.घटनेबद्दल प्रेम असेल तर संघपरिवार मनुस्मृती चे दहन का करीत नाही?

निर्भय बनो आंदोलनाच्या सभेला येरवड्यात चांगला प्रतिसाद 

पुणे :’योजनांद्वारे पैसे वाटून मत घेण्याचे प्रयत्न सुरु आहेत,पण पैशासाठी मत द्यायचे की सुरक्षिततेसाठी द्यायचे हा निर्णय घ्यायची वेळ आली आहे’,असे प्रतिपादन निर्भय बनो आंदोलनाचे प्रणेते एड. असीम सरोदे यांनी केले.तर ‘गरिबांसाठी वडापाव घेऊन जाणारा आमदार निवडा .श्रीमंतांना कोठडीत पिझा घेऊन जाणारा प्रतिनिधी निवडू नका,असे आवाहन डॉ.विश्वम्भर चौधरी यांनी केले.  

निर्भय बनो आंदोलनाच्या वतीने,संविधान प्रचारक चळवळ यांच्या   जेसीडी पार्क,मोझे नगर,येरवडा येथे झालेल्या सभेत ते बोलत होते.एड.असीम शेख,डॉ.विश्वम्भर चौधरी,इब्राहिम खान  ,निवृत्त सहायक पोलीस आयुक्त मिलिंद गायकवाड,स्मिता ताई,बाळकृष्ण निढाळकर   यांच्यासह अनेक मान्यवरांनी मते व्यक्त केली.’अन्यायाविरुद्ध न्यायाच्या लढाईत निर्भय बनो,भारत जोडो’ असा संदेश या सभेने दिला. सभेला स्थानिक नागरिकांनी मोठा प्रतिसाद दिला. 

एड.सरोदे म्हणाले,’ माणुसकी हवी असेल तर महाविकास आघाडीला मतदान केले पाहिजे.महिलांचा आदर असेल तर महिलांच्या प्रकरणात राजकीय फायदा घेण्याचे काम भाजप नेते का करतात ? ते सतत असे  करीत आले आहेत.बदलापूर प्रकरणात दोषींवर कारवाई करण्यात चालढकल का केली गेली.तेथील संस्था संघ ,भाजपशी संबंधित असल्याने त्यांना वाचविण्यासाठी प्रयत्न झाले. राहुल गांधी यांच्या संविधान संबंधी भूमिकेचे जगभर स्वागत झाले आहे. संविधान द्वेष शिकवत नाही,प्रेम शिकवत आहे .संविधान पुस्तकावरून राजकारण करणे हे फडणवीस यांना शोभते का ? त्यांना संविधान कळते का ? हे मनुस्मृती मानणारे लोक आहेत.त्यांना आपण प्रश्न विचारला पाहिजे की ते संविधान मानतात का ?
आपण आज सर्व भाजपचे नेते असभ्य बोलताना,वागताना पाहत आहोत.लाथा मारताना पाहत आहोत.आपण त्यांना प्रश्न विचारले पाहिजे ,कारण ते असंवेदशील झाले आहेत.बाबासाहेब आंबेडकर यांनी आपल्याला संघर्ष करण्याचे शिकवले आहे. सभ्य माणसांची लढाई असभ्य माणसांची आहे.अजित पवार यांनी जे केले त्यातून त्यांना यश मिळणार नाही. व्होट जिहाद हा चुकीचा प्रचार आहे . भाजप जर मुस्लिमांशी वाईट वागत असतील तर ते भाजपला का मतदान करतील,हा साधा प्रश्न आहे,असेही एड सरोदे यांनी विचारले.  

 डॉ.विश्वम्भर चौधरी म्हणाले ,’गरिबांसाठी वडापाव घेऊन जाणारा आमदार निवडा .श्रीमंतांना कोठडीत पिझा घेऊन जाणारा प्रतिनिधी निवडू नका. पुण्याची इज्जत कोणी घालवली ? माणुसकीला काळे फासणारी ही घटना आहे.आम्ही पुण्यात यासाठीच सभा घेतली, कारण यांना धडा शिकवला पाहिजे. आपण बिल्डरांचा प्रतिनिधी निवडता कामा नये, सामान्य माणसांचा प्रतिनिधी निवडला पाहिजे.वोट जिहाद म्हणून भाजपचे लोक संविधानाचा अपमान करीत आहेत.शिंदे -फडणवीस यांच्याकडे दाखविण्यासारखे काही नाही.खोके सरकारने महाराष्ट्राचा अपमान केला ,शिवाजी महाराजांची शान घालवली.मानवता धर्म नष्ट केला. पुण्यावर गुंडांच्या टोळ्या राज्य करणार नाहीत याची काळजी आपण केली पाहिजे. 

