करतात वीजबिलांचा ‘ऑनलाइन’ सुरक्षित भरणा

 दर महिन्याला सरासरी १२०० कोटी रुपयांचा घरबसल्या भरणा

पुणे, दि. १९ ऑक्टोबर २०२४: महावितरणच्या वीजबिलांचा ‘ऑनलाइन’ भरणा करण्यामध्ये पश्चिम महाराष्ट्रातील लघुदाब वर्गवारीच्या वीजग्राहकांचा दिवसेंदिवस प्रतिसाद वाढत आहे. या वर्गवारीतील तब्बल ४१ लाख १२ हजार घरगुती, व्यावसायिक, औद्योगिक व इतर वीजग्राहक दर महिन्याला सुमारे ११९५ कोटी ७० लाख रुपयांच्या वीजबिलांचा सुरक्षित व घरबसल्या ‘ऑनलाइन’ भरणा करीत आहेत.

महावितरणकडून सर्व वर्गवारीतील ग्राहकांसाठी आधुनिक जीवनशैलीशी सुसंगत सर्व प्रकारची ग्राहकसेवा एका क्लिकवर डिजिटल स्वरुपात उपलब्ध करून दिली आहे. प्रामुख्याने बिल भरणा केंद्राच्या रांगेत उभे राहून, कार्यालयीन वेळेत वीजबिल भरण्याऐवजी ‘ऑनलाइन’द्वारे घरबसल्या व २४ तास वीजबिल भरण्याची सोय उपलब्ध झाली आहे. यासाठी लघुदाब वर्गवारीतील घरगुती, व्यावसायिक, औद्योगिक व इतर ग्राहकांसाठी www.mahadiscom.in ही वेबसाईट व मोबाईल अॅपची सुविधा उपलब्ध आहे. तसेच एकाच नोंदणीकृत खात्यातून स्वतःच्या एकापेक्षा अधिक कुठल्याही वीजजोडण्यांचे बिल ‘ऑनलाइन’ भरणे तसेच सर्व वीजजोडण्यांच्या वर्षभरातील मासिक बिलांचा तपशील व रक्कम भरल्याची पावती संगणकात किंवा मोबाईलमध्ये जतन करण्याची सोय उपलब्ध आहे.

गेल्या तीन महिन्यांमध्ये पश्चिम महाराष्ट्रातील १ कोटी २६ लाख ३८ हजार ६०६ लघुदाब वीजग्राहकांनी ३५८७ कोटी ३२ लाख रुपयांच्या वीजबिलांचा ‘ऑनलाइन’ भरणा केला आहे. त्यानुसार दर महिन्याला ४२ लाख १२ हजार (७९ टक्के) वीजग्राहक सरासरी ११९५ कोटी ७० लाख रुपयांच्या (८० टक्के) वीजबिलांचा घरबसल्या भरणा करीत आहेत. यामध्ये दर महिन्याला पुणे जिल्ह्यात २५ लाख ८४ हजार ४३० वीजग्राहक ७९६ कोटी, सातारा जिल्ह्यात ४ लाख ६३ हजार २२० वीजग्राहक ७५ कोटी ८१ लाख, सोलापूर जिल्ह्यात ३ लाख २० हजार १४० वीजग्राहक ८३ कोटी २७ लाख, कोल्हापूर जिल्ह्यात ५ लाख ४४ हजार ६५० वीजग्राहक १६९ कोटी २७ लाख आणि सांगली जिल्ह्यातील ३ लाख ४३० वीजग्राहक ७१ कोटी ३३ लाख रुपयांच्या वीजबिलांचा घरबसल्या ‘ऑनलाइन’ भरणा करीत आहेत.

वीजबिलांचा ‘ऑनलाईन’ पद्धतीने भरणा करणे सोयीचे व सुरक्षित आहे. या पद्धतीला भारतीय रिझर्व्ह बँकेच्या (आरबीआय) पेमेंट व सेटलमेंट कायदा २००७ च्या तरतुदी लागू आहेत. तसेच ‘ऑनलाईन’द्वारे वीजबिल भरणा केल्यानंतर ग्राहकांच्या नोंदणीकृत मोबाईल क्रमांकावर ‘एसएमएस’द्वारे पोच दिली जाते. वीज बिल भरण्यासंदर्भात काही तक्रार किंवा शंका असल्यास ग्राहक helpdesk_pg@mahadiscom.in या ईमेलद्वारे महावितरणशी संपर्क साधू शकतात. तसेच वीजबिलांचा क्रेडीट कार्ड, डेबीट कार्ड, युपीआय, भीम, इंटरनेट बॅकींग, मोबाईल वॉलेट, मोबाईल बॅकिंगद्वारे ऑनलाईन भरणा केल्यास वीज बिलामध्ये ०.२५ टक्के (५०० रुपयांच्या मर्यादेत) सूट देण्यात येत आहे.

