राष्ट्रवादीकडून निवडणूक प्रचाराचा शुभारंभ;प्रदेशाध्यक्ष खासदार सुनिल तटकरे यांची माहिती…

मुंबई दि. २६ ऑक्टोबर – राष्ट्रवादी काँग्रेसचे राष्ट्रीय अध्यक्ष आणि उपमुख्यमंत्री अजित पवार यांच्या हस्ते एलईडी व्हॅनला राष्ट्रवादीचा झेंडा दाखवून विधानसभा निवडणुकीच्या प्रचाराची सुरुवात केल्याची माहिती राष्ट्रवादी काँग्रेसचे प्रदेशाध्यक्ष खासदार सुनिल तटकरे यांनी माध्यमांना दिली.

ज्या – ज्या विधानसभेत राष्ट्रवादी काँग्रेसचे उमेदवार लढणार आहेत त्या प्रचाराच्या मोहिमेची सुरुवात आज प्रदेश कार्यालयातून करण्यात आली.

या एलईडी व्हॅनच्या माध्यमातून महायुती सरकारने केलेल्या लोककल्याणकारी योजना… लाडकी बहीण योजनेच्या माध्यमातून अडीच कोटी महिलांना दिलेला लाभ… शेतकऱ्यांना शेतीसाठी दिलेली वीज माफी… मोफत तीन गॅस सिलेंडरची योजना… मुलींच्या शिक्षणाचा शंभर टक्के खर्च उचलण्याचा क्रांतीकारी निर्णय… अशा अनेक योजनांच्या माध्यमातून जनतेपर्यंत… मतदारापर्यंत पोचवण्याचा आमचा सर्वांचा प्रयत्न आहे असेही सुनिल तटकरे यांनी स्पष्ट केले.

यावेळी राष्ट्रवादी काँग्रेसचे राष्ट्रीय अध्यक्ष आणि उपमुख्यमंत्री अजित पवार, प्रदेशाध्यक्ष खासदार सुनिल तटकरे, पक्षाचे कोषाध्यक्ष आमदार शिवाजीराव गर्जे, प्रदेश उपाध्यक्ष प्रमोद हिंदूराव, प्रदेश प्रवक्ते संजय तटकरे, मुंबई बँकेचे उपाध्यक्ष सिध्दार्थ कांबळे, प्रदेश सरचिटणीस संतोष धुवाळी, प्रदेश सरचिटणीस लतिफ तांबोळी, दक्षिण मुंबई जिल्हाध्यक्ष महेंद्र पानसरे, विद्यार्थी प्रदेशाध्यक्ष प्रशांत कदम, आदींसह पक्षाचे पदाधिकारी व कार्यकर्ते मोठया संख्येने उपस्थित होते.

पुणे, दि. 26 : भारत निवडणूक आयोगाच्या मार्गदर्शक सूचनांप्रमाणे निवडणूकीच्या प्रत्येक टप्प्याचे कामकाज काटेकोरपणे पार पाडण्यासाठी निवडणूक कामकाजासाठी नियुक्त अधिकारी कर्मचाऱ्यांनी आपसात समन्वय ठेवून जबाबदारीने आपले कर्तव्य चोख बजवावे, असे निर्देश आंबेगाव विधानसभा मतदारसंघांचे निवडणूक निर्णय अधिकारी गोविंद शिंदे यांनी दिले.

आंबेगाव विधानसभा मतदारसंघाच्या निवडणूक कामकाजासाठी नियुक्त अधिकारी कर्मचाऱ्यांचे पहिले प्रशिक्षण अवसरी येथील शांता शेळके सभागृहात पार पडले. यावेळी मार्गदर्शन करतांना श्री. शिंदे बोलत होते. या प्रशिक्षणास सहाय्यक निवडणूक निर्णय अधिकारी प्रमिला वाळुंज , निवडणूक नायब तहसीलदार डॉ. सचिन वाघ आदी उपस्थित होते.

निवडणूक प्रक्रिया सुरळीतपणे पार पाडण्यासाठी नियुक्त अधिकारी कर्मचाऱ्यांनी भारत निवडणूक आयोगाच्या मार्गदर्शक सूचनांचे काटेकोरपणे पालन करणे आवश्यक असून संपूर्ण मतदान प्रक्रिया व्यवस्थितपणे समजावून घेवून त्याप्रमाणे समन्वयाने प्रत्यक्ष कामकाज पार पाडावे, असे श्री. शिंदे यांनी यावेळी सांगितले.

