधांमध्ये वाढ करण्याचे लक्ष्य आहे. विकसित भारत योजनेमध्ये युवा पिढीचा मोठ्या संख्येने सहभाग अपेक्षित असून त्यांचा सशक्त व सुरक्षित देशाच्या निर्मितीसाठी हातभार लागावा, अशी अपेक्षा केंद्रीय युवा व्यवहार आणि क्रीडा राज्य मंत्री रक्षा खडसे यांनी व्यक्त केली. ‌‘माय भारत‌’च्या माध्यमातून युवा पिढीने राजकारणाच्या क्षेत्रात चमकदार कामगिरी करावी; कारण राजकारण हे क्षेत्र वाईट नाही, असेही त्यांनी सूचित केले.
विश्वकर्मा इन्स्ट्यिटूट ऑफ टेक्नॉलॉजी येथे आज (दि. 20) विकसित भारत ॲम्बॅसेडर : युवा कनेक्ट प्रोग्रामअंतर्गत विशेष कार्यक्रमाचे आयोजन करण्यात आले होते. त्या वेळी महाविद्यालयातील विद्यार्थ्यांशी संवाद साधताना मंत्री खडसे बोलत होत्या. विवकर्मा समूहाचे अध्यक्ष भरत अग्रवाल, व्हीआयटी, पुणेचे संचालक डॉ. राजेश जालनेकर, विश्वकर्मा विद्यापीठाचे कुलगुरू डॉ. सिद्धार्थ जबडे, उत्पादन-विकास संचालक डॉ. विवेक देशपांडे, माजी विद्यार्थी व जनसंपर्क विभाग अधिकारी प्रा. मुकुंद कुलकर्णी, युथ आयकॉन बिष्णू हजारी यांची प्रमुख उपस्थिती होती. संस्थेतर्फे आयोजित या कार्यक्रमास विद्यार्थ्यांनी मोठ्या संख्येने उपस्थिती लावली होती.
केंद्रातील पंतप्रधान नरेंद्र मोदी यांच्या नेतृत्वाखाली गेल्या दहा वर्षात विकसित भारत योजनेअंतर्गत महिला सक्षमीकरण, आरोग्य व शिक्षण, पायाभूत सुविधा, शासकीय योजनांमधील पारदर्शकता, अर्थव्यवस्था, जनधन, मुद्रा योजना, शेतीविषयक धोरणे, उज्वल योजना, स्वच्छ भारत, जलजीवन, पंतप्रधान गृह योजना, डिजिटल इंडिया, गती-शक्ती, उडान योजना, सांस्कृतिक वारसा, खेलो इंडिया तसेच युवांचे सक्षमीकरण याविषयी दृकश्राव्य माध्यमाद्वारे विद्यार्थ्यांना खडसे यांनी अवगत केले.

खडसे पुढे म्हणाल्या, देशाच्या स्वातंत्र्याला 2047 मध्ये शंभर वर्षे पूर्ण होत आहेत. यानिमित्त केंद्र सरकारने दूरदृष्टी ठेवून अनेक योजनांचे विस्तारीकरण केले आहे. केंद्र सरकार राबवित असलेल्या योजनांमध्ये युवकांनी सहभाग नोंदवून विकसित भारताचे स्वप्न साकर करण्यासाठी योगदान देणे आवश्यक आहे. या योजनांमध्ये युवक सहभागी झाल्यास भविष्यात युवकांनाच त्याचा लाभ होणार आहे.
अवकाश संशोधन क्षेत्रात युवकांना मोठ्या प्रमाणावर संधी असून या योजनांमध्ये सहभागी झालेल्या विद्यार्थ्यांना केंद्र सरकारचे पाठबळ मिळू शकते, असेही त्यांनी सांगितले. शिक्षण, आरोग्य, कौशल्य, क्रीडा, सांस्कृतिक क्षेत्रात युवा पिढीचा मोठ्या प्रमाणात सहभाग तसेच मार्गदर्शक सूचनांचे स्वागत असेल असेही खडसे म्हणाल्या.
शिस्तबद्धता, मानसिक ताणतणावातून मुक्ती, उत्तम आरोग्य तसेच आयुष्यात सर्वांगिण समतोल साधण्यासाठी प्रत्येक विद्यार्थ्याने क्रीडा क्षेत्रात सक्रिय रहावे, अशी अपेक्षा खडसे यांनी व्यक्त केली. राष्ट्रीय, आंतरराष्ट्रीय क्रीडा स्पर्धांमध्ये सहभागी खेळाडूंच्या यशामागील गमकही त्यांनी सांगितले. राजकारण, क्रीडा, महिला सक्षमीकरण याविषयी विद्यार्थ्यांनी विचारलेल्या प्रश्नांना खडसे यांनी उत्तरे दिली.
भरत अग्रवाल यांनी प्रास्ताविकात संस्थेच्या उपक्रमांची माहिती दिली. विद्यार्थ्यांच्या सर्वांगिण विकासाच्या दृष्टीने संस्था विविध उपक्रम राबवित आहे. त्याचा सकारात्मक परिणाम दिसून येत आहे, असे ते म्हणाले.
विकसित भारत उपक्रमाविषयी कृतिका भंडारी यांनी माहिती सांगितली. बिष्णू हजारी यांनी मनोगत व्यक्त केले.
क्रीडा क्षेत्रात चमकदार कामगिरी केलेल्या विद्यार्थिनींसह संस्थेच्या आवारात रक्षा खडसे यांनी वृक्षारोपण केले. आंतरराष्ट्रीय स्तरावरील बॅडमिंटनपटू व महाविद्यालयाचा विद्यार्थी आर्य भिवपतकी, तसेच स्मार्ट इंडिया हायकेथॉनमधील यशस्वी विद्यार्थ्यांशी खडसे यांनी संवाद साधत त्यांच्या संकल्पनांचे कौतुक केले.
रक्षा खडसे यांचे स्वागत भरत अग्रवाल यांनी केले. कार्यक्रमाचे सूत्रसंचालन प्रा. मुकुंद कुलकर्णी यांनी केले तर आभार प्रा. आशुतोष कुलकर्णी यांनी मानले.

