अमनोरा येस फाउंडेशन आणि सहयोगी संस्थेच्या वतीने स्तन कर्करोग तपासणी शिबिर
पुणे :  कर्करोगाच्या प्रकारांमध्ये महिलांमधील  स्तनकर्करोगाचे प्रमाण जास्त आहे. परंतु अनेक वेळा महिला त्याकडे दुर्लक्ष करतात त्यातही पोलीस महिला कर्मचाऱ्यांना त्यांच्या व्यस्त दिनचर्येमुळे स्वतःकडे लक्ष देता येत नाही. त्यामुळे अमनोरा येस फाउंडेशन आणि सहयोगी संस्था यांच्या वतीने पोलीस मुख्यालयात कर्करोग तपासणी शिबिराचे आयोजन करण्यात आले होते. यावेळी १०३ महिला पोलीस कर्मचाऱ्यांची स्तन कर्करोग तपासणी झाली.

बीजे मेडिकल कॉलेज आणि ससून सर्वोपचार रुग्णालय, अमनोरा येस फाउंडेशन, रोटरी क्लब ऑफ पुणे कात्रज, यु इ लाईफसायन्सेस यांच्या संयुक्त विद्यमाने  शिबिराचे आयोजन करण्यात आले होते. ससूनचे अधिष्ठाता डॉ. एकनाथ पवार, ससूनचे अधिक्षक डाॅ. यल्लप्पा जाधव, पोलीस उपायुक्त डॉ. राजकुमार शिंदे, सहायक पोलीस आयुक्त रंगनाथ उंडे, ससूनच्या शस्त्रक्रिया विभागाच्या प्रमुख डॉ. लता भोईर, सिटी ग्रुप चे उपाध्यक्ष विवेक कुलकर्णी यावेळी उपस्थित होते.

डॉ. एकनाथ पवार म्हणाले, पुण्यातील सर्व पोलीस महिला कर्मचाऱ्यांसाठी त्यांना कर्करोग तपासणी शिबिर राबविण्यात येत आहे. महिलांचे देखील चांगले सहकार्य या शिबिराला मिळत आहे. पोलीस मुख्यालयात झालेल्या शिबिरात मॅमोग्राफीसाठी ३९ तर ३ महिला पोलिसांना पुढील तपासणीसाठी सांगण्यात आले आहे. कर्करोगाबद्दल लवकर माहिती मिळाल्यास त्यावर उपचार करता येतात. त्यामुळे महिला पोलिसांनी मोठ्या संख्येने या शिबिरात सहभागी व्हावे.

डॉ. राजकुमार शिंदे म्हणाले, महिला अजूनही त्यांना काही त्रास होत असेल तर सांगत नाहीत परंतु महिलांनी पुढे येऊन ते सांगणे गरजेचे आहे. स्तन कर्करोग पूर्वतपासणी सर्व महिलांनी करून घेणे आवश्यक आहे.

विवेक कुलकर्णी म्हणाले, महिला पोलिसांना विनामूल्य कर्करोग तपासणीसाठी हेल्थ कार्ड  देण्यात आले आहेत. यापूर्वी विविध ठिकाणी झालेल्या ५ शिबिरात २२५ महिला पोलिसांची तपासणी करण्यात आली. यामध्ये १२ महिला पोलिसांना मॅमोग्राफी तर १० जणींना सोनोग्राफी तपासणी सांगण्यात आली होती. पोलीस समाजाची काळजी घेतात त्यामुळे त्यांची काळजी घेणे हे आमचे कर्तव्य आहे.

विवेक कुलकर्णी यांनी सूत्रसंचालन केले.

पुणे-कोथरूड सारख्या उपनगरावर विशेष दिवाळी अंकाची निर्मिती होते, ही माझ्यासारख्या कोथरुडवासियासाठी आनंद देणारी बाब आहे. कला, साहित्य, संस्कृती, विज्ञान, समाजकारण आणि राजकारण… अशा सर्वांगाने कोथरुड परिपूर्ण असून या कोथरुडने या देशालाही बरेच काही दिले आहे. त्यामुळे कोथरुडवरील हा दिवाळी अंक निश्चितच नव्या पिढीसाठी मार्गदर्शक ठरणारा आहे.असे उद्गार येथे केंद्रीय मंत्री मुरलीधर मोहोळ यांनी काढले .