आंबेगाव विधानसभा निवडणुकीसाठी एकूण 2 हजार 475 मतदान अधिकारी, कर्मचाऱ्यांची नेमणूक करण्यात आली आहे. त्या पैकी 1235 अधिकारी, कर्मचाऱ्यांना पहिल्या टप्प्यात प्रशिक्षण देण्यात आले. मतदानाच्या आदल्या दिवशी नियमानुसार मतदान केंद्र तयार करून घेणे, उमेदवार अथवा त्यांच्या प्रतिनिधींसमोर प्रत्यक्ष मतदानाच्या दिवशी मॉक पोल घेणे, प्रत्यक्ष मतदान प्रक्रिया विहित वेळेत सूरू करणे यासाठी आवश्यक प्रशिक्षण या सत्रात देण्यात आले.

मतदान केंद्र प्रमुख, मतदान अधिकारी, क्षेत्रिय अधिकारी यांचे कामकाज आणि जबाबदाऱ्या यावेळी सांगण्यात आल्या. मतदान केंद्रावर मोबाईल वापरण्यास परवानगी बाबतचे नियम, निवडणूक अनुषंगाने कायदेशीर तरतुदीसाठी महत्वाचे अधिनियम, विधानसभा निवडणूक 2024 मधील महत्वाचे बदल, मतदाना दरम्यान भरावयाचे विविध नमुने यांचे विवरण भरणे आदी विविध मुद्यांवर प्रशिक्षणामध्ये सविस्तर माहिती देण्यात आली.

यानंतर मतदान अधिकारी कर्मचाऱ्यांना ईव्हीएम व व्हीव्हीपॅट हाताळणीचे प्रशिक्षण देण्यात आले. मतदान अधिकारी व् कर्मचाऱ्यांचे दुसरे प्रशिक्षण 9 व 10 नोव्हेंबर 2024 रोजी होईल, असे श्री गोविंद शिंदे यांनी यावेळी सांगितले.

वंचित विकास अभयाच्या वतीने ‘आपली दिवाळी स्वदेशी दिवाळी’ प्रदर्शन; रविवारी शेवटचा दिवस
पुणे : वंचित विकास अभयाच्या वतीने ‘आपली दिवाळी, स्वदेशी दिवाळी’ हे छोट्या व्यावसायिकांचे प्रदर्शन नवी पेठेतील एस. एम. जोशी सोशलिस्ट फाउंडेशन येथे भरलेले आहे. शुक्रवारी (दि. २५) या प्रदर्शनाचे उद्घाटन उद्योजिका अनघा चाफळकर यांच्या हस्ते झाले. प्रसंगी वंचित विकासच्या संचालिका सुनीता जोगळेकर, देवयानी गोंगले, मीनाक्षी नवले, चैत्राली वाघ, ‘निर्मळ रानवारा’च्या संपादक ज्योती जोशी, सल्लागार व पत्रकार श्रीराम ओक आदी उपस्थित होते. ‘निर्मळ रानवारा’च्या दिवाळी अंकाचे प्रकाशन यावेळी झाले.

गेल्या चाळीस वर्षांपासून वंचित विकास स्त्रिया आणि मुलांसाठी काम करत आहे. छोट्या व्यावसायिकांचे प्रशिक्षण घेऊन त्यांच्या उत्पादनांच्या विक्रीसाठी व्यासपीठ उपलब्ध करुन देते. यंदा प्रदर्शनात खास महिलांसाठी होम मिनिस्टर, मुलांसाठी गंमत जत्रा भरवण्यात आली. दिवाळीच्या वस्तू, फराळ, इमिटेशन ज्वेलरी, खाद्यपदार्थ, गिफ्ट आर्टिकल्स, कपडे, मुलांसाठी विज्ञान खेळणी, तसेच उत्तम प्रतीचा सुकामेवा निम्म्या किमतीत उपलब्ध असेल. उद्या रविवारी (दि. २७) सायंकाळी ८ वाजेपर्यंत हे प्रदर्शन सर्वांसाठी विनामूल्य खुले आहे.