पुणे, दि. २०: कामगारांना महाराष्ट्र घरेलू कामगार कल्याण मंडळाकडे केवळ १ रुपयांमध्ये नोंदणी करता येत असून या मंडळामार्फत राबविण्यात येणाऱ्या विविध योजनांचा लाभ घेण्याकरिता कामगारांनी नोंदणी करावी असे आवाहन कामगार मंत्री डॉ. सुरेश खाडे यांनी केले.

चिंचवड येथे रामकृष्ण मोरे नाट्यगृहात आयोजित नोंदीत घरेलू कामगारांना गृहउपयोगी वस्तुसंच वाटप कार्यक्रमात ते बोलत होते. यावेळी आमदार उमा खापरे, अमित गोरखे, सदाशिव खाडे, कामगार विभागाच्या प्रधान सचिव विनिता वेद सिंघल, कामगार आयुक्त डॉ. एच. पी. तुम्मोड, अपर कामगार आयुक्त शैलेंद्र पोळ, उप आयुक्त अभय गिते, घरेलू कामगार विविध संघटनांचे प्रतिनिधी उपस्थित होते.

डॉ. खाडे म्हणाले, घरेलू कामगारांना या गृहोपयोगी वस्तूसंचाच्या माध्यमातून मायेची ऊब देण्याचा शासनाचा प्रयत्न आहे. घरेलू कामगारांना देण्यात येणाऱ्या लाभासाठी शासनाने ५० कोटी रुपयांची तरतूद केली असून मंडळामार्फत घरेलू कामगार महिलांना दोन अपत्यापर्यंत ५ हजार रुपये प्रसुती लाभ, सन्मानधन योजनेत वयाची ५५ वर्षे पूर्ण केलेल्या नोंदणीकृत पात्र घरेलू कामगारांना १० हजार रुपये थेट बँक खात्यात जमा करण्यात येतात. तसेच संसार उपयोगी भांडी, अंत्यविधीसाठी वारसास २ हजार रुपये सहाय्य देण्यात येत असल्याचे ते म्हणाले.

बांधकाम कामगारांनाही विविध लाभ देण्यात येतात. कामगारांची नोंदणी सुलभतेने होण्यासाठी नुकतेच तालुकास्तरावर ३०४ सेतू केंद्र सुरु करण्यात आले आहेत. शासन सर्वसामान्यांच्या हिताच्या विविध योजना राबवित असून योजनांच्या माध्यमातून शासन आपल्या घरापर्यंत पोहोचले आहे. मुख्यमंत्री लाडकी बहीण योजनेची रक्कम दरमहा दीड हजारावरुन तीन हजार करण्याचा शासनाचा प्रयत्न असल्याचे सांगून शासन कामगारांच्या पाठीशी आहे, अशी ग्वाही त्यांनी दिली.

