पुणे : यशवंतराव चव्हाण द्रुतगती मार्गावर मुंबई वाहिनीवर कि.मी 58/500 (डोंगरगाव/ कुसगांव) येथे महाराष्ट्र राज्य रस्ते विकास महामंडळामार्फत बांधण्यात येणाऱ्या पुलाचे गर्डर्स बसविण्याचे काम सुरू असून 22, 23 आणि 24 जानेवारी असे तीन दिवस दुपारी 12 ते 3 या वेळेत या लांबीत ब्लॉक घेण्यात येणार असून वाहतूक पर्यायी मार्गाने वळविण्यात येणार आहे.या कालावधीत मुंबईकडून पुण्याकडे जाणारी पुणे वाहिनीवरील वाहतूक द्रुतगती मार्गाच्या किमी क्रमांक 54/700 वळवण ते वरसोली टोल नाका (राष्ट्रीय महामार्ग क्र. 48) येथून देहूरोड मार्गे पुण्याकडे वळविण्यात येणार आहे. वरील तिन्ही दिवस दुपारी 3 वाजल्यानंतर मुंबईहून पुण्याकडे जाणारी वाहतूक पुन्हा द्रुतगती मार्गाच्या पुणे वाहिनीवरुन सोडण्यात येईल. तसेच या कालावधीत पुण्याहून मुंबईकडे जाणारी वाहतूक यशवंतराव चव्हाण द्रुतगती मार्गावरुन सुरू राहणार आहे.द्रुतगती मार्गावरुन प्रवास करणाऱ्या प्रवाशांनी या अनुषंगाने आपल्या प्रवासाचे नियोजन करावे. या कालावधीदरम्यान वाहनचालकांना काही अडचण असल्यास मदतीसाठी मुंबई- पुणे द्रुतगती मार्गाच्या नियंत्रण कक्षाचा दूरध्वनी क्र. 9822498224 या किंवा महामार्ग पोलीस विभागाच्या 9833498334 या क्रमांकावर संपर्क साधावा, असे आवाहन महामंडळाचे जनसंपर्क अधिकारी तुषार अहिरे यांनी प्रसिद्धीपत्रकान्वये केले आहे.

पुणे : जिल्हाधिकारी जितेंद्र डूडी यांनी जिल्हा नियोजन समितीअंतर्गत जिल्हा वार्षिक योजना २०२४-२५ च्या अंमलबजावणीचा तसेच २०२५- २६ च्या प्रारुप आराखड्यातील तरतुदींच्या अनुषंगाने कार्यान्वयन यंत्रणांचा आढावा घेऊन विविध सूचना केल्या. 2025- 26 च्या प्रारुप आराखड्यात जिल्ह्यात पाणीसाठा वाढीसाठी पाझर तलाव दुरुस्ती व गाळ काढण्याबाबतचा सविस्तर आराखडा सादर करावा, अशा सूचना त्यांनी दिल्या. जिल्हाधिकारी कार्यालयात आयोजित या बैठकीस ग्रामीण पोलीस अधीक्षक पंकज देशमुख, जिल्हा नियोजन अधिकारी किरण इंदलकर, पुणे वनविभागाचे उपवनसंरक्षक महादेव मोहिते यांच्यासह विविध कार्यान्वयन यंत्रणांचे प्रमुख उपस्थित होते.श्री. डूडी यांनी छोटे पाटबंधारे विभागाचा आढावा घेताना संबंधितांनी सिंचनासाठी नदी, कालवे आदी सुविधा उपलब्ध नसलेल्या गावातील लघु तलाव दुरुस्तीसाठी निधीचे प्रस्ताव सादर करण्याबाबत माहिती दिली. त्या अनुषंगाने सविस्तर प्रस्ताव सादर करुन किती तलावांच्या भिंतींची दुरुस्ती व गाळ काढल्यास किती पाणीसाठा निर्माण होईल आणि त्यासाठी खर्चाची आवश्यकता याचा सविस्तर प्रस्ताव सादर करावा, असे सांगितले.जिल्ह्यात स्मार्ट प्राथमिक शाळा आणि स्मार्ट प्राथमिक आरोग्य केंद्र संकल्पनेअंतर्गत ३०५ प्राथमिक शाळा आणि सर्व १०८ प्राथमिक आरोग्य केंद्रांचा विकास करण्यात येणार आहे. इमारती जुन्या झालेल्या प्राथमिक आरोग्य केंद्रांची दुरुस्ती, नवीन बांधकाम करण्यात येणार आहे. महाऊर्जाने या सर्व स्मार्ट प्राथमिक शाळा आणि प्राथमिक आरोग्य केंद्रांकरिता सौर पॅनेलची योजना राबवून नेट मीटरींग करावे, जेणेकरुन त्यांचे वीजेचा खर्च वाचण्यासह आर्थिक लाभही होऊ शकेल.पर्यावरणीय पर्यटन (इको टुरिझम) विकासाला वन्यजीव वनक्षेत्रात चांगला वाव असून त्याचा प्रस्ताव वनविभागाने सादर करावा. रेशीम विकास विभागाने समूह विकासअंतर्गत मलबेरीच्या लागवडीच्या अनुषंगाने प्रोत्साहन द्यावे. त्यासाठी शेतकरी उत्पादक संघांना रेशीम धागे तयार करण्याचे प्रशिक्षण देण्याचे तसेच किमान ५ हजार शेतकऱ्यांना मलबेरी लागवडीसाठी अर्थसहाय्याचा आराखडा सादर करावा.यावेळी जिल्हाधिकारी श्री. डूडी यांनी सन २०२४-२५ च्या सर्वसाधारण जिल्हा वार्षिक योजना, अनुसूचित जाती उपयोजना, आदिवासी उपयोजना व आदिवासी क्षेत्राबाहेरील उपयोजनांतर्गत योजनांच्या भौतिक व आर्थिक प्रगतीचा आढावा घेतला. विभागांनी वेळेत सर्व प्रशासकीय मान्यता घ्याव्यात. तसेच काही योजनात खर्च होत नसल्यास पुनर्विनियोजनाचे किंवा निधी परत करण्याचे प्रस्ताव सादर करावेत, असेही त्यांनी सांगितले.यावेळी श्री. इंदलकर यांनी सन २०२४-२५ च्या जिल्हा वार्षिक योजनेच्या अनुषंगाने विविध विभागांच्या प्रस्तावांना दिलेली प्रशासकीय मान्यता, वितरीत केलेला निधी या अनुषंगाने सादरीकरण केले. त्याबाबत यंत्रणांच्या प्रमुखांनी खर्चाच्या अनुषंगाने माहिती दिली.

