मार्कस पंडित यांच्या माध्यमातून चर्चासत्रात वडगावशेरी मतदारसंघातील सर्व कॅथोलिक चर्चचा सहभाग

पुणे: खराडी येथे ख्रिस्ती समाजाचे नेते मार्कस पंडीत यांच्या नेतृत्वाखाली ख्रिस्ती समाजाच्या विविध समस्यांवर चर्चासत्राचे आयोजन करण्यात आले होते. यावेळी महाविकास आघाडीचे अधिकृत उमेदवार बापूसाहेब पठारे यांच्या प्रमुख उपस्थित हे चर्चासत्र पार पडले.

यावेळी संत फ्रान्सिस डी सेल्स चर्च, डीव्हाईन मर्सी चर्च, क्राईस्ट द किंग चर्च, कार्मिल चर्च, होली फॅमिली चर्च लोहगाव त्याचप्रमाणे कॅथलिक असोसिएशन ऑफ पुणे, वडगावशेरी मायनॉरीटी काँग्रेस आय पार्टी, ख्रिश्चन कोकणी संघटना, तमिळ ख्रिचन संघटना, एस एफ मराठी कॅथलिक संघटना, मिलाग्रास फाउंडेशन वडगावशेरी, पुणे कोकणी ख्रिस्त सभा, ख्रिस्त जागृती मंच या सर्व संघटनेच्या पदाधिकाऱ्यांनी सविस्तरपणे विविध विषयांवर चर्चा केली.

आगामी निवडणुकीसाठी या सर्व संघटनांनी व ख्रिस्ती समाजाने बापूसाहेब पठारे यांना पाठींबा जाहीर केला. तसेच, ख्रिस्ती समाजाच्या समस्या विधानसभेत मांडण्याची विनंती पठारे यांना केली. “ख्रिस्ती समाजाने दिलेला पाठिंबा फार महत्त्वाचे योगदान देणारा ठरेल. येणाऱ्या काळात विविध माध्यमातून ख्रिस्ती समाजाचे प्रश्न विधानसभेत मांडू व त्यावर नक्कीच तोडगा काढू”, असे आश्वासन बापूसाहेब पठारे यांनी दिले.

यावेळी जयप्रकाश पारखे (सचिव, महाराष्ट्र राज्य प्रोग्रेसिव्ह पीपल काँग्रेस पक्ष), जॉन फर्नाडिस (अध्यक्ष, मिलाग्रास फाउंडेशन), जो रोड्रिग्ज (अध्यक्ष, कोकणी सभा), एडविन अलेक्स (अध्यक्ष, तामिळ सभा), रविभाऊ कांबळे (अध्यक्ष, मराठी सभा व सरचिटणीस, काँग्रेस कमिटी अनुसूचित जाती जमाती), जो कसबे (पुणे धर्मप्रांत अध्यक्ष कॅथलिक असोसिएशन), ए वी थॉमस (धानोरी चर्च), स्वप्नील साळवे सर ( क्राईस्ट द किंग चर्च), मॅथ्यू थॉमस (कार्मेल चर्च), पासकल लोपोझ, बेंजामिन डिकोस्टा, अँथॉनी फर्नांडिस, मधुकर सदाफुले, अमर पंडीत इ. विविध संघटनांचे मान्यवर, पदाधिकारी व कार्यकर्ते उपस्थित होते.

पुणे :वडगाव शेरीतील माजी नगरसेविका रेखा टिंगरे व चंद्रकात टिंगरे यांनी राष्ट्रवादी काँग्रेस चे संस्थापक अध्यक्ष शरद पवार यांच्या उपस्थितीत राष्ट्रवादी काँग्रेस पार्टी शरदचंद्र पवार पक्षात प्रवेश केला. यावेळी प्रभारी शहराध्यक्ष अंकुश काकडे तसेच ज्येष्ठ नेते प्रकाश(आप्पा )म्हस्के हेही उपस्थित होते.