श्रीमती सिंघल म्हणाल्या, घरेलू कामगारांना हक्काच घरं, मुलांच्या शिक्षणाची व्यवस्था, महिलांच्या आरोग्याची काळजी तसेच घरेलू कामगारांना पेन्शनची सोय करण्यासाठी शासन स्तरावर प्रयत्न सुरु आहेत. घरेलू कामगार मंडळाकडे अधिकाधिक महिलांनी नोंदणी करावी व इतरांनाही नोंदणीसाठी प्रेरित करावे. त्यामुळे नोंदणीकृत कामगारांना लाभ देणे शक्य होईल. मंडळामार्फत देण्यात येणाऱ्या लाभासाठी नोंदणीचे नुतनीकरण आवश्यक असल्याचे सांगून हे शासन लोकाभिमूख असून कामगारांना मदतीचा हात देत आहे असे त्या म्हणाल्या.

कामगार मंत्री यांच्या हस्ते जिल्ह्यातील १ हजार ८२० घरेलू महिला कामगारांना गृहोपयोगी वस्तुसंचाचे वितरण करण्यात आले.
यावेळी आमदार उमा खापरे व अमित गोरखे यांनी मनोगत व्यक्त केले. प्रास्ताविकात शैलेंद्र पोळ यांनी मंडळामार्फत देण्यात येणाऱ्या योजनांची माहिती दिली.

 युवा कार्यक्रम आणि क्रीडा मंत्री डॉ. मनसुख मांडविया यांचे मत :  भारत शासनाच्या क्रिडा आणि युवा कार्यक्रम मंत्रालयाच्या वतीने आणि शिक्षण प्रसारक मंडळी यांच्या सहयोगाने माय भारत विकसित भारत २०४७ युवा कनेक्ट महाराष्ट्र अध्यायाची सुरुवात
पुणे : देशाला विकसित बनविण्यासाठी तरुणांनी पुढे या, हे तरुणांचे कर्तव्य आहे. श्रम करा, त्यापासून पळू नका. तुम्ही कुठेही जा तुमची प्राथमिकता देश असली पाहिजे. जिथे असाल तिथे देशाप्रती कसे योगदान द्याल याचा विचार करायला पाहिजे. विकसित भारत हे तरुणांचे लक्ष्य असले पाहिजे, असे मत युवा कार्यक्रम आणि क्रीडा मंत्री डॉ. मनसुख मांडविया यांनी व्यक्त केले.

भारत शासनाच्या युवा कार्यक्रम आणि क्रीडा मंत्रालयाच्या वतीने आणि शिक्षण प्रसारक मंडळी यांच्या सहयोगाने माय भारत विकसित भारत २०४७ युवा कनेक्ट महाराष्ट्र अध्यायाची सुरुवात  शिक्षण प्रसारक मंडळीच्या लेडी रमाबाई सभागृहात झाली. यावेळी मा. केंद्रीय राज्य मंत्री श्रीमती रक्षा खडसे, नेमबाज स्वप्निल कुसाळे, शि. प्र. मंडळी नियामक मंडळाचे अध्यक्ष एस. के. जैन,  नियामक मंडळ सदस्य ॲड. दामोदर भंडारी, नियामक मंडळ सदस्य तसेच महाविद्यालय विकास समिती अध्यक्ष श्री अशोक वझे, संस्थेच्या सचिव डॉ. राधिका इनामदार इ. उपस्थित होते.

डॉ. मनसुख मांडविया म्हणाले, आपला देश सामर्थ्यवान देश आहे. बौद्धिक आणि मनुष्य शक्तीची आपल्या देशात कधीच कमी नव्हती. ज्या गतीने आपण प्रगती करायला हवी होती, ती पूर्वीच्या सरकाराच्या काळात झाली नाही. विकसित भारताचा रोड मॅप नरेंद्र मोदी यांनी दिला.

आपली कर्तव्यनिष्ठा जपत युवकांनी देशाच्या विकासात आपले योगदान दिले पाहिजे. देशाच्या प्रती कर्तव्य भावनेने काम करा तर भारत विकसित होईल. एक विचार, एक संकल्प घेऊन देशातील जनता पुढे येईल तेव्हा भारत १४० कोटी पावलांनी पुढे जाईल आणि भारत विकसित होईल.

