पुणे : पुण्यातील हडपसर परिसरात कॉपीराईट कायद्याचा भंग करुन मीठाची विक्री करणार्‍या एका दुकानदारावर पोलिसांनी गुन्हा दाखल केला आहे. ही कारवाई हडपसर येथील विठ्ठल मंदिराशेजारील बालाजी ट्रेडर्स या दुकानात रविवारी दुपारी साडेबारा वाजण्याच्या सुमारास करण्यात आली.

याबाबत साजीद असगरअली अन्सारी (वय ३४, रा. स्पाईन रोड, भोसरी) यांनी हडपसर पोलीस ठाण्यात फिर्याद दिली आहे. त्यानुसार पोलिसांनी हिराराम गंगाराम चौधरी (वय २६, रा. सोलापूर रोड, हडपसर) आणि नरेंद्रसिंग याच्यावर गुन्हा दाखल केला आहे.पोलिसांनी दिलेल्या माहितीनुसार, फिर्यादी साजीद अन्सारी यांना हडपसरमध्ये टाटा नमकच्या नावाने दुसरे मीठ विकले जात असल्याची माहिती मिळाली होती. त्यानुसार फिर्यादींनी पाहणी केली असता बालाजी ट्रेडर्स या दुकानातून भेसळयुक्त टाटा मिठाची विक्री केली जात असल्याचे दिसून आले. त्यानंतर त्यांनी हडपसर पोलीस ठाण्यात याबाबत तक्रार दिली होती.

त्यानुसार पोलिसांनी बालाजी ट्रेडर्स या दुकानावर छापा टाकला. त्यावेळी पोलिसांना २० पोत्यांमध्ये टाटा नमक (मीठ) चे ६०० एक किलोच्या पुड्या आढळून आल्या. पोत्यामधील मिठाचे पाकिटावरील कव्हर व त्याचे अक्षराचे फॉन्ट पूर्णपणे वेगळे दिसून आले. तसेच त्याच्यावर बॅच नंबर देखील नव्हते.

ही सर्व पाकिटे पूर्णपणे कॉपीराईटचा भंग करुन बनविल्याचे आढळून आले. त्याची विक्री करुन कॉपीराईटचे हक्काचे उल्लंघन करीत असताना दुकानदार मिळून आला. याबाबत हिरामराम चौधरीकडे चौकशी केल्यावर त्याने नरेंद्रसिंग याच्याकडून ही पाकिटे घेतल्याचे सांगितले. या घटनेचा पुढील तपास सहायक पोलीस निरीक्षक सुशिल लोणकर करत आहेत.

पुणे-कसबा हा कुणाचाच गड नाही तर कसबा हा केवळ जनतेचा गड आहे. यंदाही कसबा आम्हीच जिंकणार असा विश्वास महाविकास आघाडी, इंडिया फ्रंट व मित्र पक्षांचे कॉंग्रेस पक्षाचे उमेदवार रवींद्र धंगेकर यांनी व्यक्त केला. माझ्या विरोधात भाजप संपूर्ण ताकद वापरत आहेत पण जनता माझ्या बाजूने असल्याने विजय माझा निश्चित आहे, असे त्यांनी सांगितले. विरोधक अपप्रचाराची खेळी करण्याचा प्रयत्न करत आहे, मात्र जनता त्यांचा डाव हाणून पाडणार असेही यावेळी त्यांनी नमूद केले. श्री कसबा गणपतीचे  आशीर्वाद घेतल्यानंतर ते माध्यमांशी बोलत होते.

उमेदवारी अर्ज भरण्यापूर्वी महाविकास आघाडी, इंडिया फ्रंट व मित्र पक्षांचे कॉंग्रेस पक्षाचे उमेदवार आमदार रविंद्र धंगेकर यांनी पत्नीसह मानाचा पहिला कसबा गणपतीची आरती करून गणरायाचा आशीर्वाद घेत आपल्या उमेदवारीचा अर्ज सोमवारी श्री गणेश कला क्रीडा रंगमंच येथे दाखल केला.