पुणे – राष्ट्रवादी काँग्रेस पार्टीचे राष्ट्रीय अध्यक्ष, उपमुख्यमंत्री अजित पवार यांची पुणे व बीड जिल्ह्याच्या पालकमंत्री निवड झाल्यानंतर पुणे शहर राष्ट्रवादी काँग्रेस पार्टीच्या वतीने जोरदार जल्लोष करण्यात आला. पुणे शहरातील पक्ष कार्यालय, नारायण पेठ येथे कार्यकर्ते आणि पदाधिकाऱ्यांनी जिलेबी वाटत, फटाके फोडून, महिला पदाधिकार्यांनी फुगडी खेळत आनंदोत्सव साजरा केला. उपमुख्यमंत्री अजित पवार यांच्या समर्थनार्थ “एकच वादा,अजित दादा” “अजितदादा तुम आगे बढो हम तुम्हारे साथ है” “ दादाचा वादा आणि बळ” अशा जोरदार घोषणाबाजी सुद्धा करण्यात आली. यावेळी शहराध्यक्ष दीपक मानकर म्हणाले, “उपमुख्यमंत्री अजितदादा पवार हे पुणे व बीड जिल्ह्याचे पालकमंत्री झाल्याने जिल्ह्याच्या विकासात अजून भर पडणार आहे. पुणे शहरातील राष्ट्रवादी काँग्रेस पार्टीच्या कार्यकर्त्याने झालेल्या लोकसभा निवडणूक, विधानसभा निवडणुकीमध्ये जोमाने व प्रामाणिकपणे काम करीत महायुती सरकारला अधिक बळकट केलेलं आहेत. आपल्या पक्षाच्या कार्यकर्त्यांना महामंडळ, विशेष कार्यकारी अधिकारी, राज्यस्तरीय व जिल्हास्तरीय कमिटी यांवर काम करण्याची संधी मिळाल्यास पक्षातील कार्यकर्त्याला न्याय मिळेल व पक्ष वाढीसाठी मदत होईल. महानगरपालिका निवडणूक महायुती मध्ये लढवायची हा निर्णय उपमुख्यमंत्री अजितदादा घेतील. मात्र आपणही महापालिका निवडणूक स्वतंत्र लढण्याची तयारी ठेवली पाहिजे. पक्ष वाढीसाठी आपणही रस्त्यावर उतरून पक्ष संघटनेची कामे केली पाहिजेत.

यावेळी प्रदीप देशमुख म्हणाले मागील दीड वर्षात 7 ते 8 वेळा जल्लोष करण्याची संधी मिळाली भविष्यात ही संधी आणखी वाढणार आहे. दादा मुख्यमंत्री हवेत अशा आमच्या सर्व कार्यकर्त्यांची इच्छा आहे.पद मिळत जातील पण त्यांची तब्येतीची आपण काळजी घेतली पाहिजे स्वतःच्या आरोग्याची परवा न अजितदादा कार्यकर्ते पदाधिकारी यांची काळजी घेतात.आपण त्यांचा कमी वेळ घेऊन त्यांना महाराष्ट्र व देशात काम करण्यासाठी प्रोत्साहन दिले पाहिजे.