रक्षा खडसे म्हणाल्या, पुणे हे युवकांचे शहर आहे. शिवरायांची कर्मभूमी, सावित्रीबाई फुले, लोकमान्य टिळक यांचा इतिहास शहराला लाभला आहे. म्हणून पुण्यापासून विकसित भारत महाराष्ट्र अध्यायाची सुरुवात झाली आहे. स्वातंत्र्य मिळविण्यासाठी आपल्या आधीच्या पिढीने चळवळ उभी केली. देशाच्या विकासासाठी त्यांनी प्रयत्न केले. आज आपला देश युवकांचा देश म्हणून ओळखला जातो. त्यामुळे त्यांच्यानंतर विकसित भारतासाठी योगदान देणे ही आता आपली जबाबदारी आहे. पुढे येणारे भविष्य आपले आहे त्यामुळे प्रत्येकाचा वाटा यात असला पाहिजे. विकसित भारत या प्लॅटफॉर्म च्या माध्यमातून अनेक गोष्टी युवा शिकणार आहे. ज्यामुळे देशाच्या विकासासाठी त्याचा उपयोग होईल. देशाला प्रगतीकडे न्यायचे असेल तर युवकांचा सहभाग असायला पाहिजे.

नेमबाज स्वप्निल कुसळे म्हणाला, कोणतेही क्षेत्र असो आहार आणि फिजिकल फिटनेस नीट ठेवा. वेड लागल्याशिवाय इतिहास घडत नाही. जिद्द आणि ध्येय ठेवा तर कोणत्याही क्षेत्रात तुम्ही यशस्वी व्हाल, असेही त्याने सांगितले. ॲड. एस. के. जैन यांनी मान्यवरांचे स्वागत करून संस्थेची ओळख करुन दिली. डॉ. माधुरी देशपांडे व डॉ. मधुरा थिटे यांनी कार्यक्रमाचे सूत्रसंचालन केले.

 ‘ब्रम्हांडनायक’ रंगावली प्रदर्शन : शेगाव निवासी श्री गजानन महाराजांच्या गजानन विजय ग्रंथावर आधारित रंगावली ; रंगावलीकार शारदा अवसरे आणि ३२ कलाकारांचे सादरीकरण
पुणे :  लोकमान्य टिळकांच्या अकोला येथील व्याख्यानात मंडपात उंच स्थानी येऊन बसलेले गजानन महाराज… गजानन महाराजांनी नारायणाला आवाहन केल्यानंतर कोरड्या विहिरीला फुटलेला झरा.. महाराजांनी शांत केलेला अती द्वाड घोडा ही….शिंगावर मुलामाणसांना घेवून तुडविणारी गाय समर्थांपुढे येऊन दिनवाणी झाली आणि समर्थांना वंदन केले तो क्षण…अशा श्री गजानन महाराज यांच्या गजानन विजय ग्रंथातील २१ अध्यायांवर आधारित भक्तीकथा  रांगोळ्यांच्या माध्यमातून पाहण्याची संधी पुणेकरांनी मिळाली.

शेगाव निवासी श्री गजानन महाराज यांच्या गजानन विजय ग्रंथातील २१ अध्यायांवर आधारित ‘ब्रम्हांडनायक’ या भव्य रंगावली प्रदर्शनाचे आयोजन बालगंधर्व कलादालनात करण्यात आले आहे. प्रसिद्ध रंगावलीकार महादेव गोपाळे यांच्या हस्ते प्रदर्शनाचे उद्घाटन झाले.  यावेळी प्रख्यात रंगावलीकार अक्षय शहापूरकर, ज्येष्ठ रंगावलीकार जगदीश चव्हाण, प्रदर्शनाच्या आयोजक रंगावलीकार शारदा अवसरे उपस्थित होते.  

नर्मदा नदीतील बुडणारी नाव महाराजांनी काठाला लावली…भक्ताची शिदोरी खाण्यासाठी चार प्रहर उपाशी राहिलेले महाराज आणि शेवटी चार प्रहरांनातर भक्ताने दिलेली भाजी भाकरी खातानाचा क्षण…विठ्ठलाच्या रूपात गजानन महाराजांनी भक्ताला दिलेले दर्शन या रांगोळ्या कलाकारांनी अतिशय बारकाईने साकारल्या आहेत.

शारदा अवसरे म्हणाल्या, प्रदर्शनामध्ये एकूण २३ रंगावलींचा समावेश आहे. गजानन विजय या ग्रंथातील २१ अध्यायांवर आधारित २१ व २ सर्वत्र पाहिले जाणारी अशी एकूण २३ रूपे   साकारण्यात आली आहेत. सर्व रंगावली काढण्याकरिता एकूण ३० किलो रंगावली व रंगाचा वापर करण्यात आला आहे.

प्रदर्शनाकरिता श्रीरंग कलादर्पण फाऊंडेशनचे अक्षय शहापूरकर यांनी विशेष सहकार्य केले आहे. दिनांक २३ सप्टेंबर पर्यंत दररोज सकाळी १० ते रात्री ७ पर्यंत प्रदर्शन विनामूल्य खुले असून पुणेकरांनी मोठया संख्येने प्रदर्शन पाहण्यासाठी यावे,असे आवाहनही शारदा अवसरे यांनी केले आहे.

