पुण्यातील गणपती मंडळ, नवरात्र मंडळ, ढोल-ताशा पथकांच्या २४ संघांचा समावेश !

पुणे, 3 मार्चः पुनित बालन ग्रुप तर्फे पुण्यातील गणपती मंडळ, नवरात्र मंडळ, ढोल-ताशा पथकांच्या संघांचा समावेश असलेल्या चौथे पर्व ‘फ्रेंडशिप करंडक’ क्रिकेट अजिंक्यपद स्पर्धेचे आयोजन करण्यात आले आहे. ही स्पर्धा दि. ४ ते ९ मार्च २०२५ या कालावधीत होणार असून स्पर्धेत विविध मंडळांचे २४ संघ सहभागी होणार आहेत.

या स्पर्धेबाबत अधिक माहिती देताना पुनित बालन ग्रुपचे संचालक पुनित बालन यांनी सांगितले की, सार्वजनिक गणपती, नवरात्र मंडळे तसेच ढोल-ताशा पथकांचा समावेश असलेली ही नाविन्यपूर्ण क्रिकेट स्पर्धा ठरली आहे. स्पर्धेला माणिकचंद ऑक्सिरीच यांचे प्रायोजकत्व लाभले आहे. स्पर्धेचे हे सलग चौथे पर्व आहे. गणपती मंडळ, नवरात्र मंडळ, ढोल-ताशा पथकांचे २४ निमंत्रित संघ एकत्रितपणे या क्रिकेट स्पर्धेत भाग घेतात आणि हेच या स्पर्धेचे मुख्य वैशिष्ट्य आहे. या वर्षी स्पर्धेमध्ये आठ नवीन संघांना खेळण्याची संधी देण्यात आली असून स्पर्धेमध्ये विजेतेपदासाठी अधिक चुरस दिसणार आहे.

पुण्यातील गणपती मंडळातील कसबा गणपती मडळ, श्रीमंत दगडुशेठ हलवाई मंडळ, तांबडी जोगेश्वरी मंडळ, गुरूजी तालिम मंडळ, तुळशीबाग गणपती मंडळ, श्रीमंत भाऊसाहेब रंगारी गणपती ट्रस्ट, अखिल मंडई मंडळ, गरूड गणपती मंडळ या मानाच्या गणपती मंडळांसह श्री साई मित्र मंडळ, श्री महालक्ष्मी मंदिर, युवा वाद्य पथक, श्रीराम पथक, नादब्रह्म सर्ववादक या नवरात्री आणि वादक पथकांच्या क्रिकेट संघांचा स्पर्धेत समावेश आहे.

या स्पर्धेचे सामने सहकारनगर येथील ल.रा. शिंदे हायस्कूल येथील मैदानावर होणार आहेत. साखळी आणि बाद फेरीमध्ये होणार्‍या स्पर्धेत २४ संघांपैकी अव्वल ८ संघ बाद फेरीमध्ये प्रवेश करणार आहेत.

रंगारी रॉयल्स्, दगडुशेठ वॉरीयर्स, गुरूजी तालिम टायटन्स्, मंडई मास्टर्स, साई पॉवर हिटर्स, जोगेश्वरी जॅग्वॉर्स, कसबा सुपरकिंग्ज्, गरूड स्ट्रायकर्स, तुळशीबाग टस्कर्स, महालक्ष्मी मॅव्हरीक्स्, शिवमुद्रा ब्लास्टर्स, नादब्रम्ह ड्रमर्स, श्रीराम पथक, नादब्रह्म सर्ववादक, युवा योद्धाज्, सुर्योदय राईझर्स, जनादर्न जायंट्स, नुमवी स्टॅलियन्स्, भगतसिंग लिजंड्स, विश्रामबाग नाईट्स, समर्थ चॅलेंजर्स, एच.टी.एम. टायगर्स, गजर सुपरनोव्हाज्, रमणबाग फायटर्स असे २४ निमंत्रित संघ स्पर्धेत सहभागी झाले आहेत.

विजेत्या संघाला २ लाख ११ हजार रूपये व करंडक तर, उपविजेत्या संघाला १ लाख ११ हजार रूपये आणि करंडक मिळणार आहे. या शिवाय स्पर्धेत वैयक्तिक पारितोषिकेही देण्यात येणार आहेत. मालिकेचा सर्वोत्कृष्ट खेळाडू याला ५१ हजार रूपये आणि इलेक्ट्रिक बाईक देण्यात येणार आहे. ‘फेअर प्ले’ पुरस्कार जिंकणार्‍या संघाला २५ हजार रूपयांचे रोख पारितोषिक मिळणार आहे. याबरोबरच स्पर्धेतील सर्वोत्कृष्ट फलंदाज, गोलंदाज, यष्टीरक्षक आणि क्षेत्ररक्षक यांना प्रत्येकी ११ हजार रूपये आणि सन्मानचिन्ह देण्यात येणार आहे. तसेच प्रत्येक सामन्याचा सर्वोत्कृष्ट खेळाडू ठरणार्‍या खेळाडूला रोख पाच हजार रूपये अशी पारितोषिकांची रेलचेल या स्पर्धेत असणार आहे.

