पुणे शहर पोलीस दलातील नव्याने स्थापन झालेल्या ७ पोलीस ठाण्यात वरिष्ठ पोलीस निरीक्षकांच्या नियुक्त्या करण्यात आल्या आहेत. काल दि. ११ रोजी रात्री उशिरा पोलीस आयुक्त अमितेश कुमार यांनी नियुक्ती आदेश काढले आहेत.

१. शरद आसाराम झिने – गुन्हे पोलीस निरीक्षक, भारती विद्यापीठ ते वपोनि आंबेगाव पोलीस ठाणे

२. अतुल मुरलीधर भोस – गुन्हे पोलीस निरीक्षक, सिंहगड रोड ते वपोनि नांदेडसिटी पोलीस ठाणे

३. महेश गुंडाप्पा बोळकोटगी – वपोनि चतुःशृंगी पोलीस ठाणे ते वपोनि बाणेर पोलीस ठाणे

४. विजयानंद पद्माकर पाटील – गुन्हे पोलीस निरीक्षक चतुःशृंगी ते वपोनि चतुःशृंगी पोलीस ठाणे

५. संजय गुंडाप्पा चव्हाण – वपोनि चंदननगर पोलीस ठाणे ते वपोनि खराडी पोलीस ठाणे
६. अनिल शिवाजी माने – गुन्हे पोलीस निरीक्षक चंदननगर पोलीस ठाणे ते वपोनि चंदननगर पोलीस ठाणे

७. पंडित हणमंतराव रेजितवाड – वपोनि लोणीकंद पोलीस ठाणे ते वपोनि वाघोली पोलीस ठाणे

८. सर्जेराव शामराव कुंभार – गुन्हे पोलीस निरीक्षक विमानतळ ते वपोनि लोणीकंद पोलीस ठाणे

९. श्रीमती मंगल शामराव मोंढवे – वपोनि बिबवेवाडी पोलीस ठाणे ते वपोनि फुरसुंगी पोलीस ठाणे

१०. शंकर भिकू साळुंखे – गुन्हे पोलीस निरीक्षक विश्रांतवाडी पोलीस ठाणे ते वपोनि बिबवेवाडी पोलीस ठाणे
११ मानसिंग संभाजी पाटील – गुन्हे पोलीस निरीक्षक कोंढवा पोलीस ठाणे ते वपोनि काळेपडल पोलीस ठाणे

तसेच मुंबई येथून बदलीने आलेल्या पोलीस निरीक्षकांची बदली पुढील प्रमाणे

१. राहुल वीरसिंग गौड – गुन्हे पोलीस निरीक्षक खडक पोलीस ठाणे

२. अमर नामदेव काळंगे – गुन्हे पोलीस निरीक्षक हडपसर पोलीस ठाणे

३. राजेंद्र भाऊराव पन्हाळे – गुन्हे पोलीस निरीक्षक चतुःशृंगी पोलीस ठाणे

पुणे :पूर्ववैमनस्यातून सामाजिक कार्यकर्ते बाळासाहेब रणदिवे यांचा निर्घुण खून करणार्‍या आरोपींना बिबवेवाडी पोलिसांनी २४ तासांच्या आत अटक केली.
राहुल दत्तात्रय खुडे (वय ४०), सचिन दत्तात्रय खुडे (वय ३४) आणि सुरजसिंग दिलीपसिंग दुधानी (वय २७, सर्व रा. डायस प्लॉट, गुलटेकडी) अशी अटक केलेल्यांची नावे आहेत. बाळासाहेब रणदिवे व आरोपी यांच्यात यापूर्वी भांडणे झाली होती. व्हॉटसअ‍ॅप ग्रुपवर रणदिवे यांनी टाकलेल्या मेसेजवरुन वाद निर्माण झाला होता. रणदिवे हे मार्केटयार्डमधील सावित्री हॉटेलचे समोरील शेडमध्ये चहा पित बसले असताना आरोपी धारदार शस्त्रे घेऊन आले. त्यांनी रणदिवे यांच्यावर कोयत्याने वार करुन त्यांना गंभीर जखमी केले. उपचार सुरु असताना दुसर्‍या दिवशी सकाळी यांचा मृत्यु झाला. या गुन्ह्याचा तपास करीत असताना पोलीस अंमलदार सुमित ताकपेरे यांना बातमी मिळाली की, आरोपी हे कात्रज घाटाचे दिशेने साताराकडे जाणार आहेत. त्यानुसार पोलिसांनी कात्रज घाटात सापळा रचून तिघांना अटक केली. ही कामगिरी अपर पोलीस आयुक्त मनोज पाटील, पोलीस उपायुक्त आर राजा, सहायक पोलीस आयुक्त धन्यकुमार गोडसे यांच्या मार्गदर्शनाखाली वरिष्ठ पोलीस निरीक्षक मंगल मोढवे, गुन्हे निरीक्षक मनोजकुमार लोंढे, पोलीस उपनिरीक्षक अशोक येवले, पोलीस अंमलदार संजय गायकवाड, संतोष जाधव, सुमित ताकपेरे, प्रणय पाटील, आशिष गायकवाड, विशाल जाधव, शिवाजी येवले, प्रणय पाटील, ज्योतिष काळे, अभिषेक धुमाळ यांनी केली आहे.