पुणे :
महाराष्ट्र कॉस्मॉपॉलिटन एज्युकेशन सोसायटी (आझम कॅम्पस) आणि संलग्न संस्थांच्या वतीने हजरत मुहम्मद पैगंबर जयंती (ईद-ए-मिलाद) निमित्त विद्यार्थ्यांची अभिवादन मिरवणूक आज २० सप्टेंबर रोजी सकाळी  भव्य स्वरूपात पार पडली. संस्थेचे अध्यक्ष तसेच ‘डॉ. पी.ए. इनामदार युनिव्हर्सिटी’चे कुलपती डॉ.पी.ए.इनामदार यांच्या हस्ते सकाळी ८.३० वाजता मिरवणुकीचे उद्घाटन करण्यात आले.

मिरवणुकीत सहभागी विद्यार्थ्यांनी हजरत मुहम्मद पैगंबरांच्या शिक्षण, सामाजिक न्याय आणि पर्यावरण संरक्षणाचे संदेश असलेले फलक हातात घेतले होते. या मिरवणुकीने पुण्याच्या प्रमुख भागांतून प्रवास करत शैक्षणिक, सामाजिक आणि पर्यावरणीय जागरूकतेचे संदेश दिले. संस्थेचे सचिव प्रा. इरफान जे. शेख, एस.ए.इनामदार,साबीर शेख,मशकूर शेख,आसिफ शेख,अफझल खान,वहाब शेख, बबलू सय्यद,शाहीद शेख आणि अन्य पदाधिकारी, शिक्षक, शिक्षकेतर कर्मचारी, विद्यार्थी व पालक मोठ्या संख्येने मिरवणुकीत सहभागी झाले होते.

ही मिरवणूक आझम कॅम्पस येथून सुरू होऊन डेक्कन मुस्लिम इन्स्टिट्यूट,ट्राय लक हॉटेल,कोहिनुर हॉटेल,बाटा चौक,सरबतवाला चौक,क्वार्टर गेट,पद्मजी पोलीस चौकी,निशात थिएटर,भगवानदास चाळ,चुडामण तालीम,पूना कॉलेज मार्गे पुन्हा आझम कॅम्पस येथे समाप्त  झाली.हे अभिवादन मिरवणुकीचे २० वे वर्ष असून, दरवर्षी महाराष्ट्र कॉस्मॉपॉलिटन एज्युकेशन सोसायटीतर्फे महामानव छत्रपती शिवाजी महाराज, म. फुले, डॉ. बाबासाहेब आंबेडकर आणि हजरत मुहम्मद पैगंबर यांना अभिवादन करण्यासाठी अशा प्रकारच्या मिरवणुका काढल्या जातात. यामधून महामानवांचे सामाजिक आणि शैक्षणिक संदेश जनतेपर्यंत पोहोचवले जातात.

यंदाच्या विंटर शेड्युलमध्ये पुण्याहून बँकॉकसाठी आणि दुबई साठी विमान सेवा सुरु होते आहे .केंद्रीय मंत्री मुरलीधर मोहोळ यांनी म्हटले आहे कि,’पुणेकरांसाठी ‘गुड न्यूज’; पुण्याहून दोन नवी आंतरराष्ट्रीय उड्डाणे ! पुणे आणि पश्चिम महाराष्ट्रातील प्रवाशांसाठी दोन नवीन आंतरराष्ट्रीय उड्डाणे येत्या २७ ऑक्टोबर, २०२४ पासून सुरु होत असून यात पुणे-दुबई-पुणे आणि पुणे-बॅंकॉक-पुणे या मार्गांचा समावेश आहे. पुणे आणि पश्चिम महाराष्ट्रातील प्रवाशांना याचा निश्चितच फायदा होणार आहे.