गतवर्षी (२०२४) साई पॉवर हिटर्स संघाने विजेतेपद तर, शिवमुद्रा ब्लास्टर्स संघाने उपविजेतेपद पटकावले होते.

लोहगाव, पुणे: विधानसभा निवडणुकीच्या प्रचारादरम्यान दिलेल्या वचनाला अनुसरून, लोहगावमधील पाणीपुरवठा नियमित करण्याच्या दृष्टीने महत्त्वपूर्ण वचनपूर्ती बैठक रविवारी (ता. ३) प्राईड एशियाना सोसायटी येथे पार पडली. या बैठकीत स्थानिक नागरिक, महापालिकेचे अधिकारी उपस्थित होते

गेली अनेक वर्षे लोहगाव भागात पाणी पुरवठ्याचा गंभीर प्रश्न नागरिकांची डोकेदुखी ठरला आहे. महानगरपालिकेत समावेश होऊनही पाण्यासाठी वणवण करावी लागत आहे. यावर आमदार बापूसाहेब पठारे यांनी दिलेल्या आश्वासनानुसार सातत्याने या भागाची पाहणी व पाठपुरावा करून संबंधित अधिकाऱ्यांसोबत बैठका घेत आवश्यक उपाययोजना करण्याचे आदेश दिले होते.

या वचनपूर्ती बैठकीत नागरिकांनी रस्ते, वाहतूक कोंडी, कचरा व्यवस्थापन, कर संकलन, पोलीस सुरक्षा, अवैध व्यवसाय आदी समस्याही पठारे यांच्यासमोर मांडल्या. त्यावर तात्काळ कार्यवाही करत आमदारांनी संबंधित अधिकाऱ्यांना सूचना दिल्या. तसेच, लोहगावमध्ये सहा ठिकाणी ट्रॅफिक पोलीस तैनात करण्याचे आश्वासन दिले.

यावेळी राजेंद्र खांदवे म्हणाले, “लोहगावचा सात वर्षांपूर्वी महापालिकेत समावेश झाला, मात्र अजूनही नागरिकांना मूलभूत सुविधा मिळत नाही. नागरिकांना पाण्यासाठी व इतर मूलभूत सुविधांसाठी खूप संघर्ष करावा लागत आहे. आजपर्यंत नागरिकांनी पाण्यासाठी लाखो रुपये मोजले आहेत हे मोठे दुर्दैव आहे. परंतु बापूसाहेब पठारे यांच्या पाठपुराव्यामुळे एक एक करून विविध समस्या मार्गी लागत आहेत.”

लोहगावातील पाणीपुरवठा समस्येवर बोलताना कार्यकारी अभियंता एकनाथ गाडेकर यांनी “न्याती, उत्तरेश्वर-निंबाळकर रस्ता, बी यु भंडारी टाकी ते प्राईड एशियाना आणि प्राईड एशियाना ते स्पार्क स्प्रिंग या चार झोनमध्ये रोज पाणीपुरवठा करू”, असे सांगितले. यावर पठारे यांनी ज्या सोसायटींना पाण्यासाठी महापालिकडे अर्ज करा, जेणेकरून लवकरात लवकर पाण्याच्या लाईन जोडून देता येतील, असे सुचवले.

तसेच, खराडी बायपास श्री पार्क पासून ते महालक्ष्मी लॉन्स दरम्यान २५० व्यासाची व ११०० मीटर लांबीची नवीन पाईपलाईन टाकण्याच्या कामाचे भूमिपूजन आमदार पठारे यांच्या हस्ते करण्यात आले. सोबतच, ५००० लीटर प्राथमिक पाण्याच्या टाकीचे उद्घाटन व लोहगाव-संतनगर इंडियन ऑइल पेट्रोल पंप शेजारील रस्ता तसेच प्राईड एशियाना सोसायटी जवळील रस्त्याचे भूमिपूजनही यावेळी त्यांनी केले.

याप्रसंगी प्राईड एशियाना सोसायटीचे चेअरमन गिरीश जयवाल यांच्या हस्ते आमदार पठारे यांचा सत्कार करण्यात आला. नागरिकांनी आमदारांच्या या प्रयत्नांबद्दल समाधान व्यक्त करत लोहगावच्या विकासासाठी अशाच सातत्यपूर्ण कार्याची अपेक्षा व्यक्त केली.

वचनपूर्ती बैठक व इतर प्रसंगी कार्यकारी अभियंता एकनाथ गाडेकर, शाखा अभियंता सुधीर आलोरकर, राजेंद्र खांदवे, सुनील खांदवे, प्रीतम खांदवे, अन्वर मुल्ला, नितीन जाधव, शिंदे, तसेच सोसायटी पदाधिकारी व नागरिक मोठ्या संख्येने उपस्थित होते.