अनघा चाफळकर म्हणाल्या, “प्रदर्शनात सहभागी महिलांनी स्वतःमधील क्षमता ओळखून एक पाऊल पुढे टाकले आहे. आपला स्वतःचा उद्योग सुरु करून स्वतःच्या पायावर उभे राहण्याचे केलेले धाडस कौतुकास्पद आहे. जगताना, व्यवसाय वाढवताना येणाऱ्या समस्यांवर मात करत मागे न हटता सक्षम व्हावे. त्यातून तुम्हाला आत्मविश्वास मिळत जातो, जो भविष्यातील वाटचालीत उपयोगी पडतो.”
येणाऱ्या निवडणुकीत प्रत्येकाने मतदान करावे, यासाठी जागृती अभियान करणारा स्टॉल प्रदर्शनात सर्वांचे लक्ष वेधून घेत होता. त्याचबरोबर एकल महिलांच्या सन्मानासाठी अभया संबोधावे, असा शासन आदेश येण्यासाठी सही अभियानही यावेळी राबवण्यात आले. जुने कपडे, वस्तू, ई-कचरा या प्रदर्शनात संकलित करण्यात येत आहे.

पुणे, –
आगामी विधानसभा निवडणुकीच्या पार्श्वभूमीवर भारतीय जनता पक्षाने जय्यत तयारी केली असून विविध गाेष्टींचे सूक्ष्म नियाेजन करण्यात येत आहे. राज्यातील विविध विभागात भाजपकडून मध्यवर्ती मिडिया सेंटरची उभारणी करण्यात येत असून पश्चिम महाराष्ट्रासाठी पुण्यातील बाजीराव रस्ता येथील भारत भवन याठिकाणी विस्तारित अशा मध्यवर्ती मिडिया सेंटरचे उदघाटन परराष्ट्रमंत्री जय शंकर, केंद्रीय राज्यमंत्री मुरलीधर माेहाेळ यांच्या उपस्थिीतीत शनिवारी करण्यात आले.
यावेळी प्रदेश सरचिटणीस राजेश पांडे, मुख्य प्रदेश प्रवक्ते केशव उपाध्ये, राष्ट्रीय माध्यम प्रमुख के.के.उपाध्याय, शहराध्यक्ष धीरज घाटे, संदीप खर्डेकर, अमाेल कविटकर, हेमंत लेले, पुष्कर तुळजापूरकर उपस्थित हाेते.
यावेळी केशव उपाध्ये म्हणाले, संबंधित मिडिया सेंटर हे पत्रकारांसाठी पत्रकारांनी निर्माण केलेले केंद्र आहे. पत्रकारांची निवडणुक काळात खूप धावपळ हाेत असते. वेगवेगळे काेट घेणे, मुलाखती घेणे, प्रेसनाेट करणे , विविध कार्यक्रम उपस्थित राहणे यामुळे पत्रकारांना एकाच ठिकाणी नेत्यांच्या प्रतीक्रिया घेणे, पत्रकार परिषदा, मुलाखत, स्टुडिओ उपलब्धता, वन टु वन, अनाैपचारिक गप्पा या सर्व गाेष्ट एकाच ठिकाणी ही यामागील कल्पना आहे. निवडणुक हाेईपर्यंत सर्व पत्रकार परिषद व मुलाखती मिडिया सेंटर मध्ये हाेईल. माध्यम केंद्रात पत्रकारांचे साेईसाठी वायफाय, लाईव्ह फुटेज, संगणक उपलब्धता याठिकाणी करण्यात आली आहे. पत्रकारांसाठी हे मिडिया सेंटर असून त्याचा वापर त्यांनी करावा. राज्यातील प्रत्येक विभागात अशाप्रकारे मिडिया सेंटर निर्माण करण्यात येत आहे. पत्रकारांचे अनाैपचारिक गप्पांचे ठिकाण येथे आगामी काळात सुरु राहील.