श्री कसबा गणपतीची आरती करून व आशीर्वाद घेऊन उमेदवारी अर्ज दाखल करण्यासाठी रॅली काढण्यात आली. लाल महालातील राष्ट्रमाता जिजाऊ माँसाहेब व छत्रपती शिवाजी महाराज यांच्या पुतळ्याला पुष्पहार अर्पण करून आशीर्वाद घेतला. यावेळी काढलेल्या रॅलीत नागरिक, कार्यकर्ते व महिलांचा अभूतपूर्व प्रतिसाद मिळाला. तरुणाई बरोबरच महिला व ज्येष्ठांनी रॅलीत सहभाग घेतला. रवींद्र धंगेकर यांचा विजय असो, असा जयघोष करण्यात आला.  

काँग्रेस पक्षाचे शहराध्यक्ष अरविंद शिंदे, महाराष्ट्र प्रदेशचे उपाध्यक्ष मोहन जोशी, प्रदेश सरचिटणीस संजय बालगुडे, काँग्रेसचे ज्येष्ठ नेते रोहित टिळक, राष्ट्रवादी काँग्रेस शरदचंद्र पवार पक्षाच्या माजी खासदार वंदना चव्हाण, महाराष्ट्र प्रदेश प्रवक्ते अंकुश काकडे, रवींद्र माळवदकर, अण्णा थोरात, शिवसेना उद्धव बाळासाहेब ठाकरे पक्षाचे पुणे शहर प्रमुख संजय मोरे आदि प्रमुख नेते सहभागी झाले होते. या बरोबरच कसबा ब्लॉक अध्यक्ष अक्षय माने, नेहरू स्टेडियम ब्लॉक अध्यक्ष हेमंत राजभोज, भाग 16चे अध्यक्ष मयूर भोकरे, भाग 15चे अध्यक्ष महेश हराळे, शिवराज भोकरे, गणेश शेडगे, कसबा महिला ब्लॉक अध्यक्ष गीता तारू, सोना ओव्हाळ, युवक काँग्रेसचे पुणे शहराध्यक्ष सौरभ अमराळे, संदीप अतपालकर, साहिल राऊत, राष्ट्रवादी काँग्रेस शरदचंद्र पवार पक्षाचे कसबा मतदार संघाचे अध्यक्ष गणेश नलावडे, दीपक जगताप, अजिंक्य पालकर, भाई कात्रे, संजय गायकवाड, बाळासाहेब ढमाले, सारिका पारेख, निलेश मोरे, दीपक पोकळे, शिवसेना उद्धव बाळासाहेब ठाकरे पक्षाचे कसबा विभाग प्रमुख चंदन साळुंखे, जावेद खान, राजेंद्र शिंदे, रुपेश पवार, संदीप गायकवाड, उमेश गालींदे, हनुमंत दगडे, बाळासाहेब गरूड, अरविंद दाभोळकर, गौरव सिन्नरकर, निलेश पवार, पारेख खांडके, निकिता मारडकर, स्वाती कथलकर आदि प्रमुख पदाधिकारी कार्यकर्ते मोठ्या संख्येने सहभागी झाले होते.

ढोल ताशांचा गजर, फटाक्यांची आतषबाजी, ठिकठिकाणी होणारी पुष्पवृष्टी, रवींद्र धंगेकर यांचे  महिलांकडून होणारे औक्षण व रवींद्र धंगेकर यांचा विजय असो अशा घोषणा देत नागरिकांनी मोठा प्रतिसाद धंगेकर यांना दिला.

कसब्याच्या नागरिकांच्या मनातला आमदार, सर्वसामान्यांचा चेहरा, 24 तास जनसेवेसाठी उपलब्ध असणाऱ्या रवींद्र धंगेकर यांच्या घोषणांनी सारा परिसर दुमदुमून गेला होता.

श्रीमंत  दगडूशेठ गणपतीचे दर्शन घेत गणरायाची आरती करून धंगेकर यांनी आशीर्वाद घेतले. यावेळी ट्रस्टच्या पदाधिकाऱ्यांनी त्यांना शाल श्रीफळ देऊन सन्मान केला.

छत्रपती शिवाजी मार्गाने पुढे जात असताना चौकात चौकातील गणेश मंडळांकडून धंगेकर यांचे स्वागत करण्यात येत होते. कार्यकर्त्यांना पाणी शरबत नागरिक देत होते. तिन्ही पक्षाचे झेंडे कार्यकर्ते हाती घेऊन धंगेकर यांच्या विजयाच्या घोषणा देत होते. रवींद्र धंगेकर विक्रमी मताधिक्याने निवडून येतील हे आजच्या रॅलीला मिळालेल्या प्रतिसादामुळे सिद्ध झाले आहे, असा विश्वास नागरिकांनी व्यक्त केला.