चौकट
प्रचारादरम्यान लोहगावकरांना दिलेल्या प्रत्येक वचनांची पूर्ती करण्यासाठी मी विविध माध्यमातून प्रयत्नशील आहे, यात नागरिकांसोबत अधिकारी वर्गाचेही चांगले सहकार्य लाभत आहे. लोहगाव भागातील पाणी पुरवठ्याचा प्रश्नाला प्राधान्य देऊन टॅंकमुक्त लोहगाव हे उदिष्ट साध्य होताना दिसेलच सोबत इतरही प्रश्न मार्गी लावून लोहगावचा सर्वांगीण विकास साकार करण्याचा संकल्प पूर्ण करणार आहे.

• बापूसाहेब पठारे (विद्यमान आमदार, वडगावशेरी मतदारसंघ)

पुणे :महाराष्ट्र गांधी स्मारक निधी आयोजित आगामी गांधी विचार साहित्य संमेलनाच्या निमित्ताने ‘सत्याग्रही विचारधारा’ या मासिकाने तयार केलेल्या  विशेषांकाचे प्रकाशन रविवार,दि.२ मार्च २०२५ रोजी ज्येष्ठ सामाजिक कार्यकर्ते डॉ.बाबा आढाव,राष्ट्र सेवा दलाचे महाराष्ट्र प्रदेशाध्यक्ष राजा कांदळकर यांच्याहस्ते झाले.महाराष्ट्र गांधी स्मारक निधीचे अध्यक्ष आणि 

‘सत्याग्रही विचारधारा’ या मासिकाचे संपादक डॉ.कुमार सप्तर्षी हे या कार्यक्रमाचे अध्यक्षस्थानी होते.हा कार्यक्रम गांधी भवन,कोथरुड येथे दि.२ मार्च रोजी सायंकाळी ६ वाजता झाला.गांधी विचार साहित्य संमेलन विशेषांकाचे गांधी भवन येथे दि.७ ते ९ मार्च २०२५ रोजी होणार असून त्यानिमित्ताने तयार करण्यात आलेल्या या  विशेषांकात गांधीजींच्या जीवन आणि संदेशाविषयी लेखन समाविष्ट करण्यात आले आहे.यावेळी लक्ष्मीकांत देशमुख, अन्वर राजन, राजा कांदळकर आणि एड.राजेश तोंडे आदी मान्यवर उपस्थित होते.सूत्रसंचालन अभय देशपांडे यांनी केले तर गांधी स्मारक निधीचे विश्वस्त लक्ष्मीकांत देशमुख यांनी प्रास्ताविक केले.महाराष्ट्र गांधी स्मारक निधीचे सचिव अन्वर राजन यांनी आभार मानले. 

डॉ.बाबा आढाव म्हणाले,’सध्या लोकशाही प्रचंड प्रमाणात धोक्यात आली असून आता जर सामान्य जनता जागी होऊन संविधान रक्षण केले नाही ,तर इतिहास आपल्याला क्षमा करणार नाही.आजच्या मोदी आणि आर एस एस च्या विचाराने चाललेल्या देशात भारताची लोकशाहीच नव्हे तर देशाचे भवितव्यच धोक्यात आले आहे. प्रत्येकाने लोकशाही वाचवण्यासाठी संविधान रक्षण करण्यासाठी खारीचा वाटा उचलावा एवढेच कळकळीने सांगण्यासाठी मी या वयातही आवर्जून आलो. लोकशाही संपुष्टात आणून हुकूमशाही आणली आहे आणि दडपशाही आणण्यासाठी लोकांना खिरापती वाटणे, ते न जमल्यास लोकांचे आवाज दडपणे, असे प्रकार मोदी सध्या सर्रास करत आहेत, त्यासाठी त्यांनी सर्व सरकारी यंत्रणा आपल्या ताब्यात घेतल्या आहेत’, असेही बाबा आढाव म्हणाले.

‘महात्मा गांधी यांचे विचारच आजच्या देशातील परिस्थितीवर खऱ्या अर्थाने मार्गदर्शक ठरतील,याचसाठी गांधी विचारांचा यज्ञ म्हणून हे तीन दिवसीय साहित्य संमेलन भरविण्यात आले आहे’,अशी माहिती कुमार सप्तर्षी यांनी यावेळी दिली.तरुणांनी या तीन दिवसीय साहित्य संमेलनाकडे खुल्या मनाने यावे,यासाठीची पूर्वतयारी म्हणून हा गांधी विचारांचा मागोवा घेणारा विशेषांक प्रकाशित करण्यात आला असल्याची माहिती यावेळी लक्ष्मीकांत देशमुख यांनी दिली. 

‘डॉ.कुमार सप्तर्षी यांचे विचार आणि कार्य पथदर्शक असून डॉ.सप्तर्षींमुळेच मी सामाजिक,राजकीय चळवळीत आलो,असे राजा कांदळकर यांनी सांगितले.आजच्या देशातील परिस्थितीवर मात करायची असेल तर साने गुरूजींचे विचार आठवावे लागतील .’देशातील जाती धर्मातील बंधुभाव जोवर जिवंत राहील तोवरच लोकशाही टिकेल’,असे साने गुरुजी म्हणाले होते. म्हणूनच देशातील बंधुभाव पूर्णतः नष्ट करण्याचे सर्व प्रयत्न मोदी सरकार करीत आहे. ते हाणून पाडण्यासाठी आपल्याला बंधुभाव एकात्मता आणि समता कायम ठेवावी लागेल’, असे मत कांदळकर यांनी व्यक्त केले. 