पुणे ते बँकॉक दरम्यान पूर्वी विमानसेवा सुरू होती. मात्र कोविडच्या सुरवातीच्या काळात आंतरराष्ट्रीय उड्डाणाची सेवा बंद झाली. त्यावेळी बँकॉकची सेवादेखील बंद झाली. ती अद्याप सुरू झालेली नाही. पुणे विमानतळाचे नवीन टर्मिनल कार्यान्वित झाल्याने यंदाच्या विंटर शेड्युलमध्ये पुण्याहून उड्डाण करणाऱ्या विमानांच्या सेवेत वाढ होण्याची शक्यता अधिक आहे. यात पुणे ते बँकॉक विमानसेवेचा देखील समावेश असण्याची शक्यता अधिक आहे

सध्या दोन आंतरराष्ट्रीय उड्डाणे
पुणे विमानतळावरून दोन आंतरराष्ट्रीय उड्डाण सुरू आहेत. यात दुबई व सिंगापूरचा समावेश आहे. बँकॉकसाठी विमानसेवा सुरू झाल्यावर पुण्याहून थायलंड हा देश जोडला जाईल. यानिमित्ताने तिसरा देश पुण्याला जोडला जाईल. यामुळे पुण्याची कनेकटव्हीटी वाढण्यास मदत होईल.

दैनंदिन ९५ विमानांचे उड्डाण

• पुण्याहून दोन्ही टर्मिनल मिळून सध्या सुमारे १९० विमानांची वाहतूक होत आहे
• यात दैनंदिन सरासरी ९५ विमानांचे उड्डाण व ९५ विमानांचे लँडिंग होते
• प्रवासी संख्या : सरासरी ३५ हजार (दैनंदिन)

पुण्याहून बँकॉकसाठी विमानसेवा सुरू करण्यासाठी आवश्यक असलेल्या स्लॉटबद्दल विचारणा झाली आहे. पुणे विमानतळावर स्लॉट उपलब्ध होत असल्याचे संबंधित विमान कंपनीला कळविले आहे.

• संतोष ढोके, विमानतळ संचालक, पुणे

पुणे, दि. 19: प्रधानमंत्री नरेंद्र मोदी यांच्या हस्ते जिल्ह्यातील ५६ महाविद्यालयात आचार्य चाणक्य कौशल्य विकास केंद्राचे दुरदृष्यप्रणालीद्वारे २० सप्टेंबर २०२४ रोजी दुपारी १२.३० वाजता उद्घाटन होणार आहे, अशी माहिती जिल्हाधिकारी डॉ. सुहास दिवसे यांनी दिली आहे.

नवीन राष्ट्रीय शैक्षणिक धोरण अंमलबजावणीला सकारात्मक वातावरण निर्मिती होण्यासाठी तसेच युवक युवतींना कौशल्य विकासाची संधी महाविद्यालयामध्ये उपलब्ध करून देण्यासाठी महाराष्ट्र शासनाने “आचार्य चाणक्य कौशल्य विकास केंद्र” ही नाविन्यपूर्ण योजना सुरु केली आहे. महाविद्यालयात कौशल्य प्रशिक्षण केंद्र स्थापन करून 15 ते 45 वयोगटातील युवक-युवतींना कौशल्य विकास प्रशिक्षण प्रदान करून त्यांना रोजगाराच्या संधी उपलब्ध होण्यास मदत होणार आहे.