हा देश नथुराम चा असेल कि गांधींचा असेल हा प्रश्न आहे. बाबासाहेब आंबेडकर यांचे संविधान राहणार कि नाही,हा प्रश्न आहे.घटनेबद्दल प्रेम असेल तर संघपरिवार मनुस्मृती चे दहन का करीत नाही,हा प्रश्न आहे. भ्रष्टाचार उखडून सत्ताधाऱ्यांना सत्तेतून हाकलले पाहिजे,असे आवाहनही डॉ.चौधरी यांनी केले. 

पुणे:उपमुख्यमंत्री देवेंद्र फडणवीस यांना भेटून पाठपुरावा केल्याने दाट वस्ती आणि गावठाण भागात बांधकाम करताना 18 मीटरपेक्षा जास्त खोली असलेल्या भूखंडावर साइड मार्जिन सोडण्याची सक्ती शिथिल करण्यात आली, त्यामुळे जुन्या वाड्यांच्या पुनर्विकासाचा मार्ग मोकळा केल्याचा दावा कसबा विधानसभा मतदारसंघातील भाजप महायुतीचे उमेदवार हेमंत रासने यांनी केला.

रासने यांच्या प्रचारार्थ आज गाडीखाना हॉस्पिटल, फडगेट पोलीस चौकी, पानघंटी चौक, राष्ट्रभूषण चौक, खडकमाळ आळी, पंच हौद चर्च, शितळादेवी चौक, महाराणा प्रताप चौक, काची आळी, फूलवाला चौक परिसरात प्रचारफेरीचे आयोजन करण्यात आले होते. राजेंद्र काकडे, माजी नगरसेवक अजय खेडेकर, रुपाली ठोंबरे पाटील, आरती कोंढरे, सम्राट थोरात, विजयालक्ष्मी हरिहर, अजय दराडे, गणेश काची, निलेश जगताप, अभिजीत राजपूत, वैशाली नाईक, निर्मल हरिहर यांची प्रमुख उपस्थिती होती.यांचा प्रमुख सहभाग होता.

रासने म्हणाले, “मध्य वस्तीत बांधकाम करताना अनेक अडचणी येतात. जुन्या नियमानुसार अनेक इमारतींना कोणतीही साइड मार्जिन न सोडता बांधकामास मंजुरी मिळत होती. परंतु यूडीसीपीआर नियमावलीतील बदलांनतर 15 मीटरपेक्षा जास्त खोलीच्या इमारतीसाठी एक मीटर साइड मार्जिन सोडणे बंधनकारक करण्यात आले होते. त्यावर आम्ही हरकत घेतली. त्याची दखल घेत नियम शिथिल करण्याचा आदेश काढण्यात आला. परंतु महापालिका आयुक्तांनी काढलेल्या आदेशात पुरेशा सवलत नसल्याने पुनर्विकास अवघड झाला होता. उपमुख्यमंत्री देवेंद्र फडणवीस यांच्याकडे पाठपुरावा करून नियम शिथिल करण्यात आले.”

रासने पुढे म्हणाले, “शहरातील गावठाणांमध्ये अनेक मिळकती 18 मीटरपेक्षा जास्त खोलीच्या आहेत. नागरिकांना चांगल्या सुविधा मिळाव्यात म्हणून वाड्यांचा पुनर्विकास करताना दोन टक्के अतिरिक्त प्रिमियम हार्डशीप आकारून साइड मार्जीनमध्ये शिथिलता देण्यात आली आहे. यामुळे वाड्यांचा पुनर्विकास वेगाने होईल आणि नागरिकांना अग्निशामक यंत्रणा, वाहनतळासह इतर सुविधा मिळतील.”