पुणे : घराची पुजा करायची आहे, असे आमिष दाखवून पुजारी व त्यांचे शिष्य यांना विजापूरला घेऊन जाऊन डांबून ठेवून ५ कोटींची खंडणी मागणार्‍या सराईत गुन्हेगारांना बिबवेवाडी पोलिसांनी जेरबंद केले आहे. रामु अप्पाराम बळुन (वय २९, रा. त्रिकुंडी, ता. जत, जि. सांगली), दत्ता शिवाजी करे (वय २०, रा. त्रिकुंडी ता. जत, जि. सांगली), हर्षद सुरेश पाटील (वय २२, रा. आसंगी, ता. जत, जि. सांगली) अशी अटक केलेल्यांची नावे आहेत.आरोपी हे फिर्यादी यांचे घरी २९ सप्टेबर रोजी आले. फिर्यादीचा मुलाला भेटून विजापूर येथे घराची पुजा करायची आहे, असे आमिष दाखविले. कर्नाटक येथे पुजारी व त्यांचे सोबतचे शिष्य यांना घेऊन गेले. पिस्तुल व हत्यारांचा धाक दाखवून अपहरण करुन ५ कोटींच्या खंडणीसाठी त्यांना डांबुन ठेवले होते.या गुन्ह्याचा तपास करीत असताना तपास पथकाला आरोपींनी पुजारी व त्यांचे शिष्यांना कर्नाटकामधील सिंधनूर जवळ डांबून ठेवल्याची खात्रीशीर बातमी मिळाली. त्यानुसार पोलीस उपनिरीक्षक अशोक येवले, पोलीस अंमलदार सुमीत ताकपेरे, जोतीष काळे यांचे पथक रवाना झाले. सिंधनूर येथे पोहचल्यानंतर स्थानिक पोलिसांच्या मदतीने मिळालेल्या बातमीच्या ठिकाणी केले असता आरोपींनी पुजारी व त्यांचे शिष्यांना एका निर्जन ठिकाणी असलेल्या रुममध्ये डांबुन ठेवले होते. पोलिसांना पाहून आरोपी पळून जात होते. स्थानिक पोलिसांच्या मदतीने बिबवेवाडी पोलिसांनी हत्यारासह ताब्यात घेतले. पुजारी व त्यांच्या ३ शिष्यांची सुटका केली. तसेच आरोपींनी आणखी ४ शिष्याना दुसरीकडे डांबून ठेवले होते. त्यांचीही सुटका केली. अपहरण करण्यासाठी वापरण्यात आलेली हत्यारे ताब्यात घेऊन आरोपींना अटक केली.ही कामगिरी अपर पोलीस आयुक्त मनोज पाटील, पोलीस उपायुक्त आर राजा, सहायक पोलीस आयुक्त धन्यकुमार गोडसे यांच्या मार्गदर्शनाखाली वरिष्ठ पोलीस निरीक्षक मंगल मोढवे, गुन्हे मनोजकुमार लोंढे, पोलीस उपनिरीक्षक अशोक येवले, पोलीस अंमलदार संजय गायकवाड, संतोष जाधव, सुमित ताकपेरे, ज्योतिष काळे, आशिष गायकवाड, प्रणय पाटील, शिवाजी येवले, विशाल जाधव, नितीन कातुर्डे, अभिषेक धुमाळ यांनी केली आहे.

• जागतिक मानसिक आरोग्य दिनानिमित्त रविवारी (ता. १३) आयोजन; नागरिकांना सहभागी होण्याचे आवाहन

पुणे: कामाच्या ठिकाणी मानसिक आरोग्य चांगले राखण्यासाठी प्रोत्साहन देणे ही काळाची गरज आहे. याची गंभीर दखल घेत कनेक्टिंग ट्रस्टने या समस्येकडे लक्ष वेधण्यासाठी वॉकेथॉनचे आयोजन केले आहे. येत्या रविवारी (ता. १३) दुपारी ४ ते ६ या वेळेत संभाजी पार्क, जंगली महाराज रोड, गुडलक चौक, फर्गसन महाविद्यालयमार्गे संभाजी पार्क अशी ही वॉकेथॉन होणार आहे. कनेक्टिंग ट्रस्टच्या संस्थापिका व व्यवस्थापकीय संचालक अर्णवाज दमानिया, सहसंस्थापक सँडी डायस, मुख्य कार्यकारी अधिकारी प्रणिता मडकईकर यांच्या हस्ते हिरवा झेंडा दाखवून वॉकेथॉनला सुरुवात होईल. जागतिक मानसिक आरोग्य दिनाची यंदाची संकल्पना ‘कामाच्या ठिकाणी मानसिक आरोग्याला प्राधान्य’ अशी आहे. पुणेकरांनी या वॉकेथॉनमध्ये सहभागी होण्याचे आवाहन संस्थेने केले आहे.