पुणे, दि. २८ : लाचलुचपत प्रतिबंधक पुणे विभागाच्यावतीने इंदापूर तालुक्यातील भिगवण व हवेली तालुक्यातील उरूळी कांचन येथे लाचलुचपत प्रतिबंधक जनजागृती मेळावा लाचलुचपत प्रतिबंधक विभागाचे पोलीस अधीक्षक शिरीष सरदेशपांडे यांच्या मार्गदर्शनाखाली पार पडला.

जिल्ह्यातील सर्व तालुक्यात लाचलुचपत प्रतिबंधक जनजागृती मेळाव्याचे आयोजन करण्यात येत आहे. भिगवण व उरुळी कांचन येथील आयोजित मेळाव्यात लाचलुचपत प्रतिबंधक विभागाचे पोलीस निरीक्षक प्रवीण निंबाळकर यांच्यासह अधिकारी, कर्मचारी उपस्थित होते.

श्री. निंबाळकर लाच लुचपत प्रतिबंधक विभागाची रचना व कार्यपद्धती विषयी माहिती देऊन म्हणाले, अशा प्रकारच्या मेळाव्यामुळे लाचलुचपत प्रतिबंधक विभाग व नागरिकांमधील दरी कमी होण्यास मदत होणार आहे. नागरिकांना भ्रष्टाचाराच्या विरोधात लाच-लुचपत प्रतिबंधक विभागात तक्रार करता येते. याशिवाय लाचेची मागणी करणाऱ्या लोकसेवकांविरुद्धही लाचलुचपत प्रतिबंधक विभागाकडे तक्रार करावी.

लाचलुचपत प्रतिबंधक विभागाकडे तक्रार दाखल करणाऱ्या तक्रारदारांचे नाव गोपनीय ठेवण्यात येईल, तसेच त्या प्रकरणाच्या अनुषंगाने संपूर्ण न्यायालयीन प्रक्रिया पूर्ण होईपर्यंत मार्गदर्शन व सहकार्य करण्यात येईल. लोकसेवकाने कामे करण्याकरिता नागरिकांकडे लाचेची मागणी केल्यास लाचलुचपत प्रतिबंधक विभागाच्या टोल फ्री क्रमांक १०६४ किंवा पुणे कार्यालयाच्या ०२०-२६१३२८०२, २६१२२१३४, तसेच ७८७५३३३३३३ या व्हॉटस्अप क्रमांकावर तक्रार करावी, असे आवाहनही श्री. निबांळकर यांनी यावेळी केले.

यावेळी नागरिकांमध्ये विभागाविषयी असलेले गैरसमज, शंकाचे निराकरण करण्यात आले. मेळाव्यात उरुळी कांचन परिसरातील सार्वजनिक गर्दीची ठिकाणे, मंडल अधिकारी, तलाठी कार्यालय, ग्रामपंचायत कार्यालय, उरुळी कांचन पोलीस ठाणे तसेच भिगवण येथील ग्रामीण शासकीय रुग्णालय, भिगवण बस स्थानक, तलाठी व मंडल अधिकारी कार्यालय, भिगवण पोलीस ठाणे आदी शासकीय ठिकाणी तसेच बाजारपेठामध्ये जनजागृतीच्या अनुषंगाने हस्तपत्रिका, भिंतीपत्रके व व्हिजिटिंग कार्ड्स वितरीत करण्यात आले.

   विश्व हिंदू परिषद पुणे महानगराच्या वतीने  आयोजित ‘संत संगम ‘ कार्यक्रम
पुणे : हिंदू धर्म हा सर्व समभाव मानणारा आहे, कोणालाही कमी लेखणारा, भेदभाव करणारा नाही, मात्र आपणच किती वेळा दगा सहन करायचा? आजच्या परिस्थितीत हिंदू समाजाला एकत्र आणणे महत्वाचे आहे, आपण सर्वांशी प्रेमाने वागले पाहिजे हे मान्य आहे, मात्र त्यासाठी आपण शिल्लक राहिजे पाहिजे. यासाठी कोणत्याही राजकीय पक्षाचा विचार न करता आपल्या हिंदू धर्माचे रक्षण करणाऱ्या उमेदवारांना आगामी विधानसभा निवडणूकीत मतदान करा, असे आवाहन श्रीराम जन्मभूमी तीर्थक्षेत्र न्यास अयोध्याचे कोषाध्यक्ष प.पू. स्वामी गोविंददेव गिरीजी महाराज यांनी  केले. 