उपमुख्यमंत्री अजितदादा पवार हे पाचवेळा पुण्याचे पालकमंत्री झालेले आहेत. अनेक वर्षांपासून ते जिल्ह्याचे नेतृत्व करीत आहेत. प्रशासकीय कामात त्यांचा हातखंडा आहे. शहरासह ग्रामीण भागातील विकासकामे, प्रलंबित प्रश्न, नागरिकांना उद्भवणाऱ्या समस्या, कोणत्या कामांना प्राधान्य द्यायचे याची त्यांना माहिती आहे. त्यामुळे पालकमंत्री पदाची जबाबदारी त्यांच्याकडे आल्याने विविध विकासकामांना आणखी गती मिळणार आहे. सदरप्रसंगी शहराध्यक्ष दीपक मानकर, कार्याध्यक्ष प्रदीप देशमुख,प्रवक्त्या रुपाली पाटील ठोंबरे, मा.महापौर दत्ता धनकवडे, सांस्कृतिक प्रदेशाध्यक्ष बाबासाहेब पाटील, मा.विरोधी पक्षनेते दत्ता सागरे, मा.नगरसेविका सुषमा निम्हण, शशिकला कुंभार, शुक्राचार्य वांजळे, युवती अध्यक्ष पूजा झोळे, विद्यार्थी अध्यक्ष शुभम माताळे, दिव्यांग अध्यक्ष पंकज साठे, माहिती अधिकार अध्यक्ष दिनेश खराडे, ज्येष्ठ नागरिक अध्यक्ष चंद्रहास शेट्टी, विधानसभा मतदारसंघाचे वडगावशेरी अध्यक्ष सतीश म्हस्के, पर्वती अध्यक्ष संतोष नांगरे, कसबा अध्यक्ष अजय दराडे, खडकवासला ग्रामीण अध्यक्ष राजेंद्र पवार, पुणे कँन्टोनमेंट अध्यक्ष नरेश जाधव आदी पदाधिकारी व कार्यकर्ते मोठ्या संख्येने उपस्थित होते.

पुणे – माजी गृहराज्यमंत्री रमेशदादा बागवे यांच्या वाढदिवसानिमित्त नाना पेठ पुणे अहिल्या आश्रम डॉ बाबासाहेब आंबेडकर महाविद्यालयाच्या मैदानामध्ये भव्य फुल पीच क्रिकेट स्पर्धेचे आयोजन करण्यात आले होते या क्रिकेट स्पर्धेचे उद्घाटन माजी नगरसेवक अविनाश बागवे व डीसीएम सोसायटी ऑफ इंडियाचे जनरल सेक्रेटरी विशाल शेवाळे यांच्या हस्ते करण्यात आले होते दोन दिवस चाललेल्या या क्रिकेट स्पर्धेमध्ये सुमारे 16 संघांनी सहभागी झाले होते, या क्रिकेट स्पर्धेचे बक्षीस वितरण माजी गृहराज्यमंत्री रमेशदादा बागवे यांच्या हस्ते संपन्न झाले, या क्रिकेट स्पर्धेमध्ये राजेवाडी (आर सी सी) क्रिकेट संघाने प्रथम क्रमांक पटकाविला, द्वितीय क्रमांक कसबा वॉरियर संघाने पटकाविला, तृतीय क्रमांक एकता क्रिकेट संघाने पटकाविला, या विजेता संघांना स्मृतिचिन्ह व विजय चषक देऊन त्यांना गौरवण्यात आला, या क्रिकेट स्पर्धेचे आयोजन पुणे शहर युवक काँग्रेसचे सरचिटणीस व मातंग एकता आंदोलन राजेवाडी शाखेचे अध्यक्ष अक्षय अवचिते यांनी केले होते, यावेळी माजी नगरसेवक अविनाश बागवे, डीसीएम सोसायटी ऑफ इंडियाचे जनरल सेक्रेटरी विशाल शेवाळे, विठ्ठल थोरात, दयानंद अडागळे, किरण लोंढे, सुरेश अवचिते, विकी भिसे, राजू शेखमेजर, साहिल खान, कौस्तुभ वाघमारे, विशाल पवार, अक्षय पवार, चंद्रकांत वाघमारे, किरण चकाले, आदि यावेळी उपस्थित होते

• संसद कट्टा अंतर्गत उपमुख्यमंत्री अजित पवार आणि छगन भुजबळ यांची मुलाखत

पुणे : युवा शक्तीला योग्य गती व दिशा देऊन समाजकारण आणि राजकारणामध्ये त्यांचे अधिष्ठान निर्माण करण्याकरीता तसेच सशक्त युवा, सशक्त राजकारण व सशक्त भारताकरीता तरुणाईने पुढाकार घ्यावा, याकरिता पुण्यामध्ये आठव्या युवा संसदेचे आयोजन करण्यात आले आहे. न-हे येथील जाधवर ग्रुप ऑफ इन्स्टिटयूटस्, पुणे तर्फे गुरुवार, दिनांक ३० व शुक्रवार, दिनांक ३१ जानेवारी २०२५ रोजी सकाळी ९ ते सायंकाळी ६ यावेळेत संस्थेच्या सभागृहात ही संसद होणार आहे, अशी माहिती इन्स्टिटयूटचे उपाध्यक्ष व संसदेचे संस्थापक अध्यक्ष अ‍ॅड. शार्दुल जाधवर यांनी पत्रकार परिषदेत दिली.