शिक्षण संस्थांनी विद्यार्थी केंद्रित तंत्रज्ञान स्नेही व्हावे – डॉ. गिरीश देसाई

पीसीयू मध्ये आंतरराज्य मुख्याध्यापक संवाद, संमेलन संपन्न

पिंपरी, पुणे (दि. १९ ऑक्टोबर २०२४) अध्यापन, अध्ययन आणि मूल्यमापनात आयसीटीचा वापर केला पाहिजे. आता शिक्षणातील तंत्रज्ञानाच्या परिवर्तनीय भूमिकेवर लक्ष केंद्रित करून २१ व्या शतकातील विद्यार्थ्यांच्या गरजा पूर्ण करणाऱ्या नवनवीन अध्यापन तंत्रांचा स्वीकार केला पाहिजे असे
आवाहन पीसीयू व्यवस्थापन मंडळाचे सदस्य विवेक सावंत यांनी उपस्थित शिक्षकांना केले. यावेळी त्यांनी एआय आधारित लर्निंग सोल्यूशन्समध्ये शिक्षणाच्या आणि वैयक्तिक शिकण्याच्या संधींचे प्रात्यक्षिक सादर केले.
पिंपरी चिंचवड एज्युकेशन ट्रस्ट (पीसीईटी) अंतर्गत साते, वडगांव मावळ येथील पिंपरी चिंचवड युनिव्हर्सिटी (पीसीयू) येथे ‘प्रिन्सिपल्स कॉन्क्लेव्ह २०२४’ चे आयोजन करण्यात आले होते. यावेळी पीसीईटी चे कार्यकारी संचालक डॉ. गिरीश देसाई, पीसीयू च्या कुलगुरू डॉ. मणिमला पुरी, प्र कुलगुरू डॉ. सुदीप थेपडे, सीनियर जनरल मॅनेजर एमकेसीेएल अमित रानडे आदी उपस्थित होते. यामध्ये उत्तर प्रदेश, छत्तीसगड, दिल्ली, राजस्थान, महाराष्ट्र, तेलंगणा, मध्य प्रदेश, गुजरात, हरियाणा, चंदीगड, पश्चिम बंगाल, बिहार आणि गोवा राज्यातील मुख्याध्यापक आणि शाळा प्रमुख उपस्थित होते.
पारंपरिक शैक्षणिक पद्धतीचा अभिनव आणि अत्याधुनिक तंत्रज्ञानाद्वारे अर्थपूर्ण वापर करून शिक्षण संस्थांनी विद्यार्थी केंद्रित तंत्रज्ञान स्नेही व्हावे त्यासाठी प्रोत्साहन दिले पाहिजे. या उद्देशाने प्रिन्सिपल्स कॉन्क्लेव्हचे आयोजन करण्यात आले आहे, अशी माहिती पिंपरी चिंचवड एज्युकेशन ट्रस्टचे कार्यकारी संचालक डॉ. गिरीश देसाई यांनी दिली.
डॉ. मणिमला पुरी यांनी पीसीयू आणि पीसीईटी समुहाची ओळख करून दिली आणि विद्यापीठाने दिलेले विविध कार्यक्रम आणि विद्यार्थ्यांच्या सक्षमीकरणाबाबतची बांधिलकी या विषयी माहिती दिली. शैक्षणिक उत्कृष्टतेला चालना देण्याच्या आणि सर्व विषयांमध्ये नाविन्यपूर्ण अध्यापन पद्धतींना चालना देण्याच्या विद्यापीठाच्या दृष्टीकोन आहे असेही सांगितले.
डॉ. सुदीप थेपडे यांनी पीसीयू मध्ये अनुभवात्मक शिक्षण, आंतरविद्याशाखीय सहयोग आणि शैक्षणिक परिणाम वाढविण्यासाठी तंत्रज्ञानाच्या एकात्मतेवर लक्ष केंद्रित करण्यात येत असल्याचे सांगितले.
पीसीटीचे अध्यक्ष ज्ञानेश्वर लांडगे, उपाध्यक्ष पद्माताई भोसले, सचिव विठ्ठल काळभोर, खजिनदार शांताराम गराडे, विश्वस्त हर्षवर्धन पाटील, उद्योजक नरेंद्र लांडगे, अजिंक्य काळभोर, कार्यकारी संचालक डॉ. गिरीश देसाई यांनी आयोजन करण्यात मार्गदर्शन केले व उपस्थितांना शुभेच्छा दिल्या.

पुणे-हजारो कोटीच्या मालाची सुमारे ५६१ कोटी ५८ लाखाची जीएसटी सरकारला न भरता त्या भरल्याच्या नकली पावत्या सापडल्याने काही बोगस कंपन्या आणि ८ जणांच्या टोळी विरोधात पुण्याच्या बंडगार्डन पोलीस ठाण्यात गुन्हा दाखल करण्यात आला आहे. व्यापारी कसे गलेलठ्ठ होतात हे GST कर्मचारी अधिकारी, आणि पोलिसांनाही समजेनासे झाले आहे. GST आल्यापासून घोटाळ्यांचा पूर शेकडो हजारो कोटीचे मोठे रूप धरण करू लागला आहे.

दि.०१/०१/२०२३ ते ०८/१०२०२४ रोजी डिजीजीआय ऑफिस, वाडिया कॉलेज समोर, पुणे यातील नमुद इसम यांनी संगणमताने बनावट कंपनीच्या नावे टॅक्स रिर्टन फाईल करुन बनावट जीएसटी ई बिल टॅक्स पावत्या इलेक्ट्रानिक दस्ताएवेज लॅपटॉपमध्ये बनवुन वेगवेगळ्या फर्मला पाठवून अंदाजे सन २०२१ पासुन सप्टेंबर २०२४ पर्यंत वितरीत करुन शासनाचा GST एकुण ५६१.५८ करोड रुपयांचा चुकवून फसवणुक केली. वरिष्ठ पोलीस निरीक्षक रविंद्र गायकवाड मो. नं.९६८९२८६५६५ अधिक तपास करत आहेत.