विश्व हिंदू परिषद पुणे महानगराच्या वतीने स. प . महाविद्यालयाच्या लेडी रमाबाई हॉल मध्ये आयोजित ‘संत संगम ‘ कार्यक्रमाच्या अध्यक्षस्थाना वरून स्वामी गोविंददेव गिरीजी महाराज बोलत होते. यावेळी भंते हर्षवर्धन शाक्य, ज्ञानी अमरजीत सिंह, ह.भ.प.चिदंबरेश्वर साखरे महाराज, १००८ किन्नर आखाडा महामंडलेश्वर दीपाजी नंदगिरी जगावली माताजी, श्री महानुभव पंथाचे रविराज दादा पंजाबी, सिंधी संप्रदायाचे संत अनंत प्रकाशजी, वाल्मिकी संप्रदायाचे कैलासनाथ व भगवान महाराज,ह.भ.प फुरसुंगीकर व ह.भ.प पळसे महाराज या धर्मगुरूंसह विहिंप महाराष्ट्र व गोवा धार्मिक विभाग संजय मुद्राळे, पश्चिम महाराष्ट्र प्रांत मंत्री किशोर चव्हाण, प्रांत धर्माचार्य सह प्रमुख नागनाथ  बोंगरगे, धर्माचार्य संपर्क प.म.प्रांत सदस्य समीर पायगुडे, पूर्व पुणे विभाग मंत्री धनंजय गायकवाड, पश्चिम पुणे विभाग मंत्री केतन घोडके आदी उपस्थित होते. 
पुढे बोलताना स्वामी  गोविंददेव गिरीजी महाराज म्हणाले, आपला समाज, आपला देश टिकला पाहिजे, आपण देश प्रथम या भावनेने राष्ट्र वाचविण्यासाठी प्रयत्न केले पाहिजेत. आपल्या हिंदुस्थानाचा विस्तार प्रचंड मोठा होता, आपला देश अनेकदा संकुचित झाल्याचे दिसते भविष्यात संकुचित व्हायला जागा नाही, यामुळे आपण जगाला प्रेम देण्यासाठी आधी आपल्या सुरक्षेची तरतूद करणे आवश्यक आहे. समाजवाद, सर्वधर्म समभाव, धर्मनिरपेक्षता या गोष्टी एका बाजूने होणार नाहीत, देशात समान नागरी कायदा असणे आवश्यक आहे. शिवरायांचा विचार देशात रुजणे महत्वाचे आहे. संत ज्ञानेश्वरांचे पसायदान हाच हिंदुत्वाचा जाहीरनामा असल्याचे त्यांनी नमूद केले. 

कार्यक्रमाचे प्रास्ताविक करताना किशोर चव्हाण म्हणाले, आपण हिंदुत्वासाठी मतदान कसे होईल यांची जागृती करण्यासाठी इथे जमलो आहोत. देशाला , समाजाला सुरक्षित ठेवण्यासाठी संविधान जीवंत असणे आवश्यक आहे. हिंदू बहुसंख्यक आहे तोपर्यंतच  देश आणि संविधान सुरक्षित असणार आहे यांची जाणीव सर्वसामान्य नागरिकांमध्ये निर्माण होण्यासाठी आपला हा उपक्रम आहे. 

संजय मुद्राळे म्हणाले, आपण आज संत संगम कार्यक्रमाच्या माध्यमातून धर्माचार्यांचे विचार ऐकत आहोत. देशाच्या स्वातंत्र्य लढ्यात स्वामी दयानंद सरस्वती, स्वामी विवेकानंद असे अनेक संतांचे अनमोल योगदान आहे. सातव्या शतकापासून आपल्यावर असंख्य परकीय आक्रमणे झाली मात्र आपण आपला धर्म फक्त संताच्या धैर्यामुळे, मार्गदर्शनामुळे टिकवू शकलो आहोत, आजही त्यांच्या विचारांची आपल्या देशाला गरज आहे, असेही त्यांनी सांगितले. कार्यक्रमाचे सूत्र संचालन शुभम मुळूक यांनी केले. 