यावर्षी संसद कट्टा अंतर्गत महाराष्ट्राचे उपमुख्यमंत्री अजित पवार आणि माजी उपमुख्यमंत्री छगन भुजबळ यांचे मुलाखतीचे सत्र होणार आहे. संसदेत मागील वर्षी शिवसेनेचे नेते संजय राऊत यांची मुलाखत झाली होती. माजी कॅबिनेट मंत्री महादेव जानकर, माजी राज्यमंत्री सदाभाऊ खोत, स्वाभिमानी शेतकरी संघटनेचे अध्यक्ष राजू शेट्टी, गणराज्य संघाच्या संस्थापक अध्यक्ष सुषमा अंधारे, ज्येष्ठ पत्रकार संजय आवटे, सावित्रीबाई फुले पुणे विद्यापीठाच्या व्यवस्थापन परिषदेचे सदस्य राजेश पांडे, भारतीय छात्र संसदेचे अध्यक्ष राहुल कराड, जाधवर ग्रुप आॅफ इन्स्टिटयूटस्चे अध्यक्ष प्राचार्य डॉ. सुधाकर जाधवर हे संसदेच्या कार्यकारिणीमध्ये आहेत.

संसदेत देशभरातील राजकारण, समाजकारण आणि विविध विषयांतील तज्ज्ञांशी थेट संवाद साधण्याची संधी महाराष्ट्रातील तरुणांना मिळणार आहे. महाराष्ट्रातून सुमारे १५०० हजार विद्यार्थी संसदेत सहभागी होणार आहेत. सावित्रीबाई फुले पुणे विद्यापीठ, लायन्स क्लब इंटरनॅशनल, रोटरी इंटरनॅशनल यांच्या माध्यमातून अनेक विद्यार्थी संसदेत सहभागी होणार आहेत. पुण्यासह सोलापूर, अकोला, कोल्हापूर, मराठवाडा, कोकण यांसह विविध भागांतून विद्यार्थी संसदेकरीता येणार आहेत.

अ‍ॅड.शार्दुल जाधवर म्हणाले, ग्रामसभा ते लोकसभा, राजकारणातील व समाजकारणातील महिलांचा सहभाग, माध्यमे राजकारण घडवतात?, व्हिजन भारत २०२९, सशक्त युवा सशक्त राजकारण सशक्त भारत या विषयांवर संसदेत सत्र होणार आहेत. राजकीय, सामाजिक, आर्थिक, शैक्षणिक अशा विविध विषयांवर अनेक मान्यवर आपले विचार मांडणार आहेत. वयवर्षे १६ ते ४० मधील तरुणांनी संसदेत सहभाग घ्यावा. संसदेत सहभागी होण्याकरीता मोफत प्रवेश असून विद्यार्थीनींची एक दिवसाची पुण्यामध्ये राहण्याची आणि जेवणाची सोय करण्यात येणार आहे.

संसदेच्या माध्यमातून युवकांनी राजकारण आणि समाजकारणातील दिग्गजांसोबत संवाद साधावा, हा यामागील मुख्य उद्देश आहे. संसदेकरीता प्रवेश विनामूल्य आहे, तरी तरुणाईने मोठया संख्येने सहभागी व्हावे, असे आवाहनही संस्थेतर्फे करण्यात आले आहे.

पर्पल जल्लोष 2025 चा समारोप उत्साहात

पुणे दि. 19:- ‘विकसित भारताचे स्वप्न आपल्या सर्वांना पूर्ण करायचे आहे. जगातील सर्वात सक्षम देश म्हणून भारताला पुढे नेण्यासाठी सर्वांनी एकत्रित प्रयत्न गरजेचे आहे. आपण समाजातील प्रत्येक घटकाच्या गरजा ओळखून त्यांना एकत्रित घेऊन पुढे गेलो तर भारत निश्चितच एक आदर्श देश म्हणून जगासमोर येईल. यामध्ये प्रत्येकाचे योगदान महत्वाचे असून कोणतेही काम करताना फळाची अपेक्षा न करता ते काम प्रामाणिकपणे केल्यास यश नक्की मिळेल, असे प्रतिपादन राज्यपाल सी.पी.राधाकृष्णन यांनी केले.

 दिव्‍यांग बांधवांना समाजाच्‍या मुख्‍य प्रवाहात आणत त्‍यांचे सक्षमीकरण करण्‍याच्‍या उद्देशाने पिंपरी चिंचवड महापालिका दिव्यांग भवनाच्या वतीने 17 ते 19 जानेवारी या कालावधीत ‘पर्पल जल्‍लोष’ कार्यक्रमाचे आयोजन करण्यात आले होते. 