पुणे-कोथरूड विधानसभा मतदारसंघातील महायुतीचे उमेदवार चंद्रकांतदादा पाटील यांची गोरगरिबांप्रति कणव आहे. दुर्बल आणि असंघटित क्षेत्रासाठी जे काम करता; त्याचा प्रचंड आनंद आणि कौतुक वाटतं अशी भावना राष्ट्रवादी काँग्रेसचे उपाध्यक्ष आनंद ऊर्फ बंडूशेठ तांबे यांनी व्यक्त केली.

महायुतीचे उमेदवार चंद्रकांतदादा पाटील यांच्या प्रचारार्थ घरोघरी संपर्काअंतर्गत आज श्री पाटील यांनी कोथरूड मधील हिंगणे होम कॉलनी येथे राष्ट्रवादी काँग्रेसचे उपाध्यक्ष आनंद ऊर्फ बंडूशेठ तांबे यांच्या निवासस्थानी सदिच्छा भेट दिली. यावेळी ते बोलत होते.

यावेळी कोथरुड मतदारसंघाचे भाजप महायुतीचे समन्वयक सुशील मेंगडे, नगरसेविका वृषाली चौधरी, दत्ताभाऊ चौधरी, आदित्य बराटे, राजू मोरे, राष्ट्रवादी काँग्रेसचे संकेत शितोळे, हभप बाळासाहेब मोकाशी, सामाजिक कार्यकर्ते मनोहर माळी, भाजपा युवा मोर्चा प्रभाग अध्यक्ष गौरव खैरनार यांच्या सह इतर कार्यकर्ते उपस्थित होते.

आनंद ऊर्फ बंडूशेठ तांबे म्हणाले की, गेल्या पाच वर्षांत चंद्रकांतदादा पाटील यांनी तळागाळातील प्रत्येक घटकांसाठी काम केले आहे. यातून त्यांची आर्थिक दुर्बल घटकांप्रतिची आत्मियताच प्रतित होते. कोथरूड विधानसभा मतदारसंघातील रिक्षाचालकांठी केलेले काम अवर्णनीय आहे. त्यामुळे कोथरूड मधील प्रत्येक नागरिक त्यांच्यावर भरभरुन प्रेम करत आहे, अशी भावना यावेळी त्यांनी व्यक्त केली. तसेच, निवडणूक निकालानंतर कोथरुड विधानसभा मतदारसंघातील ते भरघोस मतांनी विजयी होतील; आणि महायुतीच्या मंत्रिमंडळात पहिल्या पाच मध्ये त्यांचा समावेश असेल, अशीही भावना त्यांनी यावेळी व्यक्त केली.

यावेळी अखिल भारतीय भटके गोसावी समाज महासंघ आणि श्री समर्थ सेवा प्रतिष्ठानचा चंद्रकांतदादा पाटील यांना पाठिंबा जाहीर केला. दोन्ही संघटनेच्या पदाधिकाऱ्यांनी पाठिंब्याचे पत्र पाटील यांना सुपूर्द केले. याबद्दल पाटील यांनीही कृतज्ञता व्यक्त केली.

पुणे : राजकारणात पक्षनिष्ठा, सर्व जाती-धर्मांच्या लोकांना सोबत घेऊन जाणारे सर्वसमावेशक नेतृत्व आणि सर्वसामान्यांचे प्रश्न सोडविण्याची धमक असलेले रमेशदादांसारखे कणखर व्यक्तिमत्त्व आवश्यक आहे. कँटोन्मेंटच्या विकासासाठी आणि येथील सामाजिक व धार्मिक सलोखा टिकविण्यासाठी रमेशदादांना भरघोस मतांनी विजयी करा, असे आवाहन काँग्रेसचे राज्यसभेतील खासदार आणि काँग्रेसच्या अल्पसंख्याक विभागाचे राष्ट्रीय अध्यक्ष इम्रान प्रतापगढी यांनी बुधवारी केले. तुम्ही रमेशदादांना आमदार करून विधानसभेत पाठवा आम्ही त्यांना मंत्री करू. कँटोन्मेंटच्या विकासासाठी निधी कमी पडला तर मी माझ्या खासदारनिधीतून मदत करेन, पण कँटोन्मेंटचा विकास आता थांबणार नाही, अशी ग्वाही त्यांनी दिली.