पुणे-उच्च व तंत्र शिक्षण मंत्री आणि कोथरूड चे आमदार चंद्रकांत दादा पाटील यांच्या वतीने कोथरूड प्रीमिअर लीग : क्रिकेट व फुटबॉल चे आयोजन करण्यात आले होते. ५६ क्रिकेट टीम व ४५ फुटबॉल टीम ने सहभाग नोंदविला.

क्रिकेट मध्ये “स्पार्टन टीम” विजयी झाली तर “प्रदीप जोरी टीम ने उपविजेते होण्याचा मान मिळविला “विश्वेश ऊटांगडे” मॅन ऑफ टूर्नामेंट ठरले ”फुटबॉल मधे “पन्ना बॉईज” विजयी ठरले तर “इमोर्टल्स” टीम उपविजेता.“निखिल पडवळ” -मैन ऑफ द टूर्नामेंट ठरले

ह्या स्पर्धेचे संयोजक प्रतीक मंजुश्री संदीप खर्डेकर (अध्यक्ष,क्रीडा आघाडी यूवा मोर्चा,पुणे शहर) होते व
ह्या स्पर्धेचे आयोजक – भाजप क्रीडा आघाडी,पुणे युवा मोर्चा असून सरचिटणीस प्रणव वडणेरकर,अथर्व वेल्हणकर, अद्वैत इनामदार , योगेश कंठाळे, नयन शिंदे यांनी मेहनत घेतली.

“कोथरुड प्रीमियर लीग” चे उदघाटण नामदार चंद्रकांत दादा पाटील यांनी केले व या वेळी “युवा मोर्चा शहर अध्यक्ष : करण मिसाळ , मुख्य प्रदेश प्रवक्ते संदीप खर्डेकर , प्रदेश प्रवक्ते कुणाल टिळक , पुणे शहर सरचिटणीस पुनीत जोशी , कोथरुड अध्यक्ष संदीप बुटला, कोथरुड सरचिटणीस गिरीश खत्री, माजी नगरसेवक दीपक पोटे, माजी नगरसेवक मंजुश्री खर्डेकर , महिला आघाडी उपाध्यक्ष कल्याणी खर्डेकर , हिंदू जिमखाना चे संस्थापक आशिष कांटे उपस्थित होते .

सर्वोच्च न्यायालयाचे सेवानिवृत्त न्यायमूर्ती अभय सप्रे यांच्या उपस्थितीत रस्ते सुरक्षा समितीची बैठक संपन्न

अपघातातील मृत्यूंच्या संख्येवर नियंत्रण आणण्यासाठी रस्ते सुरक्षा नियमांची काटेकोर अंमलबजावणी करावी-न्यायमूर्ती अभय सप्रे

पुणे,दि.१८ : वाहन अपघातात निष्पाप नागरिकांचे बळी जाऊ नयेत यासाठी सर्व संबधित यंत्रणांनी रस्ते सुरक्षा नियमांची काटेकोर अंमलबजावणी करावी, त्यासाठी सर्वंकष धोरण तयार करावे, असे निर्देश सर्वोच्च न्यायालयाने स्थापन केलेल्या रस्ता सुरक्षा समितीचे अध्यक्ष सेवानिवृत्त न्यायमूर्ती अभय सप्रे यांनी दिले.

विधान भवन येथे आयोजित रस्ता सुरक्षा समितीच्या बैठकीत ते बोलत होते. यावेळी परिवहन आयुक्त विवेक भिमनवार, विभागीय आयुक्त डॉ.चंद्रकांत पुलकुंडवार, महानगरपालिका आयुक्त डॉ.राजेंद्र भोसले, जिल्हाधिकारी डॉ.सुहास दिवसे, पिंपरी चिंचवड महानगरपालिका आयुक्त शेखर सिंह, विभागीय आयुक्तालयाच्या उपायुक्त वर्षा लड्डा ऊंटवाल, अपर पोलीस आयुक्त मनोज पाटील, अपर परिवहन आयुक्त भरत कळसकर, पुणे प्रादेशिक परिवहन अधिकारी अर्चना गायकवाड, पिंपरी चिंचवडचे प्रादेशिक परिवहन अधिकारी संदेश चव्हाण आदी उपस्थित होते.

बेदरकारपणे आणि बेजबाबदारपणे वाहने चालवून निष्पाप नागरिकांच्या बळींच्या संख्येत वाढ होत आहे ही गंभीर बाब आहे, असे सांगून न्यायमूर्ती श्री.सप्रे म्हणाले, रस्ता अपघात कमी व्हावे, अपघातातील जखमींना तातडीने वैद्यकीय उपचार मिळावे, बळींची संख्या कमी व्हावी याची सर्वोच्च न्यायालयाने गंभीर दखल घेतली आहे. सर्वोच्च न्यायालयाने त्यासाठी वेळोवेळी मार्गदशक तत्वे निश्चित केली केली असून सर्वोच्च न्यायालयाच्या देखरेखीखाली रस्ता सुरक्षा समिती स्थापन केली आहे. ही समिती कायमस्वरुपी कार्यरत असून रस्ता सुरक्षेसंदर्भात उपाययोजना आणि त्यासंदर्भात केलेल्या कार्यवाहीची माहिती थेट सर्वोच्च न्यायालयास सादर करते असे त्यांनी सांगितले.

निष्पाप नागरिकांच्या रस्ते अपघातात बळींची संख्या लक्षात घेता परिवहन विभाग, पोलीस विभाग तसेच सर्व संबंधित शासकीय यंत्रणांनी सकारात्मकतेने काम करावे. अधिकाऱ्यांनी आपली जबाबदारी काळजीपूर्वक बजावण्याबरोबरच निस्वार्थ भावनेने काम करावे. आधुनिक तंत्रज्ञानाचा वापर करुन रस्ता सुरक्षेसंबधी नियमांची कठोरपणे अंमलबजावणी करावी. अपघातातील बळींची संख्या कमी होण्यासाठी प्रयत्न करावे. या बैठकीत दिलेल्या निर्देशांचे सर्व संबधित यंत्रणांनी गांभीर्यपूर्वक पालन करावे.