याविषयी बोलताना प्रणिता मडकईकर म्हणाल्या, “मानसिक आरोग्याविषयी अलीकडे झालेल्या अभ्यासांत कर्मचाऱ्यांच्या मानसिक आरोग्याची काळजी घेण्याची गरज अधोरेखित झाली आहे. कामाच्या ठिकाणीच कर्मचाऱ्यांवर कसा परिणाम होतो याकडे अभ्यासकांनी विशेष लक्ष वेधले आहे. ‘द सायलेंट स्ट्रगल – हाऊ मेंटल हेल्थ इम्पॅक्ट्स द इंडियन वर्कफोर्स २०२३’ यामध्ये १० विविध क्षेत्रे आणि आठ भारतीय शहरांमधील तीन हजार कर्मचाऱ्यांचा अभ्यास ‘आयपीएसओएस’ या संशोधन संस्थेने केलेल्या अभ्यासात प्रत्येक दोनपैकी एका कॉर्पोरेट कर्मचाऱ्यांना मानसिक आरोग्य बिघडण्याचा धोका आढळतो. ९३ टक्के प्रतिसादकर्त्यांनी मानसिक आरोग्य आणि कल्याण महत्त्वाचे वाटत असल्याचे मत नोंदवले. ३५-४५ वयोगटातील लोक, महिला आणि उच्च पदावरील कर्मचारी यांचा समावेश सर्वाधिक धोका असलेल्यांमध्ये होतो. आठवड्याला ४५ तासांपेक्षा जास्त काम करणाऱ्या कर्मचाऱ्यांचाही या गटात समावेश आहे. या अभ्यासात ९० टक्के कर्मचाऱ्यांनी नोकरी व व्यक्तिगत जीवन यांचे संतुलन हा मानसिक आरोग्यावर परिणाम करणारा सर्वोच्च घटक असल्याचे नमूद केले आहे. ४२ टक्के लोकांनी त्यांच्या नोकरीमुळे तणावग्रस्त असल्याचे मान्य केले. जवळजवळ ४५ टक्के लोकांनी कामाच्या ताणामुळे त्यांच्या कौटुंबिक जीवनावर परिणाम झाला आहे, असे सांगितले. ८० टक्के लोकांनी गेल्या वर्षी तणाव, चिंता, बिघडलेले मानसिक आरोग्य यामुळे कामावरून दोन आठवड्यांची रजा घेतल्याचे कबुल केले. ९० टक्के लोकांच्या मते प्रत्येकवेळी रजेवर असताना त्यांच्याकडून कामाची अपेक्षा केली जात असून, हे चिंताजनक आहे.”

‘इनसाईट्स फ्रॉम इंडियाज बेस्ट वर्कप्लेसेस इन हेल्थ अँड वेलनेस २०२३’ या अभ्यासात २१० संस्थांमधील १८.५ लाखांपेक्षा अधिक कर्मचाऱ्यांचा प्रातिनिधीक अभ्यास करण्यात आला. यातील एक महत्त्वाचा निष्कर्ष असे दर्शवितो की, प्रत्येक चार भारतीय कर्मचाऱ्यांपैकी एकाला तणाव, चिंता किंवा नैराश्याबद्दल बोलण्यासाठी संघर्ष करावा लागतो. या परिस्थितीचा परिणाम केवळ भारतीय कार्यस्थळावर होत नसून त्याची व्याप्ती जागतिक आहे, असे हे दोन्ही अहवाल सूचित करतात, असे मडकईकर यांनी नमूद केले.

आत्महत्या प्रतिबंध आणि आत्महत्येला कलंकमुक्त करण्यासाठी कनेक्टींग ट्रस्टच्या समर्पित, प्रशिक्षित स्वयंसेवक आणि कर्मचाऱ्यांची टीम गेली १९ वर्षे कार्यरत आहे. विविध कार्यक्रमांद्वारे हजारो लोकांना ट्रस्ट मदत करत आहे. यात हायस्कूल-काॅलेजेसमध्ये पीअर सपोर्ट तयार करणे, मोफत हेल्पलाइन, ईमेल सपोर्ट, सुसाईड सर्व्हायव्हर सपोर्ट आणि कनेक्टिंग संस्थेमध्ये प्रत्यक्ष भेटूनही संवाद साधता येतो ह्या विनामूल्य सेवांचा समावेश आहे, असे मडकईकर यांनी सांगितले.

पुणे- पुण्यातील जिल्हाधिकारी कार्यालयामार्फत मावळातील दोनशे कोटींची शासकीय जमीन हडपण्याचा प्रयत्न करण्यात येत आहे, यात मंत्री राधाकृष्ण विखे पाटील यांचा मोठा हात आहे, असा आरोप काँग्रेसचे आमदार रवींद्र धंगेकर यांनी केला आहे.

रवींद्र धंगेकर म्हणाले की, कासारसाई धरण प्रकल्पग्रस्तांच्या पुनर्वसनासाठी असलेली मावळ तालुक्यातील 200 कोटी रुपयांची 31 एकर जमीन वाटप आदेश होण्यापूर्वीच नोंदणीकृत साठेखत दस्तऐवजाद्वारे हस्तांतरित करण्यात आल्याचा आारोप त्यांनी केला आहे.

मावळ तालुक्यातील गट क्रमांक 154 सह पाच ते सहा गटांतील शासकीय जागा लाटण्याचा हा प्रकार आहे. या जागेवर कासारसाई प्रकल्पग्रस्तांचे पुनर्वसन होणे अपेक्षित आहे. या जागेचा सातबाराही जिल्हाधिकाऱ्यांच्या नावावर आहे. मात्र, मंत्री विखे पाटील यांच्या जवळचे असलेले सचिन शिंदे, श्वेता आचार्य यांच्यासह काही लोकांनी जिल्हाधिकारी यांच्या नावावर आणि मालकी हक्क असलेली सरकारी जमीन नोंदणीकृत साठेखताद्वारे परस्पर हस्तांतरित करण्यास सुरुवात केली आहे. या जागेच्या सातबाऱ्यावर जिल्हाधिकारी यांचे नाव असल्याने ही जागा सरकारी आहे, हे माहिती असूनही राजकीय दबावातून उपनिबंधकांनी त्याचे साठेखत तयार केले. त्यामुळे या सर्व प्रकाराची उच्चस्तरीय चौकशी झाली पाहिजे. जमीन हस्तांतर करणारे आणि घेणारे, तसेच त्यांना मदत करणाऱ्या उपनिबंधकांवर फौजदारी गुन्हा दाखल करण्यात यावा, अशी मागणी धंगेकर यांनी केली आहे.