पुणे कँटोन्मेंट विधानसभा मतदारसंघातील महाविकास आघाडी, इंडिया फ्रंट व मित्रपक्षांचे काँग्रेसचे उमेदवार रमेश बागवे यांच्या प्रचारार्थ अल्पसंख्याक विभागाच्या प्रमुख मान्यवरांचे चर्चासत्र कॅम्पमधील टाउन प्लाझा येथे आयोजित करण्यात आले होते. त्यावेळी ते बोलत होते. कँटोन्मेंटच्या नागरिकांना केवळ आमदार नाही तर मंत्री निवडायचा आहे, असे प्रतापगढी यांनी सांगताच रमेश बागवे यांच्या समर्थनार्थ जोरदार घोषणाबाजी झाली. राजस्थानचे माजी मंत्री आणि अजमेर दर्ग्याचे अध्यक्ष आमीन पठाण, माजी राज्यमंत्री बाळासाहेब शिवरकर, मौलाना निजामुद्दीन चिश्ती, डॉ. मौलाना काझमी, अली इनामदार, शफी इनामदार, जावेद शेख, भोलासिंग अरोरा, फादर रॉड्रिक्स, कवीराज संघेलिया, विनोद मथुरावाला, प्रसाद केदारी, नरुद्दीन अली सोमजी, सलीम शेख, चंद्रशेखर धावडे, माजी नगरसेवक अविनाश बागवे आणि उमेदवार रमेश बागवे यांच्यासह महाविकास आघाडीतील काँग्रेस, राष्ट्रवादी काँग्रेस शरदचंद्र पवार पक्ष, शिवसेना उद्धव बाळासाहेब ठाकरे पक्ष, आप यांचे पदाधिकारी आणि कार्यकर्ते उपस्थित होते. मुस्लिम, शीख, ख्रिश्चन, बौद्ध समाजातील प्रमुख मान्यवर मोठ्या संख्येने यावेळी उपस्थित होते.

राज्यघटना बदलण्यासाठी ‘अब की बार चारसो पार’ हा नारा देणाऱ्या लोकांना देशातील जनतेने २४० जागांवर आणले. जग अबोल लोकांचा इतिहास वाचत नाही. आपल्यावर होणाऱ्या अन्याय आणि अत्याचाराबद्दल आवाज उठविण्याची गरज आहे. बटेंगे तो कटेंगे, हिंदू स्त्रियांचे मंगळसूत्र हिसकावले जाईल या फसव्या आणि द्वेषी प्रचाराला आपण प्रेमाच्या दुकानातून उत्तर द्यायचे आहे. द्वेषाच्या बाजारात राहुल गांधी यांचे प्रेमाचे दुकान महाराष्ट्र आणि देशाला पुढे नेऊ शकते. महाराष्ट्रची अस्मिता वाचविण्यासाठी गुजरातच्या रिमोटवर चालणारे सरकार हद्दपार करण्याची गरज आहे. लोकशाही आणि राज्यघटना वाचवली नाही तर अल्पसंख्याक समाजाचे स्थान धोक्यात येईल. लोकशाही आणि देश वाचविण्यासाठीची ही लढाई आहे. मोदींच्या काळात महागाई वाढल्याने लाडक्या बहिणींच्या डोळ्यांत अश्रू आहेत. हिंदू-मुस्लिम, कलम ३७०, घुसखोरी ही भाषा बोलून भाजप जाती-धर्मात तेढ निर्माण करीत आहे, अशी टीका प्रतापगढी यांनी केली.

पुणे कँटोन्मेंट मतदारसंघात सर्व जाती-धर्माचे लोक राहत असल्याने हा छोटा भारत आहे. लोकसभा निवडणुकीत काँग्रेसला येथून १३ हजारांचे मताधिक्य मिळाले. भाजपने लोकांमध्ये भांडणे लावली आहेत. निवडणुकीसाठी पैशांचा पाऊस पाडला जात आहे, अशी टीका बागवे यांनी केली.