पिंपरी, पुणे (दि. २८ ऑक्टोबर २०२४) पिंपरी चिंचवड एज्युकेशन ट्रस्टचे (पीसीईटी) पिंपरी चिंचवड अभियांत्रिकी महाविद्यालयाने (पीसीसीओई) नुकतेच रौप्य महोत्सवी वर्षात पदार्पण केले आहे. यानिमित्त महाविद्यालयाच्या नुकताच माजी विद्यार्थ्यांचा भव्य मेळावा आयोजित केला होता. यात एक हजार पेक्षा जास्त माजी विद्यार्थ्यांनी सहभाग घेतला. माजी विद्यार्थी संघटनेचे सभासद रजत गुप्ता, वसुंधरा सिंह, संपदा कुलकर्णी, सौरभ बेदमुथा, संतोष पुजारी महाविद्यालयाचे उपसंचालक डॉ. निळकंठ चोपडे, ट्रेनिंग अँड प्लेसमेंट सेलचे अधिष्ठाता डॉ. शितल कुमार रवंदळे, माजी विद्यार्थी संघटनेचे प्रमुख प्रा. अजित पाटील आणि माजी विद्यार्थी मोठ्या संख्येने उपस्थित होते.
कार्यक्रमाच्या सुरुवातीला महाविद्यालयाचे उपसंचालक डॉ. निळकंठ चोपडे यांनी मागील २५ वर्षांचा आढावा घेत महाविद्यालयाने केलेली उत्तुंग कामगिरी सर्वांसमोर मांडली. तसेच महाविद्यालयाचे धोरण मिशन, विद्यार्थी केंद्रित अभ्यासक्रम व सर्वांगीण विकासासाठी केलेले काम याची माहिती दिली.
ट्रेनिंग अँड प्लेसमेंट सेलचे अधिष्ठाता डॉ. शितल कुमार रवंदळे यांनी सर्व विद्यार्थ्यांचे स्वागत, प्रास्ताविक करताना महाविद्यालयाने आतापर्यंत प्लेसमेंट मध्ये केलेल्या कामगिरीबद्दल माहिती दिली. आपल्या महाविद्यालयाच्या माजी विद्यार्थ्यांनी आयटी, कला, मनोरंजन स्पर्धा परीक्षा, व्यवसाय, परदेशांमध्ये उच्च शिक्षण, नोकरी यामध्ये स्वतंत्र ठसा उमटवून देशाचे नाव उज्वल केले आहे, याचा पीसीईटीच्या विश्वस्तांसह आम्हा सर्व प्राध्यापकांना सार्थ अभिमान आहे. महाविद्यालयाचे नाव उंचावण्यात विद्यार्थ्यांचे देखील मोठे योगदान आहे.
या माजी विद्यार्थ्यांनी आता इतर विद्यार्थ्यांना मार्गदर्शन करावे असे आवाहन केले. काही माजी विद्यार्थ्यांनी उत्स्फूर्तपणे आपले मनोगत व्यक्त केले. ते शिकलेल्या विभागामध्ये मध्ये जाऊन आपल्या शिक्षकांना व शिक्षकेतर कर्मचाऱ्यांना भेटून विद्यार्थ्यांनी आपल्या जुन्या आठवणींना उजाळा दिला. सांस्कृतिक कार्यक्रमाने मेळाव्याची सांगता झाली.
सूत्र संचालन प्रा. राजकमल सांगोले आणि प्रा. सोनल शिर्के व आभार माजी विद्यार्थी वसुंधरा सिंह यांनी मानले.