पिंपरी चिंचवड विद्यापीठात ‘आयडियाथॉन’ स्पर्धेस उत्स्फूर्त प्रतिसाद

पिंपरी, पुणे (दि. २६ ऑक्टोबर २०२४) – विद्यार्थ्यांनी आपल्या शिक्षणाचा उपयोग वास्तविक जगातील समस्यांचा विचार करून नवनिर्मिती केली तर सामाजिक समस्यांचे निराकरण करणे शक्य होईल.
‘समाज विकासासाठी समाज’ या मूलमंत्रावर लक्ष केंद्रित करून विद्यार्थ्यांनी सर्वोत्तम योगदान दिले पाहिजे, असे प्रतिपादन पीसीयुच्या प्रभारी कुलगुरू डॉ. मणीमाला पुरी यांनी केले.
पिंपरी चिंचवड एज्युकेशन ट्रस्ट संचलित (पीसीईटी) पिंपरी चिंचवड विद्यापीठाच्या वतीने (पीसीयु) विद्यार्थ्यांच्या नाविन्यपूर्ण कल्पना, विचारांना चालना देण्यासाठी ‘आयडियाथॉन – २४’ स्पर्धेचे आयोजन करण्यात आले होते. पीसीईटी शैक्षणिक समूहातील शाळांमधील दीडशे विद्यार्थी या स्पर्धेत सहभागी झाले होते. पीसीयुच्या ‘नाविन्यपूर्ण संशोधन आणि विकास’ विभागाच्या वतीने या स्पर्धेचे आयोजन करण्यात आले होते. यावेळी प्र कुलगुरू डॉ. सुदीप थेपडे, डॉ. सागर पांडे, डॉ. नीरू मलिक, अंकुश दहत, तुषार महोरे आदी उपस्थित होते.
विद्यार्थ्यांच्या नियमित अभ्यासक्रमा बरोबरच विचारांना, कल्पना, कौशल्यांना, संशोधनाला चालना मिळाली पाहिजे; या उद्देशाने पीसीयुने विद्यार्थ्यांसाठी व्यासपीठ उपलब्ध करून दिले आहे. यामाध्यमातून देशाला सुजाण नागरिक, उत्तम संशोधक मिळतील असा विश्वास डॉ. सुदीप थेपडे यांनी व्यक्त केला.
डॉ. अपर्णा पांडे, प्रा. डॉ. रचना पाटील हे स्पर्धेचे परीक्षण केले. या स्पर्धेत ३१ सहभागी संघांमधून तीन संघ विजयी झाले.
पीसीईटीचे अध्यक्ष ज्ञानेश्वर लांडगे, उपाध्यक्षा पद्माताई भोसले, सचिव विठ्ठल काळभोर, खजिनदार शांताराम गराडे, विश्वस्त तथा पीसीयुचे कुलपती हर्षवर्धन पाटील, उद्योजक नरेंद्र लांडगे, अजिंक्य काळभोर, कार्यकारी संचालक डॉ. गिरीश देसाई यांनी सहभागी संघांना शुभेच्छा दिल्या.

पुणे, दि. २६: सार्वत्रिक विधानसभा निवडणूक २०२४ च्या अनुषंगाने २११ खडकवासला विधानसभा मतदार संघामध्ये महिला मतदान केंद्र, युथ मतदान केंद्र, अपंग मतदान केंद्र, युनिक मतदान केंद्र, मॉडेल मतदान केंद्र अशी विविध मतदान केंद्रे निश्चित करण्यात आली असल्याची माहिती निवडणूक निर्णय अधिकारी डॉ. यशवंत माने यांनी दिली.

भारत निवडणूक आयोगाच्या मार्गदर्शक सूचनांप्रमाणे खडकवासला विधानसभा मतदारसंघात विविध घटकांवर आधारीत मतदान केंद्रे उभारण्यात येणार आहेत. त्यानुसार या मतदारसंघातील विविध ठिकाणची मतदान केंद्रे निश्चित करण्यात आली आहेत. यामध्ये वडगाव बुद्रुक येथील मतदान केंद्र क्रमांक ३११ शिवसागर सोसायटी क्लब हाऊस येथे महिला मतदान केंद्र, नांदेड सीटी येथील नांदेड सीटी पब्लिक स्कूल येथील मतदान केंद्र क्रमांक ४०७ येथे अपंग मतदान केंद्र तर बहुली येथील जिल्हा परिषद प्राथमिक शाळा येथील मतदान केंद्र क्रमांक ३ येथे युथ मतदान केंद्र उभारण्यात येईल.

डोणजे गाव येथील जिल्हा परिषद प्राथमिक शाळेतील मतदान केंद्र क्रमांक ३८४ येथे युनिक मतदान केंद्र, कोंढवे धावडे येथील जिल्हा परिषद प्राथमिक शाळेतील मतदान केंद्र क्रमांक ८ येथे परदानशीन मतदान केंद्र तर वडगाव बुद्रुक येथील मतदान केंद्र क्रमांक ३१३ सनसिटी कम्युनिटी हॉल येथे मॉडेल मतदान केंद्र उभारण्यात येणार आहे.