ते म्हणाले,’ दिवाळी अंक हा मराठी माणसाच्या जिव्हाळ्याचा विषय आहे. महाराष्ट्राचं सांस्कृतिक माहेरघर पुण्याला मानलं जातं आणि पुण्याचं कोथरूडला ! आणि हाच धागा लक्षात घेत उच्च व तंत्रशिक्षण मंत्री चंद्रकांतदादा पाटील यांच्या संकल्पनेतून मेनका प्रकाशननं या वर्षी ‘कोथरुड दिवाळी अंका’ची निर्मिती केली याचे मला कौतुक आहे आणि माझ्या खूप शुभेच्छाही आहेत कोथरुडसारख्या उपनगरावर विशेष दिवाळी अंकाची निर्मिती होते, ही माझ्यासारख्या कोथरुडवासियासाठी आनंद देणारी बाब आहे. कला, साहित्य, संस्कृती, विज्ञान, समाजकारण आणि राजकारण… अशा सर्वांगाने कोथरुड परिपूर्ण असून या कोथरुडने या देशालाही बरेच काही दिले आहे. त्यामुळे कोथरुडवरील हा दिवाळी अंक निश्चितच नव्या पिढीसाठी मार्गदर्शक ठरणारा आहे.यावेळी राष्ट्रीय स्वयंसेवक संघाचे पुणे महानगर कार्यवाह रवींद्रजी वंजारवाडकर, उच्च-तंत्रशिक्षण मंत्री श्रीचंद्रकांतदादा पाटील, प्रा. मिलिंद जोशी, वैशाली करमरकर, डॉ. सलिल कुलकर्णी, मनेका प्रकाशनचे अभय कुलकर्णी , सुकृत करंदीकर यांच्यासह कोथरुडकर उपस्थित होते.

पुणे- भाजपची उमेदवार यादी अद्याप अधिकृत रित्या जाहीर झाली नसली तरी यावेळी खुद्द पंतप्रधान नरेंद्र मोदी यांना यादी दाखवून त्याबाबत त्यांचे मत घेतल्यावर काही अत्यल्प जागा वगळता अंतिम यादी तयार असल्याचे वृत्त आहे. आणि या यादीची माहिती बावनकुळे,फडणवीस,चंद्रकांत पाटील आणि पंकजा मुंडे यांना असल्याचे वृत्त आहे. मात्र त्यांनी याबाबत गुप्तता पाळली आहे. एकूणच सूत्रांनी मिळविलेल्या माहितीच्या आधारे पुण्यातून चंद्रकांतदादा पाटील यांची कोथरूड मधून तर सिद्धार्थ शिरोळे यांची शिवाजीनगर मधून उमेदवारी निश्चित झाल्याचे मानले जाते आहे.

कोल्हापूर मधून पुण्यात आल्यावर चंद्रकांत पाटलांनी जरी कोथरूडला आपलेसे केले असले तरी येथील स्थानिक नेत्यांनी या वेळी त्यांच्या विरोधात मोहीम उघडल्याचे दिसले आहे. माजी नगरसेवक अमोल बालवडकर यांनी उघडपणे मैदानात उतरून चंद्रकांत पाटलांच्या उमेदवारीला आव्हान देत स्वतः लढण्याची तयारी सुरु केली आहे.चंद्रकांत पाटील,दिल्ली स्थित एक पत्रकार,आणि खुद्द भाजपा प्रदेश अध्यक्ष बावनकुळे यांनी बालवडकर यांना समजविण्याचा प्रयत्न केलाय पण त्यात त्यांना यश आल्याचे वृत्त नाही.मात्र कोथरूडमधून महाविकास आघाडीकडे फार भक्कम उमेदवार नसल्याने बालवडकर यांनी जरी बंडखोरी केली तरी चंद्रकांत पाटील आणि भाजपच्या मतदारांवर त्याचा फारसा परिणाम होणार नाही असा भाजपा नेत्यांचा दावा आहे. अलीकडेच मनसे च्या काही स्थानिक नेत्यांनी बालवडकर यांची भेटही घेतली आहे. या पार्श्वभूमीवर आता बालवडकर नेमकी कोणती भूमिका घेणार यावरही पुढील राजकारण अवलंबून असणार आहे.