• – नामदेव ढसाळ यांच्या कविता व लेखनांचे वाचन’ कार्यक्रम

पुणे : भारतीय चित्रपट सेन्सॉर बोर्डाने विद्रोही कवी, पद्मश्री नामदेव ढसाळ यांच्याबद्दल केलेल्या अवमानकारक वक्तव्याच्या निषेधार्थ. कवी, लेखक, कलाकार व आंबेडकरी चळवळीतील  कार्यकर्त्यांच्या वतिने अभिनव आंदोलन करण्यात येणार आहे. ‘नामदेव तुझा बाप – नामदेव ढसाळ यांच्या कविता व लेखनांचे वाचन’ या कार्यक्रमाच्या माध्यमातून सेन्सॉर बोर्डाचा निषेध करण्यात येणार असल्याची माहिती सम्यक साहित्य संमेलन, पुणेचे अध्यक्ष परशुराम वाडेकर यांनी दिली. 

 ‘नामदेव तुझा बाप – नामदेव ढसाळ यांच्या कविता व लेखनांचे वाचन’  या अभिनव आंदोलनाबद्दल अधिक माहिती देताना परशुराम वाडेकर म्हणाले,  मंगळवार दि . ४ मार्च २०२५ रोजी सायंकाळी ५ वा. कलाकार कट्टा, गुडलक चौक येथे हे आंदोलन करण्यात येणार आहे. या आंदोलनात  दंगलकार नितीन चंदनशिवे,  सुमित गुणवंत, सागर काकडे, हृद‌मानव अशोक,  रमणी सोनवणे, अशोक घोडके, स्वप्नील चोधरी, हर्षनंद सोनवणे, रवी कांबळे,  जित्या जाली, देवा झिंजाड, विठ्ठल गायकवाड,  म.भा. चव्हाण, विजय बडेवार, अंजली कुलकर्णी,  सुरेश वैराळकर आकाश सोनवणे यांच्यासह मान्यवर साहित्यिक, कवी, पत्रकार सहभागी होऊन नामदेव ढसाळ यांच्या कविता आणि लेखनांचे वाचन करणार असल्याचे वाडेकर यांनी सांगितले.  

डॉ. बासाहेब आंबेडकर सांस्कृतिक महोत्सव समितीचे सचिव  दिपक म्हस्के, डॉ. राजाभाऊ भैलुमे, प्रा. किरण सुरवसे, डॉ. निशा भंडारे, पुण्याच्या माजी उपमहापौर सुनिता परशुराम वाडेकर, डॉ. स्वप्निल गायकवाड, प्रा. रमा करोते-सुर्यवंशी आदि यं अभिनव आंदोलनाचे निमंत्रक आहेत.

मराठा आंत्रप्रिन्युअर्स असोसिएशन तर्फे ‘एमईए एक्झिबिशन २०२५’ :  अमर ओक आणि श्रुती भावे यांचा ‘फ्लूट अँड फिडेल’ सांगीतिक कार्यक्रम
पुणे : युही चला चल राही… जीव दंगला…याड लागलं...या गाण्याचे बोल नसतानाही केवळ वाद्यांच्या सुरेल सादरीकरणाने रसिकांवर मोहिनी घातली. बासरी वादक अमर ओक आणि व्हायोलिन वादक श्रुती भावे यांनी त्यांच्या अप्रतिम सादरीकरणाने रसिकांना मंत्रमुग्ध केले. दोघांनीही आपल्या वादन कौशल्यांनी रसिकांना संगीतमय सफर घडवली.

निमित्त होते, मराठा आंत्रप्रिन्युअर्स असोसिएशन च्या वतीने कर्वेनगर मधील महालक्ष्मी लॉन्स येथे आयोजित फ्लूट अँड फिडेल या कार्यक्रमाचे. व्यावसायिकांमध्ये उद्योजकता व कल्पकता यांचा विकास व्हावा, या उद्देशाने मराठा आंत्रप्रिन्युअर्स असोसिएशन तर्फे ‘एमईए एक्झिबिशन २०२५’ चे आयोजन करण्यात आले आहे. त्याअंतर्गत या सांगीतिक कार्यक्रमाचे आयोजन पुणेकरांसाठी करण्यात आले होते.

यावेळी असोसिएशनचे अध्यक्ष अरुण निम्हण, सचिव राजेश कुराडे, दीपक मानकर, दयानंद गावडे, गोपीचंद कदम, अमरसिंह पाटील या मान्यवरांसह कमिटीचे महेश भागवत, आश्रम काळे, सायली काळे, महेश घोरपडे, अभिजित जाधव, सागर तुपे, तेजस चरवड, किशोर जगताप, भारती मुरकुटे, सई बहीरट, राजेश कुराडे, सायली काळे, महेश घोरपडे, अभिजित जाधव, आदी उपस्थित होते.