‘मतदारसंघाच्या विकासासाठी आपण घेतलेल्या प्रवेशाच्या निर्णयाचे मनापासून स्वागत आहे. आपल्या प्रवेशाने नक्कीच मतदारसंघात राष्ट्रवादी काँग्रेस पार्टी शरदचंद्र पवार पक्षाला तसेच एकूणच महाविकास आघाडीला बळकटी येईल. तसेच, आगामी विजयाच्या या प्रवासात आपले योगदान मोलाचे ठरेल’, असे उदगार बापूसाहेब पठारे यांनी काढले.

‘एकमताने एकजुटीने विकासाचे ध्येय पूर्ण करूयात’, असे उदगार रेखा टिंगरे यांनी काढले.

माजी नगरसेविका सुनीता साळुंखे,त्यांचे पती अनिल साळुंखे, येरवडा येथील माजी नगरसेवक हनीफ शेख, फरझना शेख, आयुब शेख यांनीही यापूर्वीच पाठिंबा दिलेला आहे.

येरवडा येथील माजी नगरसेवक हनीफ शेख, फरझाना शेख, आयुब शेख यांनी​ही पाठींबा ​दिल्याने दिवसेंदिवस बापूसाहेब पठारे यांची बाजू मजबूत होत चालली आहे.

‘आमदार असतानाच्या काळात बापूसाहेब पठारे यांनी आमच्या परिसरातील विकासकामे केली होती.सर्व प्रश्न सोडविण्यासाठी मनापासून लक्ष घातले होते.एक चांगले लोकप्रतिनिधी म्हणून त्यांच्यावर विश्वास असल्यानेच आम्ही पाठिंबा देत आहोत’,असे पाठिंबा देणारे आवर्जून सांगत आहेत.या पाठिंब्याबरोबरच इतर राजकीय पक्षांचे पदाधिकारीही बापूसाहेब पठारे यांच्या नेतृत्वाला समर्थन देण्यासाठी इच्छुक आहेत. विविध पक्षांतील प्रमुख कार्यकर्ते, समाजसेवक, आणि स्थानिक प्रतिनिधी हे बापूसाहेब पठारे यांच्या उमेदवारीला पाठीशी उभे राहण्यास तयार आहेत. यामुळे महाविकास आघाडीची स्थिती अधिक बळकट होणार असून आगामी निवडणुकीत विजय निश्चित करण्यासाठी एकात्मतेने काम केले जाईल, असे पाठिंबा देणारे आवर्जून सांगत आहेत.

बापूसाहेब पठारे यांनी या सर्व पाठिंब्याबद्दल आभार मानले असून सांगितले की, “विकासकामांच्या खात्री मुळे मला मतदार संघात पाठिंबा वाढत आहे.वाढत्या पाठिंब्यामुळे विजय निश्चित आहे, आणि मी माझ्या कार्यक्षेत्राच्या प्रगतीसाठी अथक कार्य करेन.”

महाविकास आघाडीचे कार्यकर्ते आणि स्थानिक नागरिक या समर्थनामुळे अधिक सक्रिय झाले असून, विधानसभा निवडणुकीत बापूसाहेब पठारे यांना विजय मिळवून देण्यासाठी सर्वतोपरी प्रयत्न करणार आहेत.
………………………………………………