शिवाजीनगर विधानसभा मतदार संघातून सिद्धार्थ शिरोळे यांनी ५ वर्षे सातत्याने ठेवलेला जनसंपर्क आणि इथल्या समस्या विधीमंडळात विनम्रतेने मांडून सोडविण्याचा केलेला प्रयत्न हेच त्यांच्या यशाचे मूळ कारण असणार आहे. त्यांना पक्षातूनही फारसा विरोध नाही आणि कॉंग्रेस कडे त्यांच्या विरोधात इच्छुक असलेल्यामध्येच मोठी फाटाफूट दिसून आलेली आहे.

पुणे:बेहिशोबी मालमत्ता बाळगल्याप्रकरणी झोपडपट्टी पुनर्वसन (एसआरए) कार्यालयातील तत्कालीन उपमुख्य कार्यकारी अधिकाऱ्यासह त्याच्या पत्नीविरुध्द बंडगार्डन पोलिस ठाण्यात गुन्हा दाखल करण्यात आला आहे.लाचलुचपत प्रतिबंधक विभागाच्या (एसीबी) पुणे विभागाकडून ही कारवाई करण्यात आली.
शिरीष रामचंद्र यादव आणि प्रतीक्षा शिरीष यादव अशी गुन्हा दाखल केलेल्या संशयितांची नावे आहेत. ‘एसीबी’चे पोलिस उपअधीक्षक दयानंद गावडे यांनी दिलेल्या माहितीनुसार, पुण्यातील झोपडपट्टी पुनर्वसन कार्यालयात उपमुख्य कार्यकारी अधिकारी शिरीष यादव कार्यरत होते. त्यांच्याकडे वैध उत्पन्नापेक्षा अधिक एक कोटी ३८ लाख ७४ हजार रुपये बेहिशोबी मालमत्ता आढळून आली होती.

लाचलुचपत प्रतिबंधक विभागाकडून या प्रकरणाची चौकशी सुरू होती. उत्पन्नात विसंगती आढळून आल्याने यादव यांना स्पष्टीकरण देण्यास सांगितले होते. परंतु संधी देऊनही त्यांनी स्पष्टीकरण दिले नाही. चौकशीदरम्यान, यादव यांनी भ्रष्ट मार्गाने बेहिशोबी मालमत्ता धारण केली. त्यासाठी पत्नी प्रतीक्षा यांनी प्रेरणा दिल्याचे निष्पन्न झाले. याबाबत ‘एसीबी’कडून बंडगार्डन पोलिस ठाण्यात तक्रार देण्यात आली.
त्यावरून शासनाची फसवणूक केल्याप्रकरणी पती-पत्नीविरुध्द भ्रष्टाचार प्रतिबंधात्मक कायद्यान्वये गुन्हा दाखल केला आहे. ‘एसीबी’चे पोलिस अधीक्षक शिरीष सरदेशपांडे आणि अतिरिक्त पोलिस अधीक्षक डॉ. शीतल जानवे यांच्या मार्गदर्शनाखाली ही कारवाई करण्यात आली. पुढील तपास पोलिस उपअधीक्षक अनिल कटके करीत आहेत.

पुणे:लॉरेन्स बिश्नोई टोळीने पुण्यातील एका प्रख्यात बड्या सराफाकडे 10 कोटी रुपयांची खंडणी मागितली आहे. खंडणी न दिल्यास त्यांना ठार मारण्याची धमकी ईमेलवरून देण्यात आली आहे. जर तुम्हाला बाबा सिद्दीकीप्रमाणे तुमचा जीव गमवायचा नसेल तर लॉरेन्स बिश्नोई टोळीला 10 कोटी रुपये द्या, असे धमकीच्या ईमेलमध्ये नमूद केले आहे.पैसे केव्हा आणि कसे द्यायचे याचा तपशील दुसऱ्या ईमेलवर पाठवला जाईल. याची माहिती पोलिसांना दिली गेली तर बरे होणार नाही, असे म्हटले आहे.