बाळासाहेब थोरात म्हणाले की, अनेक अडचर्णीवर मात करीत आपण निळवंडे धरण आणि कालवे पूर्ण केले. निळवंडेसाठी आदर्श पुनर्वसन केले. त्यासाठी आपण स्वतःची जमीन दिली. शेजारच्यांनी गुंठाही जमीन दिली नाही. निळवंडेचे काम कुणी केले हे तुम्ही लक्षात ठेवले पाहिजे, आपल्याला नाव ठेवणाऱ्यांचे निळवंडेसाठी कवडीचेही योगदान नाही, असे टीकास्र काँग्रेसचे आमदार बाळासाहेब थोरात यांनी महसूलमंत्री राधाकृष्ण विखे पाटील यांच्यावर नाव न घेता डागले आहे.

श्री महालक्ष्मी मंदिर सारसबाग सार्वजनिक नवरात्र उत्सव ; विजयादशमीला मंदिरात देवीभक्तांची अलोट गर्दी

पुणे : दक्षिण भारतातील कारागिरांनी सुमारे २३ वर्षांपूर्वी साकारलेली सोन्याची साडी सारसबागेसमोरील श्री महालक्ष्मी देवीला यावर्षी देखील परिधान करण्यात आली. मंदिर प्रशासनाच्या माध्यमातून दरवर्षी देवीच्या मूर्तीला ही तब्बल १६ किलो सोन्याची साडी परिधान केली जाते. विजयादशमीनिमित्त देवीला ही साडी परिधान करण्याची परंपरा आहे.

श्री महालक्ष्मी मंदिर सारसबाग, श्री बन्सीलाल रामनाथ अग्रवाल धार्मिक व सांस्कृतिक ट्रस्ट तर्फे वर्षातून दोनदा ही साडी नेसवली जाते. मंदिराचे संस्थापक विश्वस्त राजकुमार अग्रवाल, प्रमुख विश्वस्त अमिता अग्रवाल, विश्वस्त अ‍ॅड. प्रताप परदेशी, डॉ. तृप्ती अग्रवाल, भरत अग्रवाल, प्रवीण चोरबेले, हेमंत अर्नाळकर, नारायण काबरा, निलेश लद्दड आदी यावेळी उपस्थित होते.

डॉ. तृप्ती अग्रवाल म्हणाल्या, पुरातन काळापासून दस-याच्या दिवशी सोने लुटण्याची परंपरा आहे आणि त्या परंपरेनुसार सोन्याच्या साडीत श्री महालक्ष्मी देवीचे दर्शन भाविकांना व्हावे, याकरिता दसरा आणि लक्ष्मीपूजनाच्या दिवशी ही साडी देवीला नेसविण्यात येते.

सुमारे ६ महिने ही साडी तयार करण्याचे काम सुरु होते. देवीला एका भक्ताने ही साडी अर्पण केली आहे. ही साडी तब्बल १६ किलो वजनाची आहे. आकर्षक नक्षीकाम करुन ही सोन्याची साडी साकारण्यात आली आहे. त्यामुळे श्री महालक्ष्मी देवीचे हे सुवर्णवस्त्रातील रुप पाहण्याकरीता देवी भक्तांकडून दरवर्षी गर्दी केली जाते.

सुरक्षेच्या दृष्टीने वाढत्या आव्हानांचा सामना करण्यासाठी गुणात्मक परिवर्तन आवश्यक –उपमुख्यमंत्री

पुणे, दि. ११: पुणे आणि पिंपरी चिंचवड शहरातील वाढत्या नागरिकीकरण व औद्योगिकीकरणामुळे निर्माण होणाऱ्या सुरक्षेच्यादृष्टीने वाढत्या आव्हानांचा सामना करण्यासाठी गुणात्मक परिवर्तन आवश्यक आहे, असे प्रतिपादन उपमुख्यमंत्री देवेंद्र फडणवीस यांनी केले.

पोलीस आयुक्तालय, पुणे शहर अंतर्गत शिवाजीनगर येथे पोलीस मुख्यालयात विविध प्रकल्पांचे भूमीपूजन व शुभारंभ तसेच न्यायसहायक वैज्ञानिक प्रयोगशाळा संचालनालयाच्या संगणकीय प्रकल्पाच्या पहिल्या टप्प्याचे लोकार्पण व मीरा- भाईंदर पोलीस आयुक्तालयांतर्गत पोलीस ठाण्याचे दूरदृष्य प्रणालीद्वारे लोकार्पण कार्यक्रमात उपमुख्यमंत्री श्री. फडणवीस बोलत होते.

यावेळी केंद्रीय नागरी वाहतूक राज्यमंत्री मुरलीधर मोहोळ, खासदार मेधा कुलकर्णी, आमदार राम शिंदे, उमा खापरे, योगेश टिळेकर, अमित गोरखे, भीमराव तापकीर, सिद्धार्थ शिरोळे, सुनील टिंगरे, न्यायिक व तांत्रिक पोलीस महासंचालक संजय वर्मा, पोलीस आयुक्त अमितेशकुमार, पिंपरी चिंचवड पोलीस आयुक्त विनय कुमार चौबे, महानगरपालिका आयुक्त डॉ. राजेंद्र भोसले तसेच पुणे व पिंपरी चिंचवड पोलीस आयुक्तालयातील अधिकारी, कर्मचारी उपस्थित होते.

उपमुख्यमंत्री श्री. फडणवीस म्हणाले, पुणे शहर अर्थव्यवस्थेचे ग्रोथ इंजिन म्हणून ओळखले जाते. पुणे शहर हे मॅन्युफॅक्चरिंग, टेक्नॉलॉजी व स्टार्टअप कॅपिटल आहे. शहराच्या वाढत्या नागरिकीकरण व औद्योगिकीकरणामुळे पोलीस विभागाची आव्हाने बदलली आहेत. त्यामुळे आव्हानांचा सक्षमपणे सामना करण्यासाठी राज्यातील पोलीस विभागाच्या आकृतीबंधामध्ये ६३ वर्षानंतर सर्व निकषांचा विचार करुन २०२३ मध्ये नवीन आकृतीबंध तयार करण्यात आला आहे.