या कार्यक्रमाचा समारोप राज्यपाल सी.पी.राधाकृष्णन यांच्या उपस्थितीत झाला, त्यावेळी ते बोलत होते.
कार्यक्रमास खासदार श्रीरंग आप्पा बारणे, आमदार अमित गोरखे, पद्मश्री मुरलीकांत पेटकर, राज्याच्या दिव्यांग कल्याण आयुक्तालयाचे दिव्यांग कल्याण आयुक्त प्रवीण पुरी, जिल्हाधिकारी जितेंद्र डूडी, महापालिकेचे आयुक्त तथा प्रशासक शेखर सिंह, अतिरिक्त पोलीस आयुक्त वसंत परदेशी, अतिरिक्त आयुक्त प्रदीप जांभळे पाटील, विजयकुमार खोराटे, चंद्रकांत इंदलकर, दिव्यांग भवन फाऊंडेशनचे व्यवस्थापकीय संचालक ओमप्रकाश देशमुख, मुख्य आरोग्य वैद्यकीय अधिकारी डॉ. लक्ष्मण गोफणे, उप आयुक्त अण्णा बोदडे, विशेष अधिकारी किरण गायकवाड, सहाय्यक आयुक्त विजयकुमार थोरात, जनसंपर्क अधिकारी प्रफुल्ल पुराणिक, दिव्यांग भवनाचे मुख्य कार्यकारी अधिकारी परेश गांधी, सल्लागार विजय कान्हेकर, अभिजित मुरुगकर, दिव्यांग संघटनेचे प्रतिनिधी मानव कांबळे, दत्तात्रय भोसले, संगीता काळभोर, राजेंद्र वागचौरे उपस्थित होते.

राज्यपाल म्हणाले, पिंपरी चिंचवड महापालिका आणि दिव्यांग भवन फाऊंडेशन यांनी दिव्यांगांच्या उत्कर्षासाठी, विकासासाठी जे पाऊल उचलले आहे ते कौतुकास्पद आहे. आजचा हा सोहळा म्हणजे दिव्यांग व्यक्तींच्या प्रबळ इच्छाशक्तीचा केलेला सन्मान आहे. असा अनोखा कार्यक्रम आयोजित केल्याबद्दल मी पिंपरी चिंचवड महापालिकेचे अभिनंदन करतो. पर्पल जल्लोष कार्यक्रम आयोजित करण्यामागे असणारा उद्देश खूप मोठा आहे. याठिकाणी दिव्यांगांसाठी काम करणाऱ्या विविध स्वयंसेवी संस्था, औद्योगिक संस्था यांच्या स्टॉलला भेट दिली. यावेळी एखाद्या उद्योगाला मानवी भावनांची जोड मिळाली तर प्रगती करणे सहज शक्य होते याचा प्रत्यय आला, असे राज्यपाल सी. पी. राधाकृष्णन म्हणाले.

पर्पल जल्लोष म्हणजे समाजाच्या संघटीत प्रगतीचे उत्तम उदाहरण
‘दिव्यांग व्यक्तीचे समाजाचा भाग होण्यासाठी जे प्रयत्न सुरू असतात, त्याचे शब्दात वर्णन करणे शक्य नाही. पण अशा प्रयत्नांना पर्पल जल्लोषच्या माध्यमातून बळ मिळते. पर्पल जल्लोष सोहळा म्हणजे समाजाची संघटीत प्रगतीचे एक उत्तम उदाहरण आहे. जन्मजात दिव्यांगांना लवकरात लवकर मदत मिळावी, उपचार मिळावेत, यासाठी निधी देऊन तो लाभार्थ्यांपर्यंत पोहोचवणे गरजेचे आहे. आपल्याकडे जे काही कलागुण आहेत, त्याचा योग्य वापर करून त्यांनी पुढे जात रहावे. सामाजिक बांधिलकी जोपासून आपल्याकडून ज्या पद्धतीने मदत करणे शक्य होईल ती करावी,’ असे आवाहन राज्यपाल सी.पी.राधाकृष्णन यांनी यावेळी केले.

खासदार श्रीरंग बारणे म्हणाले, पिंपरी चिंचवड महापालिकेने देशातील पहिले दिव्यांग भवन उभारण्याचे काम केले आहे. त्याबद्दल मी महापालिका आयुक्त शेखर सिंह व त्यांच्या सहकाऱ्यांचे आभार मानतो. ‘पर्पल जल्लोष’ कार्यक्रमातून राज्यातील दिव्यांग संघटनांना मार्गदर्शन ठरावे असा जल्लोष झाला आहे. देशाचे पंतप्रधान नरेंद्र मोदी यांच्या नेतृत्वाखाली केंद्र सरकारच्या वतीने दिव्यांगांसाठी विविध योजना राबवण्यात येत असतात. केंद्र व राज्य शासनाच्या दिव्यांगांसाठी असणाऱ्या योजना या दिव्यांगांपर्यंत पोहोचवण्याचे काम करण्यासोबतच त्यांना न्याय देण्याचे, त्यांना आधार देण्याचे काम करणे गरजेचे आहे.
पिंपरी चिंचवड महापालिकेचे आयुक्त तथा प्रशासक शेखर सिंह यांनी प्रास्ताविक करताना ‘पर्पल जल्लोष’ कार्यक्रम आयोजित करण्यामागील उद्देश तसेच दिव्यांग भवन फाऊंडेशनबाबत माहिती दिली. शेखर सिंह म्हणाले, ‘दिव्यांग बांधवांचे उत्कर्ष आणि विकासाला केंद्रबिंदू मानत ‘पर्पल जल्लोष’ हा उत्सव आयोजित करण्यात आला आहे. पिंपरी चिंचवड महापालिकेने महाराष्ट्रात सर्वात प्रथम दिव्यांगांसाठी दिव्यांग भवन सुरू केले. याठिकाणी 21 प्रकारच्या दिव्यांगत्वावर मोफत सल्ला व मार्गदर्शन, विविध प्रकारच्या थेरपी, कौशल्य विकास, रोजगार, स्वयंरोजगार असे विविध उपक्रम फाऊंडेशनच्या माध्यमातून सुरू आहेत. दिव्यांगांच्या कलागुणांना वाव देण्यासाठी साहित्य जत्रा, सांस्कृतिक कार्यक्रम, फिल्म फेस्टिव्हलसारखे कार्यक्रम या पर्पल जल्लोषमध्ये घेण्यात आले.