कार्यक्रमात देखा एक ख्वाब… जाने जा ढूंढता फिर रहा… चप्पा चप्पा यांसह डेस्पासितो.. पसूरी या गाण्यांच्या चालीवरील व्हायोलिन वादनाला रसिकांनी विशेष दाद दिली. बासरीवर सादर झालेल्या मोह मोह के धागे… या गीताच्या वादनात रसिक तल्लीन झाले. अमर ओक यांचे बासरीचे तर श्रुती भावे यांचे व्हायोलिनचे सूर आणि त्यांना रसिकांनी दिलेली दाद यामुळे कार्यक्रम रंगत गेला. त्यांच्या सुरेल जुगलबंदीने वातावरण भारावून गेले.

पुणे : राग यमन, हंसध्वनी, पूरिया, दरबारी, अभोगी, हेमंत, चंद्रकंस, नंद असे सायंकाळ ते उत्तररात्र या कालाधवीत गायले जाणारे राग आज सकाळच्या तीन प्रहरात ऐकायला मिळाले. कालप्रहराच्या सीमा ओलांडून दिग्गज कलाकारांनी भावपूर्णतेने केलेल्या सादरीकरणास रसिकांनी तन्मयतेने दिलेली साथ हे रागप्रभा संगीतोत्सवाचे वैशिष्ट्य ठरले.
राग प्रहरांच्या कालबाह्य संकल्पनांपासून मुक्त ‌‘रागप्रभा संगीतोत्सवा‌’चे डॉ. प्रभा अत्रे फाऊंडेशनतर्फे यशवंतराव चव्हाण नाट्यगृहात आज (दि. 2) आयोजन करण्यात आले आहे. सकाळी आठ वाजता सुरू झालेल्या पहिल्या सत्रात पंडित हरिप्रसाद चौरसिया, पंडित उदय भवाळकर, विदुषी पद्मा तळवलकर, पंडित राजा काळे, पंडित राम देशपांडे यांचे सादरीकरण झाले. संगीतोत्सवाचे उद्घाटन पंडित हरिप्रसाद चौरसिया. पंडित उदय भवाळकर, पंडित राजा काळे, पंडित योगेश समसी, पंडित विनायक तोरवी, पंडित राम देशपांडे, रघुवीर कुलकर्णी, अशोक वळसंगकर यांच्या उपस्थितीत झाले.
ज्येष्ठ बासरीवादक पद्मविभूषण पंडित हरिप्रसाद चौरसिया यांनी मैफलीची सुरुवात राग यमनने केली. त्यानंतर हंसध्वनी राग सादर केला. पंडित चौरसिया यांच्या सुमधूर वादनाने रसिकांना मोहित केले. पंडित योगेश समसी (तबला), मृणाल उपाध्याय (पखावज) यांनी साथसंगत केली तर अमर ओक, वैष्णवी जोशी, किरण बिश्त यांनी बासरी सहवादन केले.
त्यानंतर सुप्रसिद्ध ध्रुपद गायक पंडित उदय भवाळकर यांनी आपल्या धीरगंभीर आवाजात राग पूरिया ऐकविला. ‌‘शिव पार्वतीनाथ महाराज‌’ या पारंपरिक बंदिशीत आलाप, चौताल सादर केला. नंतर ‌‘भवानी माता काली‌’ ही रचना अतिशय प्रभावीपणे सादर करून रसिकांना मंत्रमुग्ध केले. पंडित भवाळकर यांना प्रताप आव्हाड (पखावज), मेघना सरदार, किरत सिंग यांनी सहगायन व तानपुरा साथ केली.
ज्येष्ठ शास्त्रीय गायिका विदुषी पद्मा तळवलकर यांनी आपल्या मैफलीची सुरुवात उत्तर रात्री गायला जाणाऱ्या राग दरबारीने केली. ‌‘मुबारक बात‌’ ही बंदिश विलंबित तालात सादर करून त्याला जोडून ‌‘अनोखा लाडला‌’ ही द्रुत बंदिश ऐकविली. राग अभोगीमधील ‌‘सपनेमे आए श्याम‌’, ‌‘लाज रखो मोरी‌’ या पारंपरिक बंदिशींना रसिकांनी भरभरून दाद दिली. सुयोग कुंडलकर (संवादिनी), ऋषिकेश जगपात (तबला), अंकिता दामले, निर्मला थोरात, रसिका गरूड (तानपुरा, सहगायन) यांनी साथसंगत केली.
कार्यक्रमाच्या पुढील भागात सुप्रसिद्ध गायक पंडित राजा काळे यांनी राग हेमंत व चंद्रकंस सादर केला. ‌‘कहा मन लागों तेरो बालमवा‌’, ‌‘तोरे बिना बरन भयो‌’ या पारंपरिक बंदिशी प्रभावीपणे सादर केल्या. राग चंद्रकंसमधील कृष्णाला उद्देशून रचलेली ‌‘याहु जानी तम की करा‌’ ही रचना ऐकविली. अरविंदकुमार आझाद (तबला), चैतन्य कुंटे (संवादिनी), श्याम जोशी, अमृता काळे (सहगायन, तानपुरा) यांनी समर्पक साथ केली.
पहिल्या सत्राची सांगता ग्वाल्हेर-जयपूर घराण्याची तालीम मिळालेल्या पंडित डॉ. राम देशपांडे यांच्या गायनाने झाली. पंडित देशपांडे यांनी मैफलीची सुरुवात राग नंदने केली. या रागातील ‌‘सैंया तोसे सकल बन ढुंढू‌’ ही पारंपरिक बंदिश ऐकवून नंतर आग्रा घराण्यातील ‌‘रहे रैन पिया सौतन‌’ ही रचना रसिकांची दाद मिळवून गेली. नागपूर येथील तबला वादक सचिन बक्षी यांची रचलेला ‌‘तान ते रे दानी‌’ तराणा ऐकवून रसिकांना आनंदीत केले. प्रशांत पांडव (तबला), मिलिंद कुलकर्णी (संवादिनी), गंधार देशपांडे, सिद्धार्थ गोडांबे, मयूर कोळेकर यांनी गायन साथ केली.
रागप्रहरांच्या कालबाह्य संकल्पनातून मुक्त संगीताविषयी डॉ. प्रभा अत्रे यांनी व्यक्त केलेल्या भावना दृकश्राव्य माध्यमातून पंडित हरिप्रसाद चौरसिया यांच्या हस्ते समाजमाध्यमावर प्रसारित करण्यात आल्या.
कलाकारांचा सत्कार रास्तापेठ एज्युकेशन सोसायटीचे कार्याध्यक्ष संजीव महाजन, विश्वस्त भारत वेदपाठक, संवाद पुणेचे सुनील महाजन, गानवर्धनचे अध्यक्ष दयानंद घोटकर, तात्यासाहेब नातू फाऊंडेशनचे अध्यक्ष शारंग नातू यांच्या हस्ते करण्यात आला. कार्यक्रमाचे अभ्यासपूर्ण निवेदन आनंद देशमुख यांनी केले.