पोलीस सहआयुक्त रंजन कुमार म्हणाले, “आम्ही या प्रकरणाचा तपास करत आहोत. लॉरेन्स बिश्नोई टोळीच्या नावाने खंडणीची मागणी करणारा ईमेल आला आहे,

पुणे, दि. १९: सर्वोच्च न्यायालयाने स्थापन केलेल्या रस्ता सुरक्षा समितीचे अध्यक्ष सेवानिवृत्त न्यायमूर्ती अभय सप्रे यांनी विमाननगर येथील सिम्बायोसीस लॉ कॉलेज येथील विद्यार्थ्यांसोबत रस्ता सुरक्षेबाबत संवाद साधला.

यावेळी परिवहन आयुक्त विवेक भिमनवार, पुणे प्रादेशिक परिवहन अधिकारी अर्चना गायकवाड, उप प्रादेशिक परिवहन अधिकारी स्वप्नील भोसले सहायक प्रादेशिक परिवहन अधिकारी युवराज पाटील, सिम्बायोसीस लॉ कॉलेजच्या संचालक डॉ. शशिकला गुरपुर, उप संचालक अपराजिता मोहंती आदी उपस्थित होते.

सेवानिवृत्त न्यायमूर्ती श्री. सप्रे म्हणाले, रस्ते अपघातामध्ये दुचाकी अपघातामध्ये मृत्यूमुखी पडलेल्यांची संख्या मोठी असून या अपघाती मृत्यूचे प्रमाण कमी करण्याकरीता दुचाकीस्वारांनी हेल्मेटचा वापर करणे आवश्यक आहे. याकरिता महाविद्यालयातील सर्व विद्यार्थी, शिक्षक, कर्मचारी यांनी हेल्मेटचा वापर करून, इतर सर्व महाविद्यालयांसाठी आदर्श निर्माण करावा, असे आवाहन श्री. सप्रे यांनी केले.

राज्यामध्ये रस्ता सुरक्षा विषयक आवश्यक उपाययोजना केल्या जात असल्याचे नमूद करुन ते म्हणाले पुण्यामध्ये दुचाकीस्वार हेल्मेटचा वापर करीत नसल्याचे दिसून येते. ही परिस्थिती विद्यार्थ्यांनी बदलावी असे आवाहनही श्री. सप्रे यांनी केले. तसेच सिम्बायोसीस लॉ कॉलेज यांनी रस्ता सुरक्षेसंदर्भात महाविद्यालयामध्ये रस्ता सुरक्षा क्लब स्थापन करावा, अशी सूचना त्यांनी केली.

श्री. भिमनवार म्हणाले, रस्ता सुरक्षा हा महत्वाचा विषय असून याकरिता परिवहन विभागामार्फत वेगवेगळ्या उपाययोजना राबविण्यात येत असल्याबद्दल नमुद केले. राज्यामध्ये मागील दोन वर्षात रस्ते अपघातामध्ये मृत्युमुखी पडणाऱ्यांची संख्या कमी झाली असल्याचे नमूद केले. तसेच सिम्बायोसीस लॉ महाविद्यालयातील विद्यार्थ्यांनी हेल्मेटचा वापर करून रस्ता सुरक्षेसंदर्भात एक चांगले उदाहरण दाखवून द्यावे, असे आवाहन त्यांनी केले.

यावेळी अपर परिवहन आयुक्त जितेंद्र पाटील यांनी रस्ता सुरक्षेबाबत मार्गदर्शन केले.

कार्यक्रमाचे प्रास्ताविक श्रीमती मोहंती यांनी केले.
0000

न्यायमुर्ती श्री.अभय सप्रे यांच्या अध्यक्षतेखाली वाहन उत्पादक आणि वाहन वितरकांची बैठक संपन्न

वाहन वितरकांनी सीएसआर फंडामधून रस्ता सुरक्षेसंदर्भात उपाययोजना करावी-न्यायमूर्ती अभय सप्रे

पुणे,दि.१९:- वाहन उत्पादक कंपनी व वाहन वितरक यांनी केवळ व्यवसायीक दृष्टीकोन न ठेवता सामाजिक जबाबदारीचे भान ठेवून सीएसआर फंडातून रस्ता सुरक्षेसंदर्भात उपाययोजना करुन त्याची प्रभावीपणे अंमलबजावणी करावी असे प्रतिपादन सर्वोच्च न्यायालयाच्या रस्ता सुरक्षा समिती अध्यक्ष तथा सेवानिवृत्त न्यायमूर्ती श्री.अभय सप्रे यांनी केले.