पर्पल सॉल्वथॉन स्पर्धेतील विजेत्यांना पुरस्कार
पर्पल जल्लोष कार्यक्रमाच्या निमित्ताने पर्पल सॉल्वथॉन स्पर्धेचे आयोजन करण्यात आले होते. सॉल्वथॉन स्पर्धेमध्ये इंजिनीअरिंग थीम मध्ये जी.एच.रायसोनी कॉलेज ऑफ इंजिनीअरिंग अँड मॅनेजमेंट या महाविद्यालयाच्या संघाला प्रथम क्रमांक मिळाला. या महाविद्यालयाच्या टीममध्ये पियुष जोशी आणि राज तिलक जोशी यांचा समावेश होता. तर, आर्किटेक्चर थीम मध्ये भारती विद्यापीठ कॉलेज ऑफ ऑर्किटेक्चर या महाविद्यालयाच्या टीमला प्रथम क्रमांक मिळाला. या दोन्ही संघांना राज्यपाल सी.पी.राधाकृष्णन यांच्या हस्ते पारितोषिक देण्यात आले. राज्यपालांनी कार्यक्रमास उपस्थित असलेल्या दिव्यांग बांधवांशी संवाद साधला.
याप्रसंगी दिव्यांगांचे प्रतिनिधी म्हणून मानव कांबळे यांचा राज्यपाल सी.पी.राधाकृष्णन यांच्या हस्ते सन्मान करण्यात आला. आभार दिव्यांग भवन फाऊंडेशनचे व्यवस्थापकीय संचालक ओमप्रकाश देशमुख यांनी आभार मानले तर सूत्रसंचालन महापालिका विशेष अधिकारी किरण गायकवाड यांनी केले. कार्यक्रमाला महापालिकेच्या विविध विभागाचे अधिकारी, दिव्यांगांसाठी काम करणाऱ्या स्वयंसेवी संस्थांचे प्रतिनिधी उपस्थित होते.

क्रीडा क्षेत्राशी निगडित प्रश्न मार्गी लावण्याकरीता राज्यशासनाचा सकारात्मक प्रयत्न-उपमुख्यमंत्री अजित पवार

पुरुष विभागात मुंबई शहर पूर्व तर महिला विभागात पुणे ग्रामीण जिल्हा संघ विजयी

बारामती, दि.१९:  महाराष्ट्र राज्य खेळाच्या बाबतीत अग्रेसर राहिला पाहिजे, खेळाडूंना बक्षिसाच्या माध्यमातून भरीव रक्कम मिळाली पाहिजे यादृष्टीने क्रीडा क्षेत्राशी निगडित प्रश्न मार्गी लावण्याकरीता राज्यशासनाचा सकारात्मक प्रयत्न आहे, असे प्रतिपादन उपमुख्यमंत्री तथा जिल्ह्याचे पालकमंत्री अजित पवार यांनी केले.

पुरुष विभागात पुणे ग्रामीण आणि मुंबई शहर पूर्व तर महिला विभागात पुणे ग्रामीण आणि मुंबई शहर पश्चिम यांच्या झालेल्या अंतिम सामन्यात पुरुष विभागात मुंबई शहर पूर्व संघ तर महिला विभागात पुणे ग्रामीण संघ विजयी झाले.रेल्वे मैदानावर आयोजित कार्यक्रमात
विजेत्या संघास उपमुख्यमंत्री श्री पवार यांच्या हस्ते पारितोषिक वितरण करण्यात आले.

यावेळी जिल्हा परिषदेचे मुख्य कार्यकारी अधिकारी गजानन पाटील, अपर जिल्हाधिकारी सुहास मापारी, अपर पोलीस अधीक्षक गणेश बिरादार, उप विभागीय अधिकारी वैभव नावडकर, क्रीडा व युवक सेवा संचालनालयाचे सहसंचालक सुधीर मोरे, उपसंचालक युवराज नाईक, जिल्हा क्रीडा अधिकारी महादेव कसगावडे, तालुका क्रीडा अधिकारी महेश चावले उपस्थित होते.