डॉ. प्रभा अत्रे यांचे विचार काळाशी सुसंगत : पंडित हरिप्रसाद चौरसिया

राग-रागिणी सादरीकरणावर काळाचे बंधन नको, या प्रभा अत्रे यांच्या संकल्पनेविषयी मी सहमत आहे, असे सांगून पंडित हरिप्रसाद चौरसिया म्हणाले, डॉ. प्रभा अत्रे यांची संगीत क्षेत्रातील साधना मोठी असून त्यांनी याविषयीचा सखोल अभ्यास केला आहे. राग सादरीकरण आणि समय यांचा एकमेकांशी संबंध नको, आजच्या काळात या संकल्पनेला महत्त्व नाही हा त्यांचा विचार सुसंगत आहे.
पंडित योगेश समसी म्हणाले, कालबाह्य रागसंगीत या विषयी विचारमंथन होणे आवश्यक आहे. जोड रागाचे सादरीकरण, कर्नाटकी संगीत पाहता प्रभा अत्रे यांचे विचार सुसंगत वाटतात. संगीताची गुरुमुखी परंपरा जपण्यासाठी ही संकल्पना योग्य आहे.

पंडित राजा काळे म्हणाले, कालबाह्य राग सादरीकरणाची संकल्पना सादर करताना कलाकाराची मानसिकता महत्त्वाची असते. कलाकाराने रागामागील शास्त्र सादर न करता तो सिद्ध करून रसिकांसमोर आणणे आवश्यक आहे. रागाचे शास्त्र नव्हे तर धून प्रकट करणे हे कलाकाराचे मोठेपण आहे.