जेथे जेथे आवश्यकता असेल त्या ठिकाणी पोलीस ठाणी निर्माण करण्याचे तसेच आधुनिकीकरणाचे काम सुरु आहे. त्याअंतर्गत पुणे व मिरा- भाईंदर येथील सुमारे ७२० कोटी रुपयांच्या कामांचा आज शुभारंभ व भूमीपूजन होत असल्याचे त्यांनी सांगितले.

ते म्हणाले, देशामध्ये सर्वात अत्याधुनिक अशा प्रकारचं सायबर सुरक्षा केंद्र हे महाराष्ट्रामध्ये आहे. जवळपास साडेसातशे कोटी रुपये खर्च करून त्याठिकाणी जगातली आधुनिक मशीनरी घेतलेली आहे. गुन्हेगार तातडीने सापडू शकेल अशी क्षमता आता सायबर केंद्रामध्ये तयार केली आहे. सीसीटीव्ही कॅमेऱ्यांच्या माध्यमातून सगळ्या कॅमेऱ्यांचे एकीकरण पोलीस विभाग करत आहे. महिला व बालकांविरुद्धचे गुन्हे, आणि ड्रग्ज संदर्भात कुठलीही तडजोड केली जाणार नाही, असे सक्त निर्देश त्यांनी दिले. ड्रग्ज प्रकरणात कुठलाही पोलीस कर्मचारी दोषी आढळल्यास त्याला थेट बडतर्फ करण्याचे निर्देश देण्यात आलेले आहेत. ते पुढे म्हणाले, अंधाऱ्या, निर्मनुष्य, दुर्गम भाग, घाट क्षेत्रात सुरक्षिततेसाठी सीसीटीव्ही कॅमेरे, वीज व्यवस्था, नाईट व्हिजन कॅमेरे आदी उपाययोजना करा, अशा सूचना देऊन कायदा व सुव्यवस्था अबाधित ठेवण्यासाठी पोलीस विभाग जोमाने काम करत आहे, असेही त्यांनी सांगितले.

पोलीस आयुक्त अमितेश कुमार आपल्या प्रास्ताविकात म्हणाले, वाढती लोकसंख्या व वाहनांची संख्या लक्षात घेऊन गुन्हेगारांवर प्रतिबंध ठेवण्यासाठी पुणे शहर आयुक्तालयांतर्गत नवीन ७ पोलीस ठाण्यांची निर्मिती करण्यात आली आहे. जिल्ह्यातील कायदा व सुव्यवस्था अबाधित ठेवण्यासाठी पोलीस विभाग जोमाने काम करत असून दुर्गम क्षेत्रात सुरक्षा परिक्षण करण्यात आले आहे. सुरक्षिततेच्या दृष्टीने विशेष उपाययोजना राबविण्यात येत आहेत. गुन्हे व गुन्हेगारीवर नियंत्रण ठेवण्यासाठी पुणे पोलीस कटिबद्ध आहेत.

पिंपरी चिंचवड पोलीस आयुक्त श्री. चौबे म्हणाले, शहराचे वाढते नागरिकीकरण व औद्योगिकीकरण लक्षात घेऊन प्रशासकीय सुलभतेसाठी नवीन परिमंडळास मान्यता मिळाली आहे. पिंपरी-चिंचवड पोलीस आयुक्तालयासाठी ताथवडे येथे नवीन जागा मिळाली असून चार नवीन पोलीस ठाण्याला शासनाने मान्यता दिली आहे. पिंपरी चिंचवड पोलीस आयुक्तालय निश्चितच गुणात्मक बदल घडवून आणेल, अशी अपेक्षा त्यांनी यावेळी व्यक्त केली.

यावेळी उपमुख्यमंत्री श्री. फडणवीस यांच्या हस्ते पुणे शहर येथील सात नवीन पोलीस ठाण्यांचे उद्घाटन, सीसीटीव्हीच्या दुसऱ्या टप्प्याचा शुभारंभ, पुणे पोलीस आयुक्तालयाच्या व बंडगार्डन पोलीस ठाण्याच्या नवीन इमारतीचे भूमिपूजन, पिंपरी चिंचवड पोलीस आयुक्तालयातील नवीन ४ पोलीस ठाण्यांचा शुभारंभ, सायबर पोलीस ठाणे, पीसीसीटी शिल्ड ॲप्लीकेशनचे उद्घाटन करण्यात आले. तसेच न्यायसहायक वैज्ञानिक प्रयोगशाळा संचालनालय, गृहविभाग, मुंबई या संगणकीय प्रकल्पाच्या पहिल्या टप्प्याचे लोकार्पण व मीरा- भाईंदर पोलीस आयुक्तालयातील नवीन बोईज पोलीस ठाण्याचे व नवीन सहायक पोलीस आयुक्त, तुळींज कार्यालयाचे उद्धाटन करण्यात आले. कार्यक्रमात उपमुख्यमंत्री श्री फडणवीस यांचा पोलीस विभागातर्फे स्मृतिचिन्ह देऊन गौरव करण्यात आला.
0000

–शिवसमर्थ प्रतिष्ठान, पुणेच्या वतीने गरजू विद्यार्थ्यांना शिष्यवृत्ती प्रदान 

पुणे : शिक्षणातून विद्यार्थी घडतात, विद्यार्थी देशाचे भविष्य आहेत यामुळे राज्यकर्त्यांनी लाडका विद्यार्थी योजना  राबविण्याची गरज आहे, परंतु आज मतदानाच्या प्रक्रियेत प्राथमिक शाळेचे विद्यार्थी जे देशाचे भवितव्य आहेत, ते येत नसल्याने राज्यकर्त्यांकडून दुर्लक्षित असल्याची खंत ज्येष्ठ साहित्यिक डॉ. श्रीपाल सबनीस यांनी व्यक्त केली.  