श्री. पवार म्हणाले, कबड्डी हा पारंपरिक खेळ असून त्यांच्या सर्वांगीण विकासाकरीता प्रयत्न करण्यात येईल.
कोणत्याही स्पर्धेत जय पराजय निश्चित असतो त्यामुळे
जिंकण्यासाठी सर्व खेळाडूकडे खेळाडूवृत्ती असली पाहिजे, पराभव हा आदरपूर्वक, सन्मानजनक असला पाहिजे. विजयी संघांनीदेखील विजयाची हवा डोक्यात जाऊ देऊ नका, पराभूत संघांनी पराभवाचे शल्य मनात न ठेवता नव्या उमेदेनी पुढील तयारी केली पाहिजे. पराभूत संघाची सुध्दा लोकांनी स्तुती केली पाहिजे अशा प्रकारची कामगिरी संघाकडून झाली पाहिजे. खेळाडूंनी
खेळ पूर्ण क्षमतेने खेळ खेळून उत्कृष्ट कामगिरी करत सर्वोत्कृष्ट खेळ दाखविला पाहिजे.

राज्य सरकारच्यावतीने क्रीडा क्षेत्राकरीता विविध निर्णय घेण्यात आले असून हे निर्णय खेळाडूसह क्रीडा रसिकांना उपयुक्त ठरणार आहेत. पुढच्या वर्षी छत्रपती शिवाजी महाराज चषक राज्यस्तरीय कबड्डी स्पर्धा, कै. भाई नेरुरकर चषक राज्यस्तरीय खो-खो स्पर्धा, छत्रपती शिवाजी महाराज चषक राज्यस्तरीय व्हॉलीबॉल स्पर्धा आणि स्व. खाशाबा जाधव चषक राज्यस्तरीय कुस्ती स्पर्धांच्या आयोजनाकरीता राज्यशासनातर्फे १ कोटी रुपयाचा निधी उपलब्ध करुन देण्यात येईल, राज्य शासनाच्यावतीने क्रीडा विभागासाठी निर्णय घेण्यात आले असून त्याचा खेळाडूंना निश्चित लाभ होईल, अशी माहिती उपमुख्यमंत्री श्री. पवार यांनी केले.

कला, क्रीडा, सांस्कृतिक अशा क्षेत्रातील विविध कार्यक्रमाचे आयोजन करुन बारामतीकरांना लाभ मिळाला पाहिजे, त्याचा आनंद घेता यावा याकरीता अशा प्रकारच्या कार्यक्रमाचे आयोजन करण्यात येते. आपणही या स्पर्धा, कार्यक्रमाला उत्तम प्रतिसाद दिला आहे, याचा मला अभिमान आहे. कबड्डी स्पर्धेत खेळाडूंच्यावतीने क्रीडा रसिकांचे डोळ्यांचे पारणे फेडणारे खेळ खेळण्यात आले. शिवछत्रपती शिवाजी महाराजांच्या नावाला साजेशी स्पर्धा आयोजित करण्यासाठी सहकार्य केल्याबद्दल सर्वांचे आभार मानले. यापुढे अशाच प्रकारच्या स्पर्धा आयोजित करण्यात येतील, असेही श्री. पवार म्हणाले.

महाराष्ट्र राज्य सहकार बँकेच्यावतीने कबड्डी खेळाच्या विकासासाठी महाराष्ट्र राज्य कबड्डी संघटनेस ९५ लाख  रुपयांचा धनादेश श्री. उपमुख्यमंत्री पवार यांच्या हस्ते प्रदान करण्यात आला.

महाराष्ट्र राज्य कबड्डी संघटनेचे सरकार्यवाह बाबुराव चांदोरे, अर्जून पुरस्कारार्थी शांताराम जाधव, शकुंतला खटावकर, मायाजी आकरे, महाराष्ट्र राज्य सहकार बँकेचे प्रशासक विद्याधर अनास्कर, पुणे जिल्हा मध्यवर्ती बँकेचे संचालक संभाजी होळकर यांच्यासह राज्य कबड्डी संघटना व पुणे जिल्हा कबड्डी संघटनेचे पदाधिकारी, खेळाडू, क्रीडाप्रेमी यावेळी आदी उपस्थित होते.

श्री. चांदोरे यांनी कार्यक्रमाचे प्रास्ताविक केले तर आभार प्रदर्शन श्री. कसगावडे यांनी केले.