वाहनांच्या संख्येत वाढ होत असल्याने रस्ता सुरक्षेचा गंभीर प्रश्न निर्माण झाला आहे. नागरिकांनीही वाहतूकीचे नियम स्वयंस्फूर्तीने पाळणे आवश्यक आहे. रस्यावर चालविण्यात येणारे वाहन सुस्थितीत असावे, वाहनचालकांनी सीट बेल्ट लावावे, वाहन चालवितांना मोबाईलवर बोलू नये, अतिवेगाने वाहन चालवू नये, मद्यप्रशान करुन वाहन चालवू नये, वाहन परवाना तसेच वाहन व वाहनचालकांनी सुरक्षा विमा वेळोवेळी नुतनीकरण करावे, रस्ता सुरक्षा उपाययोजनांची माहिती करुन घ्यावी, त्यासाठी स्वत:हून पुढाकार घ्यावा, वाहतूक नियमांचे काटेकोरपणे पालन करावे, अशा सूचना न्यायमूर्ती श्री.सप्रे यांनी केल्या.

रस्त अपघातात दुचाकी वाहनचालकांची बळींची संख्या दिवसेंदिवस वाढत त्यामुळे वाहनचालकाने स्वत: आणि सोबत बसलेल्या व्यक्तीने रस्ता सुरक्षा मानकांची पूर्तता करणाऱ्या हेल्मेटचा वापर करावा. त्यासाठी प्रशासनाने दुचाकी वाहनचालकांसाठी हेल्मेट सक्ती करावी. वाहतूक नियमांची जनजागृती करण्यासाठी रस्ता सुरक्षा सप्ताहाचे आयोजन करावे, अशा सूचना न्यायमूर्ती श्री. सप्रे यांनी केल्या.

परिवहन आयुक्त श्री. भिमनवार यांनी परिवहन विभागातर्फे रस्ता सुरक्षेसाठी करण्यात येणाऱ्या विविध उपाययोजनांबाबत माहितीचे सादरीकरण केले. विशेषत मुंबई-पुणे महामार्गावर ३० टक्क्यांने व समृद्धी महामहार्गावर ३३ टक्क्यांने अपघाती मृत्यूंचे प्रमाण कमी झाले आहे, अशी माहिती त्यांनी दिली.

विभागीय आयुक्त डॉ.पुलकुंडवार म्हणाले, सर्व शासकीय, निमशासकीय कार्यालये, महानगरपालिका, जिल्हा परिषद, महामंडळ, शाळा, महाविद्यालयात कार्यरत असणारे अधिकारी व कर्मचाऱ्यांसाठी हेल्मेट सक्ती करण्यात येईल. हेल्मेट न वापरणाऱ्याविरुद्ध कारवाई करण्यात येईल, त्यासाठी आवश्यक त्या सूचना संबधित विभागप्रमुखांना जारी करण्यात येतील अशी सांगून ते पुढे म्हणाले, राज्य तसेच राष्ट्रीय महामार्गांवर करण्यात येणाऱ्या वाहनांच्या तपासणीप्रमाणे जिल्हा तसेच शहरांतर्गत तपासणी करण्याची सूचना डॉ.पुलकुंडवार यांनी केली.

निवृत्त न्यायमूर्ती श्री.सप्रे यांनी पुणे प्रादेशिक परिवहन कार्यालयाच्यावतीने ‘अपघातमुक्त वारी’ अभियानाचे आयोजन तसेच परिवहन विभागाच्यावतीने करण्यात आलेल्या रस्ते सुरक्षाविषयक उपाययोजनाबाबत समाधान व्यकत केले.

बैठकीस नांदेडचे प्रादेशिक परिवहन अधिकारी विनय अहिरे, नागपूर प्रादेशिक परिवहन अधिकारी किरण बीडकर, बारामतीचे उपप्रादेशिक परिवहन अधिकारी सुरेंद्र निकम, गोंदियाचे उपप्रादेशिक परिवहन अधिकारी राजेंद्र केसकर आदी मान्यवर यावेळी उपस्थित होते.
0000

पुणे-रस्ते जोडणी तील रस्तोरस्तीच्या २१ मिसिंग लिंक साठी सत्वर कार्यवाही करा म्हणजे कोथरूड मधला वाहतुकीचा मोठा प्रश्न मार्गी लागेल अशी मागणी करत महापालिका आयुक्त राजेंद्र भोसले यांना थेट चर्चेसाठी माजी विरोधीपक्ष नेते उज्वल केसकर यांनी आव्हान दिले आहे. ५. ५ किमी ची जागा ताब्यात घेऊन जलदगतीने कार्यवाही करण्याऐवजी याकडे सरार्स दुर्लक्ष करून खोळंबा करून ठेवण्यात आल्याचे त्यांनी म्हटले आहे. आयुक्तांना दिलेल्या पत्रात त्यांनी असे म्हटले आहे कि,’