शिवसमर्थ प्रतिष्ठान, पुणे च्या दुसऱ्या वर्धापन दिना निमित्त साने गुरुजी स्मारक येथे विविध शाळेतील गरजू  विद्यार्थ्यांना शिष्यवृत्ती प्रदान समारंभ आयोजित करण्यात आला होता.  यावेळी कार्यक्रमाच्या अध्यक्षस्थानावरून  डॉ. श्रीपाल सबनीस बोलत  होते. तर प्रमुख पाहुणे म्हणून संविधानांचे अभ्यासक प्रा. सुभाष वारे, शिवसमर्थ प्रतिष्ठानचे अध्यक्ष शिवाजी खांडेकर, प्राचार्य वृंदा हजारे, मुख्याध्यापिका मीरा काटे, पर्यवेक्षक जीवन इंगळे आदी उपस्थित होते.

पुढे बोलताना डॉ. श्रीपाल सबनीस म्हणाले, आपला देश आज विविध पातळ्यांवर प्रगती करत आहे, मात्र सामान्य विद्यार्थ्यांच्या शिक्षणात ज्या गरीबी मुळे अडचणी येतात ती गरीबी काही कमी होत असल्याचे दिसत नाही. शिवसमर्थ प्रतिष्ठानच्या वतीने राबविण्यात आलेला हा शिष्यवृत्ती उपक्रम अतिशय चांगला आहे, त्याला मिळणारी नागरिकांची साथ ही अत्यंत मोलाची आहे. आज राष्ट्रीय एकात्मतेचा एक चांगला अनुभ या शिष्यवृत्ती प्रदान सोहळ्याच्या निमित्ताने आला. सर्व जाती – धर्मातील गरीब विद्यार्थ्यांना ही शिष्यवृत्ती दिली गेली याचे समाधान वाटते. 

प्रा. सुभाष वारे म्हणाले, डॉ. बाबासाहेब आंबेडकर म्हणाले होते जो वर्ग आर्थिक प्रगती करत आहे त्यांनी ‘ पे बॅक टू सोसायटी’ हे ध्यानात घेऊन नाही रे वर्गाला मदत केली पाहिजे तर महात्मा गांधी यांनी भांडवलदारांना तुम्ही मालक नाही तर विश्वस्त या नात्याने संपत्ती जमवली पाहिजे असे म्हटले होते. या महापुरुषांच्या, आपल्या संताच्या शिकवणीनुसार आजचा उपक्रम खांडेकर यांनी राबविला आहे, या कार्यक्रमातून सामाजिक कृतज्ञतेची भावना व्यक्त होते.   

शिवाजी खांडेकर म्हणाले,  प्रतिष्ठानच्या वतीने आपण समाजाचे देणे लागतो या भावनेतून हा उपक्रम राबता आहोत. आज २६ विद्यार्थी, विद्यार्थिनींना शिष्यवृत्ती देत आहोत पुढील वर्षी ही संख्या शंभरच्या पुढे नेण्याचा आमचा मानस आहे. 

कार्यक्रमाचे  प्रास्ताविक जीवन इंगळे यांनी केले. सूत्रसंचालन दीपक म्हस्के यांनी तर आभार प्रदर्शन मीनाक्षी संगारे यांनी केले. कार्यक्रमाची सांगता उद्योगपति रतन टाटा यांना श्रद्धांजली अर्पण करून झाली. 