घोरपडी येथील श्रावस्तीनगर, बालाजीनगर, गुलमोहर पार्क, श्रीनाथनगर, निगडेनगर, बी. टी. कवडे रस्ता, डोंबरवाडी आणि कवडेमळा या परिसरात बुधवारी सायंकाळी निघालेल्या रमेश बागवे यांच्या पदयात्रेचे नागरिकांनी उत्स्फूर्तपणे स्वागत केले. पदमजी पोलिस चौकीजवळ कोपरा बैठक पार पडली.

पुणे-खडकवासला मतदार संघात भिमराव तापकीर यांनी प्रचारात नागरिकांमध्ये प्रत्यक्ष जाऊन भेटी गाठी द्वारे प्रचारात आघाडी घेतली आहे. आज वारजे येथील उद्यान, वॉकिंग ट्रॅक ला जाऊन त्यांनी नागरिकांच्या गाठी भेटी घेतल्या यावेळी माजी नगरसेवक किरण बारटक्के, सचिन दांगट, माधव देशपांडे, पराग ढेणे त्यांच्या समवेत होते .

ना दिखावा, ना दबाव – लोकांसाठी निःस्वार्थ नेतृत्व असलेले खडकवासला विधानसभा मतदारसंघातील नागरिकांच्या मनामध्ये प्रामाणिकता, मितभाषी स्वभाव, आणि कामांमधून परिणाम साधणारे नेतृत्व म्हणून भिमराव तापकीर यांचा उल्लेख भेटणारे नागरिक करू लागले आहेत .त्यांना भेटणारे नागरिक यावेळी म्हणत आहेत कि, “गोंधळ न करता, गाजावाजा न करता, काम करत राहणे” हा त्यांचा स्वभाव त्यांना इतरांपेक्षा वेगळे ठरवतो. निस्वार्थीपणे जनतेसाठी कार्यरत असून प्रलोभनांना फाटा देत कामांवर भर: ते कधीही मतदारांना खोटी आश्वासने किंवा प्रलोभने देत नाहीत. त्यांच्या मते, कामाची प्रामाणिकता आणि लोकांचा विश्वास हाच विजयाचा खरा मार्ग आहे. लोकांसाठी सतत उपलब्ध, कोणतीही अडचण असो, अण्णा नेहमी मतदारांच्या सोबत उभे असतात. त्यांच्या मितभाषी स्वभावामुळे प्रत्येक व्यक्तीला त्यांच्याशी संवाद साधणे सोपे वाटते. कामगिरीचा पाया, विश्वासाचा आधार असल्याने गेल्या अनेक वर्षांतील त्यांच्या कार्याने खडकवासल्यात विकासाचे नवे अध्याय लिहिले आहेत.रस्ते, पाणीपुरवठा, समाविष्ट गावांमधील विकासकामे, वीजपुरवठा, पर्यटन विकास, ब्रिज, समाजमंदिर, ओपन जिम, सोसायट्याना वीज बिल बचतीसाठी सोलर प्रकल्प आणि इतर मूलभूत विकासात त्यांनी महत्त्वपूर्ण योगदान दिले आहे. सर्वसामान्य नागरिकांच्या गरजा ओळखून त्या पूर्ण करण्यासाठी सातत्याने कार्यरत राहणारा नेता अशी त्यांची प्रतिमा राहिली आहे. या कौतुकाने उमेदवार तापकीर स्वतः,’ आणखी याहून काय हवे तुमचे प्रेम असेच लाभो’ म्हणत पुढे प्रचाराला निघताना दिसत आहेत

आमचं काम बोलतंय” आम्ही मतदारांना गृहीत धरत नाही, आम्ही त्यांच्या विश्वासाला प्रामाणिकतेने उतराई होतो,मतदारांनी दिलेला प्रत्येक मत हा विश्वासाचा एक प्रकार असतो, जो प्रामाणिकपणे परत देणे हे आमचे कर्तव्य आहे – भिमराव तापकीर