खालील 21 मिसिंग लिंक ची यादी देतोय ती जर व्यवस्थित झाली तर कोथरूड मधला मोठा प्रश्न मार्गी लागेल.
१) महात्मा सोसायटी गल्ली नंबर आठ ते नाल्या वरचा छोटा पूल पंधरा मीटर रुंदीचा हा रस्ता आहे आणि या ठिकाणी दहा मीटर एवढा कमी अंतर जोडलं तर एक मोठा रस्ता व्यवस्थित वापरता येतो.
२) पौड रोडवरील कर्वे रस्त्याला मिळणाऱ्या चितळे बंधू दुकानापाशी 20 मीटर लांबीची पट्टी केली तर हा रस्ता नीट वापरता येतो.
आयडियल कॉलनी च्या रस्त्यावर एक टॉयलेट आहे त्यामुळे तो रस्ता नीट होतच नाहीत कर्वे पुतळा पेट्रोल पंप ते आयडियल कॉलनी 30 मीटर गुजरात कॉलनी गोल्डन बेकरी ते वनस फॅक्टरी 48 मीटर आंबेडकर चौक वाया तिरुपती नगर 200 मीटर किनारा हॉटेल ते पेटकर साम्राज्य रोड 54 मीटर आयडियल कॉलनी ते यशवंतराव चव्हाण नाट्यगृह 54 मीटर वनाज मेट्रो यार्ड ते गुरुकृपा सोसायटी 68 मीटर कर्वे रोड कॅनॉल चा रस्ता कमिन्स फॅक्टरी पर्यंत 90 मीटर दुधाने लॉन्स ते राजाराम पुल 180 मीटर एकलव्य कॉलेज ते हायवे 70 मीटर आंबेडकर आंबेडकर चौक कमिन्स फॅक्टरी ते बॅरोमीटर 152 मीटर भुजबळ बाग ते गुलमोहर रोड १५० मीटर कोकण एक्सप्रेस ते पिना गार्डन 180 मीटर नवीन शिवणे गोसावी वस्ती रोड तीनशे मीटर नऊशे मारुती ते कर्वेनगर 150 ठाकरे पद ते आंबेडकर चौक मिलेनियम हायस्कूल 1700 मीटर बालभारती पौड1800 मीटर .

या संदर्भामध्ये आपण चर्चेसाठी वेळ द्यावा ही विनंती.

पुणे – पुण्यातील विद्यार्थ्यांचा ग्रूप दिल्ली व जालंधरच्या सहलीसाठी आला होता. ते सर्वजण पुण्यात विमानाने येणार होते. जालंधर ते दिल्ली हा प्रवास ज्या बसने करत होते त्या बसेस दिल्लीच्या वाहतूक कोंडीत सापडल्याने विमान चुकणार होते. त्यामुळे त्यांनी तातडीने केंद्रीय नागरी उड्डाण मंत्री मुरलीधर मोहोळ य़ांच्या पुण्यातील कार्यालयाशी संपर्क साधून अडचण सांगितली. मोहोळ यांच्या कार्यालयाने तत्परतेने सूत्र फिरवून त्या मुलांना त्याच दिवशी रात्री विमानाने पुण्यात आणले

पुणेकर्स एज्युकेशन इनिशिएटिव्हच्यावतीने त्या पुण्यातील नामवंत शाळेतील १२० मुले आणि त्यांसोबत इतर २० जण असे १४० जण दिल्ली, जालंधरला शैक्षणिक सहलीसाठी गेले होते. त्यांची आमची परतीची तिकीटे बुधवार (दि १७) रात्री ८:२० च्या विमानाची होती. विमानतळावर दोन तास अगोदर पोचण्यासाठी त्यांनी दिल्लीला येण्यासाठी बसने सकाळी साडेसातवाजता जालंधर सोडले. वाटेत अर्ध्यातासाचा लंचब्रेकही सर्वांनी घेतला. त्यांचा दिल्लीपर्यंतचा प्रवास निर्विघ्न झाला. खरी परिक्षा तिथूनच सुरू झाली.
दिल्लीच्या विमानतळापासून साधारणत २५ किमीवर त्यांच्या बसेस वाहतूक कोंडीत सापडल्या. आमच्या बसेसना उशिर होत होता. मुलांना रात्री विमानात फूड पॅकेटसची व्यवस्था विमानतळावर केली होती. ते सर्वजण संपर्क करत होते अन ट्रॅफिक जॅमची अपडेट देत होते. विमानतळापर्यंत अशीच परिस्थिती असेल तर आम्हाला आमचे विमान गाठता येणे अशक्य वाटत होते.

पुण्याचे खासदर मुरलीधर मोहोळ, नागरी उड्डाण राज्यमंत्री असल्याचे पुणेकर्स एज्युकेशन इनिशिएटिव्हच्या लीना म्हसवडे यांनी संध्याकाळी साडेसहा वाजता मोहोळ यांच्या पुण्याच्या कार्यालयात फोन करून त्यांच्या पीएना आमची अडचण सांगितली. त्यांनी दिल्लीच्या कार्यालयातील एकाचा नंबर दिला. त्यांना मी फोन लावला. त्यांनी आणखी एक नंबर दिला. त्यांनाही फोन लावून आमची अडचण सांगितली.
त्यानतर चक्र फिरली अन अवघ्या दहाच मिनिटात त्यांना इंडिगो एअरलाइन्समधून फोन आला. एअरलाइन्सने आमची महिती घेतली आणि बसेसचे नेमके लोकेशनही घेतले. त्या वाहतूक कोंडीतून पुढे सरकत अखेर आम्ही विमानतळावर पोचलो. कंपनीने काही जणांची सोय सव्वानऊच्या विमानात आणि इतरांची साडेअकराच्या विमानात व्यवस्था केली होती. इंडिगोच्या कर्मचार-यांनी मुलांची सुरक्षा तपासणीसाठी मदत केली. त्यांचे फूड पॅकेटस आत नेऊ मुलांना देण्याचीही परवानगी दिली. राज्यमंत्री मोहोळ यांच्या कार्यालयाने दाखवलेल्या तत्परतेने ही सहल नियोजनानुसार उशिरा का होईना पण बुधवारी रात्रीच पुण्यात पोचली.
“आपण मंत्री आणि राजकारण्यांना नेहमी नावे ठेवतो, पण या प्रसंगाने माझा मोहोळसाहेब आणि एकंदर सिस्टीम वरचा विश्वास कितीतरी पटीने वाढला. आपण मतदार म्हणून योग्य कार्यक्षम खासदार निवडून दिल्याबद्दल खूप समाधान वाटले”, असे लीना म्हसवडे यांनी सांगितले.