‘युवोत्सव २०२५’ मध्ये पीसीसीओईआर, गरवारे, मॉडर्न महाविद्यालयांचा विजय

पिंपरी, पुणे (दि. ०२ मार्च २०२५) – जग झपाट्याने बदलत असून सर्वच क्षेत्रात स्पर्धा वाढली आहे. विद्यार्थी दशेत शिक्षणाला महत्त्व आहे. परंतु अभ्यासाचे दडपण असेल तर त्याचा शरीरावर परिणाम होतो. मानसिक सुदृढतेसाठी शिक्षणाबरोबरच खेळांची आवड जोपासली पाहिजे. तरच तंदुरुस्त, खंबीर समाज निर्माण होईल. पालकांनीही याकडे जागरूकपणे पाहण्याची आवश्यकता आहे. सर्वांगीण विकास साधत देशाची भावी पिढी सुसंस्कृत आणि जबाबदार नागरिक घडविण्यासाठी पालक, विद्यार्थी, शिक्षक यांची जबाबदारी आहे, असे मत पीसीईटीचे विश्वस्त तथा पीसीयुचे कुलपती हर्षवर्धन पाटील यांनी व्यक्त केले.
पिंपरी चिंचवड एज्युकेशन ट्रस्ट (पीसीईटी) संचालित निगडी येथील एस. बी. पाटील इन्स्टिट्यूट ऑफ मॅनेजमेंटच्या वतीने ‘युवोत्सव २०२५’ या तीन दिवसांच्या क्रीडा स्पर्धेचा समारोप शनिवारी (दि. १ मार्च) पारितोषिक वितरण समारंभाने झाला. यावेळी हर्षवर्धन पाटील बोलत होते. यावेळी उद्योजक नरेंद्र लांडगे, अजिंक्य काळभोर, एस. बी. पाटील मॅनेजमेंट इन्स्टिट्यूटच्या संचालिका डॉ. किर्ती धारवाडकर उपस्थित होत्या.
दरम्यान स्पर्धेचे उद्घाटन गुरूवारी अभिनेत्री सोनाली कुलकर्णी, पिंपरी चिंचवड मनपाचे अतिरिक्त आयुक्त प्रदीप जांभळे पाटील, आरजे अक्षय यांच्या हस्ते करण्यात आले. या स्पर्धेत फुटबॉल, बॉक्स क्रिकेट, बॅडमिंटन आणि व्हॉलीबॉल या क्रीडा प्रकारांचा समावेश होता. पुणे जिल्ह्यासह सातारा जिल्ह्यातील विविध महाविद्यालयातील एकूण १४५ संघ सहभागी झाले होते.
स्पर्धेचा सविस्तर निकाल खालील प्रमाणे –
फुटबॉल – प्रथम क्रमांक – गरवारे कॉलेज ऑफ कॉमर्स, उपविजेते – श्री बालाजी विद्यापीठ, डी. वाय. पाटील कॉलेज ऑफ इंजिनियरिंग, आकुर्डी;
बॉक्स क्रिकेट (पुरुष) – प्रथम – डी. वाय. पाटील आयएमएस, आकुर्डी, उपविजेते – पीसीसीओई, निगडी, डी. वाय. पाटील कॉलेज, तळेगाव;
बॉक्स क्रिकेट (महिला) – प्रथम – पीसीसीओईआर, रावेत, उपविजेते – झील कॉलेज, इंदिरा कॉलेज;
बॅडमिंटन (पुरुष) – प्रथम – आनंद बोरा (एमआयटी स्कूल ऑफ डिस्टन्स एज्युकेशन), उपविजेते – रितेश निम्हाळ (पीसीसीओई, निगडी);
बॅडमिंटन (महिला) – प्रथम परिनीत मगदूम (बाबुरावजी घोलप कॉलेज, सांगवी), उपविजेते – अमृता गाडेकर (एमआयटी कला, वाणिज्य, विज्ञान महाविद्यालय);
व्हॉलीबॉल – प्रथम मॉडर्न कॉलेज, शिवाजीनगर; उपविजेते – पीसीसीओई निगडी, के. बी. पी. सातारा
वैयक्तिक विजेते – बॅडमिंटन (पुरुष) – सर्वोत्तम स्मॅशर – आनंद बोरा (एमआयटी स्कूल ऑफ डिस्टन्स एज्युकेशन),; बॅडमिंटन (महिला) – सर्वोत्तम स्मॅशर मिहिका ठाकूर (एमआयटी स्कूल ऑफ डिस्टन्स एज्युकेशन);
बॉक्स क्रिकेट (पुरुष) – सर्वोत्तम फलंदाज – आदर्श पवार (डीवायपी आयएमएस); सर्वोत्तम गोलंदाज – प्रथमेश नाथे (पीसीसीओई), सर्वोत्तम क्षेत्ररक्षक – अभिषेक कोठावदे (डीवायपी आयएमएस);
बॉक्स क्रिकेट (महिला) – सर्वोत्तम फलंदाज – श्रेया टाकळकर (पीसीसीओईआर); सर्वोतम गोलंदाज – आदिती बिरादर (इंदिरा कॉलेज);
सर्वोत्तम क्षेत्ररक्षक – कल्याणी कोळपे (पीसीसीओईआर); व्हॉलीबॉल – सर्वोत्तम सेंटरर – विकास भामरे,
सर्वोत्तम ब्लॉकर – संस्कार पावरे, सर्वोत्तम स्मॅशर – विनीत शिंदे;
फुटबॉल – सर्वोत्तम गोलकीपर – ललित डोगरा (श्री बालाजी), टॉप गोल स्कोरर – यश गटकळ (डीवायपी सीओई), सर्वोत्तम खेळाडू – प्रेम भयार (गरवारे).

पिंपरी चिंचवड एज्युकेशन ट्रस्टचे अध्यक्ष ज्ञानेश्वर लांडगे, उपाध्यक्ष पद्मताई भोसले, सचिव विठ्ठल काळभोर, खजिनदार शांताराम गराडे, विश्वस्त तथा पीसीयुचे कुलपती हर्षवर्धन पाटील, उद्योजक नरेंद्र लांडगे, अजिंक्य काळभोर, कार्यकारी संचालक डॉ. गिरीश देसाई यांनी विजेत्या संघांचे आणि खेळाडूंचे अभिनंदन करून पुढील वाटचालीसाठी शुभेच्छा दिल्या.
या युवोत्सवात समन्वयक म्हणून प्रा. डॉ. काजल माहेश्वरी, डॉ. अनिषकुमार कारिया, डॉ. अमरीश प‌द्मा यांनी काम केले. माजी वि‌द्यार्थी समन्वयक नंदलाल पारीक, विशाल निकम आणि अभिजीत नायडू यांचे सहाय्य लाभले. तसेच, स्पर्धा यशस्वी करण्यासाठी सर्व प्राध्यापक, शिक्षकेतर कर्मचारी, विद्यार्थी परिषद सदस्य, विद्यार्थी स्वयंसेवकांनी मोलाचे योगदान दिले.