पुणे : भारतीय लोक शिवाजी महाराजांनी बांधलेल्या किल्ल्यांवर जर गेले तर त्यापासून प्रेरणा घेऊन पुन्हा आपल्याशी लढतील आणि ती प्रेरणा त्यांना मिळू नये या उद्देशाने ब्रिटिशांनी भारतीयांना तिथे जाऊ दिले नाही. यामुळेच शिवाजी महाराजांच्या गड कोटांची दुरवस्था झाली असे मत श्री शिवाजी रायगड स्मारक मंडळाचे कार्यवाह सुधीर थोरात यांनी आज ( २८.१०.२०२४ ) व्यक्त केले. दिवाळीनिमित्त माधव सदाशिव गोळवलकर गुरुजी विद्यालयात गड-किल्ले बांधणी स्पर्धेनिमित्त आयोजित करण्यात आलेल्या ” छत्रपती शिवाजी महाराजांचे गडकोटांचे प्रशासन ” या विषयावर ते बोलत होते. शिवाजी महाराजांनी त्यांच्या सागरी आरमाराची निर्मिती आजच्या वसुबारसदिवशी केली असल्याच्या अनुषंगाने प्रशालेत गाय आणि वासरू यांची पूजा करण्यात आली. शाळा समिती अध्यक्ष मिलिंद कांबळे यांनी विविध प्रकारच्या गायी आणि त्यांचे होणारे उपयोग याबद्दल माहिती दिली.
एकावेळेला 300 लोक जाऊ शकतील आणि 300 टन साहित्य वाहून नेता येईल अशी जहाजे मराठ्यांनी निर्माण केली होती. यामुळेच सागरी मार्गाने व्यापार सुरू झाला आणि स्वराज्याची भरभराट होऊ शकली असल्याचं थोरात यावेळी म्हणाले. महाराजांनी गड किल्ल्यांचे प्रशासन उत्तम राखल्यानेच महाराजांच्या मृत्यूनंतर मराठे लढू शकले अशीही माहिती थोरात यांनी यावेळी दिली.

शिवाजी महाराजांनी त्यांच्या सागरी आरमाराची निर्मिती वसुबारसदिवशी केली असल्याची माहितीदेखील थोरात यांनी यावेळी दिली. या अनुषंगाने प्रशालेतील सर्व शिक्षिका , शिक्षकेतर महिला कर्मचारी यांच्या हस्ते गाय आणि वासरू यांची पूजा करण्यात आली. शाळा समिती अध्यक्ष मिलिंद कांबळे यांनी विविध प्रकारच्या गायी आणि त्यांचे होणारे उपयोग याबद्दल माहिती दिली.

तत्पूर्वी दीप्रज्वलननाने कार्यक्रमाची सुरुवात करण्यात आली. याचवेळी डॉ सुशीलकुमार धनमने आणि अनंतप्रसाद देशपांडे यांनी विद्यार्थ्यांनी बनवलेल्या किल्ल्यांचे परीक्षण केले. राजगड , प्रतापगड आणि तोरणा या प्रतिकृतींना अनुक्रमे प्रथम , द्वितीय आणि तृतीय क्रमांकाचे पारितोषिक मिळाले. माध्यमिक विभागाच्या मुख्याध्यापिका वासंतीताई यांनी परिक्षकांचा परिचय करून दिला. विकास दिग्रसकर यांनी सुत्रसंचलन केलं.

बारामतीत लोकसभेनंतर पुन्हा एकदा पवार विरुद्ध पवार असा सामना रंगणार

पुणे- बारामती विधानसभा मतदारसंघाच्या निवडणुकीत काका-पुतण्या आमने-सामने आहेत. अजित पवार यांच्या विरोधात युगेंद्र पवार निवडणुकीच्या मैदानात आहेत. युगेंद्र पवार हे अजित पवारांचे पुतणे आणि अजित पवारांचे बंधू श्रीनिवास पवार यांचे पुत्र आहेत.या दोहोंनी आज आपापले उमेदवारी अर्ज दाखल केलेत महाविकास आघाडीच्या वतीने युगेंद्र यांचा अर्ज दाखल करताना खुद्द शरद पवार स्वतः उपस्थित होते तर अजित पवारांचा अर्ज भरताना जय पवार उपस्थित होते घरून विजया पाटील , सुनेत्रा पवार यांनी औक्षण केल्यावर अजित पवार उमेदवारी अर्ज दाखल करायला मिरवणुकीने निघाले.

युगेंद्र यांचे कन्हेरी येथील निवासस्थानी मातोश्री शर्मिला यांच्याकडून औक्षण करण्यात आले. ग्रामदैवत कन्हेरीच्या मारुतीचे दर्शन त्यांनी घेतले. त्यानंतर आत्या खासदार सुप्रिया सुळे यांच्यासमवेत त्यांनी शहरातील कसबा येथे श्री छत्रपती शिवाजी महाराज यांच्या पुतळ्याला पुष्पहार अर्पण केला.तद्नंतर इंदापूर रस्त्यावर भारतरत्न डॉ. बाबासाहेब आंबेडकर यांच्या पुतळ्याला पुष्पहार अर्पण करून ते प्रशासकीय भवनात दाखल झाले. तेथे शरद पवार यांच्यासह पक्षाचे तालुकाध्यक्ष अ‍ॅड. एस. एन. जगताप, सदाशिव सातव, सतीश खोमणे यांच्या उपस्थितीत त्यांनी निवडणूक निर्णय अधिकारी वैभव नावडकर यांच्याकडे अर्ज दाखल केला.