रंगत-संगत प्रतिष्ठानतर्फे समर्थ प्रतिष्ठानचे संजय सातपुते यांचा जिद्द पुरस्काराने गौरव

पुणे : समाजातील आजची विदारक, उन्मादक परिस्थिती बघता युवा वर्गातील ऊर्जेचा उपयोग समर्थ प्रतिष्ठान संचलित ढोल लेझीम पथकाच्या माध्यमातून युवा पिढीला योग्य दिशा देण्याचे महत्त्वपूर्ण आणि समाजासाठी उपयुक्त काम केले जात आहे, असे गौरवोद्गार प्रसिद्ध कथाकार आणि अखिल भारतीय मराठी साहित्य संमेलानाचे माजी अध्यक्ष भारत सासणे यांनी काढले.

रंगत-संगत प्रतिष्ठानच्या काव्य विभागातर्फे दरवर्षी कर्तृत्ववान व्यक्तीस दिल्या जाणाऱ्या जिद्द पुरस्काराने आज (दि. 18) संजय सातपुते यांचा सासणे यांच्या हस्ते गौरव करण्यात आला. त्या वेळी सासणे बोलत होते. सातपुते यांनी समर्थ प्रतिष्ठान संचलित ढोल लेझिम पथकाच्या माध्यमातून एक कोटी 25 लाख रुपये समाजऋण फेडण्यासाठी विविध घटकांना प्रदान केले आहेत. त्यांच्या या कार्याची दखल घेऊन सातपुते यांना सन्मानित करण्यात आले. रंगत-संगत प्रतिष्ठानचे अध्यक्ष ॲड. प्रमोद आडकर, रंगत-संगत प्रतिष्ठानच्या कार्याध्यक्ष मैथिली आडकर मंचावर होत्या. पत्रकार भवन येथे कार्यक्रमाचे आयोजन करण्यात आले होते. सन्मानपत्र, शाल, श्रीफळ असे पुरस्काराचे स्वरूप होते.

सातपुते यांच्या कार्याची माहिती घेतल्यानंतर जिद्द पुरस्कार योग्य व्यक्तीला प्रदान करण्यात आला आहे, असे नमूद करून सासणे पुढे म्हणाले, ढोल-ताशा वादनातून वीर रसाची अनुभूती प्राप्त होते. ज्या वयात युवकांमधील ऊर्जा बहरत असते त्या वेळी युवकांमधील ऊर्जेला योग्य मार्ग दाखविला जाणे किती आवश्यक आहे, हे समाजशास्त्रीय आणि मानसशास्त्रीय दृष्टीकोनातून सिद्ध झाले आहे. आजच्या काळात प्रत्येकालाच अस्तित्वासाठी लढावे लागत आहे, समाजकार्यासाठीची लढाई अधिक तीव्रतेने लढावी लागणार आहे, असेही त्यांनी सूचित केले.

सत्काराला उत्तर देताना संजय सातपुते म्हणाले, पुरस्कार हे समाजकार्यासाठी बळ देणारे असतात. रंगत-संगत प्रतिष्ठानच्या माध्यमातून मिळालेला पुरस्कार पुढील वाटचालीस नक्कीच बळ देणारा ठरेल. हा पुरस्कार माझ्या एकट्याचा नसून प्रतिष्ठानमधील प्रत्येकाचा आहे. ढोल-ताशा-लेझीम पथकाकडे बघण्याचा दृष्टीकोन चांगला नाही. या पथकांच्या माध्यमातून जी कार्ये होत आहेत ते बघितल्यास समाजऋण फेडणारी पथके असा विधायक दृष्टीकोन असायला हवा, अशी अपेक्षाही त्यांनी व्यक्त केली.

प्रास्ताविकात ॲड. प्रमोद आडकर यांनी पुरस्कारामागील भूमिका विशद करून मान्यवरांचा सत्कार केला. कार्यक्रमाचे सूत्रसंचालन आणि मानपत्राचे वाचन शिल्पा देशपांडे यांनी केले.

कार्यक्रमाच्या उत्तरार्धात आयोजित निमंत्रितांच्या कविसंमेलनात प्रभा सोनवणे, मृणालिनी कानिटकर-जोशी, तनुजा चव्हाण, स्वप्नील पोरे, वैजयंती आपटे, केतकी देशपांडे, सुजित कदम, नचिकेत जोशी, समीर गायकवाड, योगेश काळे, भारती पांडे यांचा सहभाग होता.