खडकवासला विधानसभा मतदारसंघात संवेदनशील किंवा दुर्गम ठिकाणी मतदान केंद्रे नसून ४८३ मतदान केंद्रांवर वेब कास्टिंग करण्यात येणार असल्याची माहिती निवडणूक निर्णय अधिकारी डॉ. माने यांनी दिली.

पुणे दि.२६: दिवाळी म्हटलं की नवीन कपडे, दागिने, फराळ, मिठाई असे चित्र प्रत्येकाच्या डोळ्यासमोर उभे राहते. सामन्यता मुलांना त्यांचे आई-वडील बाजारात नेऊन ही खरेदी करून देतात पण ज्या अभागी मुलांच्या नशिबात हे भाग्य नाही अशा अनाथ मुलींनी दिवाळीच्या सणानिमित्ताने तुळशीबागेत महाराष्ट्र विधानपरिषद उपसभापती तथा शिवसेना नेत्या डॉ. नीलम गोऱ्हे यांच्यासोबत मनसोक्त खरेदी करत दिवाळी साजरी केली. याप्रसंगी डॉ. गोऱ्हे यांनी सर्व मुलींना चॉकलेट्स, बिस्कीट आणि मिठाई भेट म्हणून दिली.

तुळशीबाग गणपती मंडळ यांच्यातर्फे दिवाळी निमित्त मुळशी येथील सूर्योदय फाउंडेशन मधील अनाथ मुलींसाठी तुळशीबाग येथे दिवाळी खरेदी च्या उपक्रमाचे आयोजन विधानपरिषद उपसभापती डॉ. नीलमताई गोऱ्हे यांच्या उपस्थितीत आज करण्यात आले. याप्रसंगी श्री तुळशीबाग गणपती मंडळाचे अध्यक्ष विकास पवार उपाध्यक्ष विनायक कदम, कोषाध्यक्ष नितीन पंडित, डॉ. शैलेश गुजर, किरण चव्हाण, जितेंद्र आंबासनकर, प्रदीप इंगळे, श्रीमती अभिनेत्री वाळके, सुनंदा इपते, लक्ष्मी भावसार, सोनी पवार, सूर्योदय फाउंडेशन च्या रोहिणी दीक्षित उपस्थित होते.

हा स्तुत्य उपक्रम या दीपोत्सवाचा निरामय आनंदापासून वंचित असलेल्या या मुलानं मायेची उब देणारा ठरेल असा विश्वास डॉ नीलम गोऱ्हे यांनी यावेळी व्यक्त केला. डॉ. नीलम गोऱ्हे पुढे म्हणाल्या की या मुलींनी शिकून मोठं व्हावं, त्यांच्या आवडीच्या क्षेत्रामध्ये त्यांचं करियर घडवावं. तसेच तुळशीबाग व्यापारी असोसिएशन आणि मंडळाचे अभिनंदन करुन अत्यंत प्रामाणिकपणे या सर्व मुलींचे आदरातिथ्य केल्याबद्दल हार्दिक आभार मानले.

दिवाळीनिमित्त या मुलींच्या चेहऱ्यावर खुललेला आनंद मलाही आनंदित करतो. आपण सर्व या मुलींच्या घरातील सदस्य असल्यासारखे कायम त्यांच्या सोबत राहुया अशा हृद्य भावना डॉ गोऱ्हे यांनी या प्रसंगी व्यक्त केल्या. तसेच, मंडळाचे कार्य ही नेहमीच देदीप्यमान असे राहिले आहे. विविध सामाजिक व आगळेवेगळे उपक्रम राबविण्यात मंडळ कायम पुढाकार घेत असते. भविष्यातही असेच कार्य मंडळाकडून सदैव घडत राहो अशा शुभेच्छा डॉ. गोऱ्हे यांनी तुळशीबाग गणपती मंडळाला रौप्य महोत्सवी वर्षानिमित्त दिल्या. मंडळाच्या पहिल्या महिला ट्रस्टी म्हणून अभिनेत्री वाळके यांची नियुक्ती केली त्याबद्दल त्यांनी मंडळाचे अभिनंदन केले.