• कसबा मतदारसंघातून धुळखात पडलेली वाहने उचलण्याच्या मोहिमेला सुरुवात

पुणे (दि २ मार्च): शहरातील रस्त्यांवर धूळखात पडलेल्या बेवारस वाहनांमुळे वाहतुकीस अडथळा, अस्वच्छता आणि आरोग्यविषयक समस्या निर्माण होतात. अशा काही वाहनांची चोरी झालेली असते, तर काहींना मालकच नसतो. ही परिस्थिती लक्षात घेऊन पुणे पोलीस आणि महापालिका प्रशासनाने व्यापक मोहीम हाती घेतली असून याची सुरुवात कसबा मतदारसंघातून करण्यात आली आहे. येत्या १५ दिवसांमध्ये येथील सर्व बेवारस वाहने हटवली जाणार आल्याची माहिती अपर पोलिस आयुक्त मनोज पाटील यांनी दिली आहे.

आमदार हेमंत रासने यांच्या माध्यमातून राबवण्यात येणाऱ्या स्वच्छ, सुंदर आणि विकसित कसबा अभियानाच्या माध्यमातून गणेश पेठतील दूधभट्टी चौकामध्ये या मोहिमेचा शुभारंभ करण्यात आला. यावेळी महापालिका अतिरिक्त आयुक्त पृथ्वीराज बी पी, झोन १ पोलीस उपायुक्त संदीप सिंह गिल, कसबा मंडल अध्यक्ष राजेंद्र काकडे यांच्यासह कसबा मतदारसंघातील सर्व माजी नगरसेवक, पदाधिकारी आणि कार्यकर्ते यावेळी उपस्थित होते.

यावेळी बोलताना अपर पोलिस आयुक्त मनोज पाटील म्हणाले, “पुणे शहरात जवळपास चार हजारांच्यावर धुळखात पडलेली बेवारस वाहने आहेत. यामुळे पार्किंगची समस्या वाढत असून आरोग्यावरही परिणाम होतो. यातील काही वाहने चोरीची असतात तर काहींचे मालक सापडत नाहीत. पोलिस आयुक्तांच्या आदेशानुसार अशा वाहनांच्या मालकांना प्रथम नोटीस दिली जाईल, मात्र कोणी मालक नसल्यास वाहतूक पोलीस गाड्या जप्त करतील आणि पुढे कायदेशीर प्रक्रिया करून लिलाव केला जाईल. कसबा मतदारसंघात पहिल्या दिवशी १३९ वाहने उचलण्यात आली असून येत्या १५ दिवसांमध्ये सर्व बेवारस वाहने हटवण्यात येतील. यासाठी आमदार हेमंत रासने यांची घेतलेला पुढाकार कौतुकास्पद आहे”.

महापालिकेचे अतिरिक्त आयुक्त पृथ्वीराज बी पी म्हणाले, “महापालिकेच्या माध्यमातून रस्त्यावर धुळखात पडलेली 45 वाहने गेल्या महिन्यात उचलण्यात आली आहेत. महापालिका आणि पुणे पोलिस यांच्यामध्ये समन्वय साधून ही कारवाई केली जात आहे. दोन्ही विभागांकडून रस्त्यावर अशा पद्धतीने वाहने उभी करणाऱ्यांवर दंडात्मक कारवाई केली जाते. वाहने जप्त केल्यानंतर कायदेशीर प्रक्रिया पार पडण्यासाठी काही महिने लागत असल्याने ती ठेवण्यासाठी बाणेर येथे महापालिकेची जागा असून कोंढव्यात नवीन जागा उपलब्ध करून देण्यात येईल. खराब झालेल्या महापालिकेच्या वाहनांचा देखील लवकरच लिलाव केला जाणार आहे.

आमदार हेमंत रासने म्हणाले, “बेवारस वाहनांमुळे अस्वच्छता, आरोग्यविषयक समस्या आणि वाहतुकीस अडथळा निर्माण होतो. रस्त्यावर कचरा तसेच बेवारस साहित्य असू नये, हा आमचा प्रयत्न आहे. त्यामुळे अशी वाहने उचलण्यासाठी पुणे पोलीस, वाहतूक विभाग आणि महापालिकेच्या संयुक्तिक कारवाईला सुरुवात करण्यात आली आहे. वाहने जप्त केल्यानंतर कायदेशीर प्रक्रिया पूर्ण करण्यासाठी सहा महिन्यांच्या कालावधी लागत असल्याने तो कमी करण्यासाठी तसेच संपूर्ण प्रक्रियेत सुसूत्रता आणण्यासाठी राज्य सरकारकडे पाठपुरावा करणार आहे. कसबा अनधिकृत फ्लेक्समुक्त करण्यासाठी देखील प्रयत्न सुरू आहेत.