पुणे, दि. १८: राजकीय पक्षांनी, निवडणूक लढविणाऱ्या उमेदवारांनी, त्यांच्या प्रतिनिधींनी किंवा त्यांच्या हितचिंतकांनी मुद्रणालयाचे मालक व इतर सर्व माध्यमाद्वारे छपाई करणाऱ्या मालकांनी तसेच प्रकाशकाने नमुना मतपत्रिका छापताना इतर उमेदवाराचे नाव व त्यांनी नेमून देण्यात आलेले चिन्ह, नमुना मतपत्रिकेसाठी आयोगाने निश्चित केल्याप्रमाणे कागद वापरणे तसेच आयोगाने निश्चित केलेल्या कागदाच्या आकारामध्ये नमुना मतपत्रिका छापण्याबाबत निर्बंध घालण्यात आल्याचे आदेश जिल्हाधिकारी तथा जिल्हादंडाधिकारी डॉ. सुहास दिवसे यांनी जारी केले आहेत.

हे आदेश २५ नोव्हेंबर २०२४ पर्यंत अंमलात राहतील. या आदेशाचे उल्लंघन केल्यास लोकप्रतिनिधीत्व अधिनियम १९५१ मधील तरतुदीनुसार व भारतीय न्याय संहिता २०२३ कलम २२३ प्रमाणे संबंधित हे दंडनीय कार्यवाहीस पात्र राहतील.

शासकीय कार्यालये, विश्रामगृहांच्या परिसरात राजकीय सभा, मिरवणुकांना प्रतिबंध

विधानसभा निवडणूक प्रक्रिया कालावधीत जिल्ह्यातील सर्व शासकीय कार्यालये आणि शासकीय विश्रामगृहांच्या आवारामध्ये मिरवणूक, सभा घेणे, मोर्चा काढणे, उपोषण करणे, घोषणा देणे, वाद्य वाजविणे किंवा गाणी म्हणणे, कोणत्याही प्रकारचा निवडणूक प्रचार करणे यावर जिल्हाधिकारी तथा जिल्हा निवडणूक निर्णय अधिकारी डॉ. सुहास दिवसे यांनी निर्बंध जारी केले आहेत.

विधानसभा निवडणूकीची संपूर्ण प्रक्रिया शांततेत, निर्भय व न्याय वातावरणात पार पाडण्याच्या दृष्टीकोनातून जिल्हाधिकारी कार्यालय, उपविभागीय अधिकारी कार्यालय, तालुका दंडाधिकारी कार्यालय, तसेच जिल्ह्यातील सर्व शासकीय, निमशासकीय कार्यालय, संस्था आणि शासकीय विश्रामगृहाच्या आवारामध्ये कोणत्याही राजकीय पक्षाने, निवडणूक लढविणाऱ्या उमेदवाराने किंवा त्यांच्या प्रतिनिधीने किंवा त्यांच्या हितचिंतकाने वरील कृत्य करण्यास बंदी घातली आहे.

हा आदेश दिनांक २५ नोव्हेंबर २०२४ पर्यंत पर्यंत अंमलात राहील. सदर आदेशाचे उल्लंघन करणारे लोकप्रतिनिधी अधिनियम १९५१ मधील तरतुदी व भारतीय न्याय संहिता २०२३ च्या कलम २२३ प्रमाणे संबधित दंडनीय कार्यवाहीस पात्र राहतील, असेही आदेशात स्पष्ट करण्यात आले आहे.

निवडणूक कालावधीत ध्वनीक्षेपकाचा वापर नियंत्रित करण्याचे आदेश जारी

विधानसभा निवडणूक प्रक्रिया कालावधीत निवडणुकीच्या प्रचारासाठी ध्वनीक्षेपकाचा वापर नियंत्रित करण्याबाबतचे आदेश जिल्हाधिकारी तथा जिल्हा दंडाधिकारी डॉ. सुहास दिवसे यांनी जारी केले आहेत.

या आदेशानुसार कोणतीही व्यक्ती, संस्था पक्ष कार्यकर्ते यांना ध्वनीक्षेपकाचा (लाऊडस्पिकरचा) वापर पोलीस अधिकाऱ्याच्या परवानगी शिवाय करता येणार नाही. सकाळी ६ वाजण्यापूर्वी आणि रात्री १० वाजल्यानंतर कोणत्याही फिरत्या वाहनावर व कोणत्याही क्षेत्रात ध्वनीक्षेपकाचा वापर करता येणार नाही. तसेच प्रचाराकरीता ध्वनीक्षेपकाचा वापर विशिष्ट ठिकाणी थांबूनच करावा, वाहन फिरत असताना ध्वनिक्षेपकाचा वापर करण्यास प्रतिबंध असेल.

सर्व राजकीय पक्ष, उमेदवार व इतर व्यक्तींनी निश्चित ठिकाणी ध्वनीक्षेपकाच्या वापरासंबंधीच्या परवानगीची माहिती जिल्हादंडाधिकारी, संबंधित निवडणूक निर्णय अधिकारी व संबंधीत यंत्रणेस कळविणे बंधनकारक करण्यात आले आहे. हा आदेश २५ नोव्हेंबर २०२४ पर्यंत पुणे जिल्ह्यासाठी अंमलात राहील. आदेशाचे उल्लंघन करणारे लोकप्रतिनिधीत्व अधिनियम १९५१ मधील तरतुदीनुसार व भारतीय न्याय संहिता २०२३ च्या कलम २२३ प्रमाणे दंडनीय कार्यवाहीस पात्र राहतील, असेही आदेशात स्पष्ट करण्यात आले आहे.