जिल्ह्यातील डॉ. डी. वाय. पाटील कला, वाणिज्य व विज्ञान महाविद्यालय (पिंपरी), नूतन महाराष्ट्र अभियांत्रिकी आणि तंत्रज्ञान संस्था (तळेगाव दाभाडे), कला विज्ञान व वाणिज्य महाविद्यालय (इंदापूर), शंकरराव भेलके महाविद्यालय (नसरापूर), शारदाबाई पवार महिला कला, वाणिज्य व विज्ञान महाविद्यालय (शारदानगर-बारामती), अण्णासाहेब मगर कॉलेज (हडपसर), डॉ. डी. वाय. पाटील बायोटेक्नोलॉजी आणि बायोइनफोरमॅटीक इन्स्टिट्युट (ताथावडे), सेंट व्हिन्सेंट कॉलेज ऑफ कॉमर्स (पुणे), जे.एस.पी.एम भिवराबाई सावंत पॉलिटेक्निक (वाघोली), शासकीय अभियांत्रिकी व संशोधन महाविद्यालय (अवसरी खुर्द), वैकुंठ मेहता नॅशनल इन्स्टिट्यूट ऑफ कोऑपरेटिव्ह मॅनेजमेंट (पुणे), स्कूल ऑफ फार्मसी अँड रिसर्च सेंटर (बारामती), समर्थ पॉलिटेक्निक (बेल्हे) सुभाष बाबुराव कुल कला, वाणिज्य व विज्ञान महाविद्यालय (केडगाव), एसव्हीपीएम इन्स्टिट्यूट ऑफ टेक्नॉलॉजी अँड इंजिनिअरिंग (माळेगाव), सिम्बायोसिस स्किल्स अँड प्रोफेशनल युनिव्हर्सिटी (किवळे), विठ्ठलराव थोरात औद्योगिक प्रशिक्षण संस्था (भिगवण), गिरिजाई नर्सिंग कॉलेज (शिरुर), जयहिंद कॉलेज ऑफ फार्मसी (वडगाव सहानी), टिकाराम जगन्नाथ कला वाणिज्य व विज्ञान महाविद्यालय (खडकी), श्री जैन विद्या प्रसारक मंडळ सांगवी केशरी कला व वाणिज्य महाविद्यालय (पिंपरी), प्रीतम प्रकाश कॉलेज ऑफ आर्ट्स अँड कॉमर्स (भोसरी), प्रतिभा कॉलेज ऑफ कॉमर्स अँड कॉम्प्युटर स्टडीज (पिंपरी), इंडीयन इन्स्टिट्यूट ऑफ एज्युकेशन (पुणे), एमकेएसएसएस मनीलाल नानावटी व्होकेशनल इन्स्टिट्युट फॉर वमेन (कर्वे नगर), नवसह्याद्री ग्रुप ऑफ इन्स्टिट्यूट पॉलिटेक्निक (नायगाव-नसरापूर), भिवराबाई सावंत कॉलेज ऑफ इंजिनीअरिंग अँड रिसर्च (नर्हे), श्री. फत्तेचंद जैन विद्यालय आणि कनिष्ठ महाविद्यालय (पिंपरी), सौ. ताराबाई शंकरलाल मुथ्था कॉलेज ऑफ सायन्स अँड कॉमर्स (पिंपरी), एशियन कॉलेज ऑफ फार्मसी (धायरी), गर्व्हेन्मेंट पॉलिटेक्निक (पुणे), शरदचंद्र पवार कृषी महाविद्यालय (बारामती), एशियन कॉलेज ऑफ सायन्स अँड कॉमर्स (धायरी), हरिभाई देसाई कॉलेज (पुणे), लोटस बिझनेस स्कूल (मुळशी), डॉ. शरदचंद्र पवार कॉलेज ऑफ एमबीए (कृषी-व्यवसाय) (बारामती), डॉ. प्रा. रामकृष्ण मोरे आर्ट्स, कॉमर्स आणि सायन्स कॉलेज (आकुर्डी), श्रीमती. गेंदीबाई ताराचंद चोपडा कनिष्ठ महाविद्यालय, (चिंचवड), एमईएस गरवारे कॉलेज ऑफ कॉमर्स (पुणे), समर्थ कॉलेज ऑफ इंजिनीअरिंग अँड मॅनेजमेंट (बेल्हे), मराठवाडा मित्र मंडळाचे पॉलिटेक्निक (पिंपरी-चिंचवड), कृषी विकास प्रतिष्ठान शारदाबाई पवार औद्योगिक प्रशिक्षण संस्था (शारदानगर, बारामती), अनंतराव थोपटे महाविद्यालय व संशोधन केंद्र (भोर), इरा एज्युकेशन सोसायटीचे कॉलेज ऑफ एज्युकेशन (आर्वी), कला विज्ञान आणि वाणिज्य महाविद्यालय (खेड-शिवापूर), डॉ. डी. वाय. पाटील टेक्निकल कॅम्पस (वराळे-तळेगाव), बी.डी.काळे महाविद्यालय (घोडेगाव), पद्मश्री आप्पासाहेब पवार कृषी पॉलिटेक्निक (बारामती), एमकेएसएसएस ॲकॅडमी ऑफ इनफोर्मेशन टेक्नोलॉजी (कर्वेनगर), शारदाबाई पवार इन्स्टिट्यूट ऑफ नर्सिंग (शारदानगर, बारामती), डॉ. डी. वाय. पाटील कला, वाणिज्य आणि विज्ञान महाविद्यालय (आकुर्डी), एमकेएसएसएस महेंद्रा नानावटी इन्स्टिट्यूट ऑफ लेसर टेक्नॉलॉजी अँड ऍप्लिकेशन्स (कर्वे नगर), राजगड ज्ञानपीठ टेक्निकल कॅम्पस पॉलिटेक्निक (भोर), विद्या प्रतिष्ठानचे पॉलिटेक्निक कॉलेज (इंदापूर) महर्षी कर्वे स्त्री शिक्षण संस्था, स्किल डेव्हलपमेंट सेंटर (कर्वे नगर) व अरहम स्कूल आणि ज्युनियर कॉलेज (पुणे) या महाविद्यालयात कौशल्य विकास केंद्राचे उद्धाटन करण्यात येणार आहे.