चौकट 

शिष्यवृत्ती व शिष्यवृत्ती धारकांची नावे 

एस.एम. जोशी हिंदी माध्यमिक विद्यालय –  मीराताई काटवटे पुरस्कृत – हाफिजुल रेहमान रईन
राजा धनराज गिर ज्युनिअर कॉलेज –  राधाबाई इंगळे पुरस्कृत कै. लक्ष्मण इंगळे स्मरणार्थ समृध्द जीवन शिष्यवृत्ती – श्रेया रितेश भिसे
मोलेदिना माध्यमिक विद्यालय – अविनाश संगारे, भाई संगारे फाऊंडेशन, पुणे पुरस्कृत पँथर शहीद भाई सांगरे शिष्यवृत्ती – उमर गुलामअली खान, ९ वी
लक्ष्मणराव आपटे ज्युनिअर कॉलेज –  शिवाजी खांडेकर पुरस्कृत – स्मृती सुमित ओव्हाळ, ११ वी                                                                                   –  अधिनी कदम पुरस्कृत – सुहानी रुपेश चव्हाण, १२ वी                                                                                                                                  – ज्ञानेश्वरी रीटे, १२ वी
खंडोजी बंडोजी चव्हाण माध्यमिक विद्यालय, धायरी –  वाळाराम धुलप पुरस्कृत – श्रध्दा सिध्देश्वर माळी, १० वी
नु.म.वि. मुर्तीची प्रशाला – श्रीमती संगीता गोवळकर पुरस्कृत – गायत्री संतोष बागवे, १० वी
आबासाहेब गरवारे कॉलेज – श्रीमती विद्या नांदुलकर पुरस्कृत – वैभव बाळू कांबळे
रावसाहेव पटवर्धन विद्यालय व ज्युनिअर कॉलेज –  मंगलताई जाधव पुरस्कृत – अनन्या संदिप दामले, ९ वी                                                                                                                                – पौर्णिमा मनोज सर्वगोड, ८ वी
महाराष्ट्र आरोग्य मंडळाचे साने गुरुजी माध्यमिक विद्यालय-डॉ. प्रिया निघोजकर पुरस्कृत-नेहाल तसोवर हुसेन, ९वी                                                                                          –  कल्पना शेरे पुरस्कृत- ऋषिकेश राजेंद्र जगताप, ९वी
एम व्ही एम रामचंद्र राठी मराठी माध्यमिक विद्यालय – शोभा खांडेकर पुरस्कृत – अनुष्का वसंत डोंगरे १० वी                                                                                   –  शंतनू खांडेकर पुरस्कृत – सोनाक्षी किशोर देवकर ९ वी
सुंदरदेवी राठी हायस्कूल –   विनोद गोरे पुरस्कृत – राजवीर सतीश परदेशी, ९ वी
सेंट हिल्डाज हायस्कूल –  राकेश नेवासकर पुरस्कृत – समृध्दी दीपक क्षत्रीय, ९ वी
माध्यमिक व उच्च माध्यमिक विद्यालय, वारजे –  देवेंद्र पारखे पुरस्कृत – मिताली दत्तात्रय निक्षे, १० वी
बनकर विद्यालय, सुखसागर नगर, कात्रज –   सुभाष तांबे पुरस्कृत – कोमल तानाजी होगडे, १२ वी
हमाल पंचायत कष्टकरी विद्यालय -डॉ. गोवर्धन पांडुळे पुरस्कृत कै. गोविंद पांडुळे स्मरणार्थ- धनश्री हरिभाऊ कन्हाळे, ९वी
म.ए.सो. भावे प्राथमिक शाळा – सुखदेव कंद पुरस्कृत – श्रेयस अजय कांबळे, ८ वी
अशोक विद्यालय – श्रीमती मेधा गोरे पुरस्कृत – कार्तिक राजेंद्र गायकवाड, ९ वी
समाज भूषण बाबुराव फुले माध्यमिक विद्यालय – प्रसन्न कोतुळकर पुरस्कृत – नेहा लक्ष्मीपुत्र गौर, १० वी
राधाकृष्ण माध्यमिक विद्यालय – किशोर मुथा पुरस्कृत – निकिता गणेश वाघमोडे, ९ वी

भरत नाट्य मंदिराच्या 130व्या वर्धापन दिनाच्या पूर्वसंध्येला विविध पुरस्करांचे वितरण
विजय कुवळेकर यांचा कै. गो. रा. जोशी स्मृती नाट्यसमीक्षक/अभ्यासक पुरस्काराने गौरव

पुणे : आयुष्यात तपश्चर्या, साधना, तयारीला पर्याय नसतो. अखंड अभ्यास त्यातून शिकत जाणे भरत नाट्य संशोधन मंदिराच्या परंपरेतून कळते. संस्थेचे कार्य देवघरातील नंदादीपाप्रमाणे शांत तेवत आहे. संस्थेमध्ये स्वत:भोवती आरत्या ओवाळण्याची कुणाचीच मानसिकता नाही, असे प्रतिपादन ज्येष्ठ साहित्यिक, पत्रकार विजय कुवळेकर यांनी केले. या वेळी कुवळेकर यांचा कै. गो. रा. जोशी स्मृती नाट्यसमीक्षक/अभ्यासक पुरस्काराने गौरव करण्यात आला.

भरत नाट्य संशोधन मंदिर आयोजित भरत नाट्य करंडक स्पर्धेतील विजेत्यांना पारितोषिक वितरण आणि विविध पुरस्कारांचे वितरण आज (दि. 11) कुवळेकर यांच्या अध्यक्षतेखाली झाले. त्या वेळी ते बोलत होते. गुरुबाबा महाराज औसेकर यांच्या प्रमुख उपस्थिती होती. कार्यक्रमाचे आयोजन भरत नाट्य मंदिरात करण्यात आले होते. भरत नाट्य मंदिराचे अध्यक्ष पांडुरंग मुखडे, कार्याध्यक्ष अभय जबडे, कार्यवाह संजय डोळे, विश्वस्त रवींद्र खरे, उपाध्यक्ष भाग्यश्री देसाई मंचावर होते.
कुवळेकर म्हणाले, भरत नाट्य संशोधन ही संस्था नाट्य-कला क्षेत्रात कार्यरत असूनही सामाजिक बांधिलकीच्या जाणीवेतून करत असलेल्या कार्यामागे मुलभूत विचार आहे. संस्था पुण्याच्या सांस्कृतिक जीवनाच्या केंद्रस्थानी कायमच असेल, असा विश्वासही त्यांनी व्यक्त केला.

गुरुबाबा महाराज औसेकर म्हणाले, आत्मचिंतनातून नवनवीन शोध लागतात. त्यासाठी तपस्या करावी लागते. ही प्रक्रिया भरत नाट्य संशोधन मंदिराने जपून ठेवावी. डिजिटल युगातही नाट्यक्षेत्र आणि कलेच्या क्षेत्रात संस्थेतर्फे संशोधन व्हावे. कार्यक्रमाचे सूत्रसंचालन संजय डोळे, अभय जबडे, रवींद्र खरे यांनी केले.

भरत नाट्य संशोधन मंदिराची स्थापना विजयादशमीच्या मुहुर्तावर झाली असून संस्थेने नृत्य-नाट्य-संगीत कलाप्रवासाची 130 वर्षे पूर्ण करून 131व्या वर्षात पदार्पण केले आहे. संस्थेच्या वर्धापन दिनानिमित्त शनिवार, दि. 12 ऑक्टोबर रोजी सकाळी 11 वाजता भरत नाट्य मंदिर येथे स्नेहमेळाव्याचे आयोजन करण्यात आले आहे.