पुणे . पर्वती विधानसभा मतदारसंघाच्या विकासाचा अनुशेष भरून काढण्यासाठी इंजिनिअर,वास्तुविशारद,पर्यावरणतज्ज्ञ,डॉक्टर्स,वकील,शिक्षणतज्ञ,टाउनप्लँनेर,नगरनियोजक,समाजसेवक, उद्योजक आदींसह विविध तज्ज्ञांचा समावेश असलेल्या ‘पर्वती फर्स्ट’च्या माध्यमातून विकासाची ब्लू प्रिंट तयार आहे. विशेष म्हणजे महिलांच्या सुरक्षिततेसह आर्थिक स्वावलंबन, सुविधांनाही अग्रक्रमाने प्राधान्य असणार आहे. पहिल्या वर्षांपासून ती अंमलात येणार आहे.त्यामुळे संपूर्ण मतदारसंघाचा कायापालट होणार आहे. त्यासाठी हिरा निशाणीसमोरील बटन दाबून ‘पर्वती’च्या रखडलेल्या विकासाला गती द्यायची आहे. असे आवाहन अपक्ष उमेदवार आबा बागुल यांनी केले आहे.
आबा बागुल यांच्या प्रचारार्थ कोपरा सभा, मतदारांच्या गाठीभेटीतून पर्वती मतदार संघाच्या विकासासाठी मांडल्या जाणाऱ्या आश्वासक व्हिजनला मतदारांचा उत्स्फूर्त प्रतिसाद मिळत आहे.
या व्हिजनबाबत माहिती देताना आबा बागुल म्हणाले की, पर्वती मतदारसंघाच्या सुनियोजित विकासाला चालना देण्यासाठी ‘पर्वती फर्स्ट’च्या माध्यमातून एक रोडमॅप तयार आहे. त्यानुसार पुणे महापालिका व राज्यसरकारच्या जागा उपलब्ध करून घेतल्या जाईल. या जागांवर लोकोपयोगी प्रकल्पांची उभारणी होणार आहे. त्यासाठी निधी उभारणीबाबतही नियोजन झालेले आहे. शाळा, रुग्णालये, युथ सेंटर आदी विविध प्रकल्पातून नागरिकांना दिलासा मिळणार आहे.

आज मुबलक पिण्याचे पाणी पुरवता येत नाही,हे दुर्दैव आहे. त्यामुळे मतदारसंघात सर्वत्र समान आणि मुबलक पाणीपुरवठ्यासाठी ‘ऑनलाईन वॉटर डिस्ट्रीब्यूशन सिस्टीम’ सारखी योजना निश्चितच दिलासादायक ठरणार आहे. वाहतूक कोंडी, वाढत्या प्रदूषणामुळे आज नागरिकांचा श्वास गुदमरत आहे. त्यातून मुक्तता करण्यासाठीही ठोस उपाययोजना आखण्यात आल्या आहेत. वाढत्या गुन्हेगारीला आळा घालण्यासाठी तसेच महिलांच्या सुरक्षिततेसाठी ‘एआय ‘तंत्रज्ञानावरील सीसीटीव्ही सर्व्हेलन्स यंत्रणा बसवली जाणार आहे. कोणत्याही शहराचा विकास हा त्या शहराच्या प्रवेशद्वारातून समजतो. आपल्या ‘पर्वती’ला ४ प्रवेशद्वार आहेत.ते आकर्षक व विविध रंगात साकारणार आहोत. त्यामुळे पर्वती मतदार संघाची प्रतिमा निश्चित उंचविणार आहे. आपले आणि भावी पिढीचे जीवनमान उंचावण्यासाठी आता हीच वेळ आहे, बदल घडवायची. त्यामुळे कुणावरही विसंबून न राहता,एकत्र येऊ आणि आपले प्रश्न आपणच सोडवू यासाठी हिरा निशाणी समोरील बटन दाबून पर्वती मतदार संघाच्या सर्वसमावेशक विकासाला चालना द्यायलाच हवी असेही आबा बागुल म्हणाले.

सिद्धार्थ शिरोळे यांच्या दुचाकी रॅलीला उत्स्फूर्त प्रतिसाद

पुणे, दि. १४ नोव्हेंबर, २०२४ : महाराष्ट्रात होत असणाऱ्या विधानसभा निवडणुकीकडे साऱ्या देशाचे लक्ष लागलेले आहे. सध्या राज्यात सत्तेमध्ये असणाऱ्या सरकारने जनहिताची कामे केली आहेत, त्यामुळे पुन्हा एकदा महायुतीचेच सरकार राज्यामध्ये सत्तेत येणार असल्याचा विश्वास केंद्रीय सामाजिक न्याय राज्यमंत्री रामदास आठवले यांनी व्यक्त केला. छत्रपती शिवाजीनगर विधानसभा मतदार संघातील महायुतीचे उमेदवार सिद्धार्थ शिरोळे यांच्या प्रचारासाठी खडकी परिसरात आयोजित करण्यात आलेल्या दुचाकी रॅलीला ते प्रमुख पाहुणे म्हणून उपस्थित होते.