या कार्यक्रमाच्या उद्धघाटनप्रसंगी प्रधानमंत्री श्री. मोदी मार्गदर्शन करणार आहे. तरी जिल्ह्यातील अधिकाधिक युवक-युवती, विविध क्षेत्रांतील तज्ज्ञ व मान्यवरांनी नजीकच्या आचार्य चाणक्य कौशल्य विकास केंद्राच्या उद्घाटन कार्यक्रमाकरीता उपस्थित राहावे, असे आवाहन जिल्हाधिकारी डॉ. दिवसे यांनी केले आहे.

पुणे,दि. १९ : ऑटोरिक्षा चालकांच्या सोयीकरिता १९ सप्टेंबर पासून रामटेकडी इंडस्ट्रियल इस्टेट, इगलबर्ग कंपनी, लेन नं.३ व अलंकार पोलीस चौकीसमोर, कर्वेनगर, पुणे येथील ट्रॅकवर ऑटोरिक्षा मीटर तपासणीचे कामकाज तात्पुरत्या स्वरुपात प्रायोगिक तत्वावर सुरु करण्यात आल्याची माहिती पुणे उप प्रादेशिक परिवहन कार्यालयाने दिली आहे.

पुणे प्रादेशिक परिवहन कार्यालयाच्या कार्यक्षेत्रातील मीटर तपासणीची मुदत संपलेल्या ऑटोरिक्षा चालक, मालक यांच्या सोयीकरिता ऑटोरिक्षा मीटर तपासणीकरिता रामटेकडी इंडस्ट्रियल इस्टेट, इगलवर्ग कंपनी, लंन नं.३ व इऑन आयटी पार्कजवळ, खराडी पोलीस चौकीसमोर, खराडी हे दोन नविन ट्रॅक निश्चित करण्यात आलेले होते.

तथापि, सदर ट्रॅकपैकी खराडी येथील ट्रॅक ऑटोरिक्षा चालकांसाठी गैरसोयीचा असल्याने तो बंद करून त्याऐवजी अलंकार पोलीस चौकी चौकी समोर, कर्वेनगर, पुणे येथे टेस्ट ट्रॅक सुरु करावा अशी मागणी ऑटोरिक्षा संघटनांनी केली होती.

सर्व ऑटोरिक्षा परवानाधारक, चालक यांनी १९ सप्टेंबर पासून कार्यालयीन कामकाजाच्या दिवशी पासून रामटेकडी इंडस्ट्रियल इस्टेट, इगलबर्ग कंपनी, लेन नं.३ व अलंकार पोलीस चौकीसमोर, कर्वेनगर, पुणे येथील ट्रॅकवर सकाळी ७ वाजता सुरु होणार असून, ज्या ऑटोरिक्षाधारकांना त्यांची वाहने मीटर तपासणीकरिता सादर करावयाची आहेत, त्यांनी सकाळी १० वाजण्यापूर्वी वाहने स्टार्ट पॉइंटला उपस्थित ठेवावीत, असेही प्रसिद्धी पत्रकान्वये प्रादेशिक परिवहन अधिकारी यांनी कळविले आहे.

पुणे, दि. १९ : कर्णबधिर (मुकबधिर) प्रवर्गातील दिव्यांग मतदारांसाठी जिल्हाधिकारी कार्यालयातील निवडणूक शाखेत ९२२६३६३००२ हा हेल्पलाईन क्रमांक सुरु केलेला असून या हेल्पलाईनवर कर्णबधिर मतदारांनी त्यांच्या मतदान केंद्रांची माहिती तसेच ईव्हीएम मशीन्सद्वारे मतदान कसे करावे याची माहिती जाणून घ्यावी, असे आवाहन उप जिल्हा निवडणूक अधिकारी मिनल कळसकर यांनी केले आहे.

कर्णबधिर व्यक्तींना समजू शकणा-या सांकेतिक भाषा (साईन लाग्नवेज) येणाऱ्या कर्णबधिर विद्यालयातील दोन शिक्षकांची नियुक्ती १८ सप्टेंबर पासून पुढील आदेशापर्यंत सकाळी ९.४५ ते सायं. ६.१५ या वेळे दरम्यान निवडणूक शाखा, जिल्हाधिकारी कार्यालय, पुणे येथे नियुक्ती करण्यात आलेली आहे. कर्णबधिर मतदारांनी व्हिडीओ कॉल द्वारे हेल्पलाईन क्रमांक ९२२६३६३००२ वर संपर्क करावा, असेही जिल्हा निवडणूक कार्यालयाने प्रसिद्धी पत्रकान्वये कळविले आहे.