नामनिर्देशनपत्र दाखल करतेवेळी वाहनांचा ताफा, दालनातील उपस्थितांची संख्या नियंत्रित; मिरवणूक, सभा, घोषणांना प्रतिबंध

विधानसभा सार्वत्रिक निवडणूक प्रक्रियेदरम्यान नामनिर्देशनासाठी निवडणूक निर्णय अधिकारी यांच्या कार्यालयात येताना आणावयाची वाहने, दालनात उपस्थित राहणाऱ्या व्यक्तींची संख्या नियं‍त्रित करण्याबरोबरच मिरवणूक, सभा घेणे, घोषणा देण्यास प्रतिबंध करण्याचे आदेश जिल्हाधिकारी तथा जिल्हादंडाधिकारी डॉ. सुहास दिवसे यांनी जारी केले आहेत.

या आदेशानुसार उमेदवारांना जिल्ह्यातील निवडणूक निर्णय अधिकारी यांचे कार्यालयात येताना वाहनांच्या ताफ्यामध्ये तीन पेक्षा जास्त मोटारगाड्या, वाहने यांचा समावेश करण्यास प्रतिबंध करण्यात आला आहे. निवडणूक निर्णय अधिकारी यांच्या दालनात पाच व्यक्ती उपस्थित राहतील, या व्यतिरिक्त कोणालाही प्रवेश दिला जाणार नाही. तसेच निवडणूक निर्णय अधिकारी यांचे कार्यालयाच्या परिसरात नामनिर्देशनपत्र दाखल करते वेळेस मिरवणूक, सभा घेणे, घोषणा देणे, वाद्य वाजविणे किंवा गाणी म्हणणे आणि कोणत्याही प्रकारचा निवडणूक प्रचार करण्यास निर्बंध घालण्यात आले आहेत.

सदरचा आदेश दिनांक २५ नोव्हेंबर २०२४ पर्यंत अंमलात राहील. आदेशाचे उल्लंघन केल्यास संबंधित लोकप्रतिनिधीत्व अधिनियम १९५१ मधील तरतुदीनुसार व भारतीय न्याय संहिता २०२३ च्या कलम २२३ प्रमाणे दंडनीय कार्यवाहीस पात्र राहतील, असेही आदेशात स्पष्ट करण्यात आले आहे.

पुणे, दि. १८: जिल्ह्यात विधानसभा निवडणुकीच्या प्रचार मोहिमेच्या कालावधीत सर्व राजकीय पक्षाचे उमेदवार, निवडणूक लढविणारे उमेदवार आणि त्यांचे कार्यकर्ते, हितचिंतकांना निवडणूक प्रचारासाठी वापरण्यात येणाऱ्या वाहनांवर पक्ष प्रचाराचे फलक, झेंडे लावण्यास जिल्हाधिकारी तथा जिल्हादंडाधिकारी डॉ. सुहास दिवसे यांनी निर्बंधात्मक आदेश जारी केले आहेत.

या आदेशान्वये फिरत्या वाहनांवर पक्ष प्रचाराचा झेंडा हा वाहनाच्या डाव्या बाजूला विंड स्क्रिन ग्लासच्यापुढे राहणार नाही; तसेच तो त्या वाहनाच्या टपापासून २ फुट उंची पेक्षा जास्त राहणार नाही. प्रचाराच्या फिरत्या वाहनांवर कापडी फलक वाहन चालकाच्या आसनामागे वाहनाच्या डाव्या व उजव्या बाजूने लावण्यात यावा, इतर कोणत्याही बाजूस तो लावता येणार नाही. फिरत्या वाहनांवर लावावयाचा पक्ष प्रचाराचा झेंडा किंवा कापडी फलक संबंधित पक्षाचे जिल्हाध्यक्ष, उमेदवार व उमेदवाराचे निवडणूक प्रतिनिधी निवडणूक प्रचारासाठी निवडणूक निर्णय अधिकारी यांचेकडून अधिकृत परवानगी घेतलेल्या वाहनाव्यतिरिक्त इतर कोणत्याही वाहनांवर लावता येणार नाही.

हे आदेश २५ नोव्हेंबर २०२४ पर्यंत अंमलात राहतील. या आदेशाचे उल्लंघन केल्यास संबंधित हे लोकप्रतिनिधीत्व अधिनियम १९५१ मधील तरतुदीनुसार व भारतीय न्याय संहिता २०२३ कलम २२३ प्रमाणे दंडनीय कार्यवाहीस पात्र राहतील.

सार्वजनिक ठिकाणांच्या जवळपास तात्पुरत्या स्वरुपात पक्ष कार्यालय स्थापन करण्यास निर्बंध

विधानसभा सार्वत्रिक निवडणुकीच्या आचारसंहिता कालावधीत जिल्ह्यातील धार्मिक स्थळे, रुग्णालये किंवा शैक्षणिक संस्था व सार्वजनिक ठिकाणांच्या जवळपास तात्पुरत्या स्वरुपात पक्ष कार्यालये स्थापन करण्यावर जिल्हाधिकारी तथा जिल्हा दंडाधिकारी डॉ. सुहास दिवसे यांनी निर्बंध घालण्याचे आदेश जारी केले आहेत.

संपूर्ण निवडणूक प्रक्रिया शांततेत, निर्भय व न्याय्य वातावरणात पार पाडण्याच्या दृष्टीकोनातून २५ नोव्हेंबर २०२४ पर्यंत हे आदेश अंमलात राहतील. या आदेशाचे उल्लंघन करणारे लोकप्रतिनिधीत्व अधिनियम १९५१ मधील तरतुदीनुसार व भारतीय न्याय संहिता-२०२३ कलम २२३ प्रमाणे दंडनीय कार्यवाहीस पात्र राहतील.