यावेळी उमेदवार सिद्धार्थ शिरोळे, रिपब्लिकन पार्टी ऑफ इंडिया (आठवले) गटाचे परशुराम वाडेकर, माजी नगरसेविका सुनीता वाडेकर, माजी नगरसेवक आनंद छाजेड,  महायुतीमधील घटक पक्षांचे पदाधिकारी, कार्यकर्ते मोठ्या संख्येने उपस्थित होते. खडकी बाजार परिसरात असणाऱ्या छत्रपती शिवाजी महाराजांच्या पुतळ्याला पुष्पहार अर्पण करून या रॅलीला सुरवात झाली. खडकी परिसरात या रॅलीचे जोरदार स्वागत करण्यात आले. यामध्ये तरुणवर्ग मोठ्या संख्येने सहभागी झाले होते.

सध्या सत्तेमध्ये असणारे महायुतीच्या सरकारने जनहिताची कामे केली आहेत, त्यामुळे जनता त्यांच्या प्रेमात आहेत. महाविकास आघाडीवर राज्यातील जनतेचा विश्वास नाही, त्यामुळे निवडणुकीनंतर राज्यामध्ये पुन्हा महायुतीचेच सरकार सत्तेमध्ये येणार असल्याचे आठवले यावेळी म्हणाले.

केंद्रात सत्तेमध्ये असणारे सरकार नरेंद्र मोदी यांच्या नेतृत्वाखाली चांगले काम करत आहे. त्यामुळे राज्यामध्ये महायुतीला मोठा विजय मिळेल. देशामध्ये महाराष्ट्र राज्याचा लौकिक मोठा आहे, त्यामुळे या निवडणुकीकडे संपूर्ण देशाचे लक्ष आहे. सिद्धार्थ शिरोळे यांनी आमदार म्हणून केलेल्या कामाचे आठवले यांनी यावेळी कौतुक केले.

२०१९ मध्ये झालेल्या विधानसभा निवडणुकीच्या दरम्यान आपण माझ्या प्रचारासाठी इथे आला होतात, तेव्हा मी आमदार म्हणून निवडून आलो होतो. यंदा देखील तुम्ही आलात त्यामुळे माझा विजय निश्चित असल्याचे सांगताना रामदासजी तुम्ही माझ्यासाठी लकी असल्याचे उद्गार सिद्धार्थ शिरोळे यांनी यावेळी काढले.

खडकी छावणी भागातील डॉ. बाबासाहेब आंबेडकर यांच्या पुतळ्याला रामदास आठवले यांनी पुष्पहार अर्पण केला. यावेळी त्यांनी केलेल्या छोटेखानी भाषणात “पुण्यातील शिवाजीनगरचे नागरिक आहेत भोळे, इथे निवडून येणार आहेत सिद्धार्थ शिरोळे’ अशी चारोळी देखील सादर केली.

सिद्धार्थ भाऊ आहे,  मित्र आहे, सर्वसामान्याचा कार्यकर्ता आहे, त्यामुळे तो आपला आहे, अशी भावना महायुतीच्या कार्यकर्त्यांनी यावेळी व्यक्त केली.

सिद्धार्थ शिरोळे यांना जाहीर पाठिंबा

पुणे, दि. १४ नोव्हेंबर, २०२४ :“माझे वडिल स्व. विनायक (आबा) निम्हण हे छत्रपती शिवाजीनगर  मतदारसंघाचे कार्यसम्राट आमदार म्हणून लोकप्रिय होते. त्यांच्या कार्यकाळातच या मतदारसंघात नियोजनबद्ध आणि तत्पर विकासाचे एक पर्व सुरु झाले. अभ्यासपूर्ण मांडणी, लोकसहभागाला प्राधान्य आणि शासन दरबारी सातत्याने पाठपुरावा या बळावर त्यांनी एक प्रगत मतदारसंघ आकाराला आणला. आबांचा हा जनसेवेचा वारसाच सिद्धार्थ शिरोळे पुढे चालवीत आहेत म्हणून, त्यांना पाठिंबा देत आहे,” अशी भूमिका सनी निम्हण यांनी जाहीर केली. निम्हण यांच्या पाठिंब्यामुळे शिवाजीनगर मतदारसंघात शिरोळे यांची ताकद वाढली आहे.