अजमते-ए-काश्मीर‌’ महोत्सवाचे मंगळवारी आयोजन
पुणे : जम्मू-काश्मीरचा सांस्कृतिक वारसा अनुभवण्याची संधी पुणेकरांना ‌‘अजमते-ए-काश्मीर‌’ या 13व्या काश्मीर महोत्सवातून मिळणार आहे. सरहद, पुणे आणि महाराष्ट्र स्टेट इलेक्ट्रिसिटी ट्रान्समिशन कं. लि.तर्फे मंगळवारी या महोत्सवाचे आयोजन करण्यात आले आहे. काश्मिरी आणि मराठी गायन तसेच भजनासाठी प्रसिद्ध असलेल्या शमिमा अख्तर या महोत्सवाच्या मुख्य आकर्षण असणार आहेत.
काश्मीर महोत्सव मंगळवार, दि. 21 जानेवारी 2025 रोजी दुपारी 3 ते सायंकाळी 6 या वेळात नटसम्राट निळू फुले नाट्यगृह, पिंपळे गुरव, पुणे येथे होणार आहे. महाराष्ट्र स्टेट इलेक्ट्रिसिटी ट्रान्समिशन कं. लि.चे व्यवस्थापकीय अध्यक्ष डॉ. संजीवकुमार शर्मा, विभागीय आयुक्त चंद्रकांत पुलकुंडवार, जिल्हाधिकारी जितेंद्र डुडी, महाराष्ट्र स्टेट इलेक्ट्रिसिटी ट्रान्समिशन कं. लि.चे मुख्य अभियंता अनिल कोळप आणि सरहद, पुणेचे संस्थापक अध्यक्ष संजय नहार यांची प्रमुख उपस्थिती असणार आहे, अशी माहिती निवेदनाद्वारे कळविली आहे.
पारंपरिक काश्मिरी गीते, नृत्य, रौफ, संतूर, रबाब, ठुमर नारी आदी वाद्यांचे सादरीकरण काश्मिरी कलाकार करणार आहेत. काश्मीरमधील 20 कलाकारांचा यात समावेश आहे. काश्मीरच्या लोकसंस्कृतीशी जोडलेला हा महोत्सव पुणेकरांसाठी आयोजित करण्यात आला असून सर्वांना मुक्त प्रवेश आहे.

विकासाचा मुद्दा राहतो दूर : नेत्यांना खूष करण्याचाच प्रयत्न
युवा संवाद आयोजित आंतरराष्ट्रीय व्यंगचित्र महोत्सवास रोहित पवार यांची भेट

पुणे : पत्रकाराच्या लेखणीप्रमाणे व्यंगचित्रकाराच्या कुंचल्यात ताकद आहे. यामुळेच राजकारणी व्यंगचित्र प्रदर्शनास भेट देण्याचे टाळतात, असे वाटते. राजकीय, सामाजिक प्रश्नांवरील व्यंगचित्रांचा संदर्भ देऊन मार्मिक टिप्पणी करताना आमदार रोहित पवार म्हणाले, चित्रात दर्शविल्याप्रमाणे पाणी वाया घालवून महिला मात्र नळकोंड्यावर भांडणे करीत आहेत त्याप्रमाणे सभागृहात आम्ही राजकारणी मंडळी विकासाचा मुद्दा बाजूला सारून विरोधासाठी विरोध करताना किंवा नेत्याला खूष करण्याकरिता एकमेकांशी भांडत राहतो.

युवा संवाद सामाजिक संस्थेच्या पुढाकारातून पुणे आंतरराष्ट्रीय व्यंगचित्र महोत्सवाचे बालगंधर्व कलादालनात आयोजन करण्यात आले असून या महोत्सवास आज (दि. 19) आमदार रोहित पवार यांनी भेट देऊन व्यंगचित्रांची पाहणी केली. त्या वेळी ते बोलत होते. व्यंगचित्र महोत्सवाचे संयोजक, व्यंगचित्रकार धनराज गरड, लहु काळे, घन:श्याम देशमुख मंचावर होते.

पक्ष फोडणे, पक्ष बदलणे, लोकप्रतिनिधी पळविणे, कोण कुणाच्या वाहनात स्वार होणे, खुर्चीच्या लोभापायी मंत्र्यांचे जॅकेट परिधान करून मिरविणे, फिरविणे आणि मात्र मंत्रिपद न मिळाल्यामुळे लेखणीचा उपयोग केवळ जॅकेटच्या खिशाला लावण्यासाठी करणे अशा राजकीय परिस्थिती आणि व्यंगचित्रांवर भाष्य करून आमदार रोहित पवार म्हणाले, राजकारणी स्वत:च्या वागणुकीनेच व्यंगचित्रकारांना खुराक देतात, स्वत:ची छबी निर्माण करतात तीच छबी व्यंगचित्रकार स्वत:च्या चित्रशैलीतून साकारतो आणि ती कामय राहते. असे होऊ नये म्हणून मी वारंवार माझी स्टाईल बदलत राहतो. पूर्वीचे नेते व्यंगचित्रांमधून झालेली टीका खेळीमेळीने स्वीकारायचे, परंतु आजच्या परिस्थितीत असे होताना दिसत नाही. एकाधिकारशाहीचा अंमल वाढल्यामुळे कलाकाराला व्यक्त होण्यास मर्यादा येत आहेत. राजकारणापेक्षा सामाजकारण वाढविले तरी आम्हाला निवडणुकीत यश आले नाही. पुढील काळ आमच्यासाठी संघर्षाचा ठरणार आहे.
प्रास्ताविकात धनराज गरड यांनी आमदार पवार यांना व्यंगचित्र महोत्सवाचे स्वागताध्यक्षपद स्वीकारावे आणि व्यंगचित्रकला-कलाकारांना राजश्रय द्यावा अशी विनंती केली. सूत्रसंचालन किशोर गरड यांनी केले. लहु काळे, घन:श्याम देशमुख, शरद महाजन, अमित पापळकर, हेमंत कुंवर, ऋषिकेश उपळावीकर या व्यंगचित्रकारांचा सत्कार आमदार पवार यांच्या हस्ते करण्यात आला. व्यंगचित्रकार गौरव सर्जेराव यांनी प्रात्यक्षिक सादर केले.