मी जी चूक केली तीच चूक आता पवारसाहेबांनी केली -अजितदादा

उपमुख्यमंत्री तथा राष्ट्रवादी काँग्रेसचे अध्यक्ष अजित पवार यांनी लोकसभा निवडणुकीत आपल्याकडून जी चूक झाली तीच चूक या निवडणुकीत शरद पवार करत असल्याचा दावा केला. लोकसभा निवडणुकीत कुटुंबातील उमेदवाराविरोधात उमेदवार देण्याची मोठी चूक माझ्याकडून झाली. ती चूक आता त्यांच्याकडून होत आहे, असे ते म्हणालेत.अजित पवारांनी अर्ज दाखल करण्यापूर्वी मोठे शक्तिप्रदर्शन केले. यावेळी पत्रकारांशी संवाद साधताना त्यांनी आपल्या प्रतिस्पर्धी उमेदवाराचा पक्ष लोकसभेला आपल्याकडून जी चूक झाली तीच करत असल्याचा दावा केला. लोकसभा निवडणुकीत बारामतीत शरद पवार यांच्या कन्या सुप्रिया सुळे यांना अजित पवार यांच्या पत्नी सुनेत्रा पवार यांनी आव्हान दिले होते. त्यात सुनेत्रा यांचा पराभव झाला होता.

अजित पवार यासंबंधी म्हणाले, लोकसभेला सुप्रिया सुळे यांच्याविरोधात सुनेत्रा पवार यांना उभे करून मी चूक केली. पण आता युगेंद्र पवार यांना माझ्याविरोधात उभे करून तीच चूक ते करत आहेत. त्यांनी (शरद पवार) असे करायला नको होते. लोकशाही शासन पद्धतीत सर्वांना निवडणूक लढवण्याचा अधिकार आहे.

निवडणुकीत माझ्या विरोधात उभा राहणारा प्रत्येक उमदेवार स्ट्राँगच असल्याचे माणून आम्ही आतापर्यंत प्रचार केला. यंदाच्या निवडणुकीतही तीच परिस्थिती असेल. यंदा विरोधात कोणताही उमेदवार असला तरी बारामतीकर मला चांगल्या मतांनी निवडून देतील असा मला विश्वास आहे. दरम्यान, युगेंद्र पवार हे अजित पवार यांचे पुतणे आहेत. ते अजित पवार यांचे बंधू श्रीनिवास पवार यांचे सुपुत्र आहेत.

पास होण्यासाठीच परीक्षेला बसलोय :
खा. सुप्रिया सुळे
बारामतीमध्ये एक समांतर यंत्रणा, अदृश्य शक्ती बारामती चालवत आहे. हे अजिबात चालणार नाही. आगामी काळात ही समांतर यंत्रणा मोडून टाकण्यात येईल. सर्वसामान्य बारामतीकर बारामती चालवतील. केवळ बिल्डिंग्ज उभ्या करून प्रश्न सुटत नाहीत तर त्याचा सोशल इम्पॅक्टमध्ये बदल झाला पाहिजे. आम्ही परीक्षेला पास होण्यासाठीच बसलोय, अशा शब्दांत खासदार सुप्रिया सुळे यांनी उपमुख्यमंत्री अजित पवार यांच्यावर नाव न घेता टीका केली. युगेंद्र यांचा अर्ज दाखल करण्यापूर्वी कन्हेरी येथे मारुतीचे दर्शन घेतल्यानंतर माध्यमांशी त्या बोलत होत्या. गेली सहा दशके शरद पवार यांना बारामतीकरांनी प्रेम दिले आहे. या निवडणुकीतही ते दिसून येईल असे त्या म्हणाल्या.