भरत नाट्य संशोधन मंदिरातर्फे दिल्या जाणाऱ्या पुरस्कारांचे मानकरी
कै. अप्पासाहेब ताम्हणकर स्मृती उत्कृष्ट नाट्य कलाकार – उदय थत्ते
कै. बबनराव गोखले स्मृती उत्कृष्ट संगीत वादक – मुकुंद कोंडे
कै. उदयसिंह पाटील स्मृती सर्वोकृष्ट बालकलाकार – सार्थक फडके
कै. गोपाळराव लिमये स्मृती संस्था कलाकार (नियोजन) – मुकुंद खामकर
गुणवंत संस्था कलाकार : भरत नाट्य मंदिर – अभिजित पोतनीस
कै. अवधूत घाटे स्मृती संस्था नाट्य कलाकार – डॉ. प्रचिती सुरू
कै. गो. रा. जोशी स्मृती तेजा काटदरे पुरस्कृत नाट्यसमीक्षक/अभ्यासक – विजय कुवळेकर
स्नेहवन आणि पालवी या संस्थांना त्यांच्या सामाजिक कार्यासाठी भरत नाट्य मंदिरातर्फे आर्थिक मदत देण्यात आली तर पडद्यामागील कलाकारांच्या मुलांना शिष्यवृत्ती प्रदान करण्यात आली.

कलादर्शन व नाट्यशृंगार, पुणेच्या ‌‘बॉइल्ड शुद्ध शाकाहारी‌’ला भरत करंडक
भरत नाट्य संशोधन मंदिरातर्फे घेण्यात आलेल्या भरत करंडक स्पर्धेत कलादर्शन व नाट्यशृंगार, पुणे संस्थेने बाजी मारली असून संस्थेने सादर केलेल्या ‌‘बॉइल्ड शुद्ध शाकाहारी‌’ या एकांकिकेने भरत करंडक पटकाविला आहे. विद्या प्रतिष्ठानच्या कला, विज्ञान, वाणिज्य महाविद्यालयाच्या (बारामती) ‌‘पाटी‌’ या एकांकिकेला द्वितीय तर फर्ग्युसन महाविद्यालयाच्या 11,111 एकांकिकेला तृतीय क्रमांकाचे पारितोषिक मिळाले आहे. एमआयटी डब्ल्यूपीयू, पुणेच्या ‌‘एक दिन बीत जाएगा माटी के मोल‌’ला आणि दृष्टी, पुणेने सादर केलेल्या ‌‘नदीकाठचा प्रकार‌’ या एकांकिकांना उत्तेजनार्थ पारितोषिक मिळाले आहे.
स्पर्धेचा सविस्तर निकाल
लेखन : प्रथम – विनोद रत्ना (बॉइल्ड शुद्ध शाकाहारी), द्वितीय – सई काटकर, वेदिका कुलकर्णी (11,111), उत्तेजनार्थ – निरज खेडकर, सुजल धडोती (एक दिन बित जाएगा माटी के मोल).
दिग्दर्शन : प्रथम – आदेश यादव, सुबोधन जोशी (पाटी), द्वितीय – श्रेयस इंदापूरकर (नदीकाठचा प्रकार), उत्तेजनार्थ – निरज खेडकर, सुजल धडोती (एक दिन बित जाएगा माटी के मोल).
अभिनय : पुरुष : प्रथम – सुजल बर्गे (पाटी), द्वितीय – अमेय राजमाने (बॉइल्ड शुद्ध शाकाहारी).
लक्षवेधी अभिनय : समृद्धी कुलकर्णी (बस नं. 1532)
अभिनय : स्त्री : प्रथम – ऋतुजा बोठे (बॉइल्ड शुद्ध शाकाहारी), द्वितीय – श्रद्धा रंगारी (पाटी).
नेपथ्य : प्रथम – ऋतुजा बोठे (बॉइल्ड शुद्ध शाकाहारी), द्वितीय – प्रद्युम्न उमरीकर (11,111), उत्तेजनार्थ – श्रावणी धुमाळ, गौरव माळी (कैवारी).
प्रकाश योजना : प्रथम – अभिप्राय कामठे (बॉइल्ड शुद्ध शाकाहारी), द्वितीय – आकांक्षा पन्हाळे (इंद्रायणी), उत्तेजनार्थ – वेदिका कुलकर्णी (11,111).
ध्वनीसंयोजन : प्रथम – मानस जोगळेकर (बस नं. 1532), द्वितीय – देवाशिष शिंदे (इंद्रायणी), उत्तेजनार्थ – श्रेयस शिराळकर, राजस शिंदे (एक दिन बित जाएगा माटी के मोल).
अभिनय उत्तेजनार्थ : विक्रांत बारगळे, प्रथमेश अंभोरे, गार्गी कथले, मिहिर माईणकर, निलय कात्रे, मयंक हिंगे, यश पत्की, इंद्रायणी दीक्षित, वृषाली घोडके, सोहम कुलकर्णी, क्षितिजा चिंदरकर, नयन अमराळे.
स्पर्धेचे संयोजन विश्वास पांगारकर आणि पुष्कर केळकर यांनी केले तर स्पर्धेचे परीक्षण चारुलता पाटणकर, अनुपमा कुलकर्णी, समीर हंपी यांनी केले. परीक्षकांच्या वतीने समिर हंपी यांनी मनोगत व्यक्त केले. स्पर्धेचा निकाल प्रा. राजेंद्र उत्तुरकर, अश्विनी थोरात यांनी जाहीर केला.