महायुतीच्या कार्यकाळात हा मतदारसंघ भाजपकडे गेला. काळाबरोबर वाढत्या लोकसंख्येचा विचार करून सुयोग्य विकासाचे आव्हान उभे राहिले. परंतु गेल्या पाच वर्षांत युवा आणि अभ्यासू आमदार सिद्धार्थ शिरोळे यांनी आबांचा जनसेवेचा वारसा हाती धरत मतदारसंघाचा वेगाने विकास घडवला आहे. केंद्र, राज्य आणि महानगरपालिका अशा तीन सत्ता केंद्राचा उत्तम रितीने वापर करत त्यांनी विकासाचा नवा अध्याय साकारला आहे, अशा शब्दांत निम्हण यांनी शिरोळेंचे कौतुक केले.

आज विद्यापीठ चौकात सुरु असलेला डबल डेकर पूल, मेट्रो प्रकल्प, स्मार्टसिटी प्रकल्पातून झालेली रस्त्यांची कामे, मुबलक पाणीपुरवठा अशा योजनांतून शिरोळे केवळ शिवाजीनगरच नव्हे तर अग्रेसर शहर घडविण्यात महत्त्वाचे योगदान देत आहेत. येत्या काळात काही नवे, कल्पक प्रकल्पही ते तडीस नेणार आहेत. त्यांच्या या कार्याला पाठिंबा देत पुढील वाटचालीसाठी निम्हण यांनी मनापासून शुभेच्छाही दिल्या.

महाराष्ट्राचे उपमुख्यमंत्री देवेंद्र फडणवीस यांचे दूरदर्शी नेतृत्व आणि मार्गदर्शनाखाली सिद्धार्थ शिरोळे हे काम करत आहेत. त्यांची मांडणी, नियोजन आणि कार्यपद्धती यातून आबांच्या जनसेवेच्या वारशाचे प्रतिबिंब डोकावते. सक्षम, सुरक्षित आणि सशक्त महाराष्ट्रासाठी शिरोळे यांना येथील जनता बहुमताने पुन्हा विधानसभेत पाठवेल, याची मला खात्री आहे, असेही निम्हण म्हणाले.

शिरोळे यांच्या हस्ते चॅम्पियन्स फॉर एक्सलन्स पुरस्कारांचे वितरण

पुणे, दि. १४ नोव्हेंबर, २०२४ : पुणे शहरात क्रीडासंस्कृती टिकून ठेवण्यात अनेकांचा मोलाचा वाटा आहे. समाजात सुसंवाद राखायचा असेल तर क्रीडासंस्कृती वाढीस लागायला हवी असे प्रतिपादन आमदार सिद्धार्थ शिरोळे यांनी केले. पीवायसी हिंदू जिमखाना येथे स्पोर्ट्स व फिटनेस क्षेत्रात उल्लेखनीय कामगिरी केलेल्या व्यक्तींना शिरोळे यांच्या हस्ते नुकतेच चॅम्पियन्स फॉर एक्सलन्स पुरस्कार देत सन्मानित करण्यात आले, त्यावेळी ते बोलत होते.

शिवछत्रपती लाईफटाईम अचिव्हमेंट पुरस्कार विजेते, ज्येष्ठ बॉडी बिल्डर डॉ अरुण दाते, विविध क्षेत्रातील खेळाडूंसाठी मानसिक सल्लागार (मेंटल कोच) म्हणून कार्यरत असलेले स्वरूप सवनुर, प्रसिद्ध क्रीडा फिजिओथेरपिस्ट डॉ आनंद गंगवाल, भारतीय फुटबॉल टीमचे माजी व्यवस्थापक मंदार ताम्हाणे, खेळाडू आशिष कसोदेकर, सायकलिस्ट डॉ अविनाश फडणीस, पीडीएमबीएचे सचिव रणजीत नातू, ऑलिम्पिकमध्ये सहभागी झालेले बॉक्सर व प्रशिक्षक मनोज पिंगळे, चॅम्पियन्स स्पोर्ट्सचे अमित मदान, आयोजक आनंद पांड्या आदी मान्यवर यावेळी उपस्थित होते.