मी असेन नवखा पण आजोबा आहेत पाठीशी- युगेंद्र
मी गेली काही वर्षे समाजकारणात सक्रिय होतो. पक्षाने उमेदवार देत मोठी जबाबदारी दिली, त्याचा आनंद आहे. मी राजकारणात नवखा असलो तरी ५० वर्षांहून अधिक राजकीय कारकीर्द असणारे आजोबा शरद पवार माझ्यासोबत आहेत, ही मोठी गोष्ट आहे. बारामतीत अनेक प्रश्न प्रलंबित आहेत. भ्रष्टाचार बोकाळला आहे, गुन्हेगारी वाढली आहे. अशा अनेक प्रश्नांसाठी आपला लढा असेल. तरुणाईला रोजगार उपलब्ध करून देण्याला प्राधान्य दिले जाईल असे युगेंद्र पवार म्हणाले.

कऱ्हाडे ब्राह्मण संघ, पुणेतर्फे ‌‘कार्तिक महात्म्य‌’ विषयावर प्रवचन
पुणे : मोहमायेतील गुरफटलेपण सोडून जागृत व्हा, नामस्मरणाचे महत्त्व जाणा, गुरुंची महती समजून घ्या, श्रद्धा जोपासून चैतन्याचा शोध घ्या, असे सांगणाऱ्या कार्तिक महिन्यातील काकडा या विषयी ह.भ.प. अद्वैता उमराणीकर यांनी ‌‘कार्तिक महात्म्य‌’ कार्यक्रमातून उपस्थितांचे प्रबोधन केले.
कऱ्हाडे ब्राह्मण संघ, पुणेतर्फे कोजागरी पौर्णिमेनिमित्त ‌‘कार्तिक महात्म्य‌’ या विषयावर ह. भ. प. अद्वैता उमराणीकर यांचे पुण्याई सभागृह, पौड रस्ता येथे प्रवचन आयोजित करण्यात आले होते.
हरिपाठाचे जगणे आपल्या आचरणात यावे, असे सांगून उमराणीकर यांनी अक्कलकोट, शेगांव, गोंदवले, सज्जनगड, नृसिंहवाडी, शिर्डी, अमृतसर आदी भक्तिसंस्थानांमध्ये काकड्याची परंपरा कशी आहे, याविषयी माहिती विशद केली. काकड्यात सादर होणारी पंचपदी, भजन, आरती, गवळण, भारुड, जागल्या या भक्तिसंप्रदायातील वैशिष्ट्यपूर्ण सादरीकरणांची त्यांनी थोडक्यात ओळख करून दिली. सलोकता, सरूपता, समीपता आणि सायुज्य या मुक्तीप्रकारांविषयी उद्बोधक माहिती सांगितली.
आपल्या नित्यनेमात फक्त पोथीवाचन, आध्यात्मिक-धार्मिक वाचन न करता संतांनी सांगितलेल्या मार्गानुसार कर्म होणे आवश्यक आहे, असे सांगून उमराणीकर म्हणाल्या, कार्तिक महिन्यातील काकडा हा आत्मभान देतो, आपल्यातील आत्मज्योत जागवितो. नामस्मरणाचे भक्तिमार्गात असणारे अनन्यसाधारण स्थान तसेच संतश्रेष्ठ ज्ञानेश्वर महाराज, जगद्गुरू तुकाराम महाराज, संत एकनाथ महाराज, संत नामदेव महाराज, रामदास स्वामी, गजानन महाराज, स्वामी समर्थ, साईबाबा, गोंदवलेकर महाराज आदी संत-महात्म्यांनी सांगितलेला सुख आणि आनंद यातील फरक या विषयही उमराणीकर यांनी विवेचन केले.
कार्यक्रमाची सुरुवात अध्यक्ष मुक्ता चांदोरकर, उपाध्यक्ष गिरीश शेवडे, हरी मुणगेकर, कोषाध्यक्ष गणेश गुर्जर, अद्वैता उमराणीकर यांच्या हस्ते दीप प्रज्वलनाने झाली. प्रास्ताविकात मुक्ता चांदोकर यांनी कार्यक्रमाच्या आयोजनामागील भूमिका विशद केली. कार्यक्रमाचे सूत्रसंचालन डॉ. राजश्री महाजनी यांनी केले. या प्रसंगी कऱ्हाडे ब्राह्मण संघातील सदस्यांची स्नेहभेट आयोजित करण्यात आली होती.