पुणे-आमदार रवींद्र धंगेकर यांना केवळ १६ महिन्यांचीच आमदारकी मिळाली;पण या अवधीत त्यांनी ससूनमधील ड्रग्ज रॅकेट उघडकीस आणून संपूर्ण महाराष्ट्रातील मादक द्रव्यांच्या तस्करीवर कारवाई करण्यास सरकारला भाग पाडले. त्यांची ही कामगिरी महाराष्ट्राच्या आणि तरुण पिढीच्या भवितव्याच्या दृष्टीने अत्यंत हितकारी ठरली. त्यामुळे धंगेकर यांना आपण दिलेले मत संपूर्ण महाराष्ट्राच्या सार्थकी लागते, असा विश्वास त्यातून निर्माण झाला आहे.त्यामुळे कसबा विधानसभा मतदारसंघातील मतदारांनी धंगेकरांनाच मतदान करावे, असे आवाहन ज्येष्ठ नेते आणि पुण्याचे माजी महापौर यांनी केले आहे.

सुरतवाला यांनी यासंदर्भात प्रसिद्धीला दिलेल्या एका निवेदनात म्हटले आहे की, धंगेकर यांनी ससूनमधील मादक द्रव्य गैरव्यवहाराचे जे रॅकेट उघडकीस आणले, त्यातून पाच पोलीस निलंबित झाले. याची पाळेमुळे राज्यभर असल्याची माहिती तपासात निष्पन्न झाली. त्यावर कारवाई करून या प्रकाराला आळा घातला गेला. धंगेकर यांनी केलेल्या पाठपुराव्यामुळेच हे यश लाभले आहे, हे आपल्याला लक्षात घ्यावे लागेल.

पुण्यातील पोर्शे मोटार कार अपघातप्रकरणीही त्यांनी असाच आक्रमक आवाज उठवला. हे प्रकरण दाबून टाकण्यासाठी मोठ्या पैशांची ऑफर असतानासुद्धा धंगेकर यांनी ती धुडकावून लावून सर्वसामान्य माणसाच्या हिताचे रक्षण केले.आजच्या जमान्यात ही बाब साधी नाही. बेकायदेशीर पब्ज आणि हुक्का पार्लर यांच्याविरोधात कोणीतरी लोकप्रतिनिधींनी आक्रमक होऊन आवाज उठवायला पाहिजे होता, ती जबाबदारी धंगेकर यांनी समर्थपणे पार पाडली आहे. त्यामुळे धंगेकर यांच्या पाठीशी उभे राहणे हे केवळ कसबा विधानसभा मतदारसंघातील नागरिकांच्याच हिताचे नव्हे तर संपूर्ण पुणेकरांच्या हिताचे आहे असेही सुरतवाला यांनी म्हटले.

कसबा मतदार संघातील ब्राह्मण समाजाने गेल्या पोटनिवडणुकीत आपले पारंपारिक पद्धतीचे मतदान बाजूला ठेवून धंगेकर यांच्या बाजूने उभे राहण्याचा निर्णय घेतला होता. हा निर्णय धंगेकर यांनी सार्थ ठरवला आहे. आपण निवडून दिलेला आमदार महाराष्ट्राच्या उपयोगी पडतो हे धंगेकर यांनी आपल्या कार्यकर्तृत्वातून सिद्ध केले आहे, त्यामुळे कसबा पेठ येथील अन्य समाजाबरोबरच ब्राह्मण समाजही धंगेकर यांच्याबरोबरच उभा राहील असा विश्वासही सुरत वाला यांनी व्यक्त केला. ज्या मतदारांचे महाराष्ट्रावर प्रेम आहे त्यांनी भारतीय जनता पक्षाला मत देऊ नये असे आवाहन ही सुरतवाला यांनी केले.

सायंकाळी नारायण पेठेतील मुरलीधर भोजनालय येथून पदयात्रेस प्रारंभ झाला. ओंकारेश्वर मंदिर, अहिल्यादेवी शाळा, नेने घाट, मेहुणपुरा, केसरी वाडा, गरुड गणपती, भरत नाट्यमंदिर, चिमण्या गणपती असा शनिवार, सदाशिव, नारायण पेठे येथून पदयात्रा जाऊन खजिना विहीर विठ्ठल मंदिर येथे पदयात्रा समाप्त झाली. महाविकास आघाडीचे तिन्ही पक्षांचे पदाधिकारी व कार्यकर्ते पदयात्रेत सहभागी झाले होते.