आजही धकाधकीच्या जीवनात खेळासाठी वेळ देण्याचा प्रयत्न मी करतो असतो, असे सांगत सिद्धार्थ शिरोळे म्हणाले, “क्रीडा क्षेत्राशी संबंधित व्यक्ती, खेळाडू यांसोबत वेळ घालवला की एक वेगळीच उर्जा मिळते, म्हणून खेळाविषयी आपुलकी असणाऱ्यांच्या संपर्कात राहायला हवे. समाजातील एकोपा आणि सुसंवाद यामुळे टिकून राहील.” आज पुणे शहरात सर्वच खेळांमध्ये मोठ्या प्रमाणात कार्यरत असलेले आणि काम केलेलं, खेळाडू व प्रशिक्षक आहेत ही शहराची संपत्ती असल्याचे शिरोळे यांनी नमूद केले.

या आधी व्यासपीठावर उपस्थितांनी शहरातील खेळाच्या संस्कृतीबद्दल आणि सद्य परिस्थितीबद्दल आपली मते मांडली. शहरात स्पोर्ट्स कम्युनिटी वाढत असली तरी खेळाची संस्कृती रुजायला आणखी थोडा वेळ जावा लागेल असे आशिष कसोदेकर म्हणाले. आज मॅरेथॉनमध्ये धावणारे १० हजार खेळाडू असले तरी त्यांना प्रोत्साहन देणारे मोजकेच दिसतात असे निरीक्षणही त्यांनी नोंदविले.

कोणत्याही क्रीडाप्रकारात यश मिळवायचे असेल तर मानसिक आरोग्य महत्त्वाचे असून याची जाणीव आता पालक आणि पाल्य दोहोंमध्ये वाढत आहे, असे स्वरूप सवनुर यांनी सांगितले. खेळाची संस्कृती वाढीस लागायची असेल तर खेळाडूंना पायाभूत सोयीसुविधा, प्राथमिक प्रशिक्षण आणि स्पर्धात्मक वातावरण उपलब्ध करून देण्याची गरज मंदार ताम्हाणे यांनी अधोरेखित केली.

मागील २० वर्षांचा विचार केल्यास आज खेळाडूंना पालकांकडून मिळत असलेला पाठींबा हा महत्त्वाचा ठरत असून मागील पाच वर्षात खेळांवर लक्ष केंद्रित करणाऱ्या शाळा, विद्यापीठे यांमध्ये होत असलेली वाढ हा सकारात्मक बदल आहे असे अमित मदान यांनी नमूद केले. आज खेळाचा विचार केल्यास पुणे देशातील पहिल्या पाच शहरांमध्ये असून नजीकच्या पाच वर्षांमध्ये पहिल्या तीन शहरांमध्ये पुणे स्थान पटकावेल असा विश्वासही त्यांनी व्यक्त केला.

खेळामध्ये प्रशिक्षक व फिजिओथेरपिस्टचे महत्त्व डॉ गंगवाल यांनी अधोरेखित केले. रणजीत नातू यांनी बॅडमिंटन खेळाचा प्रवास सांगत काही खेळाडूंच्या कामगिरीने कशा पद्धतीने खेळाला फायदा होऊ शकतो याची उदाहरणे दिली. डॉ फडणीस यांनी खेळातील सातत्य आणि आनंद घेण्याची प्रक्रिया आयुष्यात महत्त्वाची असते असे सांगितले. बॉक्सिंग क्षेत्राकडे अधिक लक्ष देण्याची गरज असल्याचे सांगत बॉक्सिंग संघटनांचा अनुभव पिंगळे यांनी विशद केला. कार्यक्रमाचे सूत्रसंचालन चैतन्य राठी यांनी केले व आभार मानले.