विधान भवनातील झुंबर हॉल येथे मोटार वाहन उत्पादक कंपनी व वाहन वितरकांच्या बैठकीत ते बोलत होते. परिवहन आयुक्त विवेक भिमनवार, अपर परिवहन आयुक्त भरत कळसकर, प्रादेशिक परिवहन अधिकारी अर्चना गायकवाड यावेळी उपस्थित होते.

न्यायमूर्ती श्री.सप्रे म्हणाले, दुचाकीस्वारांनी हेल्मेटचा वापर करावा यासाठी याकरिता वाहन वितरकांनी ग्राहकांचे प्रबोधन करावे तसेच हेल्मेटचा वापर करण्यासाठी त्यांना प्रवृत्त करावे. कायद्यातील तरतूदीनुसार ग्राहकास दुचाकीसोबत मोफत हेल्मेट देणे बंधनकारक आहे. त्याचे पालन करणे आवश्यक आहे. वाहन उत्पादक कंपन्या व वाहन वितरक यांनी परिवहन विभाग तसेच पोलीस विभागासोबत ताळमेळ ठेवून रस्ता सुरक्षा संदर्भात वाहनधारकांना मार्गदर्शन करावे. वाहनचालकांना विशेषकरुन तरुणवर्गाला वाहतूक नियमांची माहिती होण्यासाठी ‘ट्रॅफीक पार्क’ सारखे उपक्रम राबवून त्यांच्यामधे रस्ता सुरक्षेसंदर्भात जागृती होईल याकरिता प्रयत्न करण्याचे न्यायमूर्ती श्री.सप्रे यांनी आवाहन केले.

वाहनाचा वीमा न काढताच वाहनचालक रस्त्यावर वाहने चालवतात ही अतिशय गंभीर बाब आहे. अशा वाहनचालकांवर कायद्याच्या चौकटीत तातडीने दंडनीय कारवाई करावी असे सांगून पाच वर्षासांठी त्रयस्थ पक्ष विमा वाहनचालकांनी काढावा यासाठी वाहन उत्पादकांनी विमा कंपन्यांकडे पाठपुरावा करावा, यामुळे अपघातग्रस्तांना आर्थिक मदत होईल असे न्यायमूर्ती श्री.सप्रे यांनी सांगितले केले.

परिवहन आयुक्त श्री.भिमनवार यांनी, मागील मागील दोन वर्षामध्ये वाहन उत्पादक कंपन्यांनी सीएसआर फंडातून रस्ता सुरक्षे संदर्भात उपाययोजना करण्यासंबंधी पुढाकार घेतला नसल्याचे सांगून नाराजी व्यक्त केली.
वाहन उत्पादक कंपन्यांनी एखाद्या विशिष्ट भागावरती लक्ष केंद्रित करून रस्ते सुरक्षे संदर्भात कार्य करावे, रस्ता सुरक्षा संदर्भात परिवहन विभागाकडे वेगवेगळ्या संकल्पना असून त्यांची प्रत्यक्ष अंमलबजावणी करण्याकरिता सीएसआर फंडातून खर्च करण्याकरिता कंपन्यांनी पुढाकार घ्यावा अशी सूचना केली. वाहन धारककांनी हेल्मेट, सीटबेल्ट वापरणेबाबत तसेच रस्ता सुरक्षा नियमांचे पालन करण्याबाबत वाहन उत्पादक कंपन्यांनी जनजागृती करावी असे आवाहन केले. बैठकीकरिता उपस्थित वाहन उत्पादक कंपन्यांचे प्रतिनिधी व वाहन वितरक यांनी सीएसआर फंडातून रस्ता सुरक्षेसंदर्भात कामकाज करण्यासाठी सहकार्य करण्याचे आश्वासन दिले.

बैठकीस वाहन उत्पादक कंपनी व वाहन वितरक यांचे प्रतिनिधी, प्रादेशिक परिवहन अधिकारी पुणे, पिंपरी चिंचवड तसेच परिवहन विभागातील इतर अधिकारी उपस्थित होते.
०००